10:19

Gugma ug Kaminyoon

Wendy Watson Nelson

Usa ka Gabii uban ni Presidente Russell M. Nelson

Tibuok Kalibutan nga Debosyonal alang sa mga Young Adult • Enero 8, 2017 • Brigham Young University

Salamat, sa choir, nianang makapatandog nga musikal nga pasundayag.

Akong minahal nga mga kaigsoonan, gimahal namo kamo ug ganahan nga makauban kamo! Sa pagkatinuod kamo ang paglaum sa Israel, mao nga samtang motanyag ko og pipila ka hunahuna, nag-ampo ko nga ang Espiritu Santo mohatud sa tukma nga mensahe nga inyong gikinahanglan.

Sa wala pa mi magminyo, usa ko ka propesor sa marriage and family therapy sobra sa 25 ka tuig—ang katapusang 13 dinhi gyud sa Brigham Young University. Nakatambag ko og liboan ka managtiayon ug nakadungog og usa ka makapahugno nga istorya bahin sa nagkagubot nga mga pamilya ug nabungkag nga mga relasyon. Direkta nakong nakita kon unsay mosalir sa kaminyoon ug unsay dili. Nahibaloan nako unsay makaayo sa grabe kagubot nga mga kaminyoon ug unsay makaguba sa uban sa usa lang ka gabii. Busa karon, tugutan ba ko ninyong mamulong bahin sa siguradong usa sa inyong pinakapaborito nga mga hilisgutan? Gugma ug kaminyoon?

Ako ganahang mopakigbahin og upat ka kamatuoran nga akong gituohan nga dili lang moluwas ninyo sa wala kinahanglana nga kasakit apan motabang ninyo nga makahimo, ug makapili, og matarung nga kapikas ug dayon magmugna og malipayong pamilya ug usa ka produktibong pamilya.¹

Karong gabhiona unta maghunahuna mo nako isip inyong “Tiya Wendy” samtang mamulong ko kaninyo gikan sa akong kasingkasing sama sa akong buhaton—ug gibuhat—sa kaugalingon nakong mga pag-umangkon. Busa, ania ang upat ka kamatuoran ni Tiya Wendy bahin sa gugma ug kaminyoon:²

Kamatuoran #1: Ang mga kamatuoran bahin sa gugma ug kaminyoon gidala nganha ninyo pinaagi sa Espiritu Santo gikan sa atong Langitnong Amahan. Siya mimando nga ang kaminyoon dili mailisan nga bahin sa Iyang plano sa kalipay.³ Ang Espiritu mao ang mensahero niining mga kamatuoran. Giawhag ko kamo nga maninguha sa pagsabut niini.

Sukwahi niini, ang mga bakakbahin sa gugma ug kaminyoon nagagikan, ug gipasiugdahan ni Satanas ug sa iyang mga sulugoon. Ang kaaway nagmaya sa matag higayon nga makaagni siya og biktima sa pagdawat sa bisan unsa nga makadaut o makapaubos sa gugma ug kaminyoon. Hinoon, ang kamatuoran usa ka kamatuoran, ang mga bakak mga bakak gayud, ug walay ingon kamaayo nga pamaligya, pangampanya, o adbokasiya ang makausab gayud niana.

Kamatuoran #2: Ang personal nga kaputli mao ang labing importante nga butang sa tinuod nga gugma. Kon mas putli ang inyong hunahuna ug mga pagbati, inyong mga pulong ug mga buhat, mas modako ang inyong kapasidad sa paghatag ug pagdawat og tinuod nga gugma.

Saligi ko niini: Matag higayon nga inyong ipadangat ang inyong gibati ngadto sa inyong Langitnong Amahan diha sa pag-ampo, ug dayon maminaw; matag higayon nga magtuon kamo sa mga kasulatan nga mangita og mga tubag sa mga pangutana sa inyong kasingkasing; matag higayon nga likayan ninyo ang bisan unsa nga makadaut sa inyong espiritu (sama sa pornograpiya); matag higayon nga mosimba kamo diha sa templo; matag higayon nga makakita kamo og impormasyon nga makapasarang sa ordinansa sa katigulangan, kamo nagpili nga mopalambo sa inyong personal nga kaputli.

Ang inyong umaabut nga kapikas magpasalamat ninyo tungod kay niana gayud nga gutlo mangandam mo alang sa tinuod nga kasuod sa kaminyoon. Busa, kon wala pa mo maminyo ug naghunahuna kon unsaon gayud pagpangandam alang sa tinuod nga gugma, ang tubag mao: Buhata kon unsay angay sa pagpabilin sa inyong mga hunahuna, pagbati, pulong, ug buhat nga putli. Dapita ang Espiritu sa paggiya kaninyo. Motabang Siya kaninyo! Ug kon minyo mo, ang akong tambag mao ra gayud gihapon!

Samtang naningkamot mo nga mahimong mas putli, mas makauban ninyo ang Espiritu Santo. Ang inyong abilidad sa pagdawat og personal nga pagpadayag molambo, nga nagpasabut nga makabaton mo og mas klaro nga direksyon sa inyong kinabuhi. Mobati mo og dugang nga kalinaw ug dugang nga kalipay, dili kaayo magmagul-anon, ug mas malaumon bahin sa inyong ugma. Makabaton usab kamo og napalambo nga katin-aw sa hunahuna samtang magtuon ug magtrabaho mo. Ug, agig dugang niining dakong mga ganti sa pagpaningkamot matag adlaw aron mahimo gayung mas putli, mapalambo ninyo ang inyong abilidad nga makasinati sa tinuod nga kasuod sa kaminyoon.

Mao kini nganong makadaut gayud ang pornograpiya! Sukwahi sa unsay gipangangkon sa mga nagpasiugda niini, ang pornograpiya sa tinuod lang magpugong ninyo sa pagsinati sa labing talagsaong matang sa kasuod.

Karon, kining sunod nga kamatuoran, ang Kamatuoran #3, mahimong makapalibug sa inyong hunahuna tungod kay sukwahi gayud kini sa unsay gustong patuohan sa kaaway ug kadaghanan sa kalibutan bahin sa gugma ug kaminyoon.

Kamatuoran #3: Isip importante nga bahin sa pagpahayag sa ilang gugma, gusto sa Ginoo nga ang bana ug asawa moambit sa katalagsaon ug kalipay sa kasuod sa kaminyoon.

Ang kasuod sa kaminyoon gi-orden sa Dios. Gimando ug gidayeg Niya kini tungod kay nagpaduol kini sa bana ug asawa ngadto sa Ginoo! Ang tinuod nga kasuod sa kaminyoon naglangkob sa tibuok kalag sa matag kapikas. ⁴ Kini ang panaghiusa sa lawas ug sa espiritu sa bana ngadto sa lawas ug sa espiritu sa iyang asawa.

Kanang panaghiusa sa kalag nagrepresentar kon sa unsang paagiha gayud nga ang bana ug asawa nahiusa diha sa tanang aspeto sa ilang kinabuhi. Nagtambayayong sila isip managkauban. Sila nag-ampo, nagdula, nanlimbasug, naglambo, ug nalingaw sa kinabuhi nga dungan. Nagsakripisyo sila alang sa usag usa ug nag-awhag sa usag usa nga mahimo kon unsay ilang gipakatawhan.

Minahal nakong mga kaigsoonan, ang kasuod sa kaminyoon sagrado. Gani, ang bana ug asawa mas duol pa sa Dios kon mahiusa sa tinuod nga kasuod sa kaminyoon.

Busa, unsaon man ninyo sa pagpangandam alang niana nga kasuod? Kinahanglan kamong magpakabuhi sa matarung nga paagi aron ang Espiritu mahimong kauban ninyo ug sa inyong kapikas.

Modala kini ngadto sa Kamatuoran #4: Alang sa tinuod nga kasuod sa kaminyoon, ang Espiritu Santo kinahanglan gayud nga malambigit. Dili gayud kini posible nga mabatunan ang matang sa mga kasinatian sa kasuod nga gawas sa kaminyoon nga inyong mabatunan sa sulod tungod kay ang Espiritu wala diha.

Si Elder Parley P. Pratt nagtudlo nga ang Espiritu Santo dunay abilidad sa pagpalambo, pagpadako, pagpatubo, ug paglimpyo sa “tanang natural nga mga gana ug mga pagbati.” ⁵ Hunahunaa lang: Makalimpyo Siya sa inyong mga pagbati! Busa, ang bisan unsa nga makadapit sa Espiritu sa inyong kinabuhi, ug sa kinabuhi sa inyong kapikas ug sa inyong kaminyoon, mopalambo sa inyong abilidad sa kasuod sa kaminyoon. Ingon kini kayano, ug katulukibon, sama niana!

Sa laing bahin, ang bisan unsa nga makapasilo sa Espiritu mopaminos sa inyong abilidad nga mahiusa sa inyong kapikas. Ang mga butang sama sa kasuko, kahigal, dili pagpasaylo, panagbingkil, imoralidad, ug wala mahinulsuli nga sala mopaminos sa inyong pagsulay sa kasuod sa kaminyoon ngadto sa butang nga dili molabaw sa usa ka sekswal nga kasinatian.

Busa, sa pagribyu: Samtang ang kalibutanong pakighilawas ubos sa impluwensya sa kalibutan ug sa kaaway ug naglambigit og kalibutanon, mahilayon, ug yawan-on nga mga gana, ang gi-orden sa Dios nga kasuod sa kaminyoon ubos sa impluwensya sa Espiritu ug naglambigit og gipalambo ug gilimpyo sa Espiritu nga mga gana. Ang kamatuoran mao, kon mas putli kamo, mas mahimong talagsaon ang inyong kasuod sa kaminyoon. ⁶

Sa kalibutanong pakighilawas, mahimo ang bisan unsa. Sa kasuod sa kaminyoon, gihimo ang talagsaong pag-atiman aron malikayan ang bisan unsa ug ang tanan—gikan sa sinultihan ngadto sa musika ngadto sa mga salida—nga makapasilo sa Espiritu, sa inyong espiritu, o sa inyong kapikas.

Samtang ang kalibutanong pakighilawas puno sa kahigal ug mopatay sa gugma, ang kasuod sa kaminyoon makamugna og dugang nga gugma.

Ang kalibutanong pakighilawas mopaubos sa kalalakin-an ug sa kababayen-an ug sa ilang mga lawas, samtang ang kasuod sa kaminyoon motahud sa kalalakin-an ug sa kababayen-an ug modayeg sa lawas isip usa sa dakong ganti sa mortal nga kinabuhi.

Sa kalibutanong pakighilawas, ang mga indibidwal mobati nga gigamit, giabusaran, ug sa katapusan mas magul-anon. Sa kasuod sa kaminyoon, ang mga kapikas mobati nga mas nagkahiusa ug gihigugma, mas naamumahan ug nasabtan.

Ang kalibutanong pakighilawas modaut ug sa katapusan moguba sa mga relasyon. Ang kasuod sa kaminyoon molig-on sa mga kaminyoon. Kini mosuporta, moayo, ug mobalaan sa kinabuhi sa mga kapikas ug sa ilang kaminyoon.

Ang kalibutanong pakighilawas nahisama sa sintunado nga tunog sa flute, samtang ang kasuod sa kaminyoon nahisama sa katalagsaon sa tibuok orchestra. ⁷

Ang kalibutanong pakighilawas nahimong hingpit nga obsesyon tungod kay wala gayud kini makatuman sa mga saad niini. Ang gi-orden sa Dios nga kasuod sa kaminyoon mahimayaon ug magpadayon sa kahangturan alang sa mga bana ug mga asawa nga nagtuman sa pakigsaad.

Sa ato pa, ang kasuod sa kaminyoon nga gitugutan sa Espiritu panalanginan sa Ginoo ug makapabalaan. ⁸

Karon, ang pagmugna og lig-on, malipayong kaminyoon dili sayon! Makapamatuod ko niana. Apan kini modala gayud kaninyo og kalipay!

Sa among ika-10 nga anibersaryo sa kaminyoon, naghunahuna ko kon unsay akong mahatag sa akong bana nga magrepresentar sa kalipay nga gidala sa among kaminyoon ngari kanako. Kini ang akong gihatag niya:

Usa ka swing!

Minahal nakong mga kaigsoonan, nga among gihigugma, kon tuyuon ninyo sa pag-implementar kining upat ka kamatuoran, masaligon ko nga makaugmad kamo og malipayong kaminyoon nga mopatunhay ug mohupay kaninyo sa kahangturan. Ang kaminyoon nga motugot kaninyo nga mahimong mas labaw pa kay sa inyo gayung makab-ot kon kamo ra.

Ako mopamatuod nga ang kaminyoon maoy usa sa labing dako nga mga pribilehiyo nga gihatag sa Dios sa Iyang mga anak, nga ang kaminyoon mahimong tinubdan sa dili hitupngan nga kalipay, ug ang personal nga kaputli mao ang importante nga butang ngadto niana nga kalipay. Sa pangalan ni Jesukristo, amen.