Mga Lider Kamo

Sister Harriet R. Uchtdorf

Usa ka Gabii uban ni Elder Dieter F. Uchtdorf

Tibuok Kalibutan nga Debosyunal alang sa mga Young Adult • Enero 14, 2018 • Conference Center

Mahal kong mga kaigsoonan, akong mga higala!

Nindot kaayo mong tan-awon. Matahum kamo. Talagsaon kamo. Wow! Ganahan kong mogakos ninyo.

Kining katapusang semana usa ka panahon sa kasubo ug pasalamat. Gimahal nako si Presidente Monson. Mingawon ko niya. Apan sigurado ko nga malipayon na siya nga kauban na usab niya si Frances, iyang mahangturon nga kapikas.

Usa ka dakong panalangin nga makauban kamo karong gabhiona. Ganahan sab ko nga makauban ang akong paborito nga Apostol. Nasayud ko, kinahanglang wala gayud kitay paborito. Apan sa akong bahin, murag OK ra kay naminyo man ko niya.

Bag-o lang mi nagsaulog sa among ika-55 nga anibersaryo, ug sa gihapon nahigugma pa kami sa usag usa!

Maghisgot bahin sa mga bunga sa ebanghelyo! Kon modawat kita og mga mensahe sa gugma ug pahalipay sa maong mga okasyon gikan sa atong mga apo ug apo sa tuhod, nasayud kita unsa ka bililhon ang mga panalangin sa pagkamiyembro sa Simbahan ug sa ebanghelyo.

Kamong mga single pa, nadiborsyo na, o nagpuyo sa mahagiton nga mga kahimtang sa pamilya, sayri nga ang Dios nakaila ug nahigugma kaninyo, ug kon magpuyo mo nga matinuoron sa inyong mga pakigsaad, ang kalipay sa kinabuhi sa pamilya dili ihikaw gikan kaninyo. Wala gyud ko masayud unsaon kini, apan nasayud ko nga ang grasya, kalooy, ug gugma sa Ginoo igo alang kanatong tanan. Iya kining ipahinabo sumala sa Iyang pamaagi ug sa Iyang panahon.

Si Dieter ug ako dungan nga nagtubo sa sama nga branch sa Frankfurt, Germany. Nahibalo ko nga naibog siya nako, apan wala gyud ko nainteresado. Maayo siya, ug managhigala kami. Nakat-un mi og sayaw sa among mga kalihokan sa Simbahan. Mao kadto ang panahon sa foxtrot, boogie-woogie, ug rock and roll.

Human siya miapil sa Air Force aron mamahimong usa ka fighter nga piloto, wala na ko makakita niya sulod sa duha ka tuig. Sa pagkatinuod, pagbalik niya sa Frankfurt, ang akong unang impresyon dili kaayo nindot. Mura siyag pareha sa mga lalaki sa salida nga Top Gun.

Apan sa dihang nakigsulti siya nako, medyo nadani ko; klaro kaayong nakat-on gyud siya niadtong duha ka tuig. Nasayud siya unsa ang iyang gustong buhaton sa iyang kinabuhi, ug lig-on siya diha sa ebanghelyo.

Determinado gyud siya sa iyang pagpangulitawo, ug pipila ka bulan human niadto, nausab ang akong ngalan gikan sa Reich ngadto sa Uchtdorf. Wala gyud ko nagbasol nga mahunahunaon nako siyang gikonsiderar, bisan sa negatibong nakong impresyon sauna.

Si Dieter mao ang gugma sa akong kinabuhi ug ang mapagarbuhon nga amahan sa among mga anak ug lolo sa among mga apo.

Ug nasayud mo, ganahan pa gihapon ming mosayaw—bisan hangtud karon.

Istoryahan ko kamo niadtong 12 anyos pa ko. Subo kadto nga panahon sa batan-on pa ko. Ang akong amahan mipanaw tungod sa kanser pipila ka bulan sayo niana. Maayo siya nga amahan, mahigugmaong bana, ug maayo kaayo nga tawo. Maayo kaayo siyang pagka-edukar, makasulti og lima ka linggwahe, makatugtug sa symphony orchestra og upat ka lainlaing instrumento sa musika sa propesyonal nga paagi, ug gikan sa prominenteng pamilya sa mga musikero sa Frankfurt.

Ang akong mga ginikanan adunay nindot nga mga plano alang kanamo. Ang kaugmaon puno sa paglaum ug potensyal, bisan human sa makaguba nga mga tuig sa Ika-II nga Gubat sa Kalibutan. Apan ang dugay na kaayong sakit sa akong amahan nakapahimo sa among panimalay nga usa ka dapit sa pag-antus, kasubo, ug ka walay paglaum.

Human namatay ang akong amahan, grabe ang kasubo sa akong inahan. Ma-Domingo, manimba mi sa among protestante nga simbahan, apan wala namo makit-i ang kahupayan sa among kalag. Walay bisan unsa o bisan kinsa ang makahupay sa akong inahan.

Apan, dili kaayo kana tinuod! Ang atong Langitnong Amahan, sa Iyang dako nga gugma, wala malimot kanamo.

Walo ka bulan human mipanaw ang akong amahan sa dihang duha ka Amerikano nga mga misyonaryo nanuktok sa among pultahan sa Frankfurt. Kining duha ka misyonaryo, nga gigiyahan sa Espiritu ug bansay na kaayo, nasayud gayud unsa ang gikinahanglan sa among gamay nga pamilya. Ilang gibilin sa akong inahan ang bililhong Basahon ni Mormon.

Ang akong inahan ganahan kaayo mobasa. Ug gimahal niya ang Biblia. Dali kaayo siyang nadani niining bag-ong basahon sa kasulatan. Sa dihang gisugdan niya og basa ang Basahon ni Mormon, dili siya makahunong hangtud nabasa niya ang entiro nga basahon. Nadasig kaayo ang akong inahan bahin sa sulod ug sa mensahe sa Basahon ni Mormon nga palingkuron niya ang akong igsoon nga babaye ug ako ug maminaw samtang magbasa siya sa mga bersikulo nga daw gisulat alang gayud kanamo.

Atol sa katapusang mga semana sa kinabuhi sa akong amahan, kanunay kong magbarug sa may bintana sa among apartment nag-ampo og maayo sa Dios alang sa kahupayan sa among kasakit.

Ug miabut ang tubag. Miabot kini pinaagi sa mensahe sa gipahiuli nga ebanghelyo ni Jesukristo. Ganahan kaayo ko sa Basahon ni Mormon. Ganahan kaayo ko sa plano niini sa kaluwasan, ang plano sa kalipay. Unsa ka nindot ug gamhanan nga mensahe sa paglaum ug kahayag nga gihatag kanato sa Langitnong Amahan. Sa among paghangop sa Basahon ni Mormon, nakahupay kini sa among kasakit ug miayo sa pagkawalay paglaum ug kagul-anan tungod sa pagpanaw sa akong amahan.

Tungod kay naa na ang Basahon ni Mormon sa among panimalay wala nay kangitngit sa among pamilya, sanglit ang kahayag ug kangitngit dili man mahimong maanaa sa samang dapit sa samang higayon. Makusganon kaayo namong nabati ang Espiritu, ug nasayud kami sa tibuok namong kasingkasing ug hunahuna nga ang gitudlo nga mensahe sa mga misyonaryo tinuod.

Ang kalinaw mibalik sa among panimalay. Ang mensahe sa ebanghelyo ug ang pagkamiyembro diha sa Ang Simbahan ni Jesukristo sa mga Santos sa Ulahing mga Adlaw nakahatag og tinuod nga milagro sa among pamilya. Daw gipadala ngari kanamo ang mga anghel.

Ang duha ka mga misyonaryo nga miabut sa among panimalay kaedad ra ninyo. Wala silay makapadani nga kasaysayan sa ilang kaugalingon. Apan sama sila sa duha ka mga anghel sa himaya nga gipadala sa Dios ngari kanamo. Ilang gidala ngari kanamo ang mga panalangin sa gipahiuli nga ebanghelyo ni Jesukristo.

Mahal kong batan-ong mga higala, hinimo kamo sa samang balaang materyal. Ang uban kaninyo minyo na, ang uban single pa, apan kamong tanan nagpuyo taliwala sa mga katawhan nini nga kalibutan. Mga pinili kamo sa atong kapanahonan, kinsa pinaagi sa pulong ug sa buhat nagtudlo ug nagpuyo sa mensahe sa ebanghelyo taliwala sa inyong katawhan. Niini nga katuyoan, gipahimutang kamo diha sa inyong baranggay o siyudad, sa eskwelahan o sa trabahoan, sa inyong nasud, sa inyong pamilya. Ayaw kalimot, kamo adunay potensyal nga mahimong mahimayaong mga anghel niadtong anaa sa inyong duol.

Mga representante kamo sa Simbahan ni Jesukristo, ug kusganong mga lider kamo sa pagpahibalo sa mensahe sa ebanghelyo pinaagi sa inyong maayong kinabuhi ug maisugong pagpamatuod.

Ang usa ka lider mao ang nagtabang sa uban nga makakita, makabati, ug makapangita sa tarung nga agianan. Palihug tabangi ang usag usa nga magpabilin nga nakagamut sa Simbahan ug sa ebanghelyo. Ang Dios nagbutang kaninyo sa usa ka dapit diin kamo adunay daghang kahigayunan nga mamahimong himan diha sa mga kamot sa Ginoong Jesukristo. Siya naglaum kaninyo, Siya nakaila kaninyo, Siya nagsalig kaninyo, ug Siya mohatag og gahum kaninyo. Siya buhi. Siya tinuod!

Ang matag yano ug tataw nga pulong o buhat sa kaayo, kaligdong, gugma nga putli, kabuotan, serbisyo, gugma, ug kapuangod mahimong inyong buhat sa pagka-lider sa gingharian sa Dios. Ayaw ipakaubos ang inyong maayong impluwensya ug gahum alang sa kaayohan. Kining duha ka batan-ong mga misyonaryo nga kaedad ninyo nakatabang kanako nga makakita sa dalan paingon ngadto sa atong Manluluwas ug balik ngadto sa Langitnong Amahan.

Syempre, kinahanglan kong molakaw niini nga dalan sa akong kaugalingon, buntogon ang mga hagit, mangitag mga tubag sa mga pangutana, moatubang og seryoso nga mga pagpili, ug maghimo og mga desisyon. Ug kamo usab! Ang Simbahan ug ang Ginoo nagtanyag kaninyo og gamhanang mga kapanguhaan aron sa pagpatuman sa inyong katuyoan sa kinabuhi. Ang Basahon ni Mormon usa niini, ug gibutang kini sa ato gayud nga atubangan. Kapot ug gakos niini ug ang mga pagtulun-an niini. Kapot sa Langitnong Amahan ug Siya mogiya kaninyo. Salig sa Ginoo!

Minahal kong batan-ong mga higala, palihug hibaloi ang akong gugma ug pasalamat alang sa matag usa kaninyo. Ang akong mga pag-ampo ug mga panalangin maanaa kaninyo. Mahinungdanong bahin kamo niining talagsaon ug sagrado nga buhat sa atong Manunubos. Niini ako mopamatuod, sa ngalan ni Jesukristo, amen.