Aoao Atu i le Ala a le Faaola

Aoao Atu i le Ala a le Faaola faatasi ma Elder Uchtdorf

Video Panel

Aso Sa, 12 Iuni, 2022

Chad Strang: I le avea ai ma se tamā, ou te manatu o se tasi o tiutetauave aupito taua ua ia te au o le aoao lea o la’u fanau talavou ia iloa upumoni ma aoaoga faavae e mafai ona maua i tusitusiga paia e fesootai patino ia i latou i o latou olaga ma o latou tulaga. Ma o se lesona taua tele lena e aoao ai mo a’u—ia nofouta i le Agaga ma ia fesootai atu ia i latou ina ia nofouta i o latou manaoga ae, o le mea sili ona taua, fesoasoani ia i latou ia fiafia i tusitusiga paia ma malamalama e mafai ona faatatau aoaoga faavae i o latou olaga.

Roberta Luz Pavanelo [Subtitles]: O a’u o se faiaoga seminare mai Pasila. Ina ua amata ona ou faiaoga i le seminare, sa ou matuai manao lava e avea ma se faiaoga lelei, ma sa ou matuai manao lava i a’u tamaiti aoga ia aoao i mea uma sa ou aoaoina atu. O lea sa ou mafaufau ai i auala eseese e aoao atu ai: lauga, ni vitio, taaalo i taaloga. Ma i se tasi taimi sa faia ai e se tamaitiiti aoga se tatalo amata, ma sa ia talosaga ina ia ona lagonaina le Agaga i le taimi o le vasega. Ma ou te iloa e matuai manino lava lenei mea, a ea? Tatou te faalogo i lenei mea i taimi uma, ae na suia i lena taimi e lena tatalo lo’u loto, ma sa ou mafaufau, “O le mea lena e manaomia e tamaiti aoga. Ua latou i ai iinei ina ia lagonaina le Agaga.”

Tyler Harris: O a’u o se faiaoga Peraimeri. E toatele la’u vasega. O loo i ai nisi o i ai manaoga faapitoa, ma, o le mea e laki ai, sa faia ni a matou aoaoga e lo matou peresitene Peraimeri, ma sa ia aoaoina i matou e faapea e le o tamaiti uma e tutusa le auala e aoao ai ma o nisi tagata e matuai sogasoga lava ma e manaomia le uuina o se mea po o le faia o se mea. O nisi tagata e manaomia moni lava ona aoao i vaaiga ma mea faapena. I le avea ai la o i matou ma uso e toatolu i le vasega e taumafai moni lava e tatalo e uiga i ai ma mafaufau pe faapefea ona tatou o ese mai le tulaga o le leai o se gauai mai o a tatou fanau i se mea e mafai ona latou aoao moni ai e uiga i le Faaola ma aoao ai e uiga i mea o le a fesoasoani ia i latou ia faaaofia ma auai i le potuaoga. Ma sa ma maua se aafiaga maoae ma nei tamaiti ina ia mafai ona maua ni lesona aoga.

Kaion Constantino [Subtitles]: Ou te sau mai Pasila, ma o a’u o se faiaoga inisitituti. I se tasi aso i se vasega inisitituti i le taimi o le faama’i oti sa tatau ai ona fai a matou vasega i luga o le initoneti. Ma sa ou valaauliaina tagata uma, ae, e ui i lea, sa na o le toatasi le tamaitiiti aoga na auai mai. Ma sa tele ni fesili a le tamaitiiti aoga ona o ia o se tagata fou. Ma i lena aso, a o faalogologo atu i musumusuga a le Agaga, sa mafai ona ou fesoasoani ma foia le tele o ana fesili. Ua ou fiafia lava aua o le asō o loo ia sauni e auauna atu i se misiona.

Sina Khoza: Sa tuuina mai ia te au talu ai nei se tofiga e lauga ai e uiga i se vaitaimi sili ona pogisa i lo’u olaga, o se vaitaimi o le faavauvau. Ma o le ala na ou taulimaina ai lenei tofiga e lauga atu o le taulai atu i le faataitaiga a le Faaola. Sa ou toe tomanatu i le tele o vaitau o le faanoanoa lea na oo i ai le Faaola ma le ala na Ia taulimaina ai i latou. Sa ou iloaina, o le taulai atu ia te Ia ma le auala na Ia taulimaina ai nei tulaga patino, o mea uma sa ou oo i ai sa mo lo’u lelei moni lava. Ma sa ou iloaina o se vaega uma lava o se Tama oi le lagi alofa, o le e alofa ia i tatou ma faia ma le atoatoa, e tusa lava po o le a le mea tatou te oo i ai.

Lori Newbold: I la’u aoaoga, sa iu ina ou talosaga atu mo nisi faataitaiga. Sa ou vaaia ni fesootaiga pe a matou talanoa e uiga i se aoaoga faavae, ona ou fai atu lea i tamaitai talavou e saili ni fesootaiga. Ma o se tasi o faataitaiga o se tamaitai talavou lea faatoa ou fesili i ai, mo se faataitaiga, “O fea e te vaai ai i le Faaola i le faamanatuga?” Ma faatoa uma lava ona ma talanoa e uiga i le faamanatuga, ma sa ia—faatoa iloaina ina ua ia talanoa e uiga i ai—pe a tatou vaavaai atu i le laulau o le faamanatuga, o loo tatou vaavaai atu i Lona tino! Ma sa ia mauaina lea taimi e ui ina sa 17 ona tausaga, ae na te lei faafesootaia lava le Faaola iina. Ma ona o lena mea, mo au lava ia i le sauniuni ai faapena, sa amata ona ou vaai atili atu ia te Ia, ma sa pei e tafe masani mai fafo ia te a’u.

Pandu Prasetyo: I le taimi a o ou i ai i le misiona, sa ou aoao ai i le auala e saunia ai i taimi uma e faalogo i uunaiga faaleagaga a le Agaga. A o ou taumafai e faalogo i le siufofoga o le Agaga, sa fesoasoani ou te malamalama ai i au tagata sailiili ma fesoasoani e aoao i latou e tusa ai ma le Agaga.

Tania M Diaz De Recio [Subtitles]:

I le avea ai ma se uso o auaunaga, a o ou tatalo mo o’u uso taitoatasi ua tofia i ai au e tatau ona auauna atu i ai, e mafai ona ou lagonaina se alofa sili atu mo i latou. Ma e mafai foi ona ou lagonaina le alofa o loo i ai i le Faaola.

Alex Munoz [Subtitles]: O loo tatou taumafai pea e taulai atu ia Iesu Keriso, ma ua ou matauina pe a tatou taumafai e faataulai atu le vasega ia Iesu Keriso, i Ana faatusa, i—ma o ataata o loo tatou vaaia i tusitusiga paia o loo suitulaga ia te Ia, e mafai ai e tamaiti aoga ona vaavaai ma le loto i ai mo Iesu Keriso i tusitusiga paia ma le ala e faaafia ai e lenei mea o latou olaga.

Nuria Munoz: E toalua o ma afafine matutua e auai tele i la matou suesuega o le Sau, Mulimuli Mai ia te A’u, ae o le ma afafine lona tolu sa pei e matamuli ma sa le faasoa tele mai. Sa ou vaaia i le aluga o le vaiaso o loo ia tusia ni ata o mea sa matou talanoaina, ma sa ou manatu o se auala matagofie lea e fesoasoani na te lagona ai e mafai ona ia saofaga atu. O lea sa ou valaauliaina o ia e faasoa mai ia i matou na ata, ma o vaiaso uma lava e i ai ni ana ata fou o mea uma sa matou talanoaina. Ona amata lea ona ia faasoa maia lana molimau faatasi ma na ata ma tusiaina i lalo. Ma o se auala matagofie e fesoasoani ai ia te ia ia lagona e faatauaina o ia ma e mafai ona ia saofaga i mea sa matou talanoaina ma fesoasoani moni ia i matou uma e atiae a matou molimau.

Paola Segastume de Orellana [Subtitles]: Na aoao i tatou e le Faaola ia alolofa i a tatou tamaiti aoga uma. O lea ou te matuai fiafia ai lava i a latou gaoioiga faapitoa, i a latou gaoioiga i fafo atu o le Ekalesia. Ou te fiafia foi e fia iloa o latou aso fanau, ia aoao lelei o latou igoa, ia mafai ona talanoa atu ia i latou o ni tagata faapitoa o loo latou i ai. I le avea ai ma fanau faapitoa a le Tama Faalelagi, ou te popole mo i latou. Afai e le sau se tasi o i latou i le vasega, ou te saili patino mo i latou, ma ou te iloa i taimi uma i latou taitoatasi.

Woodly LaFord: I le avea ai ma se epikopo, ou te galue tele ma le autalavou, ma ou te talitonu o le auala sili e fesoasoani ai ia i latou o le taulai atu lea ia Iesu Keriso. Ma ou te faia lena mea e ala i le faaaogaina o le polokalama o le atinaega patino lea ua mamanuina mo le autalavou uma. E i ai sau alii talavou e toatasi sa le auai i le seminare, ma sa ou manatu o le fesoasoani ia te ia ia malamalama i le manaomia ona avea e faapei o Iesu o le a fesoasoani moni lava ia te ia. O lea na matou faatulagaina ai se gaoioiga i le [polokalama o le] atinaega patino. Ma i le mavae ai o lena gaoioiga, ua ia auai soo i le seminare. O lea ou te malamalama ai afai tatou te mananao ia tuputupu ae faaleagaga ma faaletino le autalavou, e mafai ona tatou fesoasoani ia i latou e taulai atu i le avea e faapei o Iesu.

Edwin Ramirez Guzman [Subtitles]: Talofa. O au o se faiaoga Peraimeri. Ou te aoaoina tamaiti. Ou te sau mai Kuatemala. E eseese uma i latou, ma o nisi o i latou e matuai le malolo lava i nisi o taimi.

Ma e mafai ona ou lagonaina le auala e finagalo Iesu Keriso e aoao atu ai i latou taitoatasi i se auala e taua ia i latou. Ma ou te manatua se taimi na matua lelavava ai lava se tasi o tamaiti. O ia moni lava o se tamaitiiti e tele lona malosi, ma sa mafai ona ou valaaulia o ia e avea ma o’u fesoasoani i le vasega. O lea sa ou faaaogaina ai lena malosi ina ia mafai ai ona ou aoaoina isi tamaiti. Ma i lena ala ou te iloa ai o loo faatasi Iesu Keriso ma i tatou taitoatasi; Na te aoaoina i tatou i ni auala patino ina ia mafai ai ona tatou aoao. Ou te molimau atu e alofa Iesu Keriso ma lo tatou Tama Faalelagi ia i tatou taitoatasi. Ma e mafai ona tatou lagonaina lena mea pe a tatou faasoa atu Lana talalelei.