Alofa ma le Faaipoipoga
O Se Afiafi ma Peresitene Russell M. Nelson
Faigalotu i le Lalolagi Atoa mo Talavou Matutua • 8 Ianuari , 2017 • Iunivesite o Polika Iaga
Faafetai, i le aufaipese, mo lena viiga matagofie.
Ou uso e ma tuagane pele, ma te alolofa ma fiafia e faatasi ma outou! O outou moni o faamoemoe o Isaraelu, o le mafuaaga lea a o ou tuuina atu ni nai manatu, ou te tatalo o le a tiliva atu e le Agaga Paia le savali tonu tou te manaomiaina.
A o lumanai ai le ma faaipoipoga, sa avea au ma se polofesa o fomai o faaipoipoga ma aiga mo le silia ma le 25 tausaga—o le 13 mulimuli o iinei i le Iunivesite o Polika Iaga. Sa ou fautuaina le faitau afe o ulugalii ma ou faalogo ai i lea tala ma lea tala matautia e uiga i aiga malepelepe ma mafutaga ua faaleagaina. Sa ou vaai patino i mea sa aoga i faaipoipoga ma mea sa le aoga. Sa ou aoao i mea e mafai ona faamaloloina e oo lava i faaipoipoga sa matua afaina ma mea e mafai ona faatamaia ai isi e toetoe lava i se po se tasi. O le aso nei la, e mafai ona outou faatagaina au e talanoa atu ia te outou e uiga i se mea e mautinoa lava o se tasi o a outou autu tou te fiafia i ai? Alofa ma le Faaipoipoga?
Ou te fia faasoaina atu ni upumoni se fa ou te talitonu o le a le gata e laveaiina outou mai le lototiga le manaomia ae o le a fesoasoani foi ia te outou e avea ai, ma filifili ai foi se toalua amiotonu ma fatuai ai se faaipoipoga fiafia ma se aiga uluola.1
O le po nei ou te faamoemoe o le a outou mafaufau ia te au o “Aunty Wendy” a o ou talanoa atu mai lo’u loto e pei ona ou faia—ma tatau ai—i fanau a ou uso ma tuagane. O upumoni la nei e fa a Aunty Wendy e uiga i le alofa ma le faaipoipoga:2
Upumoni #1: O upumoni e uiga i le alofa ma le faaipoipoga e avatu ia te oe e le Agaga Paia mai lo tatou Tama Faalelagi. O Ia sa folafolaina le faaipoipoga e avea ma se vaega le masuia o Lana fuafuaga o le fiafia.3 O le Agaga o le avefeau moni lea o nei upumoni. Ou te uunaia outou ia saili atu ia malamalama i ai.
I le isi itu, o, pepelo uma e uiga i le alofa ma le faaipoipoga e pogai mai ma e faatumauina pea e Satani ma ana au. E fiafia le fili i taimi uma na te faatosinain ai se tagata ua afaina e taliaina soo se mea e faaleagaina pe faaumatiaina le alofa ma le faaipoipoga. Peitai, o le upumoni o le upumoni lava ia, ma o pepelo o pepelo lava ia, ma e le mafai e le tele o faasalalauga, faatosinaga, po o faalauiloaga atamamai ona suia lena mea.
Upumoni #2: O le mama faaletagata lava ia o le ki lea i le alofa moni. O le faateleina lava o le mama o ou mafaufauga ma lagona, o au upu ma amioga, o le faateleina foi lena o lou gafatia e avatu ai ma talia le alofa moni.
Talitonu mai ia te au i le mea lenei: O taimi uma lava e te sasaa atu ai lou loto i lou Tama Faalelagi i le tatalo, ona e faalogo lea; o taimi uma e te suesue ai i tusitusiga paia e saili ai ni tali i ni fesili o lou loto; o taimi uma e te aloese ai mai soo se mea } o le a faamanualiaina ai lou agaga (e pei o ponokalafi); o taimi uma e te tapuai ai i totonu o le malumalu; o taimi uma e te maua ai se faamatalaga e agavaa ai se tuaa mo se sauniga, o loo e filifili e faateleina lou mama faaletagata lava ia.
O le a faafetai atu lou toalua i le lumanai ia te oe ona i lena lava taimi o le a e saunia ai mo le alofa moni faamamai faaleulugalii. O lea la, afai o loo e nofofua ma tuufesili pe faapefea ona sauni mo le alofa moni silisili, o le tali o le: Ia faia soo se mea e tatau ai e tausia ai ou mafaufauga, lagona, upu, ma amioga ia mama. Valaaulia le Agaga e taiala oe. O le a Ia fesoasoani ia te oe! Ma afai ua e faaipoipo, o lau fautuaga e tutusa lelei!
A e galue ia faateleina lou mama, o le a e maua le Agaga Paia e faatasi pea lava pea ma oe. O lou gafatia e maua ia faaaliga faaletagata lava ia o le a faateleina, o lona uiga, o le a manino atili le taitaiga o lou olaga. O le a e lagonaina atili le filemu ma le olioli, faaitiitia le tuuatoatasi, ma faateleina le faamoemoe e uiga i lou lumanai. O le a faateleina foi le manino o lou mafaufau a o e a’oga ma faigaluega. Ma i se faaopoopoga i nei taui sili mo le galue ia mama atili teisi i aso uma, o le a e faatelelina ai lou gafatia e lagonaina le alofa moni faamamai faaleulugalii.
O le mafuaaga lenei e matua faataumaoi ai lava ponokalafi. E ese ai mai mea uma o loo taua e tagata o loo faalauiloaina ponokalafi, o le a taofia moni lava e ponokalafi oe mai le lagonaina o le ituaiga o alofa faamamai sili ona ofoofogia.
Ia o le isi upumoni lenei, Upumoni #3, atonu e fenumiai ai lou mafaufau ona o le faafeagai tonu lea o mea e manao le fili ma le tele o le lalolagi e faatalitonu ai oe e uiga i le alofa ma le faaipoipoga.
Upumoni #3: I le avea ai ma se vaega taua o le faailoaga o lo la alolofa, e finagalo le Alii i se tane ma se ava ia tofusia i mea ofoofogia ma fiafiaga o le alofa faamamai faaleulugalii.
O le alofa faamamai faaleulugalii ua faauuina e le Atua. Ua poloaiina ma fautuaina e Ia ona e tosoina maia faatasi se tane ma se ava ia latalata atili ma latalata atu ai i le Alii! O le alofa moni faamamai faaleulugalii e aofia ai le agaga atoa o le tasi i le isi.4 O le tuufaatasia lea o le tino ma le agaga o le tane ma le tino ma le agaga o lana ava.
O lena tuufaatasiga faaleagaga o le faatusa lena o le auala e tuufaatasia ai se tane ma se ava i vaega uma o lo la olaga. La te galulue faatasi o se paaga. La te tatalo, taaalo, tauivi, tuputupu ae, ma olioli faatasi i le olaga. La te ositaulaga mo le tasi ma le isi ma faamalosiau e le tasi le isi ina ia avea ma tagata atoa na la fananau mai e avea ai.
Ou uso e ma tuagane, o le alofa faamamai faaleulugalii e paia. O le mea moni, e mafai e se tane ma se ava ona latalata atili atu i le Atua pe a tuufaatasia i le alofa moni faamamai faaleulugalii.
E mafai la faapefea ona outou saunia mo se alofa faamamai faapena? E manaomia ona e ola amiotonu ina ia mafai ona avea le Agaga ma soa ia te oe ma lou toalua.
Ona taitai atu ai lea i le Upumoni #4: Mo le alofa moni faamamai faaleulugalii, e manaomia ona aofia ai le Agaga Paia. E le mafai ona i ai le ituaiga o aafiaga faamamai lea i fafo atu o le faaipoipoga lea e mafai ona e maua i totonu [o le faaipoipoga] ona o le a le i ai le Agaga.
Sa aoao mai Elder Parley P. Pratt e i ai i le Agaga Paia le gafatia e “faateleina ai, faalautele, faatupulaia, ma faamama ia faananauga natura ma lagona faamamai.”5 Mafaufau: E mafai ona Ia faamamaina ou lagona! O le mea lea, soo se mea lava e valaauliaina le Agaga i lou olaga, ma le olaga o lou toalua ma le lua faaipoipoga, o le a faateleina ai lou gafatia e lagonaina ai le alofa faamamai faaleulugalii. E faigofie lava ma e loloto faapena!
I se isi itu, soo se mea lava e faatiga i le Agaga o le a faaitiitia ai lou tomai e tasi ai ma lou toalua. O mea e pei o le ita, tuinanau, le lotofaamagalo, finauvale, ola le mama, ma agasala e le salamo ai o le a faaitiitia ai lou taumafai mo le alofa faamamai faaleulugalii i se mea e le sili atu lava nai lo le na o se aafiaga faalefeusuaiga.
O lea la, e toe ta’u atu: E ui o feusuaiga faalelalolagi ua i lalo o faatosinaga a le lalolagi ma le fili ma ua aofia ai faananauga faaletino, nautino ma faaletiapolo, ae o le alofa faamamai faaleulugalii ua faauuina e le Atua ua i lalo o le faatosinaga a le Agaga ma ua aofia ai faananauga ua faaleleia ma faamamaina e le Agaga. O le mea moni, o le tele lava o lou mama, o le tele foi lena o le ofoofogia o lou alofa faamamai faaleulugalii o le a i ai.6
I feusuaiga faalelalolagi, soo se mea lava e faatagaina ai. Ae i le alofa faamamai faaleulugalii, e faia se faaeteetega tele lava e aloese ai mai soo se mea ma mea uma—mai le gagana i musika i atatifaga—e faatiga i le Agaga, lou agaga, po o le agaga o lou toalua.
E ui o feusuaiga faalelalolagi e faatuinanau ma fasiotia ai le alofa, ae o le alofa faamamai faaleulugalii na te fofoaina atili le alofa.
O feusuaiga faalelalolagi na te faaleagaina alii ma tamaitai ma o latou tino, ae o le alofa faamamai faaleulugalii na te faamamaluina alii ma tamaitai ma olioli i le tino o se tasi o taui sili o le olaga faaletino.
I feusuaiga faalelalolagi, e mafai ona lagona e tagata le faaaogaina, faatautalaina, ma i le iuga e atili ai lava ona tuuatoatasi. I le alofa faamamai faaleulugalii, e lagona atili e taitoalua le lotogatasi ma le alofaina, faafaileleina ma le malamalama atili.
O feusuaiga faalelalolagi na te faataumaoiina ma iu ai lava ina faaleagaina ia mafutaga. O le alofa faamamai faaleulugalii na te faamalosia faaipoipoga. Na te lagolagoina, faamaloloina, ma faapaiaina olaga o taitoalua ma a latou faaipoipoga.
O feusuaiga faalelalolagi ua faatusa i le leo o se fagufagu, ae o le alofa faamamai faaleulugalii ua faatusa i le mamalu o se aufaaili atoa.7
O feusuaiga faalelalolagi e avea ma tuinanauga atoa ona na te le faataunuuina ana folafolaga. O le alofa faamamai faaleulugalii ua faauuina e le Atua e mamalu ma o le a faaauau pea e faavavau mo tane ma ava tausi-feagaiga.
I se faapuupuuga, o le alofa faamamai faaleulugalii e faamaonia e le Agaga, ua faamanuiaina e le Alii ma o loo faapaiaina.8
Ia, o le fatuina o se faaipoipoga malosi ma fiafia e le faigofie! Ou te tautino atu lena mea. Ae o le a ia aumaia ia te outou le olioli!
Mo le faamanatuina o le 10 tausaga o le ma faaipoipoga, sa ou tau manatu po o le a se mea ou te foai atu i lo’u toalua e fai ma faatusa o le olioli ua aumai e le ma faaipoipoga ia te au. O le mea lea na ou foai atu ia te ia:
O se suigi!
Ou uso e ma tuagane pele, o e ma te alolofa i ai, afai o le a outou faatino ma le loto i ai nei upumoni e fa, ou te talitonu lava o le a mafai ona outou fausiaina se faaipoipoga fiafia o le a lagolagoina ma faamafanafanaina outou e faavavau. O se faaipoipoga o le a faatagaina ai outou e avea ma tagata sili atu i lo ē mafai ona outou avea ai a o tuua ai na o outou.
Ou te molimau atu o le faaipoipoga o se tasi o faamanuiaga aupito silisili ua aumai e le Atua i Lana fanau, o le faaipoipoga e mafai ona avea ma puna o le olioli lemafaatusalia, ma o le mama faaletagata lava ia o le ki lea i lena olioli. I le suafa o Iesu Keriso, amene.
© 2017 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 10/16. Faamaonia le faaliliuga: 10/16. Faaliliuga o le “Love and Marriage.” Samoan. PD60002798 890