ʻOku Mou Kau ki he Fineʻofá
Fakataha Lotu Fakaēmamani Lahi ʻa e Fineʻofá 2024
Sāpate, 17 Māʻasi, 2024
Palesiteni Camille N. Johnson: ʻE hoku ngaahi tokoua, ʻoku ou ʻofa lahi kiate kimoutolu! Ko ha faingamālie nāunauʻia ke fakataha fakaemamani lahi mai ai ʻi he polokalama fakahisitōlia ko ʻení, ko hono fakamanatua ʻo e taʻu 182 hono fokotuʻu ʻo e Fineʻofá. Ko e fē pē ha feituʻu ʻokú ke nofo ai, pe ko e hā pē ha lea ʻokú ke lea ʻakí, pe ko e fē pē ha feituʻu kuo uiuiʻi koe ke ke ngāue aí, ʻokú ke kau ki ha kautaha ʻo ha houʻeiki fafine naʻe fokotuʻu fakalangi ke ʻomi ʻa e ʻofá mo e fakafiemālie ʻa Sīsū Kalaisí ki he niʻihi kehé. Pea kiate kimoutolu kotoa pē ʻi homou taʻu 18 ʻa ia ʻe vavé ni pē ha kau mai ki he Fineʻofá, ʻoku talitali lelei kimoutolu. ʻOku mau fiemaʻu kimoutolu; ʻoku mau ʻofa atu!
ʻOku ʻi heni hoku ongo tokoní, Sisitā Tenisi mo Sisitā Ī, pea mo e Kau Palesiteni Lahi ʻo e Palaimelí mo e Kau Finemuí. ʻOku mau ʻi heni ʻi he Fale ʻo e Fineʻofá (Relief Society Building), ʻa ia ʻoku mau ngāue, lotu mo fealēleaʻaki fakataha aí. ʻOku mau ʻinasi ʻi ha taumuʻa tatau: ke tokoni ʻi hono langa hake ha kau ākonga tuʻuloa ʻo Sīsū Kalaisi ʻoku nau tauhi ʻenau ngaahi fuakavá pea mo fakaʻamu mo feʻunga ki he ngaahi tāpuaki maʻongoʻonga taha ʻi he ngaahi tāpuaki kotoa pē, ʻa e moʻui taʻengata mo e ʻOtuá mo e kakai ʻoku nau ʻofa aí. Kuo ui ha niʻihi ʻiate kimoutolu ʻi ha vahaʻataimi ke tokoni ki he fānau ʻi he Palaimelí pe ko ʻetau kau finemuí. Ko e fē pē ha feituʻu ʻokú ke ngāue aí, ʻokú ke kei kau pē ki he Fineʻofá.
Palesiteni Susan H. Porter: Kuo hanga ʻe heʻeku hoko ko ha mēmipa ʻo e Fineʻofá ʻo ʻai ke u ako mei he kau fafine kuo fakatapui ʻi he funga ʻo e māmaní ʻa e ʻuhinga ke ʻofa mo ngāue ʻo hangē ko e Fakamoʻuí. ʻOku ui au ʻi he vahaʻataimi ko ʻení ke tokoni ki he fānau ʻo e Siasí ke haʻu kia Kalaisi. ʻOku ou houngaʻia ke hoko maʻu pē ko ha mēmipa ʻo e Fineʻofá.
Palesiteni Emily Belle Freeman: Naʻe pehē mai ʻe ha fefine ngāue fakaetauhi kiate au ʻi he ngaahi taʻu kuo hilí, “ʻOku ou ʻofa ʻi he Fineʻofá! Naʻá ku langa takai ai hoku fāmilí; Naʻá ku langa takai ai ʻeku moʻuí.” Naʻá ne fakatō mamafa kiate au ʻa e tui ki he fiemālie ʻoku maʻu mei ha sosaieti ʻoku muimui ʻia Sīsū Kalaisi. Naʻá ne akoʻi au, neongo ha tafaʻaki te u ngāue ai ʻi he Siasí, ʻe hoko ʻa e Fineʻofá ko hoku ʻapi.
Palesiteni Johnson: Ko hano fakahaaʻi fakaʻofoʻofa ia ʻo e ngāue ʻa e Fineʻofá—ke ʻomi ʻEne fakafiemālié ki he toʻu tangata kei tupu haké ʻaki ʻenau tokoni ke fokotuʻu mo fakamālohia ha fehokotaki fakataautaha mo ha tukupā kia Sīsū Kalaisi ʻi heʻetau fānaú mo e toʻu tupú.