Mga Magtutudlo nga Nagtudlo Sumala sa Pamaagi sa Manluluwas
Pagtudlo Sumala sa Pamaagi sa Manluluwas uban ni Elder Uchtdorf
Dominggo, Hunyo 12, 2022
Chad Strang: Isip amahan, nagtuo ko nga usa sa akong labing importanteng responsibilidad mao ang pagtudlo sa akong tin-edyer nga mga anak nga makaila sa mga kamatuoran ug doktrina nga makit-an diha sa kasulatan nga personal nga mokonektar kanila sa ilang kinabuhi ug sirkumstansiya. Ug kana importante gyod nga leksiyon sa pagkat-on nako—nga makaila sa Espiritu ug mokonektar kanila aron mahibalo sa ilang panginahanglan apan, mas importante, tabangan sila nga makadiskobre og gugma sa kasulatan ug makasabot nga ang doktrina may kalabotan sa ilang kinabuhi.
Roberta Luz Pavanelo [Subtitles]: Ako usa ka magtutudlo sa seminary gikan sa Brazil. Dihang nagsugod kog tudlo sa seminary, gusto gyod kong mahimong maayo nga magtutudlo, ug gusto gyod ko nga akong mga estudyante makakat-on sa tanan nga akong gitudlo. Maong naghunahuna ko og lainlaing paagi sa pagtudlo: mga panudlo, mga video, mga dula. Ug usa ka higayon dunay estudyante nga mihatag sa pangbukas nga pag-ampo, ug siya nangayo nga iyang mabati ang Espiritu atol sa klase. Ug nasayod ko nga dayag kaayo kini, di ba? Pirme ni natong madungog, apan nianang higayona kana nga pag-ampo miusab sa akong kasingkasing, ug ako naghunahuna, “Mao kana ang gikinahanglan sa mga estudyante. Ania sila dinhi aron mobati sa Espiritu.”
Tyler Harris: Usa ko ka magtutudlo sa Primary. Duna koy dako nga klase. Kami dunay pipila nga dunay espesyal nga mga panginahanglan, ug, swerte lang, duna mi nindot kaayo nga pagbansay gikan sa among presidente sa Primary, ug gitudloan niya kami kon sa unsang paagi ang matag bata dili makat-on sa samang paagi ug nga ubang tawo makat-on gyod pinaagi sa paghikap ug kinahanglang dunay gunitan o buhaton. Ubang tawo kinahanglang makat-on gyod sa biswal nga paagi ug sa samang mga butang. Maong kami isip ang tulo ka lalaki sa klase nag-ampo gyod bahin niini ug naghunahuna kon unsaon namo ang mga bata nga walay interes nga makat-on gyod mahitungod sa Manluluwas ug sa mga butang nga makatabang nila nga malakip ug maapil diha sa lawak klasehanan. Ug kami dunay talagsaon gyod nga kasinatian niini nga mga bata nga makabaton og nindot nga mga leksiyon.
Kaion Constantino [Subtitles]: Taga-Brazil ko, ug usa ko ka magtutudlo sa institute. Usa ka adlaw atol sa klase sa institute panahon sa pandemya kinahanglan namong ipahigayon among klase sa online. Ug gidapit nako ang tanan, apan, bisan pa niana, usa lang ka estudyante ang mitunga. Ug ang estudyante dunay daghang pangutana tungod bag-o siya nga miyembro. Ug nianang adlawa, naminaw sa paghunghong sa Espiritu, ako nakatabang ug nakaresolbar sa daghan sa iyang pangutana. Malipayon kaayo ko tungod kay karon nangandam na siya nga moserbisyo og misyon.
Sina Khoza: Bag-ohay lang ko gihatagan og tahas nga mamulong bahin sa lisod kaayong panahon sa akong kinabuhi, usa ka panahon sa kasubo. Ug giunsa nako pagbuhat kini nga tahas nga mamulong mao ang pagtutok sa ehemplo sa Manluluwas. Namalandong ko sa daghang higayon sa kasubo nga giagian sa Manluluwas ug giunsa Niya kini pagsagubang. Nakaamgo ko nga, pinaagi sa pagtutok Kaniya ug giunsa Niya pagsagubang kining personal nga mga sirkumstansiya, ang tanan nga akong giagian para gyod sa akong kaayohan. Ug nakaamgo ko nga kining tanan kabahin sa mahigugmaong Amahan sa langit, nga hingpit nga nahigugma nato, dili igsapayan sa unsay atong maagian.
Lori Newbold: Sa akong pagtudlo, mangayo kog dugang nga mga ehemplo. Nakakita kog mga koneksiyon kon maghisgot mi bahin sa doktrina, ug dayon hangyoon nako ang young women nga tinguhaon ang mga koneksiyon. Ug usa ka ehemplo mao ang usa ka batan-ong babaye nga akong gipangutana, pananglit, “Asa nimo makita ang Manluluwas diha sa sakramento?” Ug bag-o lang mi naghisgot bahin sa sakramento, ug nakaamgo dayon siya sa dihang naghisgot siya bahin sa—kon kita motan-aw sa lamesa sa sakramento, kita nagtan-aw sa Iyang lawas! Ug nakabaton gyod siya niini nga kasinatian bisan og 17 anyos lang siya, wala gyod niya nakonektar ang Manluluwas niana. Ug tungod lang niana, alang nako nga nangandam niana nga paagi, nagsugod ko nga mas makakita Kaniya, ug natural lang kining miabot kanako.
Pandu Prasetyo: Niadtong naa ko sa misyon, nakat-onan nako unsaon nga mahimong andam pirmi nga maminaw sa espirituwal nga mga pag-aghat sa Espiritu. Samtang naningkamot ko nga maminaw sa tingog sa Espiritu, kini nakatabang nako nga makasabot sa akong mga investigator ug nakatabang nako sa pagtudlo nila sumala sa Espiritu.
Tania M Diaz De Recio [Subtitles]:
Isip tigpangalagad nga sister, samtang mag-ampo ko sa matag usa sa gi-assign nako nga mga sister nga akong pangalagaran, akong mabati ang mas dakong gugma alang kanila. Mabati usab nako ang gugma nga aduna ang Manluluwas.
Alex Munoz [Subtitles]: Naningkamot kami pirmi nga motutok kang Jesukristo, ug akong nabantayan nga kon mohimo kami og paningkamot nga itutok ang klase kang Jesukristo, sa Iyang mga simbolo nga atong makita diha sa kasulatan nga nagrepresentar Kaniya, kini mohimo sa mga estudyante nga mangita og tuyo kang Jesukristo diha sa kasulatan ug sa unsang paagi kini nakaapekto sa ilang kinabuhi.
Nuria Munoz: Kami dunay duha ka mas magulang nga mga anak nga babaye nga nag-apil gyod sa among pagtuon sa Dali, Sunod Kanako, apan ang among ikatulo nga anak nga babaye maulawon ug dili kaayo mopaambit. Nakita nako atol sa semana nga nagdrowing siya sa unsay among gihisgotan, ug nahunahunaan nako nga nindot kaayo kini nga paagi nga tabangan siya nga mobati nga siya makatampo. Maong gidapit nako siya sa pagpaambit niadto nga mga drowing kanamo, ug matag semana aduna siyay bag-ong mga drowing sa tanang butang nga among gihisgotan. Ug misugod dayon siya sa pagpaambit sa iyang pagpamatuod uban niadtong mga drowing ug sa pagsulat niini. Ug kadto usa ka nindot nga paagi sa pagtabang nga mobati siya nga bililhon ug nga siya makatampo sa mga butang nga among gihisgotan ug nakatabang gyod namong tanan sa pagpalambo sa among pagpamatuod.
Paola Segastume de Orellana [Subtitles]: Ang Manluluwas mitudlo nato sa paghigugma sa atong tanang estudyante. Maong interesado gyod kaayo ko sa ilang mga interes, sa ilang mga kalihokan gawas sa Simbahan. Interesado usab kaayo ko sa ilang adlawng natawhan, sa pagkat-on gyod sa ilang ngalan, aron matawag sila isip ang espesyal nga katawhan nga sila mao gyod. Isip ang espesyal nga mga anak sa Langitnong Amahan, nagpakabana ko kanila. Kon usa kanila dili motambong sa klase, personal akong mangita kanila, ug kanunay akong nahibalo sa matag usa kanila.
Woodly LaFord: Isip bishop, naningkamot kog maayo para sa kabatan-onan, ug nagtuo ko nga ang labing maayong paagi sa pagtabang nila mao ang pagtutok kang Jesukristo. Ug gibuhat nako kana pinaagi sa paggamit sa personal nga kalamboan nga programa nga gidesinyo alang sa tanang kabatan-onan. Duna koy usa ka batan-ong lalaki nga wala nagtambong sa seminary, ug nahunahunaan nako nga ang pagtabang niya nga makasabot sa panginahanglan nga mahimong sama ni Jesus makatabang gyod niya. Maong miorganisar kami og kalihokan bahin sa personal nga kalamboan. Ug human niana nga kalihokan, makanunayon na siyang motambong sa seminary. Maong nasabtan nako nga kon gusto natong molambo ang kabatan-onan sa espirituwal ug temporal, matabangan nato sila nga motutok nga mahimong sama ni Jesus.
Edwin Ramirez Guzman [Subtitles]: Kumusta. Magtutudlo ko sa Primary. Nagtudlo ko sa mga bata. Taga-Guatemala ko. Silang tanan managlahi, ug usahay pipila kanila lihok kaayo.
Ug nabati nako kon sa unsang paagi si Jesukristo gusto nga tudloan ang matag usa sa paagi nga espesyal kanila. Ug nakahinumdom ko og higayon dihang usa sa mga bata dili gayod mahimutang. Siya usa ka batang lalaki nga daghan kaayo og enerhiya, ug nadapit nako siya nga mahimong kaabag diha sa klase. Maong gipahimuslan nako kana nga enerhiya aron makatudlo sa ubang bata. Ug nianang paagi ako nasayod nga si Jesukristo anaa sa matag usa nato; Siya nagtudlo nato sa piho kaayong mga paagi aron kita makat-on. Ako nagpamatuod nga si Jesukristo ug atong Langitnong Amahan nahigugma sa matag usa kanato. Ug mabati nato kana kon kita mopaambit sa Iyang ebanghelyo.