O Outou o Taitai

Sister Harriet Reich Uchtdorf

O Se Afiafi ma Peresitene Dieter F. Uchtdorf

Faigalotu mo Talavou Matutua i le Lalolagi Atoa • 14 Ianuari, 2018 • Maota Autu mo Konafesi

Ou uso e ma tuagane pele, au uo talavou pele!

Ua e foliga aulelei. E tulagaese oe.E te lelei. Oka! Ou te moomoo maimau pe ana mafai ona fusi ia te outou taitoatasi.

O le vaiaso lenei ua mavae atu o se taimi o le faanoanoa ma le lotofaafetai. Ou te alofa ia Peresitene Monson. O le a ou misia o ia. Ae ou te mautinoa ua fiafia o ia e toe faatasi ma Frances, lana soa e faavavau.

E matagofie naua le faatasi ai ma outou i le asō. Ou te fiafia foi e faatasi ma lau Aposetolo sili ona fiafia i ai. Ou te iloa e le tatau ona i ai se tatou faaituau. Ae i lo’u tulaga, e seki a ona ua ou faaipoipo ia te ia.

O lea faatoa faamanatu le 55 tausaga o le ma faaipoipoga, ma o lea lava ma te alofa faamamai i le tasi ma le isi!

E uiga i fua o le talalelei! A ma mauaina ni feau o le alofa ma ni faamanuia i ia taimi faapitoa mai le ma fanau a fanau, ma fanau a fanau a fanau, ma te iloa le taua tele o faamanuiaga o le avea ma tagata o le Ekalesia ma le talalelei.

O outou na o loo nofotoatasi, tete’a, pe o ola i tulaga luitauina faaleaiga, faamolemole ia iloa o loo silafia outou e le Atua ma alofa ia te outou, ma a outou tumau faamaoni i tou feagaiga, o le a le faapuupuuina pe taofia foi mai ia te outou le olioli o le olaga faaleaiga. Ou te le iloa tonu pe faapefea ona tupu lenei mea, ae ou te iloa ua lava le alofatunoa, alofa mutimutivale ma le alofa o le Alii mo i tatou uma. O le a Ia faia ia tupu e tusa ma Lana ala ma Lana taimi.

Sa ma ola ae ma Dieter i le paranesi lava e tasi i Frankfurt, i Siamani. Sa ou iloa sa fia alu ia te au, ae sa ou lei naunau tele i ai. Sa lelei o ia, ma sa ma faauo. Sa ma aoao e sisiva faatasi i a tatou gaoioiga a le Ekalesia. O le taimi lena o le foxtrot, boogie-woogie, ma le rock and roll.

Ina ua auai o ia i le Ea Fosi ina ia avea ma se pailate o vaalele tau, sa ou lei toe vaai ia te ia mo le toeitiiti lua tausaga. Ma le faamaoni, ina ua toefoi atu o ia i Frankfurt, o le uunaiga muamua na ou maua sa lei lelei tele. Sa foliga o ia e tai pei o tama ia i le ata o le Top Gun.

Ae ina ua ma talanoa, sa faagaeetia teisi au; sa iloagofie ua faatagatamatua o ia i na tausaga e lua. Sa ia iloa le mea na ia manao e fai i lona olaga, ma sa malosi o ia i le talalelei.

Sa fai lava si ona pulunaunau ma fatufatua’i i ana taumafaiga faaaumoega, ma i ni nai masina mulimuli ane sa ma faaipoipo ai ma suia ai lo’u igoa mai ia Reich ia Uchtdorf. Ou te lei salamo lava i lo’u pulato’a ia te ia, e oo lava i le mavae ai o se uluai uunaiga le mautinoa.

O Dieter o le fatu o lo’u olaga ma o le tamā ma le tamā matua mitamita o le ma fanau ma le fanau a le ma fanau.

Ma e tatau ona outou iloa, o loo ma fiafia pea e sisiva faatasi—e oo mai lava i lenei aso.

Sei ou toe faafoi atu outou i tua i le taimi ina ua12 ou tausaga. O se taimi faanoanoa lea i lo’u olaga talavou. Na maliu lo’u tama i le kanesa i ni nai msina ma muamua atu. O ia o se tama maoae, o se tane alofa i lou tina, ma o se tamalii lelei tele. Sa lelei lona aotauina, tautala i ni gagana se lima, taina faapolofesa ni mea faamusika eseese se fa i se aufaaili, ma sa sau mai se aiga musika lauiloa i Frankfurt, i Siamani.

Sa i ai i o‘u matua ni fuafuaga maoae mo i matou. Sa foliga manuia ma faamoemoeina le lumanai, e oo lava ina ua mavae tausaga faataumaoi o le Taua Lona Lua a le Lalolagi. Ae o tausaga o le ma’i o lo’u tama na liua ai lo matou fale i se nofoaga o mafatiaga, faanoanoaga, ma le leai o se faamoemoe.

I le mavae ai o le maliu o lo’u tama, sa matua faanoanoa lo’u tina. I Aso Sa, matou te o ai i le matou sauniga lotu Polotesano, ae sa le mafai ona matou mauaina le pulupāsama o Kiliata. Sa foliga mai peisea’i sa leai se mea po o se tasi na mafai ona ia aumaia le mafanafana i lo’u tina.

Ia, toeitiiti lava! O lo tatou Tama Faalelagi, i Lona alofa tele, sa lei faagaloina i matou.

O le valu masina talu ona mavae le maliu o lo’u tama ae tuitui atu ni faifeautalai Amerika i le matou faitotoa i Frankfurt, Siamani. O na faifeautalai e toalua, na taialaina e le Agaga ma sa saunia lelei, sa iloa tonu le mea na manaomia e le matou aiga toalaiti. Sa la tuua le Tusi a Mamona faapelepele i lo’u tina.

Sa fiafia lo’u tina e faitau. Ma sa fiafia i le Tusi Paia. Sa faafuasei ona gauai o ia i lenei tusi fou o tusitusiga paia. Ina ua amata ona ia faitauina le Tusi a Mamona, sa le mafai ona ia taofi seia oo ina ia faitauina atoa mai le faavaa i le faavaa. Sa fiafia lava lo’u tina i le aano ma le savali lea sa tele ai ina ia faasaofa’ia au ma lo’u uso i lalo ma faalogo a o ia faitau maia ni fuaiupu na foliga mai sa tusia mo na o i matou lava.

I ni vaiaso faaiu o le olaga o lo’u tama, sa tele ina ou tu i le faamalama o le matou potumautotogi ma tatalo faatauanau i le Atua mo se toomaga mai o matou tiga.

Ma sa oo mai le tali. Sa oo mai e ala i le savali o le talalelei toefuataiina a Iesu Keriso. E maeu lo’u fiafia i le Tusi a Mamona. E maeu lo’u fiafia i lana savali o le ata o le faaolataga, le fuafuaga o le fiafia. Oka se matagofie ma le mamana o le savali o le faamoemoe ma le malamalama ua foai mai ia i matou e le Tama Faalelagi. Ina ua matou taliaina le Tusi a Mamona, sa faatoafilemuina lo matou lototiga ma faamaloloina le faanoanoa ma le faavauvau na mafua ona o le oti o lo’u tama.

I le ulufale mai ai o le Tusi a Mamona i lo matou fale, sa lei toe i ai se pogisa i lo matou aiga, talu ai e le mafai e le malamalama ma le pogisa ona i ai i le mea e tasi i le taimi e tasi. Sa malosi tele lo matou lagonaina o le Agaga, ma sa matou iloaina i o matou loto uma ma mafaufau o le savali sa aumai e nei faifeautalai sa moni.

Sa toe foi mai le filemu i lo matou aiga. O le savali o le talalelei ma le avea ai ma tagata o Le Ekalesia a Iesu Keriso o le Au Paia o Aso e Gata Ai na aumaia se vavega moni i lo matou aiga. Sa peiseai na auina mai ni agelu ia i matou.

O faifeautalai e toalua sa o mai i lo matou aiga i Frankfurt, i Siamani, sa pei o outou le matutua. Sa leai ni o laua lava ia talaaga faagaeetia. Ae sa pei i laua o ni agelu se toalua o le mamalu na auina mai ia i matou e le Atua. Sa la aumaia faamanuiaga o le talalelei toefuataiina a Iesu Keriso.

Au uo talavou pele, ua foafoaina outou i lea lava anomea paia e tasi. O nisi o outou ua faaipoipo, o nisi o loo nofotoatasi, ae o outou uma o loo ola faatasi ma tagata o lenei lalolagi. O outou o tagata filifilia o o tatou aso, o e e ala i upu ma galuega o loo aoao atua ma ola i le savali o le talalelei i o outou tagata. Mo lenei faamoemeoga, ua tuu ai outou i o outou nuu po o aai, tou a’oga po o falefaigaluega, tou malo, ma tou aiga. Aua nei galo, ua ia te outou le gafatia e avea ai ma agelu o le mamalu ia i latou o loo i ai i o outou autafa.

O loo fai outou ma sui o le Ekalesia a Iesu Keriso, ma o outou o taitai mamana i le folafolaina atu o le savali o le talalelei e ala i o outou olaga lelei ma molimau lototetele.

O se taitai o se tasi e fesoasoani i isi ia vaai, lagona, ma maua le ala sa’o. Faamolemole fesoasoani i le tasi ma le isi ia matua mauaa i le Ekalesia ma i le talalelei. Ua tuu e le Atua oe i se nofoaga e te maua ai le tele o avanoa e avea ai ma meafaigaluega i aao o le Alii o Iesu Keriso. O loo faalagolago mai o Ia ia te oe, Na te silafia oe, ua Ia faatuatuaina oe, ma o le a Ia faamanaina oe. O loo soifua o Ia. E moni o Ia!

O upu po o galuega uma faigofie ma faatauvaa o le lelei, amiosa’o, alofa mama, agalelei, auaunaga, alofa, ma le agaalofa e mafai ona avea ma ou faatinoga o le taitaiga i le malo o le Atua. Aua e te manatu faatauvaa i lau faatosinaga ma le mana mo le lelei. O nei faifeautalai talavou tou te tupulaga sa fesoasoani ia te au ia ou vaai i le ala lea e tau tau i lo tatou Faaola ma toe foi atu ai i le Tama Faalelagi.

Ioe, sa ao ona ou alu i lea auala na o au, faatoilalo luitau, saili tali i fesili, feagai ma filifiliga ogaoga, ma faia ni faaiuga. Ma e faapena foi outou! Ua ofo mai e le Ekalesia ma le Alii ia te oe ni punaoa mamana e ausia ai lou faamoemoega i le olaga. O le Tusi a Mamona o se tasi o na punaoa, ma ua tuu tonu lava i ou luma. Aapa atu ma opomau i ai ma ona aoaoga. Aapa atu i le Tama Faalelagi ma o le a Ia taialaina oe. Faalagolago i le Alii!

A’u uo talavou pele, faamolemole ia outou iloa lo’u alofa ma le lotofaafetai mo outou uma taitoatasi. Ua ia te outou a’u tatalo ma faamanuiaga. O outou o se vaega taua o lenei galuega ofoofogia ma le paia a lo tatou Togiola. Ou te molimau atu ai i nei mea, i le suafa o Iesu Keriso, amene.