Usa ka Lig-on nga Sumpay
Usa ka Gabii uban ni Elder David A. Bednar
Tibuok Kalibutan nga Debosyonal alang sa mga Young Adult • Septyembre 10, 2017 • Apex North Carolina Stake Center
Ang Kadena sa mga Henerasyon
Ang akong mensahe gibase sa usa ka kasinatian namo ni Susan niadtong Septyembre 1999. Si Presidente Gordon B. Hinckley miadto sa Ricks College, nga karon BYU–Idaho, aron sa pagpahinungod sa bag-ohay lang nahuman nga Spencer W. Kimball Building. Among dungog ni Susan ang pag-abi-abi ni President ug Sister Hinckley atol sa usa ka talagsaon nga espirituhanon ug dili makalimtan nga adlaw.
Samtang didto siya sa campus, si Presidente Hinckley namulong sa usa ka debosyonal ngadto sa mga estudyante, mga kawani, ug mga magtutudlo. Naglingkod ko sa atubangan pipila lang ka piye gikan sa Presidente sa gipahiuli nga Simbahan sa Ginoo samtang iyang gihatag ang iyang mensahe. Bisan karon, niini gayud nga higayon samtang nagtan-aw ko sa inyong mga nawong ug namulong kaninyo, klaro kaayo ang akong panumduman ni Presidente Hinckley nga nagbarug sa pulpito sa Hart Auditorium. Nahinumdom ko sa mga baruganan nga iyang gitudlo, sa tono sa iyang tingog ug ekspresyon sa nawong, ug sa mga butang nga akong nakat-unan pinaagi sa gahum sa Espiritu Santo samtang naminaw ko niya nga namulong.
Dapiton ko kamo sa pag-apil karon sa usa ka bahin niana nga debosyonal.
“Niadtong Sabado ug Dominggo didto kami sa Columbus, Ohio, sa pagpahinungod og bag-o ug matahum nga templo. Ang templo ug ang duol nga ward chapel napuno sa tanang unom ka mga sesyon. Ang Espiritu sa Ginoo anaa, ug usa ka dako ug importanting okasyon ang pagpahinungod sa ikaduha nga templo sa kasaysayan sa Simbahan diha sa maanindot nga estado sa Ohio.
“Uban kanako ang akong asawa ug anak nga babaye, kinsa anaa didto aron sa pag-abag sa iyang inahan. Sa among kalipay, ang usa ka apo nga babaye ug duha sa iyang mga anak, among mga apo sa tuhod, miabut gikan sa St. Louis, diin sila nagpuyo. …
“Samtang naglingkod ko didto sa templo sa Columbus, Ohio, sa miaging adlaw, nagtan-aw sa akong mga apo sa tuhod, usa ka talagsaong butang nahitabo kanako. Kalit nakong namatikdan nga nagbarug ko sa tunga nga dunay tulo ka mga henerasyon nga akong kaila nga nag-una kanako ug tulo ka mga henerasyon nga natawo human kanako. Sa literal nga paagi ang akong kasingkasing mibati ngadto sa akong mga amahan. Ang akong kasingkasing usab mibati ngadto sa akong kaliwatan. Naghanduraw ko og usa ka kadena sa mga henerasyon; kana nga kadena moabut ngadto sa karaan na kaayong panahon nga wala kaayo kitay nasayran sa pagkakaron. Kini karon miabut og tulo ka henerasyon human kanako. Akong gihunahuna kana nga kadena, nga sa karon wala maputol ug nagsinaw ug lig-on. …
“Karon naghunahuna ko, samtang naglingkod ko sa templo, nga ako usa ka sumpay, nagdugtong sa tanang nangagi nga mga henerasyon ug sa tanang henerasyon sa umaabut. Tanan nga anaa kanako kalabut sa hunahuna ug lawas, unod ug mga parte sa lawas ug lutahan ug utok, miabut isip kabilin niadtong nag-una kanako. Ug tanan nga anaa sa akong kaliwatan miagi kanako ngadto kanila. Dili ako angay nga moputol niana nga kadena. Ang akong kaliwatan dili angay nga moputol niana nga kadena. …
“Unta makasulti ako og klaro aron mapahibalo kaninyo mga batan-ong tawo nga ania karon sa akong gibati didto sa templo, ang hilabihan ka dakong tinguha nga ako, ni ang akong mga kaliwatan, dili gayud moputol sa kadena sa mga henerasyon sa among pamilya.
“Kaninyo ako moingon uban sa tanang kusog nga akong mahimo, ayaw pagkahimong huyang nga sumpay sa inyong kadena sa mga henerasyon. Miabut kamo niining kalibutana uban sa usa ka talagsaong kabilin. Gikan kamo sa talagsaong mga lalaki ug babaye, mga lalaki nga isug ug lig-on, mga babaye nga daghan og nakab-ut ug hilabihan ang pagtuo. Ayaw sila pakyasa. Ayaw gayud pagbuhat og bisan unsa nga makapahuyang sa kadena diin kamo mahinungdanon nga bahin.”1
Ang imahe sa kadena sa mga henerasyon klaro sa akong hunahuna. Ang pasidaan nga dili mahimong huyang nga sumpay sa kadena sa mga henerasyon kusog diha sa akong kasingkasing. Ang tambag nga dili gayud mobuhat og bisan unsa nga makapahuyang sa kadena sa mga henerasyon mituhop sa akong kalag. Alang kang Susan ug kanako, ang yano ug gamhanang mga leksyon nga among nakat-unan nianang hapon sa Septyembre miimpluwensya alang sa kaayohan sa among kaminyoon, among pamilya, ug matag aspeto sa among mga kinabuhi.
Ang Pamilyang Call
Isip batan-ong babaye nga nagdako sa iyang yutang natawhan sa Afton, Wyoming, si Susan nakaila ug midayeg sa usa ka pamilya sa iyang ward nga usa ka talagsaong ehemplo sa kadena sa mga henerasyon.
Pakigpulong ni Sister Susan K. Bednar
Nagpuyo sa ward diin ko nagdako mao ang usa ka talagsaong pamilya nga adunay 14 ka mga anak. Ang inahan ug amahan, si Bessie ug Evan Call, naminyo sa templo ug nagpabilin nga matinuoron ug matinud-anon sa ilang mga pakigsaad. Gitudloan nila ang ilang mga anak sa doktrina sa gipahiuli nga ebanghelyo ug napanalanginan nga mopadako og matarung nga pamilya.
Pipila ka tuig ang milabay, nakahimamat ko og matahum nga batan-ong babaye sa usa ka sakrament miting nga akong gitambungan. Samtang iyang gipaila ang iyang kaugalingon kanako, mihisgut siya nga nakaila ko sa iyang inahan. Ang iyang inahan anak ni Brother ug Sister Call ug gimanggad nga higala sukad sa akong kabatan-on. Kining batan-ong babaye nga akong nahimamat sa sakrament miting apo sa mga Call. Human mangutana, akong nadiskubrihan nga ika-44 siya sa 96 ka mga apo, ug ang iyang bag-ong natawong anak mao ang ika-230 nga apo sa tuhod ni Bessie ug Evan Call. Nahingangha ako niini nga gidaghanon. Pagkadako nga kaliwatan!
Naghunahuna ko sa makadaghan sukad niadto: Unsa kaha kon si Brother ug Sister Call wala maminyo sa templo o mituman sa ilang mga pakigsaad? Unsa kaha kon wala sila magpabiling matinuoron sa “hilabihang pagtuo” sa nag-unang mga henerasyon? Unsa kaha kon wala nila tudloi ang ilang mga anak sa ebanghelyo pinaagi sa ehemplo ug panudlo? Unsa kaha kon sila mga huyang nga sumpay sa kadena sa ilang mga henerasyon? Pila ka mga tawo kaha ang naapektuhan niini? Ang tubag klaro. Ang mga desisyon nga gihimo niini nga magtiayon nakaapekto sa sobra sa 300 ka mga sakop sa pamilya—ug ang gidaghanon nagpadayon sa pagtubo samtang nagkadaghan ang mga apo sa tuhod ug mga apo sa apo nga miabut niini nga pamilya.
Itandi kini ngadto sa lahi nako nga kasinatian uban sa usa ka suod nga dili miyembro nga higala nga akong kaila sa dugay nang panahon. Hunahunaa ang akong kakurat sa dihang kaswal niyang gisulti usa ka adlaw nga duna siyay Mormon nga lola. Nakalitan ko tungod kay wala siyay nahibaloan ug dili gayud interesado nga mahibalo sa doktrina ug mga baruganan sa ebanghelyo. Bisan tuod wala ko masayud sa tubag, kanunay akong naghunahuna, “Asang dapita nahitabo ang pagkaputol sa kadena sa iyang mga henerasyon?” Ang siguradong konklusyon mao nga ang akong higala wala gayud makatagamtam sa mga panalangin sa ebanghelyo ni Jesukristo sa iyang kinabuhi tungod sa mga desisyon nga gihimo niadtong nag-una kaniya.
Isip usa ka sumpay sa kadena sa inyong mga henerasyon, kinahanglan ninyong masabtan nga ang mga desisyon nga inyong himoon karon ug sa umaabut dili lamang kabahin ninyo. Ang inyong mga desisyon makaapekto niadtong nag-una ug niadtong nagsunod kaninyo. Ang ehemplo ug impluwensya sa inyong pagsunod sa mga baruganan sa ebanghelyo, ang gahum sa inyong personal nga pagkamatarung, ug ang mga sangputanan sa mga desisyon nga inyong gihimo alang sa maayo o dautan makaapekto og daghang mga henerasyon. Palihug pagmahimong lig-on nga sumpay sa kadena sa inyong mga henerasyon.
Aduna akoy pagpamatuod sa gipahiuli nga ebanghelyo ni Jesukristo. Magpamatuod ko nga ang kaminyoon tali sa lalaki ug babaye gi-orden sa Dios ug nga ang pamilya mahinungdanon ngadto sa mahangturong destinasyon sa mga anak sa Dios.
Magpamatuod ko nga tungod sa Iyang maulaong sakripisyo, si Jesukristo motubos kanato gikan sa atong mga sala ug sayop nga mga pagpili ug mohatag usab kanato og kalig-on labaw sa atong kaugalingon aron magpabiling matinuoron sa ebanghelyo ug sa mga pakigsaad nga atong gihimo, ilabi na kon ang mga kasinatian sa kinabuhi lisud alang kanato.
Nasayud ko nga ang Espiritu Santo nagdala og espirituhanong mga impresyon sa atong hunahuna ug kasingkasing ug motabang nato sa pagdiskubre ug pag-implementar og mga paagi nga mahimong matinud-anong sumpay sa kadena sa atong mga henerasyon. Sa pangalan ni Jesukristo, amen.
Katapusan sa pakigpulong ni Sister Susan K. Bednar
Usa ka Lig-on nga Sumpay
Manghinaut ko nga ibase ang akong pakigpulong sa mga pagtulun-an ni Presidente Hinckley bahin sa atong “kadena sa mga henerasyon.” Klaro ug kusganon niyang gihulagway ang unsay dili nato angayang buhaton, nga mao ang mahimong huyang nga sumpay sa kadena sa mga henerasyon. Gusto nakong tutukan ang unsay kinahanglan natong buhaton, nga mao ang pagkahimong lig-on nga sumpay sa kadena sa mga henerasyon.
Sa Doktrina ug mga Pakigsaad 128:18, atong nakat-unan “nga ang yuta hampakon uban sa tunglo gawas kon adunay nagsumpay nga pipila ka matang o lain tali sa mga amahan ug sa mga anak, diha sa pipila ka mga hilisgutan o lain—ug tan-awa unsa kana nga hilisgutan? Kini mao ang bunyag alang sa mga patay. Kay kita kon wala sila dili mahimo nga hingpit; ni sila kon wala kita. Wala kanila ni kanato ang mahingpit kon wala kadto kinsa namatay usab diha sa ebanghelyo; kay gikinahanglan kini sa pagpasiuna sa kapaigoan sa kahingpitan sa panahon, diin nga kapaigoan karon nagsugod na, nga ang tibuok ug walay kulang ug hingpit nga pagkahiusa, ug pagkasumpay sa mga kapaigoan, ug mga yawe, ug mga gahum, ug mga himaya kinahanglan nga mahitabo, ug ipadayag gikan sa mga adlaw ni Adan bisan niini nga panahon.”2
Dapiton ko kamo sa pagkonsiderar og duha ka sukaranang mga pangutana nga motumaw gikan niini nga kasulatan.
Una nga pangutana: Unsa ang lig-on nga sumpay? Si Presidente Joseph F. Smith mitudlo, “Kinahanglan nga adunay sumpay sa pagkahiusa ug usa ka panaghiusa sa mga ginikanan ug mga anak ug mga anak sa mga ginikanan hangtud nga ang tibuok kadena sa pamilya sa Dios masumpay sa pagkahiusa ngadto sa usa ka kadena, ug silang tanan mahimong pamilya sa Dios ug sa Iyang Kristo.”3
Ang pagpahiuli sa awtoridad ug mga yawe sa priesthood niining katapusang dispensasyon naghimong posible alang sa matag usa kanato sa pagdawat, paghinumdom, ug pagtahud sa mga ordinansa sa indibidwal nga kaluwasan ug kahimayaan sa pamilya. Miabut gayud si Elijah sama sa gisaad aron sa pagtugyan sa mga yawe sa priesthood ug sa awtoridad sa pagbugkos nga mopabati og mga kasingkasing ug mohulma og lig-ong mga sumpay tadlas sa mga henerasyon. Anaa na usab sa yuta niining ulahing mga adlaw ang awtorisado nga mga sulugoon kinsa makahatud sa sagradong mga panalangin nga gihatag sa Manluluwas, “nga bisan unsa ang imong bugkuson diha sa yuta pagabugkuson didto sa langit; ug bisan unsa ang imong bugkuson diha sa yuta, diha sa akong ngalan ug pinaagi sa akong pulong, miingon ang Ginoo, kini nabugkos sa gihapon didto sa mga langit.”4
Busa, “ang pagpuli nga mga ordinansa nga atong gihimo sa templo, sugod sa bunyag, naghimog posible sa usa ka mahangturong dili maputol nga sumpay tali sa mga henerasyon nga nagtuman sa mga katuyoan sa paglalang sa kalibutan.”5
Ikaduha nga pangutana: Sa unsang paagi ang lig-on nga sumpay mopanalipod sa yuta aron dili hampakon og usa ka tunglo? Si Presidente Joseph Fielding Smith mideklarar, “Dili lamang kini kabahin sa bunyag sa mga patay, apan usab sa pagbugkos sa mga ginikanan ug mga anak ngadto sa mga ginikanan, aron adunay ‘tibuok ug walay kulang ug hingpit nga pagkahiusa, ug pagkasumpay sa mga kapaigoan, ug mga yawe ug mga gahum ug mga himaya,’ gikan sa sinugdan ngadto sa katapusan sa panahon. Kon [ang] gahum sa pagbugkos [nga gipahiuli ni Elijah] wala dinhi sa kalibutan, nan ang kalibug mohari ug kagubot mopuli sa kahusay niana nga adlaw nga ang Ginoo moanhi, ug, sa tinuod, dili kini mahimo, kay ang tanang mga butang gidumala ug gipugngan sa hingpit nga balaod diha sa gingharian sa Dios.”6
Nganong tungluhon man ang yuta? “Tungod lamang kay walay pagkasumpay tali sa mga amahan ug sa mga anak—nga mao ang buluhaton alang sa mga patay—nan tanan kita magbarug nga isalikway; ang tanang buhat sa Dios mapakyas ug hingpit nga malaglag. … Ang pagpahiuli niining awtoridad sa [pagbugkos] mao ang panalangin nga nagluwas sa kalibutan gikan sa hingpit nga pagkalaglag inig anhi ni Jesukristo.”7
Kining sukaranang mga kamatuoran sa ebanghelyo nagtabang kanato nga makasabut nga ang “kaminyoon tali sa lalaki ug babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.”8
Ang pipila kaninyo nakasinati og grabeng kasubo diha sa abusado o gubot nga mga relasyon sa pamilya. Ug tungod niini, tingali kamo gamay ra o wala gayuy tinguha nga masumpay ngadto sa mga tawo nga mipahamtang niana nga kasakit ug pag-antus.
Palihug paminaw: ang mahangturong mga sumpay sa pamilya mahiusa lamang pinaagi sa awtoridad sa priesthood ug sa personal nga pagkamatarung. Bisan unsang dautan nga mga butang ang nahitabo sa inyong pamilya, ako mopamatuod ug mosaad nga ang Ginoong Jesukristo mao ang tinubdan sa pagkaayo, pagbag-o, ug pagpahiuli nga inyong gikinahanglan.
Tingali ang paghilak nagpabilin panahon sa kagabhion sa inyong kalisdanan, apan ang kalipay moabut sa kabuntagon sa inyong bag-ong kinabuhi nga nahimong posible pinaagi sa atong Manunubos ug Manluluwas.9
Busa, Unsa Man?
Atol sa mga diskusyon sa importanting mga butang sa Korum sa Napulog Duha ka mga Apostoles, si Presidente Boyd K. Packer kanunayng mangutana, “Busa, unsa man?” Akong nasabtan ang iyang pangutana isip, “Busa, unsang importanting kalainan ang mahimo niini nga ideya, sugyot, o buhat ngadto sa kinabuhi sa mga miyembro sa Simbahan? Makapanalangin ba gayud kini niadtong atong giserbisyuhan?” Buot ipasabut, nagdapit siya kanamo sa paghunahuna sa bili ug padayong implikasyon sa hilisgutan nga among gisabutan. Akong nakita ang pangutana nga “busa, unsa man?” nga makatabang kaayo sa pagtutok sa akong hunahuna sa usa ka isyu ug sa pag-ila sa mga butang nga labing mahinungdanon.
Busa, tingali mangutana mo, “Brother Bednar, unsa man ang ‘busa, unsa man?’ sa imong mensahe kanamo?” Nagtuo ko nga ang tubag niana nga pangutana makita sa tulo ka mga pangutana nga ang uban kaninyo tingali nangutana sa inyong kaugalingon karon.
Daghan ang miapil niini nga debosyonal nga mga batan-ong babaye ug lalaki kinsa unang henerasyon nga mga miyembro sa Simbahan ni Jesukristo sa mga Santos sa Ulahing mga Adlaw. Naminaw kamo ug midawat sa mensahe sa gipahiuli nga ebanghelyo ni Jesukristo, nabunyagan ug nakumpirmahan pinaagi sa tukmang awtoridad sa priesthood, ug karon nagpadayon sa unahan uban sa hugot nga pagtuo diha kang Kristo. Kon bag-o pa kamo o dugay na nga mipasakop sa Simbahan, kamo ang tinubdan sa kalig-on sa Simbahan ug ang kaluwasan sa inyong mga pamilya sa karon ug sa umaabut. Kamo ang unang sumpay sa kadena sa inyong mga henerasyon.
Apan tingali nangutana mo sa inyong kaugalingon, “Isip bugtong miyembro sa Simbahan sa akong pamilya ug tungod kay ako nag-atubang og kusganong oposisyon gikan sa akong mga ginikanan, mga igsoon, ug ubang mga sakop sa pamilya, unsaon nako nga mahimong usa ka lig-on nga sumpay?”
Samtang nagbasa ug naminaw kamo sa mga istorya mahitungod sa unang mga pioneer niining dispensasyon kinsa miantus og pagpanggukod, milahutay og pisikal nga kalisud, ug milakaw tabok sa kapatagan aron manimuyo sa Salt Lake Valley, tingali naghunahuna mo kon makahimo ba kamo sa unsay ilang gibuhat. Apan daghan kaninyo ang nagbuhat sa ilang nabuhat! Ang tukma nga mga kinaiya ug matang sa mga hagit nga inyong giatubang karon tingali lahi kay sa niadtong mga pioneer, apan ang oposisyon sa gipahiuli nga kamatuoran pareho ra karon ug mag-anam ka grabe.
Niadtong Abril 1986, ang pangulo sa usa ka tribu sa central Ghana namatay. Ang miabag sa pagpangandam alang sa lubong mao ang half-brother sa pangulo, si Fred Antwi, kinsa usa pa ka tuig ang milabay nabunyagan ug nakumpirmahan isip miyembro sa Simbahan ni Jesukristo sa mga Santos sa Ulahing mga Adlaw. Wala masayri ni Fred, nagplano ang manghud nga babaye sa pangulo, ang inahang rayna, nga himoon siyang bag-o nga pangulo sa tribu.
Sa bispiras sa lubong, usa ka sakop sa pamilya pribadong nakigsulti ni Fred ug nangutana kaniya, “Nahibalo ka sa plano sa pamilya alang nimo?” Mitubag si Fred, “Wala, wala pa ko sultihi.” Ang sakop sa pamilya dayon miingon, “Ikaw ang mahimong bag-ong pangulo.” Nakalitan si Fred ug kusganong miingon, “Dili! Ang akong relihiyon dili motugot nga mobuhat ako niini.”
Ang pagserbisyo isip pangulo usa ka dungog. Ang pangulo mao ang labing hawud sa iyang mga baranggay, ug kon siya mamulong, ang katawhan mobuhat sigun sa imando kanila. Ang pangulo magdawatan og pinansyal nga suporta, ug bisan unsa nga iyang gibati nga iyang gikinahanglan ihatag kaniya. Si Fred nagserbisyo isip presidente sa branch nianang panahuna nga iyang nasayran ang posibilidad nga mahimong pangulo. Ug dili gayud siya gusto nga moapil sa mga ritwal sa tribu nga supak sa mga baruganan sa ebanghelyo sa Manluluwas.
Karon akong kutluon ang mismong tubag ni Fred sa makapakurat nga pahibalo sa iyang igsoong babaye. “Nianang gabhiona, mi-drayb ko sa sakyanan aron sa pagbisita sa usa sa among tinahud nga katigulangan sa tribu sa duol nga baranggay. Gusto kong makig-istorya niya mahitungod sa balita nga gipaambit kanako. Mipasabut siya, ‘Nasayud ko sa mga plano, ug wala koy mahimo sa pagtabang nimo nga makalikay nga mahimong pangulo.’”
Dayon miingon si Fred, “Nasayud ka nga Kristiyano ko, ug ang akong relihiyon dili motugot nga mahimo kong pangulo tungod kay adunay daghang mga butang nga kinahanglang buhaton sa pangulo nga dili nako buhaton.” Ang tinahud nga sakop sa tribu mitubag, “Nan, balik ngadto sa imong mga lider ug sultihi sila nga Kristiyano ka ug dili mahimo nga pangulo.” Si Fred mitubag, “Mibalik na ko aron sa pagpahibalo sa mga lider, apan gibaliwala nila ang akong mensahe.”
Mipadayon si Fred, “Ang akong half-brother [ang kanhi pangulo] ilubong na sa tungang gabii, mao nga nagdrayb ko sa akong sakyanan sa pinakaulahi sa tanang mga sakop sa pamilya nga diha sa ilang kaugalingong mga sakyanan. Pag-abut sa usa ka eskina sa dalan padulong sa lubong, imbis nga moliko sa wala sama sa uban, miliko ko sa tuo ngadto sa dalan padulong sa Cape Coast ug mipakusog og dagan.”
Sa misunod nga unom ka bulan, walay kontak si Fred sa tibuok pamilya. Nasayran niya sa kaulahian nga kon miadto pa siya sa lubong, siya unta ang itudlo nga sunod nga pangulo, nga mobutang kaniya sa lisud kaayo nga sitwasyon. Sa katapusan iyang nakat-unan nga ang iyang pag-umangkon, ang anak sa inahang rayna, maoy gitawag nga bag-ong pangulo.
Sa pagliko ni Fred sa tuo ug sa pagpadulong sa Cape Coast, gilig-on niya ang unang sumpay sa kadena sa iyang mga henerasyon. Lig-on sa iyang pagpamatuod sa doktrina ug mga baruganan sa gipahiuli nga ebanghelyo, ang dalan sa kinabuhi ni Fred nausab sa milagrusong mga paagi. Siya ug si Sister Antwi mao ang unang full-time nga mga misyonaryo gikan sa West Africa nga gi-assign nga moserbisyo sa Ghana Temple. Karon, si Fred ug ang iyang asawa nagserbisyo isip magtatambag sa kapangulohan sa Accra Ghana Temple ug isip assistant matron.
Isip bag-ong kinabig sa gipahiuli nga Simbahan sa Manluluwas, si Fred napanalanginan ug nalig-on nga mabuntog ang kusganong oposisyon gikan sa iyang pamilya, mga higala, ug kaubanan. Ug si Brother ug Sister Antwi makugihong mitudlo sa ilang mga anak sa ebanghelyo ni Jesukristo ug miestablisar og mga sumbanan sa pagkamatarung diha sa ilang pamilya nga miimpluwensya og mga henerasyon. Sama nga kini nagsugod nila ni Fred ug sa iyang asawa, kini usab magsugod diha kaninyo!
Kaninyo kinsa unang henerasyon nga mga miyembro sa Simbahan: kini magsugod diha kaninyo! Kamo ang mga pioneer alang sa inyong mga katigulangan ug sa inyong kaliwatan. Ang namatay na nga mga sakop sa pamilya kinsa nag-una kaninyo diha sa kadena sa inyong mga henerasyon nag-ampo alang sa inyong tabang, ug kadtong moabut human kaninyo nagsalig sa inyong pagkamatinud-anon. Sa pagkatinuod kamo adunay gahum nga mahimong lig-on nga mga sumpay. Hinumdumi, kini magsugod diha kaninyo. Ug uban sa tabang sa Ginoo, makahimo kamo niini.
Ang pipila kaninyo tingali mangutana sa inyong mga kaugalingon, “Unsaon nako pagkahimo og mahangturong pamilya kon wala pa ako sukad mahimong sakop sa usa ka lig-on nga Santos sa Ulahing mga Adlaw nga panimalay?” Pipila ka mga obserbasyon gikan sa akong kaugalingong kasinatian mahimong makatabang kaninyo.
Ang akong personal nga “mga kadena sa mga henerasyon” managlahi kaayo sa akong inahan ug amahanon nga mga linya sa katigulangan. Diha sa kadena sa akong inahan, ikalima na ko nga henerasyon nga miyembro sa Simbahan. Ang iyang mga katigulangan nagpamiyembro sa Simbahan sa England ug Switzerland sa unang mga adlaw sa Pagpahiuli. Sa ingon, diha sa linya sa akong mama usa ako ka sumpay sa taas nga kadena sa matinud-anong mga henerasyon.
Diha sa kadena sa akong amahan, ako ang unang henerasyon nga miyembro sa Simbahan. Tungod kay ang akong papa wala magpasakop sa Simbahan hangtud sa ulahi na nga bahin sa iyang kinabuhi, ang akong igsoon ug ako maoy unang mga Bednar nga nakadawat sa priesthood. Ako ang una sa among pamilya nga nakaserbisyo isip full-time nga misyonaryo. Busa, sama sa daghan kaayo kaninyo, ako ang unang sumpay sa ebanghelyo sa kadena sa Bednar nga mga henerasyon.
Ang akong amahan maayo, matinud-anon, ug kugihan nga tawo. Gimahal nako siya ug nakakat-on ko og mahinungdanong mga leksyon sa pagtrabaho uban kaniya nga nakatabang nako nga mahimo kon unsa ako karon. Ang akong inahan mitudlo kanako sa pag-ampo ug sa pagmahal sa mga kasulatan. Gimahal nako siya ug gipasalamatan ang iyang pag-ugmad dinhi kanako og hugot nga pagtuo. Makapaikag, hinoon, wala ko kahinumdom nga nag-ampo, nagtuon sa mga kasulatan, o naghimo og home evening isip pamilya sukad. Nag-ampo ug nagbasa ko sa Basahon ni Mormon uban sa akong mama, apan wala gyud namo buhata kining mga butanga nga mag-uban isip amahan, inahan, ug mga anak.
Uban sa tabang sa Ginoo, makahimo kamo og mahangturong pamilya, bisan kon dili kamo gikan sa matang sa Santos sa Ulahing mga Adlaw nga panimalay nga usahay ipakita diha sa mga hapin sa Liahona o Ensign nga mga magasin. Palihug hinumdumi kanunay: kini magsugod diha kaninyo!
Ang kamatuoran nga wala nako masinati ang mga sumbanan sa matarung nga pamilya sa panimalay sa akong kabatan-on nakamugna kanako og dakong tinguha sa pagtrabaho nga makugihon uban ni Susan sa pagsiguro nga ang ingon nga mga sumbanan kanunay nga parte sa panimalay nga among gimugna. Samtang nakigtambag kami sa usag usa ug nangayo og tabang sa among mga pag-ampo, kami nadasig ug napanalanginan sa pagtabang sa among mga anak nga makakat-on sa mga baruganan sa gipahiuli nga ebanghelyo sa Manluluwas. Sigurado nga dili kami hingpit nga mga ginikanan, apan nadawat namo ang espirituhanong mga gasa nga among gikinahanglan ug nakakita og “tabang … lapas sa [among] kaugalingon.”10
Kamo ug ako wala malit-ag sa atong nangagi nga mga kasinatian. Dili kita hingpit nga mga biktima sa atong kasamtangang mga kahimtang o mga bihag sa atong palibut. Ang Espiritu Santo motudlo kanato sa tanang butang nga atong buhaton, lakip ang mga sumbanan sa pagkamatarung sa pamilya diin wala kita makaapil kaniadto. Kini magsugod diha kaninyo! Ug uban sa tabang sa Ginoo, makahimo kamo niini.
Ang pipila kaninyo napasakitan sa mga sakop sa pamilya o tinahud nga mga lider kinsa wala motahud sa sagradong pakigsaad sa kaminyoon. Tingali mangutana kamo sa kaugalingon, “Kon ang akong mga ginikanan o ubang magtiayon nga akong kaila na-sealed sa templo ug wala magmalampuson ang ilang kaminyoon, makalaum ba ko nga ang akong kaminyoon molungtad sa kahangturan?”
Kaninyo nga nakasinati sa kagul-anan sa diborsyo sa inyong pamilya o mibati sa kasakit sa pagkapakyas sa pagsalig, palihug hinumdumi nga kini magsugod pag-usab diha kaninyo! Usa ka sumpay sa kadena sa inyong mga henerasyon tingali naputol, apan ang ubang matarung nga mga sumpay ug ang nahabilin sa kadena importante gihapon sa kahangturan. Makadugang kamo og kalig-on sa inyong kadena ug tingali gani makatabang sa pagpahiuli sa naputol nga mga sumpay. Kana nga buhat matuman sa tagsa-tagsa.
Kita mga anak sa Dios. Sumala sa mahangturong plano sa Amahan alang sa kalipay, kita gitugahan sa gasa sa moral nga kabubut-on ug mga tinugyanan nga adunay kapasidad sa paglihok. Dili lamang kita mga butang nga aghaton sa pagpalihok. Kita mga tinugyanan ngadto sa atong mga kaugalingon ug kinahanglang matinguhaong moapil sa pagpahinabo sa daghan nga pagkamatarung.11
Ang makatagbaw ug malipayon nga kaminyoon dili makit-an; hinoon, kini mamugna sa lalaki ug babaye nga nagtuman sa pakigsaad. Nahadlok ko nga pipila kaninyo tingali walay katapusang nangita sa usa ka butang nga dili gayud makit-an. Walay hingpit nga potensyal nga kapikas nga makapanalipod kaninyo gikan sa emosyonal nga kasakit ug espirituhanong kaguol. Apan diha sa kalig-on sa Ginoo, ang matinud-anong lalaki ug babaye nga naglihok isip tinugyanan makamugna sa makatagbaw nga kaminyoon ug mahangturong pamilya nga gilauman ug gipangandoy nilang maangkon.
Ang dili hinakog nga pagserbisyo diha sa kaminyoon nagkinahanglan og pailub ug paglahutay sa usa ka kalibutan nga walay hunong nga nag-awhag sa paghunahuna sa kaugalingon ug pagkahakog. Apan kini magsugod diha kaninyo samtang kamo molihok ug mopadayon sa unahan uban sa pagtuo diha sa Manluluwas, padayon nga nagtinguha og langitnong panabang, ug matarung nga naggamit sa inyong moral nga kabubut-on. Makahimo kamo niini uban sa tabang sa Ginoo.
Mga Saad, Panalangin, ug Pagpamatuod
Minahal nga mga kaigsoonan, mo-awhag ko kaninyo uban sa tibuok kusog sa akong kalag nga mahimong lig-on nga sumpay sa kadena sa inyong mga henerasyon.
Ang pagkahimong lig-on nga sumpay magsugod diha kaninyo pinaagi sa pagbuhat sa yanong mga butang nga gibuhat ni Brother ug Sister Call sa pagtahud sa sagradong mga pakigsaad ug sa pagtudlo sa ilang mga anak nga mosunod ug magmahal sa gipahiuli nga ebanghelyo ni Jesukristo.
Ang pagkahimong lig-on nga sumpay magsugod diha kaninyo pinaagi sa pagbaton og kaisug ug pagtuo sa Manluluwas nga mohimo og importanting pagpili, sama ni Brother Antwi.
Ang pagkahimong lig-on nga sumpay magsugod diha kaninyo pinaagi sa pagsalig sa Espiritu Santo nga motudlo kaninyo sa tanang butang ug modan-ag sa inyong dalan, bisan kon wala kamo masayud daan kon asa kamo angayng moadto ug unsay angay ninyong buhaton.
Ang pagkahimong lig-on nga sumpay magsugod diha kaninyo pinaagi sa makugihon ug maisugon nga pagpapahawa sa kangitngit gikan kaninyo12 ug pagbarug nga lig-on batok sa matintalon nga mga kadautan sa ulahing mga adlaw.
Akong iampo nganha kaninyo ang apostolikanhong panalangin, gani nga pinaagi sa gahum sa Espiritu Santo mas hingpit ninyong masabtan ang kaimportante sa inyong dapit diha sa kadena sa mga henerasyon. Nasayud ko nga kamo mapanalanginan ug malig-on samtang maningkamot kamo nga mahimong lig-on nga sumpay. Ug mosaad ako nga uban sa tabang sa Ginoo makahimo kamo niini!
Malipayon akong mopamatuod nga si Jesukristo mao ang Buhi nga Anak sa Buhi nga Dios. Nasayud ko nga Siya buhi, nga Siya nabanhaw, ug nga Siya nakaila kanato ug nahigugma kanato isip mga indibidwal. Mopamatuod ko nga ang awtoridad sa priesthood ug ang mga yawe nga mobugkos dinhi sa yuta ug didto sa langit napahiuli na sa yuta niining ulahing mga adlaw. Ug nasayud ko nga samtang sundon nato ang mahangturong plano sa Amahan, kita magmalipayon niining kinabuhia, ug ang atong mga pamilya magkauban sa kahangturan. Niana ako mopamatuod ug mosaksi pinaagi sa sagrado nga pangalan ni Jesukristo, amen.
© 2017 by Intellectual Reserve, Inc. Tanang mga katungod gigahin. Pagtugot sa Iningles: 6/17. Pagtugot sa paghubad: 6/17. Hubad sa “A Welding Link.” Cebuano. PD60004410 853