“Aua le Fefefe … o A’u e Atoatoa ai Lo Outou Olioli” (MF&F 101:36)

Elder Quentin L. Cook

O Le Korama a Aposetolo e Toasefululua

O Se Afiafi ma Elder Quentin L. Cook

Faigalotu i le Lalolagi Atoa mo Talavou Matutua • 11 Setema, 2016 • Washington D.C. Stake Center

Ou te faafetai lava i le faatasi ai ma outou talavou matutua o loo maimoaina lenei faigalotu mai nofoaga i le lalolagi atoa. E pei ona ta’ua o lenei faigalotu o loo tuusao atu mai le falelotu o loo i talaane tonu lava o le Malumalu o Uosigitone D.C. Sa ou filifilia ma le faamoemoe i ai lenei nofoaga ona e sosoo lava ma le malumalu. Ou te matua faafetai lava o loo tatou ola i se taimi o loo salalau atu ai malumalu i le lalolagi atoa. Tatou te manaomia faamanuiaga o le malumalu i nei taimi faigata tele.

O loo vavaō moni lava le lalolagi.¹ Ua matua tetele fefinauaiga i lo se isi lava taimi muamua. O le filemu o le mafaufau ma lagona o le saogalemu ua foliga mai ua faigata ona maua ma e oo lava ina le mafai ona maua. O la’u savali ia te outou i lenei afiafi e faapea, e le tatau ona tatou fefefe e tusa lava po o se lalolagi lamatia ma pagatia. Ua faamautinoa mai e tusitusiga paia ia i tatou e mafai ona tatou maua le olioli atoatoa ona o le Faaola.²

O loo i ai ni mea ofoofogia na tutupu o loo faamaumauina e le toatele o outou i o outou mafaufau ma lagona i se ala lelei tele. E mafai ona e manatuaina auiliiliga uma o se mea na tupu. O ni faataitaiga e mafai ona aofia ai le tatalaina o se teutusi o loo i ai se valaauga o se misiona, o se faamauga i se toalua i le malumalu, le faailoaga na molimau atu le Agaga Paia i lou agaga i le moni a’ia’i o le Tusi a Mamona. O ituaiga nei o mea faapelepele e tutupu e aumai ai e le gata o se olioli faamalieina ae o se olioli tumau foi. E mata’ina tele ia mea taitasi e tutupu i soo se ala lava e fesootai ai i le Faaola e masani lava o mea ia na te aumaia le olioli silisili.

Ae e i ai foi nisi mea e tutupu e matua faateia lava, pe gatete foi, lea e aafia ai i tatou i se ala loloto.

O le soloia i lalo o le Pa o Perelini, o le tagatavaleina o le Peresitene o le Iunaite Setete o John F. Kennedy, ma osofaiga a tagata faatupufaalavelave i le 9/11 o ni faataitaiga ia o mea e tutupu e te’i ai lea e mafai ona manatua ai e tagata le mea tonu sa latou i ai ma o latou lagona i le taimi na latou faalogo ai i talafou.

O le toatele o outou masalo sa laiti lava i le taimi na tupu ai le osofaiga i le World Trade Center i le Aai o Niu Ioka ma le Pentagon, iinei i Uosigitone D.C., i le aso tonu lava lenei, Setema 11, 2001, 15 tausaga talu ai. Ou te masalo o le toatele o outou (po o fea lava sa outou i ai i le lalolagi atoa) e mafai ona manatuaina le mea sa e i ai ma lagona o le faateia ma le atuatuvale na e oo i ai faapea ma isi na siomiaina oe. O se mea na faatamaia ai le lagona o le filemu ma faatuputeleina ai lagona o le le saogalemu mo le toatele. E pei ona ou faamatalaina i le tuanai, sa i ai ni tulaga taua patino mo a’u ma lo’u toalua o Mary.

O le ma atalii ulumatua ma lona toalua sa maitaga i le la pepe muamua sa nonofo i le tolu poloka mai le World Trade Center i le Aai o Niu Ioka, ina ua pa le vaalele muamua lea na avefaamalosi e tagata faatupufaalavelave i le Tower i Matu. Sa la o atu i le tumutumu o le la fale ma na gatete a o la matamata atu i taunuuga o mea sa la manatu o se faalavelave faafuasei matautia. Ina ua la molimauina le vaalele lona lua na avefaamalosi ua fetoai ma le Tower i Saute, na la iloa ai e le o se faalavelave faafuasei lenei mea, ma talitonu ai ua osofaia le taulaga o Manhattan. Ina ua solovi ifo le Tower i Saute, sa matua lilofia atoa lo la fale i otaota na toulu mai lalo i luga o le taulaga o Manhattan.

I le fenumiai ai ma le matata’u i le mea ua la molimauina, ma popole i nisi osofaiga e oo atu, sa la o atu ai i se nofoaga saogalemu ona o atu ai lea i le falelotu o le Siteki o Manhattan i Lincoln Center. Ina ua la taunuu, sa la tau atu ai i nisi tagata o le au paia mai le taulaga o Manhattan na faia foi lena faaiuga e potopoto i le nofoaga autu o le siteki. Sa maua lo ma to’a ina ua la valaau mai ma faailoa mai le mea sa la i ai ma o loo saogalemu. Sa lei faateia i maua i lo latou nofoaga ona o loo aoao mai faaaliga o aso nei o siteki o Siona o “se puipuiga, ma ... se sulufaiga mai le afā, ma mai le toasa pe a sasaa mai e aunoa ma le suia i luga o le lalolagi atoa.”³ Sa lei faatagaina i laua e toefoi atu i lo la falemautotogi mo se vaiaso ma sa lofituina i le tele o ola taumamaina na maumau ai, ae sa lei mafatia i laua lava i ni aafiaga tumau faaletino.

O le vaalele lea na pa i le Pentagon e latalata i le mea o loo tatou i ai i le po nei, Uosigitone D.C., o se faapapomu pule i le ola a tagata faatupu faalavelave faatasi ai ma ni taunuuga faataumaoi.

O lo’u faamoemoega i lenei afiafi ia aua ne’i o tatou mafaufau pea i mea matautia na tutupu i le tuanai. Ou te manao ia outou faamamafaina ituaiga mea fiafia e tutupu ia sa ou faamatalaina i le amataga. Ae ou te fia fesoasoani foi ia te outou ia mafaufau i tofotofoga, faafitauli, ma mea lamatia ia tou te fetaiai pe fefefe ai foi ia o le a outou fetaiai ai i o outou olaga taitoatasi. O nisi atonu o ni mea tutupu e ono aafia ai ni tagata se toatele, o nisi e patino lava ia te oe. Ua tonu ia te au e talanoaina ni ituaiga o mea tutupu se tolu: o mea e aofia ai ni lamatiaga faaletino; o mea e aofia ai ni luitau faapitoa, o nisi o ia mea e tulagaese i lou aso; ma le mea mulimuli, o mea e aofia ai lamatiaga ma luitau faaleagaga.

O Lamatiaga po o Luitau Faaletino

O lamatiaga faaletino o mea ia e aupito sili ona faigofie ona vaaia ma iloa. E le afaina pe faapefea po o fea foi e te maua mai ai au talafou o aso taitasi, o lamatiaga faaletino, fevesia’iga, ma faalavelave matautia o mea ia e muamua lava lipotia—ae patino lava i televise ma le Initoneti. O le tasi mafuaaga mo lenei mea e faapea, o fevesia’iga ma le oti e patino tele ma e masani lava e faigofie ona faamatalaina i le vaaiga faapena foi i le tusitusi. O fevesia’iga ma le oti, pe lata mai pe mamao ese, e pueina lo tatou gauaiga ma e mafai ona faaumatia ai lo tatou filemu ma le toafimalie. A tatou le lagonaina le saogalemu faaletino, tatou te lagonaina le lofituina faaletagata lava ia.

I le aso 22 Mati talu ai, sa faapa ai e se tagata faapapomu pule i le ola se pomu i totonu o le malaevaalele i Brussels, Peleseuma. E toafa a tatou faifeautalai sa i ai i le kesi e siaki ai ato a le Delta. Sa mafatia uma i latou i ni manuaga tuga; o nisi manuaga sa matua ogaoga lava. O manuaga o Elder Richard Norby, o se faifeautalai sinia sa matua ogaoga lava. Talu ai nei sa ia faailoa mai e faapea e ui lava o le a le toe tutusa lava le olaga, ae “ua ia filifili e faalagolago i le Alii ae le o le fefe.” Sa ia toe faapea mai, “O le a ou ola pea i lo’u olaga, ma o le a ou aoao la’u fanau ma fanau a fanau e [tatau] ona matou faalagolago i le Atua.”⁴

Ua faamamafa mai e le Alii e faapea e oo lava ia i latou e faamaumauina lo latou ola, i le faamaoni i a latou feagaiga, “o le a toe maua e ia, o le ola lava e faavavau.”⁵

Sa ootia lava a’u i le saunoaga a Sister Fanny Clain, o se tasi o isi faifeautalai na mafatia i manuaga mai le pomu i le malaevaalele i Brussels. Sa ia fai mai, “O le pasiaina o nei ituaiga o mea ua ou malamalama atili ai i tagata, ona e i ai moni lava i tagata ni mea faigata i o latou olaga, o lea la ua i ai ni mea faigata ia te au foi ia, ina ia mafai ai ona ou malamalama atili.” I le taumafai ai ina ia toe malosi, sa ia fai mai ai, “A tatou filifili e faalagolago i le Atua, e mafai ona tatou vaaia le auala e fesoasoani mai ai o Ia ia i tatou ma le maoae tele. Ua sili atu lo’u faalagolago ia te Ia i le taimi nei nai lo le taimi muamua.” E faapitoa lava lona lotofaafetai ua mafai ona toe faaauau lana misiona.⁶

I lo tatou muai olaga na tatou iloa ai o le faitalia ma le faafeagai sa talafeagai ina ia mafai ai ona tuputupu ae, atiae, ma maua mulimuli ane ai le faaeaga.

I le fono i le muai olaga i le lagi, sa aofia ai i le fuafuaga a le Tama le faitalia o se elemene taua. Sa fouvale Lusifelo “ma saili e faaumatia le faitalia a le tagata.”⁷ O le mea lea, o le avanoa mo le mauaina o se tino faitino sa teena e Satani ma i latou na mulimuli ia te ia.

O isi agaga i le muai olaga sa faatinoina lo latou faitalia i le mulimuli lea i le fuafuaga a le Tama Faalelagi. O agaga ua faamanuiaina e ala i le fananau mai i lenei olaga faitino e faaauau pea ona maua le faitalia. Ua tatou saoloto e filifili ma faatino ae le saoloto e pulea ia taunuuga o a tatou filifiliga. O lea, o a tatou filifiliga e fuafua ai le fiafia po o le faanoanoa i lenei olaga ma le olaga a sau. “O filifiliga o le lelei ma le amiotonu e taitai atu ai i le fiafia, filemu ma le ola e faavavau, ae o filifiliga o le agasala ma le amioleaga e iu ina taitai atu i le lototiga ma le faanoanoa.”⁸

E le mafai ona tatou tuuaia tulaga po o tagata mo se faaiuga e faatino e feteenai ma poloaiga a le Atua. E nafa uma i tatou ma tali atu i le Atua i le auala tatou te atiae ai uiga FaaKeriso, taleni, ma tomai, ma e tatou te nafa mo le auala tatou te faaaogaina ai le taimi ua atofa mai ia i tatou i lenei olaga.

O le aoaoga faavae o le faafeagai e fesootai vavalalata ma le faitalia, ma o nisi taimi e tagai i ai o se vaega o le aoaoga faavae o le faitalia. Ae ona o mea faafeagai e tele ina sau mai puna i fafo atu po o vaega lona tolu, e aoga la le tuueseese. O lenei aoaoga faavae ua manino ma otootoina e le perofeta o Liae i le 2 Nifae 2:11: “Ona e ao lava ona i ai se faafeagai o mea uma. A na le faapea, ... e le mafai ona i ai o le amiotonu, po o le amioleaga, po o le paia po o le pagatia, po o le lelei po o le leaga.”

Sa faaauau le faamalamalamaga a Liae e faapea o lenei aoaoga faavae e taua tele aua a aunoa ma lea “po ua leai se ... faamoemoe o ... foafoaga” ma o le “poto o le Atua ma ona faamoemoega e faavavau, ma le mana foi, ma le alofa mutimutivale, ma le faamasinotonu o le Atua” o le a faaumatiaina.⁹

Na saunoa pea Liae, “O le mea lea, na tuuina mai ai e le Alii le Atua i le tagata ia tatau ona ia fai mo ia lava.”¹⁰

Sa tatou iloaina i le muai olaga o le i ai o le faitalia e ono tulai mai ai le faafeagai ma feteenaiga—o le taua i le lagi o le faamaoniga lea o lenei upumoni. Na tatou iloa e faaopoopo atu i taua ma fevesiaiga o le a i ai foi amioga agasala iloga i le salaga o le lalolagi atoa. Sa tatou iloa foi sa finagalo lava Iesu Keriso e totogi le tau mo nei agasala. O Ona puapuaga, ia e le mafai ona malamalama i ai, o le a taunuu i le manumalo i le agasala ma le oti faaleagaga. O Lona Toetu o le a faatoilaloina le oti faaletino. Sa tatou talitonu e faapea o le mavae ai o le oti faaletino, o le a tatou toe ola uma. E pei ona tatou faitau i le Talai La’u Talalelei:

“O le manumalo lenei a Iesu Keriso i le oti faaleagaga e ala i Ona mafatiaga ma le faatoilaloina o le oti faaletino e ala i Lona Toetu ua ta’ua o le Togiola. …

“A tatou faalagolago i le Togiola a Iesu Keriso, e mafai ona Ia fesoasoani ia i tatou ia onosaia o tatou tofotofoga, ma’i, ma tiga. E mafai ona faatumulia i tatou i le olioli, filemu, ma le mafanafana. O mea uma e lē fea e uiga i le olaga e mafai ona faasa’o e ala i le Togiola a Iesu Keriso.”¹¹

O aafiaga matautia na oo i o tatou tagata ina ua faatuina le Ekalesia i Misuri na manino ai le taulaiga i nei mataupu faavae o le Togiola. O o tatou tulaga faatauaina faaleaoaoga faavae na fitoitonu le feteenai ma tagata na nonofo i Misuri e le o nisi o lo tatou faatuatuaga. E toatele tagata Misuri na manatu o Initia Amerika o se fili faatautee ma sa mananao ai e aveese i latou mai le nuu. Ma le isi, e toatele tagata na nonofo i Misuri sa pule i pologa ma lagona le faamata’uina e i latou sa tetee atu i faiga faapologa. E toatele sa saili mo ni fanua, tamaoaiga, e oo lava i le pule.

I se eseesega, e faaaloalogia e la tatou aoaoga faavae ia Initia Amerika ma o lo tatou manao ia aoao i latou i le talalelei a Iesu Keriso. E tusa ai ma le faaaloalo i tagata pologa, ua manino lava a tatou tusitusiga paia e faapea e leai se tagata e tatau ona nofopologa i se isi tagata. Sa tapuai faatasi nai o tatou uluai tagata uli i lena taimi ma tagata papae o le ekalesia, e pei lava ona latou faia i nei aso. Mea mulimuli, o lo tatou faamoemoega e le o le maua lea o le tamaoaiga ae ia atiae nuu o uso ma tuafafine e alofa le tasi i le isi ma ola i mataupu faavae na aoao mai e le Faaola. O isi tagata na nonofo i Misuri sa lagona le faamata’uina a o faatupulaia le aofai o le Au Paia, na mulimuli i faaaliga a le Alii, ia masii atu i Misuri.¹²

O lenei mea na oo ai i ni fetauaiga tetele ma sauaga o tagata o le Ekalesia. Sa faatamaia e fili o le Au Paia a latou meatoto ma nisi o fale, faoa a latou manu ma meatotino patino, ma tutuli ese i latou mai i o latou fale. O nisi o le Au Paia na faataina ma faapipii ai fulumanu, sasa, pe fasia. I lana tusi ia Iosefa Samita, lea sa nofo i Katelani, Ohaio, sa ta’ua ai e William W. Phelps, “O se taimi matautia tele, ua sosola ese alii, tamaitai ma tamaiti pe ua sauni foi [e sosola ese] i itu uma.”¹³ I le vevesi o le aveesea faamalosi o aiga, o nisi taimi sa vaeluaina ma e toatele le Au Paia na leai ni meaai ma isi sapalai. Sa tauivi tagata o le Ekalesia i le fia malamalama pe aisea na tutuliese ai i latou i le mavae ai ona poloaiina o i latou e le Alii ia potopoto faatasi i Misuri. Ina ua ia maua le tala faataumaoi, sa tatalo atu ai loa Iosefa Samita i le fia malamalama. Sa tali mai le Alii i lenei savali mafanafana, ua maua nei i le Mataupu Faavae ma Feagaiga 101:35–36:

“Ma o i latou uma o ē e mafatia i sauaga ona o lo’u igoa, ma tumau i le faatuatua, e ui ina valaauina i latou e tuu atu o latou ola mo a’u ae o le a tofusia i latou i lenei mamalu [uma].

“O le mea lea, aua le fefefe e oo lava i le oti; ona e le atoatoa lo outou olioli i le lalolagi lenei, ae o a’u e atoatoa ai lo outou olioli.”

Ua folafola mai foi e le Alii ia i tatou le taui o le amiotonu o le “filemu i lenei [olaga], ma le ola e faavavau i le lalolagi a sau.”¹⁴

O lea la o le Togiola a le Faaola ua faatagaina ai i tatou ia maua le filemu ma le toafimalie e tusa lava pe o i ai ni lamatiaga faaletino.

O Luitau Faapitoa, O Nisi o Na Mea E Tulagaese i o Outou Aso

I le avea ai ma talavou matutua, e faaopoopo atu i luitau faaletino, ua ia te outou ni luitau faapitoa, ma o nisi e tulagaese i o outou aso. O loo outou atugalu i ni faaiuga e fesootai ma aoaoga, galuega. faaipoipoga, ma le aiga. O aoaoga faavae ma mataupu faavae e faatatau i nei faaiuga ua uma ona talanoaina i le tele o lauga ma ua lava ona malamalama i ai. O le totogiina e le Faaola o le sala mo a tatou agasala, Na te lei aveesea ai o tatou tiutetauave faaletagata lava ia i le auala tatou te ola ai i o tatou olaga. O le taua o le galue, maelega, galulue ma lo tatou malosi, faaleleia o a tatou taleni, ma le tausiaina o o tatou aiga ua folafola atu i tagata uma i tusitusiga paia mai lava i le amataga. I le Kenese o loo tautino mai ai le Alii, “E te ai foi au meaai ma le afu o ou mata seia e toe foi atu i le eleele.”¹⁵

Ou te talitonu o nei manatu faaleaoaoga faavae ua taliaina lautele e le au paia. Peitai, i se lalolagi lavelave o loo tele lava le fenumiai i le auala e faatino ai nei mataupu faavae.

I la’u lauga muamua lava i le konafesi aoao i le 20 tausaga talu ai, sa ou faasoa atu ai sa’u lava tala e fai si malie lea e fesootai tonu lava ma nei faafitauli.¹⁶

A o laiti le ma fanau, sa tonu ia i maua ma lo’u toalua o Mary, e mulimuli i se tumasani sa aoao mai e lo’u tama a o o’u laitiiti. E feiloai o ia ma a’u ma o’u tei taitoatasi e fesoasoani ia i matou e seti ni sini i vaega eseese o o matou olaga ma aoao i matou i le auala e fesoasoani ai gaoioiga a le Ekalesia, a’oga, ma isi gaoioiga ia ausia nei sini. E tolu ana tulafono:

Sa manaomia ona i ai ni a matou sini taua.
Sa mafai ona suia a matou sini i soo se taimi lava.
Sa ao ona matou galulue filiga i soo se sini na matou filifilia.

Ona sa ou manuia i lenei tumasani, sa tonu ai ia i maua ma Mary ia ma faatinoina lenei faiga ma le ma fanau. Ina ua lima tausaga o le ma atalii o Larry, sa ou fesili atu ia te ia po o le a se mea na te manao ia faia mo se galuega pe a matua. Sa ia fai mai na te fia manao e avea ma se fomai e pei o lona Uncle o Joe.¹⁷ Sa i ai se aafiaga o Larry i se taotoga tuga ma sa maua ai sona faaaloalo tele mo fomai, aemaise lava lona Uncle o Joe. Sa ou faamatalaina ia Larry le auala e mafai ona fesoasoani ai mea taua uma sa ia faia e faatino le galuega a se fomai.

I ni nai masina mulimuli ane, sa ou toe fesili atu ia te ia po o le a se mea na te fia manao e fai pe a matua. O le taimi lea sa ia fai mai ai e fia manao ia avea ma se pailate o se vaalele. O le suia o sini sa lelei, o lea sa ou faamatala atu i ai le auala o le a fesoasoani ai ana gaoioiga eseese ia te ia ia ausia lenei sini. I le maea ai o le ma talanoaga, sa ou soona fesili atu i ai, “Larry, o le taimi mulimuli sa ta talanoa ai na e fia manao ai e avea ma se fomai. O le a se mea ua suia ai lou mafaufau?” Sa ia tali mai, “Ou te manatu o le avea ma se fomai e lelei, ae ua ou matauina e faigaluega Uncle Joe i taeao o Aso Toonai, ma ou te le fia manao e misia ata komi i taeao o Aso Toonai.”

Talu mai lena taimi ua faaigoa ai lava e lo matou aiga se mea faalavefau i se sini taua, o se ata komi i le taeao o le Aso Toonai.

E lua ni mataupu faavae ou te manao e faamamafa mai lenei tala moni. O le mea muamua o le auala e te fuafua ma saunia ai ia ausia ni sini taua i le lalolagi i nei aso, ma le lona lua o le aafiaga o le Initoneti ma ala faasalalau faaleagafesootai i a tatou sini amiotonu. O mea taitasi nei e mafai ona avea ma se ata komi i taeao o Aso Toonai lea e faalavelave ia i tatou mai le olioli tatou te manaomia.

E patino lo’u popole i le le mafai e le toatele o talavou matutua ona seti ni sini amiotonu pe faia foi se fuafuaga e ausia ai na sini. O loo ou popole foi i le manatu faatauvaa ma le le faatauaina e le toatele o a latou lava taleni ma tomai. O le foiaina o nei faafitauli e lua o le a aumaia ai le tele o le olioli i lou olaga.

O se tusi fou a Polofesa Angela Duckworth, ua faaulutalaina Grit, o loo aumaia ai se finauga faatosina e faapea e toatele, a leai e toetoe o tagata uma e soona faatauaina le tomai faalenatura ae le faatauaina le galue malosi ma le maelega. Ua ia faamanino mai e faapea o soo se tulaga manuia lava e iloagofie atu e ala i se uiga lelei o le galue nai lo le atamai a’ia’i po o se tomai. Sa ia faamamafa mai e faapea o tagata e i ai le naunautaiga ma le taitaiga (lea foi na te ta’ua o le faananau ma le filiga) e tumau pea ona sili atu a latou faatinoga nai lo i latou e i ai le tomai faalenatura e le o i ai sea lava maelega e tasi.¹⁸

A o ou talavou sa faafuasei ona ou iloaina ia togi o suega faaleatamai a se tamaitiiti aoga, lea sa fai si maualalo ma le averesi. Sa ou matauina o ia i le a’oga e aunoa ma le ta’u atu i se isi tagata. Sa ia aveina ni vasega faigata ma suesue ma le filiga. I le kolisi o nisi taimi sa i ai o ia i ni vaega suesue se lua pe tolu mo le vasega lava e tasi. Mulimuli ane sa ia mauaina se tikeri maualuga i se matata faaleatamai sa moomia ai le galue malosi ma ausia ai ni tomai faapitoa iloga i lana matata.

Ia, ou te le o fautua atu e tatau i tagata uma ona ausia faailoga faaleatamai ae o loo ou fautua atu e mafai ona e ausia le tele o au sini taua ma amiotonu e ala i fuafuaga, maelega, ma le naunautaiga, aemiase lava pe afai e te aveesea ata komi o taeao o Aso Toonai mai lou olaga. E mafai foi ona e mauaina le olioli ma le fiafia sili atu i lou olaga.

Ou te fia faamautinoa atu ia te outou e mafai ona outou faia ni mea faigata. O Elder John B. Dickson, o se Fitugafulu ofoofogia, ua faamaloloina nei ma le mamalu, na auauna atu ma le tulagaese i le lalolagi atoa, na faaalia lenei mea i se ala malie e le masani ai. Sa valaauina Elder Dickson e auauna atu o se faifeautalai o le Ekalesia i Mekisiko i le 1962. Ae lei malaga ese atu o ia, sa maua o ia i le kanesa o ponaivi i lona lima taumatau. Sa lei faamoemoeina la o ia e ola e sili atu ma se masina. Peitai, i le 10 masina mulimuli ane sa ia malaga loa e auauna atu i lana misiona atofaina, ma lona lima ua tipiese.¹⁹ O le a le galo lava ia te a’u le auala na ia aoao ai faifeautalai i le MTC e mafai ona latou faia ni mea faigata. Sa ia valaauliaina ni faifeautalai se toafa e o mai i le tulaga ma tauva ma ia i se tauvaga o le fusiina o le fusiua. Mafaufau i le fusiina o se fusiua i le lima e tasi! Sa ou fesili atu talu ai nei ia Elder Dickson e faasino mai. Tatou matamata i ai.

Elder John B. Dickson:[Nonoaina se fusiua.] Tou te silafia e tofu i tatou uma ma luitau i o tatou olaga. O nisi taimi e faaletino pe faalelagona pe faaletamaoaiga po o isi mau ituaiga e tele, ae afai e tau na ona tatou maua lagona lelei ma tausi i tulafono, faatuatua i le Alii, talitonu ia i tatou lava, e mafai ona tatou taulimaina soo se mea e oo mai. Ou te mate e mafai ona tatou nonoaina a tatou fusiua. E i ai se tasi e fia mili pe fia fusu?

Faafetai John.

I le MTC, sa faatoilalo ai e Elder Dickson ia faifeautalai uma e toafa, i le faaaogaina o ona nifo, ona tauau, ma lona fatafata i se ala ofoofogia. Faamolemole ia iloa e mafai ona e faatoilaloina faigata ma faia ni mea faigata.

Na ta’ua e Polofesa Duckworth e faapea o le “naunautaiga e taatele. Ae o le tumau e seāseā maua.”²⁰

O se tasi o suesuega na ia ta’ua o loo faamamafa ai le taua o sauniuniga ola mo le olaga, e aofia ai le filiga, tumau, mausali, ma le naunau e aua nei lafoaia tiute i taimi o faafitauli.”²¹

Sa ia faamatala foi le i ai o se faamoemoega sili atu lea e saofagā i le tulaga manuia o isi.²² Sa ia ta’ua:

“E manuia tagata pe a i ai so latou sini maualuga lea e taua tele i le lalolagi e maua ai se uiga loloto i mea uma latou te faia, e tusa lava po o le a le faatauvaa po o le itiiti o se galuega e fai. Mafaufau i le talafaatusa o tagata fola piliki:

“Sa fesiligia ni tagata fola piliki se toatolu: ‘O le a lau mea o fai?’

“Na fai mai le tagata muamua, ‘O loo ou folaina ia piliki.’

“Fai mai le tagata lona lua, ‘O loo ou fausiaina se falesa.’

“Ae fai mai le tagata lona tolu, ‘O loo ou fausiaina le maota o le Atua.’

“E i ai se galuega a le tagata fola piliki muamua. O le tagata lona lua e i ai sana matata. O le tagata lona tolu e i ai sona valaauga.”²³

O la’u lu’i ia te outou i le po nei, ia suesue a outou sini ma fuafua po o a sini o le a faatagaina ai oe e faataunuu ni matafaioi faaleaiga ma faatumau ai oe i luga o le ala o feagaiga ma faataga ai oe ia maua le olioli e finagalo ai le Alii mo oe. Manatua, o le faia o se sini e faataga ai oe e sefe le taimi ma taumafaiga e ala i le fuafua mamao ma aua lē misia ai mea faavae taua ma aso e faagata ai.

Ou te liliu atu nei i le aafiaga o le Initoneti ma alafaasalalau faaleagafesootai i faaiuga fai.

E anoanoai se lelei e saofaga ai le Initoneti ma alafaasalalau faaleagafesootai i o tatou malo faaonapo nei. E tele so latou taua! E mafai foi ona avea ma ata komi o taeao o Aso Toonai e faalavelave ai ia i tatou mai le faataunuuina o o tatou vaalauga moni i le olaga faaletino nei.

O la’u aioiga faatauanau, ia iloilo e i tatou uma lava le auala ma le taimi tatou te faaaogaina ai le Initoneti ma alafaasalalau faaleagafesootai. O le suesuega manino lava e tatau ona faapea: O fesoasoani [ia mea] i isi a tatou sini agavaa ma taua, pe o punitia moni ai lava lo tatou alualu i luma? O tatou faananauvale ea i alafaasalalau faaleagafesootai ona o le fefe nei misia se mea pe a tatou le siaki sooa? Pe o le fia lauiloa o le tagata lava ia i alafaasalalau faaleagafesootai ua mafua ai ona tatou masalosalo ia i tatou lava ma lagona ai le le atoatoa? Ae o le isi mea leaga, o taitai atu ea i tatou e le Initoneti i ata ma mea e le mama, le talafeagai, pe o mea o loo i ai upumoni le sa’o e faaumatia ai le faatuatua? O tatou natia ea lo tatou tagata moni ae lafo atu faamatalaga po o manatu leaga i isi? O faalavelave ea alafaasalalau faaleagafesootai i le taimi e masani ona tatou faaaluina i gaoioiga faalelotu i le aiga po o taimi lelei faaleaiga? Pe o le taimi o loo faaaluina i le Initoneti i taaloga ma mea le aoga o loo taofia i tatou mai le tulitulimatagauina ma le mataalia o sini anoa? O faaiuga nei ou te lu’iina ai i tatou taitoatasi e mafaufau loloto i ai, faia ni fetuunaiga, ma salamo pe a manaomia ina ia manuia ai o tatou olaga.

I le ta’ua ai o mea o i luga, ou te matua iloa lelei tulaga manuia tetele o alafaasalalau faaleagafesootai e mafai ona i ai pe faaaoga tatau. O lona sao toatasi i talafaasolopito o aiga ua manino ai ia te au na musuia e le Alii lenei tekinolosi.

A maea la’u lauga, o le a ou tuuina i luga lenei vaega o la’u lauga i la’u Facebook. Ou te manao ia outou faasoa maia ia te au o outou popolega e uiga i alafaasalalau faaleagafesootai ae po o a foi auala o loo faamanuiaina ai e alafaasalalau faaleagafesootai lou olaga.

Ou te fia tuua foi ma outou se manatu faaopoopo se tasi e uiga i lenei mataupu. Tatou te faalogo soo e uiga i le tausisi i le sa’o i alafaasalalau faaleagafesootai. O le avea faamaoni faapei o Keriso o se sini e sili atu lena ona taua nai lo le fia tausisi i lou sa’o. Sei ou toe fai atu: O le avea faamaoni faapei o Keriso o se sini e sili atu lena ona taua nai lo le fia tausisi i lou sa’o.

O Luitau Faaleagaga

Ou te liliu atu nei i luitau faaleagaga.

O se tasi o tiutetauave sili ona taua i lenei olaga o le osia ma le tausia lea o feagaiga paia ma le Atua. E manaomia ai lo tatou suesueina o o tatou manaoga le agavaa ma tuuese i tatou lava mai na mea. Tatou te suesueina foi ni faamoemoega le talafeagai o tatou faamoemoeina ma le loto i ai pe le loto i ai mai le Atua. Tatou te saili e le aunoa ia iloa le finagalo o le Atua mo i tatou. Tatou te faaauau pea ona toetaulai atu i le faatuatua, salamo, ma sauniga faaola. O le Faaola, o le na totogia se tau mo i tatou uma e sili atu ma mea e mafai ona tatou malamalama atoatoa i ai, na te lei faataunuuina le Togiola ina ia mafai ai ona tatou taulai atu i ni sini faalelalolagi e leai se taua e faavavau po o, taaloga ma mea faafiafia faamaimau taimi e mo lo tatou lava fiafia. Mafaufau i faamoemoega o le Alii ina ua Ia fetalai, “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata.”²⁴

O nisi e foliga mai e fai mai pe manatu foi, “Pe faamalieina ea se Tama i le Lagi agaalofa pe afai ou te le ausia le tagata e tatau ona avea ai au? Pe o le a Ia teena ea faamanuiaga mo au ona ou te fiafia e inupia ma inu kofe?” O le mea e leaga ai, e sese lena fesili ma e faaalia ai le leai o se malamalama e uiga i le fuafuaga a le Tama. O le fesili moni lava e faapea “E mafai faapefea ona avea a’u ma tagata amiotonu ma agaalofa e finagalo lo’u Tama ma le Faaola e avea ai a’u? Ua tautino mai tusitusiga paia, “[O lē] ua tuu atu i ai mea e tele, e tele mea ua manaomia mai ai.”²⁵

I se lalolagi ua tele ina maua ai taui ma faailoga mo le tau na o na auai, ua foliga mai ai ua le talafeagai pe faaletonu foi ia tulaga faatonuina po o mea ua faamoemoeina. E patino le moni o lenei mea mo i latou e naunau pea e mulimuli i lo latou lava ala e aunoa ma le tausisia o le fuafuaga a le Tama, e tusa lava po o a ni taunuuga.

E toatele e faamaonia ni amioga agasala ma faaaoga e fai ma a latou puipuiga, “Sa aoao i tatou e Iesu ia alofa i tagata uma.” Ioe, e moni lenei mea ae e masani lava o i latou e fautuaina lenei tulaga e foliga mai e faaosofia ia le amanaiaina Lana apoapoaiga e tutusa le taua, “Afai tou te alolofa mai ia te au, tausi a’u poloaiga.”²⁶

E le tatau mo i tatou ona fetuunaia tuutuuga o lo tatou sootaga ma le Aiga Atua. O le mauaina o se “loto momomo ma se agaga salamo” o le mea muamua lea e manaomia mo le amataina o le savaliga o le ala o feagaiga na amataina e le papatisoga. E tatau ona tatou tatalo atu ma le faamaulalo i le Atua. E pei ona aoaoina i tatou e le Tupu o Peniamina: “Aua faauta, pe le o i tatou uma ea o ni tagata aisi? Pe ua tatou le faalagolago uma ea i le Tagata e tasi, o le Atua lava lea mo mea uma ua tatou maua … o ituaiga uma?”²⁷

E mafai ona faigata o tatou luitau, ma o nisi e oo lava ina le fea. E mafua ai ona tiga o tatou loto ma faamafanafana atu ai isi. E moni lenei mea i vaivaiga ma faamai e aafia ai o tatou lava tagata. E aofia ai ma i latou e leai se sala ma ua faasauaina. E aofia ai le mativa ma fevesiaiga ua salalau solo i siosiomaga na tatou fananau mai ai. E aofia ai o tatou faanaunautaiga ma faamoemoega ia masalo tatou te lei filifilia. Ua tatou aue i vaisu na mfua mai i se filifiliga leaga lava se tasi; e anoanoai mea e le fea pe le amiotonu i lenei lalolagi.

O le a se tatou tali? E tatau ona tatou agalelei ma agaalofa atu ma taulima tagata uma i le faaaloalo, e tusa lava pe latou te filifilia se ala ua tatou iloa e le ogatusa ma le fuafuaga a le Tama ma aoaoga a le Faaola. Ae afai tatou te mananao moni lava ia agalelei, e tatau foi ona tatou aoao atua le salamo. E le o se agalelei, lo tatou faia o se mea e fiafia ai se tasi, pe a tatou aloese mai le uunaia o i latou tatou te alolofa i ai ia suia o latou olaga ma talia le Togiola a le Faaola. O loo i ai faamanuiaga ofoofogia ma faavavau o loo faatalitali mai ia i latou e salamo.

Na faamanino e le Faaola lava Ia lenei mea i Lana fetalaiga ia sa Nifae, e faatatau ia i latou o le a salamo, “O ia lea o le a ou le ta’usalaina i luma o lo’u Tama i lena aso pe a ou tu e faamasino i le lalolagi.”²⁸ Sa faaauau Lana fetalaiga, “Ma e leai se mea le mama e mafai ona ulu atu i lona malo; o lea e leai se mea e ulu atu i lona malologa vagana ai i latou o e ua faamamaina o latou ofu i lo’u toto, ona o lo latou faatuatua, ma le salamo i a latou agasala uma, ma lo latou faamaoni e oo i le iuga.”²⁹

Faamolemole ia iloa e mafai ona faamamaina outou. E mafai ona e mauaina le olioli e te manao ai i lenei olaga. E leai se tasi e tatau ona tuua lenei faigalotu ma le manatu e te le mauaina le togiola. Leai. I lou taua tele o oe o se atalii po o se afafine o le Atua. E mafai ona e maua le faamoemoe ma le olioli. E mafai ona sui lou loto ma salamo. E mafai ona e faamagalo atu ma faamagaloina oe.

E taua tele le salamo i le fuafuaga a le Tama. I le Tusi a Mamona, tatou te aoao ai i le sootaga i le va o le alofa mutimutivale ma le faamasino tonu. Ua faavae e Keriso le auala e fesootai ai le alofa mutimutivale ma le faamasinotonu.³⁰

Ou te fiafia i upu fiafia na tusia e Eliza R. Snow:

Ma’eu, mamalu, ma atoa
Le ata o le olataga,
Faamasino tonu ma alofa
Ua tasi i Lē paia!31

O le fuafuaga mamalu o le fiafia e amiotonu ma alofa mutimutivale. Ua tatou iloa le mea na tatou o mai ai, le mafuaaga ua tatou i ai iinei i lenei olaga, ma le mea o le a tatou o i ai pe a tatou oti.

O outou o se tupulaga ofoofogia. Ua manino lava tusitusiga paia e faapea i aso e gata ai o le a i ai le “amioleaga ma mea inosia.”³² Peitai, o le Au Paia, e toalaiti ma ua taape atu i luga o le fogaeleele, o le a “faaaupegaina i latou i le amiotonu ma le mana o le Atua i le mamalu tele.”³³ Ua folafola mai e le Alii o le a Ia “faasao[ina] e ua amiotonu” ma “e le tatau ai ...ona fefefe” i tatou.”³⁴

E le tatau ona outou fefefe, e tusa lava po o a tulaga lamatia ma luitau o le a outou fetaiai. O le a faamanuiaina ma puipuia outou pe a outou saili atu i sini amiotonu ma agavaa., Fuafua ma galue ma le maelega ma le naunautaiga, aloese mai le faaaogaina ma le le tatau o ala faasalalau faaleagafesootai ma le Initoneti, ma faalagolago ma taulai atu i le faatuatua, salamo, sauniga faaola, atoa ai ma le taulaga togiola a le Faaola a o outou tumau seia oo i le iuga. O le taulai atu i le malumalu o le a fesoasoani ia te outou ia ausia nei sini.

Ina ia toe faaupu le Roma 12:12, “Ia olioli i le faamoemoe, ia onosai i puapuaga, ma ia faatuatua i le tatalo.” E mafai ona e aloese mai ata komi o le olaga i taeao o Aso Toonai ma olioli ma ausia ai mea uma ua folafola mai e le Faaola ia i tatou.

Ou te molimau atu ma le faamaoni i le paia o Iesu Keriso. Ona o Ia e le manaomia ai ona tatou fefefe, aua o Ia e tumu ai lo tatou olioli. I le suafa o Iesu Keriso, amene.

© 2016 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 6/16. Faamaonia le faaliliuga: 6/16. Faaliliuga o le “‘Fear Not … in Me Your Joy Is Full’ (MF&F 101:36).” Samoan PD60002153 890