2:3

Nuinui kei Isireli

Peresitedi Russell M. Nelson kei Sister Wendy W. Nelson

Peresitedi Russell M. Nelson: e sega na vosa me vakamacalataka rawa na neirau vakavinavinaka kina matasere ni semineri oya. Kemudou, sa totoka ka vakasakiti na kena oya. Vinaka. Vinaka vakalevu. Niu rai yani ena loma ni Vale ni Koniferedi sa vakasinaiti tu ena Yalododonu Edaidai totoka, au vakila me vaka sa mai noqu na matavuvale levu au a dau nuitaka tu. E tiko oqo e 22,000 vei kemuni ena bogi nikua ka udolu vakaudolu vei kemuni o ni veisemati tiko mai kei keimami ena kakaburaki.

Keirau marau vakalevu kei Sister Nelson na tiko kei kemuni nikua. Keirau taleitaka na soqoni kei kemuni na itabagone ni Lotu i Jisu Karisito ni Yalododonu Edaidai—kei ira na nomuni qasenivuli kei na itubutubu.

Keirau diva me rogoca na nomuni vakavakarau ki na noda soqoni e vuravura raraba, ena nomuni wilika na iVola i Momani ka masulaka mo ni mai rogoca na veika e gadreva na Turaga me vakavulica vei kemuni.

Au tokaruataka tale, na noqu vakavivinaka levu na kina matasere ni semineri ka lagata na imatai ni sere ena yaloqaqa. Na serenilotu o ya—“Turaga Keitou Vuabale”—e dau vagolea na yaloda vua na Parofita Josefa Simici. E sega na ka meda dolea lesu vua! Sai koya na Parofita ni otioti ni itabagauna oqo! Raitayalotaka! A yabaki vata kei iko, ni a uqeti ena vosa ni iApositolo o Jemesa: “Ke sa lailai na vuku vua e dua, me kerea vua na Kalou.”¹

Na vosa oqo a uqeta na cauravou o Josefa me gole ki na veikau voleka e kea, ka talaucaka kina na lomana vua na Kalou.

A tadola ko lomalagi! A raica o Josefa na Tamana kei na Luvena ka kila sara na vanua me saumi mai kina na nona vakatataro.

Nikua, au kerei kemuni mo ni cakava me vakataki cauravou o Josefa. Kauta vakadodonu nomu taro vei Tamamu Vakalomalagi ena masu. Tarogi Koya, ena yaca i Jisu Karisito, me dusimaki iko. O na vulica vakai iko—nikua ena nomu yabaki oqo—na sala mo ciqoma na ivakatakila yadua. Ka sega na ka me veisautaka vakalevu nomu bula me vaka o ya!

Au yalataka vei iko sega ni o koya e yasamu, ia o iko—ni, vanua cava ga e vuravura, ena vanua cava ga ena salatu ni veiyalayalati—ena gauna mada ga oqo, o sega ni umani tiko ena salatu—au yalataka kevaka mo yalodina ka guta na cakacaka vakayalo e gadrevi me tara cake na kilaka bibi, kei na maqosa vakayalo mo kila na rogoca na vakasolokakana ni Yalo Tabu, o sa na dusimaki vakataucoko ena nomu bula. Ena soli mai vei iko na isau ni nomu vakatataro ena sala ni Turaga kei na Nona gauna. Mo kakua ni guilecava na ivakasala nei ta kei na kei na iliuliu ni Lotu. Era vakasaqara talega na ivatakila ena vukumu.

Ni ko sa kila sa dusimaka tiko na nomu bula na Kalou, se cava sara na ibolebole kei na veika rarawa ka na dau yaco mai, o na reki tiko ka vakacegu.

Ia oqo, me keirau tukuna vei kemuni na ibolebole levu duadua, na inaki levu duadua, kei na cakacaka levu duadua e vuravura. Ka keirau sureti iko mo mai vakaitavi kina!

Au sa kerei Sister Wendy Nelson me vakarautaka mai eso na lewe ni itukutulu bibi oqo. Yalovinaka, Sister Nelson.

Sister Wendy W. Nelson: Kemuni na ganequ kei na taciqu, oi kemuni keimami lomana vakalevu ka vakabauti kemuni, au na tekivu ena ka keirau a raica vakaveiwatini ena siga keirau draiva tiko yani ena veidelana mai Utah ena dua na motoka kaukauwa.

A totoka tu na draki ena siga o ya. Keirau taleitaka na curuma na maliwa ni veikau damusa ka totoka, wadrovu, ka dodonu cake ki lomalagi

Oti, keirau a yacova e dua na igole kau raica e dua na vunikau au nanuma—kina—na ivakarau ni noqu nanuma ena ituvaki e vuqa.

O kila beka na yalo o ya? O na veiraiyaki ni ra sa wadrovu ka dodonu cake ki lomalagi na tamata kecega, ni da vakatauvatana.

Esa rau kila tu na veika kecega. Era dara na isulu vivinaka, ka vaka mera cavuta na ka dodonu, sega na nodra leqa, ka talairawarawa dina—ka vaka mera sega ni bau caka cala ena nodra bula.

Ia oqo, sa qai tiko o iko kei au!

Taciqu kei na ganequ, meda sa kakua ni vakatauvatani keda tiko kei ira na tamata. Sa gauna meda kakua ni raici keda tiko vakatani kei ira na tamata. Na dina oqo e sega sara ni da ca me vaka eda dau nanuma ena levu na gauna, ka sega soti sara ni taucoko na kedra irairai na tani—o keda kece vakavo ga, na noda iVakabula, o Jisu Karisito.

Na ka yaga duadua ga o ya ni o iko kei au e daru sa cakava tiko na nodaru dina—na veiyalayalati—mai na bula taumada kei Tamada Vakalomalagi na ka me daru na mai cakava eke e vuravura.

Ia, meu tarogi iko mada: Na cava o sucu mo mai cava?

Au diva me rawa nida sarava mada e dua na vidio 10 na miniti ni nomuni bula taumada ena YouTube.

A kaya o Parofita Josefa Simici ke o rai ki lomalagi me lima na miniti, o na kila cake na veiulutaga ni vakatauvatani ke o vulica ena nomu bula taucoko.² Ia vakasamataka mada ke o raica me 10 na miniti na nomu bula taumada!

E dina eda sa kila tu ni sa vakalatia tu na Turaga na nodaru vakanananu oqori. Ia, wawa mada, ka vakasamataka na revurevu ni nomu bula ke vakatarai mo sarava me 10 na miniti na nomu bula taumada.

Au vakabauta ke mo raici iko vata kei nomu iTubutubu Vakalomalagi kei Jisu Karisito; ke mo dikeva nomu cakacaka ena bula taumada ka raica nomu a veiyalayalatitaka—na veiyalayalati—kei na so, ira nomu dauveituberi kei na qasenivuli; ke mo raica nomu yaloqaqa mo taqomaka na dina ka tucake qaqa yani baleti Jisu Karisito, au vakabauta ni oi kemuni yadua ena yaco vei kemuni mo ni kaukauwa sara, yalodina, kei na rai tawamudu me vukea mo ni valuta e duase taucoko na nomuni veilecayaki, vakatitiqa, sasaga bula, kei na leqa. O ira taucoko!

Au vakabauta ke o nanuma o cei o a kaya vua mo vukea ni ko tiko ena vuravura oqo, se na veika rarawa o sa vakadonuya mo mai sotava, se na veika dredre dina cava ga o sotava sara tikoga nikua—se na yaco mai—o na qai kaya kina, “Io, au sa qai nanuma. Au sa qai kila. Na gauna dredre vakaoqo au sa qai kila vinaka. Ena veivuke ni Turaga au na cakava rawa!”

Oqo, e dua tale na ka au sureti iko mo vakasamataka. Au via raitayalotaka ni keda yadua eda lako mai ki vuravura kei na dua na ivola e yaloda e vakatokai “Veika me Caka e Vuravura.”

Meda veivosakitaka na ka e tiko beka ena ivola o ya. Me da veivosakitaka na lima na ka a volai dina tiko ena nomu ivola mai na kosipeli i Jisu Karisito.

iMatai, o a lako mai mo mai vakayago. Ka sa dua dina na ka levu vei au o ira na noqu itokani.

iKarua, o a lako mai mo vakatovolei.

Ia, o sa raica ni noda vakatovolei e oka kina noda vulica meda lewa vinaka na gagadre ni yagoda kei na lomada, ni dau yaco ena so na gauna me sega sara ni lewai rawa? Ke o sasaga tiko mo bula mai na revurevu ca ni veivakatotogani se o valavala ca vakalevu tiko, au vakamamasu mo sereki iko ka veivosaki kei nomu bisopi nikua. Sa tu vua na idola ni matabete me vukei iko kina.

Na ikatolu ni noda itavi e vuravura: digitaka mo muri Jisu Karisito ka tutaki Koya, me vaka o a cakava ena bula taumada.

iKava, digitaka mo veivutuni e veisiga ka kania na sakaramede ena veimacawa. Ni ko cakava oqo o na vakabulai vakayalo, vaqaqacotaki, ka vakatataki cake ka yaco mo vakatabui ka cecere vakalou, ena Veisorovaki i Jisu Karisito.

Oqo, na ikalima ni ka a volai vei iko: mo kunea ka cakava nomu ilesilesi eke. Kemuni na noqu itokani, ena bula taumada daru a vakailesilesi yadua ena itavi totoka me daru cakava e vuravura.

Sa nodaru madigi me daru cakava noda ilesilesi, ia e sega ni gadrevi. E sega me vakasaurarataki keda. Eda na lewa ga vakai keda noda vakayagataki gauna kei na igu, noda taledi kei na ivurevure. E dina, ni veika eda cakava sa da vakatovolei kina.

Na digidigi sa nomu ka noqu. Eda na cakava beka na cava ga e gadrevi me rawa kina na ilesilesi totoka eda a talai mai kina e vuravura?

Ni buebue tiko oqo ena nomu vakasama, meda veivosakitaka mada na vuna o mai tiko kina e vuravura —ena gauna oqo, ni sa gauna talei duadua ena itukutuku kei vuravura.

Cava na vuna o mai tiko kina e vuravura nikua?

Cava na vuna o a sega ni sucu kina ena 1880? se 30 na yabaki mai oqo?

Meu tukuna mada na gauna au a vakavulici kina baleta na veisiga ni veigauna eda bula tiko kina.

Eda dau tukuna tikoga na bula ena iotioti ni siga. Oi keda, dina sara, na Yalododonu Edaidai. Ia e rairai ni siga edai era sa kena “iotioti” dina eda raitayalotaka rawa.

Na dina oqo sa mai yaco baleta na ka au a sotava ena dua na 24 na auwa a tekivu ena 15 ni June, 2013. Keirau a tiko vakaveiwatini e Moscow, Rusia.

E a bose vata tiko o watiqu kei ira na iliuliu ni matabete e kea, kau a laki sotava volekata ni 100 na noda marama. Au taleitaki ira noda marama ni Rusia. E ra sa vakasakiti!

Niu sa tu yani meu vosa mai cake, au a kaya sara e dua na ka au a sega ni namaka meu cavuta. Niu sa tu yani meu vosa mai cake “Au vinakata meu kilai kemuni ena nomuni kawa. Yalovinaka ni tucake na kawa i Isireli sa tukuni tu ena nomuni veivakalougatataki vakapeteriaki sa na cavuti.”

Penijamini?” Era tucake e vica na marama.

“Tani!” A vica tale.

“Rupeni?” Eso tale a tucake.

“Nafitalai?” E so tale a tucake.

Ni sa kacivaki oti na tinikarua na mataqali i Isireli—maivei Aseri kivei Sepuloni—ka ra tucake na marama, keimami a kurabui ena ka keimami sa raica, vakila, ka vulica rawa.

E vica beka vei ira na tinikarua na mataqali i Isireli a tiko ena soqoni ni marama lailai mai na 100 ena Vakarauwai o ya mai Moscow?

Tinikadua! E tinikadua mai na tinikarua na mataqali i Isireli a tiko ena rumu o ya! Na mataqali ga a sega ni tiko o iratou na Livai. Au a kurabui. Sa dua dina na veivakauqeti vakayalo vei au.

Ni oti ga na veisoqoni o ya keirau sa gole sara vakaveiwatini ki Yerevan, Armenia. Na imatai ni tamata keirau sotava ni sobu yani ena waqavuka o peresitedi ni kaulotu kei watina. Ia, a rogoca talega o wati peresitedi na ka a caka mai Moscow, ka a marautaka nona kaya mai, “Era tiko qo na Livai!”

Vakasamataka mada na neirau marau levu ni keirau sotavi ira na kaulotu ena siga e tarava, kei na dua na italatala qase mai na yavusa i Livai e tiko e kea ka lako mai Gilbert, Arizona.

Ia, niu a se gonelailai ka lewena tiko na Lalai e Raymond, Alberta, e Kenada, au vulica kina ni otioti ni gauna—ni bera na iKarua ni Lako Mai na iVakabula—ena sokumuni na mataqali tinikarua i Isireli. Au a marautaka vakalevu na dina oqo, ka yaco talega, me curuma tu vakataucoko na noqu vakasama. Mo qai vakasamataka mada noqu tiko kei ira na lewe tinikarua na mataqali i Isireli ena dua na 24 na auwa.

Au sa vulica kina ni a sega beka ni donu meu kerei ira na marama o ya mera vakatakilai ira ena nodra kawa baleta na veivakalougatataki vakapeteriaki e ka tabu kei na kawa e tiko kina e ka ni tamata yadua. Ia, au vakavinavinakataka na madigi meu raica e mataqu na vua ni nodra sokumuni na Isireli. Na mana ni veika au a sotava o ya e sega vakadua ni yali mai yaloqu se vakasama.

Taciqu kei na ganequ lomani, oqo dina na iotioti ni gauna! Se bera mada me dua na gauna vakaoqo ena itukutuku kei vuravura. Sega vakadua! Ena bula taumada, daru a yalataka me daru mai cakava ena gauna eda tiko kina oqo e vuravura e dua na cakacaka cecere. Ena veivuke ni Turaga, eda na rawata kina. Ena yacai Jisu Karisito, emeni.

Peresitedi Nelson: Vinaka, Wendy. Au lomani iko! E sega beka ni totoka o ya?

Kemuni na taciqu ganequ itabagone, oqo na iotioti ni gauna, ka sa maqusataka tiko na Turaga na Nona sokumuni ira na Isireli. Na vasokumuni oqo sa ka bibi duadua e yaco tiko e vuravura nikua. E sega tale ni vakatauvatani rawa na kena cecere, na kena sa rui bibi, ka sega ni vakatauvatani rawa na kena qaqa. Ke o sa digitaka, se o sa vinakata, sa rawa mo tiki ni cakacaka oqo. Sa rawa mo mai tiki ni dua na ka levu—dua na ka cecere, dua na ka qaqa!

Ni da tukuna tiko na sokumuni, eda sa kaya tiko na ka dina oqo: ni luvena yadua na Tamada Vakalomalagi, ena yasa ruarua ni ilati, mera na rogoca na itukutuku ni kosipeli vakalesuimai i Jisu Karisito. Era na lewa ga vakai ira kera gadreva mera kila vakalevu.

O ira na kawa sa mai vei ira na mataqali i Isireli ena rawa ni vagolei na yalodra vua na Turaga. E kaya o koya, “Sa rogoca na noqu vosa ko ira na noqu sipi, ia kau sa kilai ira, ka ra sa muri au.”³ O ira sa mai na vuvale na Isireli ena rawarawa mera kila na Turaga o Jisu Karisito ni sa nodra iVakabula ka gadreva mera sokumuni me Nona tamata. Era na gadreva mera lewena na Nona Lotu, veiyalayalati kei Koya kei na Tamada Vakalomalagi, ka ciqoma na nodra cakacaka vakalotu bibi.

A kaya na Turaga vei Parofita Josefa Simici ni noda gauna oqo, sa itinitini ni auwa ka iotioti ni gauna me kaciva na daucakacaka ena Nona tabaniwere me maqusataki nodra vakasokumuni na digitaki mai na tutu e va kei vuravura.⁴

Meu tarogi kemuni yadua mada ko ni sa yabaki 12 ki na 18: O gadreva beka mo tiki bibi ni ibolebole cecere duaduana inaki cecere duaduaka cakacaka cecere duadua e vuravura nikua?

O gadreva beka mo vukea nodra sokumuni na Isireli ena iotioti ni gauna talei oqo? E rawa vei iko, sa digitaki, mo vukea nodra kunei na digitaki era se bera ni rogoca na itukutuku ni kosipeli vakalesuimai? O na gadreva beka mo dua na “mata totolo” a tukuna tiko o parofita Aisea?⁵

Ia oqo, na vakaitavi ena sokumuni na Isireli ena gadrevi mo solibula ena veika eso. Ena gadrevi talega mo veisautaka na nomu bula. Ena taura sara e vuqa na nomu gauna kei na igu kei na taledi mai vua na Kalou. E vakaivei tiko?

Vakasamataka na marau kei na kena maqusa: era sa raica mai na parofita tekivu vei Atama na siga edai. Ka ra tukuna tiko na parofita na noda siga ena sokumuni kina o Isireli ka vakarautaki ko vuravura me vakavakarau ki na iKarua ni Lako Mai na iVakabula. Vakasamataka mada! Vei ira kece na tamata era a bula e vuravura, sai keda eda na vakaitavi tiko ena iotioti, ni sokumuni cecere oqo. Sa ka marautaki dina!

Na Tamada Vakalomalagi sa maroroi ira tu mai na Nona tamata cecere—au rawa ni kaya, ira na Nona qaqa—ki na iotioti ni cakacaka. O ira sa cecere oqo—na kenadau savasava, ira na qaqa—sai kemuni!

Au vakadinadinataka oqo na vakasokumuni, ka sa dina. Ena yabaki au a sucu kina, na lewe ni Lotu taucoko a lailai mai na 600,000, na tamata, ka sega na lewenilotu e Sauca Amerika. Nikua sa sivia na 16 na milioni na lewenilotu e vuravura raraba, ka voleka ni 3 na milioni na lewenilotu e Sauca Amerika.

Meu tukuna mada vei kemuni e dua na ka au a sotava ena 1979. Au a veiqaravi tiko ena gauna oya vaka Peresitedi Raraba ni Wilivola ni Sigatabu. Au a sureti meu tiko ena dua na soqo ni iliuliu ni Lotu a vosa kina na Peresitedi ni Lotu, o Peresitedi Spencer W. Kimball. A lesia me keimami masulaka na katuba ni veimatanitu me dola ki na kosipeli i Jisu Karisito me kau yani kivei ira na tamata kecega e vuravura. A tukuni China kina vakamatata ka kerea mera masulaki na lewenivanua o China. A kaya talega, “Eda sa na qaravi ira kina na lewe i China. Meda na vulica na nodra vosa. E dodonu meda masulaki ira ka vukei ira.”

Au a lesu i vale vei watiqu o Dantzel (sa mai takali ena 13 na yabaki sa oti), kau kaya, “Sa kerea o Peresitedi Kimball ena soqoni me keimami vuli vosa vaka-China! Kau a segani rogoca me kaya, ‘Vakavo ga o Brother Nelson!’ O sa vinakata li me daru vulica vata na vosa vaka-China Madarini? Io, a vakadonuya ka keirau a vulica na vosa vaka-Madarini.

Oti e ono na macawa na veilesi nei Peresitedi Kimball, au a tiko ena bose vakayabaki ni American Association ni Thoracic Surgery e Boston. E yaco mai Boston, Massachusetts. Ena kena mataka, au a masu ena noqu rumu ni otela baleti ira mai China, me vaka a kerea o Peresitedi Kimball. Au a gole ki na imatai ni bose ni siga o ya ka dabe ena vanua au dau dabe kina ena matabose vakasakiti vakaoqo—ena mua e liu ni rumu. Ni sa vakacagau tiko na bose, au sa masa vakalevu sara ena noqu idabedabe. Ni sa boko na cina me caka na sara iyaloyalo, au a tucake mai na noqu idabedabe ka gole ena mua e muri ni rumu—ena vanua au sega ni dau dabe kina. Ni sa waqa tale mai na cina, au sa dabe tikiva toka e dua na vuniwai mai China. A tukuna ni o koya o Parofesa Wu Ying-Kai mai Beijing, e China!

Ni oti e dua na neirau veivosaki totoka, au a sureti koya me gole mai ki Salt Lake City me mai cakavuli ena Koronivuli ni Vuli Vuniwai ena Univesiti o Utah. A marautaka sara ka veituberi sara vakavinaka. Sa qai lesu tale ki China.

Sega ni dede, a sureti au mai meu laki parofesa veisiko ni veisele ena Shandong Medical University mai Jinan, China. A tarava sara na veisureti tale eso meu parofesa veisiko ena rua tale na univesiti mai China.

Na veigauna vakavuniwai cecere oqo—ni bera noqu kacivi ki na Tinikarua—a torocake sara ena gauna era kerea kina na vuniwai mai China meu sele dolava na utona e dua na nodra dau ni opera taleitaki duadua. Au a cakava, ka marau ni a rawa vinaka na veisele o ya. Sa yaco kina, me sa iotioti ni noqu cakacaka vakavuniwai.

Sa voleka ni 40 na yabaki oqo, na noqu masulaki ira tiko na lewe i China. Au marautaka na noqu veimaliwai kei ira na itokani cakacaka vakavuniwai kei na itokani mai China. Sa ka marautaki dina vei au nikua meu kilai vakamatanitu niu sa “itokani tudei kei China.”

Sa noqu ivakadinadina ni gauna eda muria kina na cava ga e kerea na parofita ni Kalou meda cakava, ena tadola na sala ka na veisau na bula ni tamata.

Ia oqo, mo tarogi iko mada ga, “Cava meu cakava vaka-itabagone, mera sokumuni na Isireli? Keirau a taroga kei Sister Nelson na taro oqori, kei na so tale, ki na so na itabagone era yabaki 12 ki na 18, e vuqa era tiko qo ena bogi nikua.

Keirau a taroga e liu, “Na cava na sokumuni ni Isireli? Na cava na kena ibalebale vei iko?” E duidui nodra sauma, ia e levu era vakaraitaka ni ra sega ni kila se cava o ya. Bogi nikua, keirau gadreva mo kila ni sokumuni ni Isireli o ya na kena cabori na kosipeli i Jisu Karisito vei ira na luve ni Kalou ena yasa e rua ni ilati ira era se bera ni veiyalayalati dina kei na Kalou se ciqoma nodra cakacaka vakalotu bibi.

Na luvena yadua na Tamada Vakalomalagi me ra na digitaka mera muri Jisu Karisito, ciqoma ka taura na Nona kosipeli kei na kalougata kece—io, na kalougata kece sa yalataka na Kalou ki na kawa i Eparama, Aisake, kei Jekope, ko sa kila tiko, sa kilai talega me ko Isireli.

Kemuni na itabagone vakasakiti, ko ni talai mai ki vuravura ena gauna donu oqo, na gauna bibi ni itukutuku kei vuravura, mo vukea na sokumuni Isireli! E sega tale ni dua na ka e caka tiko e vuravura e bibi cake mai na ka oqo. E sega ni dua na kae cecere cake ena ka e salamuria mai. E sega sara ga

Na sokumuni oqo sa veika taucokobaleti kemuni. Oqo na ilesilesi ko a talai mai kina e vuravura.

Au sa tarogi iko kina “Sa lomamu dina mo lewena na mataivalu ni itabagone ni Turaga mo sokumuni Isireli?” Yalovinaka mo vakasamataka. Kua mada ni se sauma.

Meda lesu ki na neirau taro kei Sister Nelson vei ira na noda itabagone. Keirau a taroga, “Ke sureta na parofita na tamata yabaki 12 ki 18 ena Lotu mera vukea na sokumuni Isireli, cava beka o gadreva mo cakava?”

Era a vakaio na itabagone ena vosa veivakauqeti vakaoqo, “Ke sureti keimami na parofita me keimami sokumuni Isireli, au na vakaitavi dinakina. E kaya e dua tale, “Au na biuta na ka au cakava tiko ka laki veivuke!” Ka dua tale: “Au na lako ka cakava na cava ga e kerea meu cakava, baleta na parofita sa dauvunau ni Kalou.”

Era sauma talega vakaoqo: “Au na gadreva meu cakava vakalevu na cakacaka ni tuva kawa. Au na veimaliwai vakalevu ka sasagataka vakalevu meu tukuna vei ira na tamata na kosipeli. Au na vakaraitaki vinaka ni ivakarau ni bula sa Vakarisito. Au na cakava vakalevu nodra papitaisotaki na mate; veisautaka na ivakarau ni noqu bula kei na digidigi au cakava; lakova na vanua cava ga e gadreva meu butuka, vulica e dua na vosa vou, sotavi ira na vulagi; solia na noqu iVola i Momani vei ira se bera ni wilika. Kau na dua na tamata dauloloma dina sara.”

Keirau a tarogi ira talega na itabagone oqo na ka era na solibula kina mera vukea na sokumuni Isireli. Era a vakurabuitaki keirau tale. Era a kaya: “Au na qito ga vakalailai ka meu na gole ki vua e dua se matavuvale e gadreva tu na dina. Au na solibula meu kua ni gade kei ira na itokani ka sureti ira me keimami gole ki valetabu. Au na musuka noqu gauna ena talevoni. Au na musuka noqu sara iyaloyalo. Au na solibula meu kua ni moce ena yakavi ni Sigatabu!”

Keirau a taroga, “Ke o gadreva mo sokumuni Isireli, na cava mo tekivu cakava se kua ni cakava?” Era a sauma mai vakaoqo “Au na vulica vakalevu na ivolanikalou, ka gadreva vakalevu, meu sauma na taro era na tarogi au kina na tamata. Ena lailai na noqu gauna ena itukutuku raraba; ka cakava vakalevu na itavi lalai ni kaulotu, oka kina na cakacaka ni veiqaravi e veisiga. Au na vakalailaitaka noqu gauna ena talevoni, kau na vakauta ga kina na ivolanikalou se itukutuku vakayalo ena itukutuku raraba. Au na vulica na vosa ni koniferedi raraba baleta ni ra sa ka bibi sara. Au na kana kakana bulabula meu ituvaki vinaka. Meu kakua ni nanuma me ka kecega sa baleti au.” Vinaka vakalevu, kemuni na taciqu kei na ganequ, ena nomuni saunitaro kina neirau taro.

Vakasamataka mada oqo, kemuni na taciqu kei na ganequ itabagone, au gadreva mo ni kila ni dua na siga au na soli itukutuku vei Parofita Josefa Simici, vei Peresitedi Brigham Young, kei na so tale—ka itinitini vua na Turaga—me baleta na ilesilesi niu sa parofita ni Kalou e vuravura nikua. Meu kua ni tarogi, “Brother Nelson, na cava o sega ni vakamatatataka kina vei ira na itabagone na nodraitavi ni sokumuni Isireli? Cava o sega ni douvaka kina mera lesi mera vakaitavi kina?”

Au sa sureta kina na goneyalewa kei na cauravou yaduaera yabaki 12 ki na 18 ena Lotu i Jisu Karisito ni Yalododonu Edaidai mera lewena na mataivalu ni itabagone ni Turaga mera sokumuni Isireli.

Na cava ena vukei iko? Ni ko wiliwili tikoga e veisiga mai na iVola i Momani, ko na vulica na vunau ni sokumuni,⁶ na dina me baleti Jisu Karisito, na Nona Veisorovaki, kei na taucoko ni Nona kosipeli era sega ni tiko ena iVola Tabu. Na iVola i Momani sa usutu ni nodra sokumuni na Isireli.⁷ E dina, kevaka me sega na iVola i Momani, na kena yalataki na sokumuni o Isireli ena sega ni yaco.

Ia oqo au sureti iko mo vakarautaka e lima tale na ka—lima na ka ena veisautaki iko ka vukea mo veisautaki vuravura.

iMatai, mo tagutuva nomu vakararavi tiko ki na itukutuku raraba, me vakalailaitaka na veivakauqeti ni vuravura vei iko.

Meu tukuna mada e dua na cauravou vakataki iko, e makubui noqu itokani vinaka sara. E kilai levu vei ira nona itokani ka iliuliu ena nona koronivuli. Walega oqo, rau a raica nona itubutubu ena nona talevoni na ka e sega ni dodonu vua e dua e muri Jisu Karisito. Rau a lewa me sa gole tani mada mai na itukutuku raraba. Rau a veisautaka nona talevoni vuku ki na kena e vakaisogo, ka rarawa kina. Ena veitaratara vakacava kei ira nona itokani?

A cudruvi rau taumada nona itubutubu, ia ni oti e vica na siga, a vakavinavinakataka ni rau taura na nona talevoni. A kaya “Au sa qai bula galala ena imatai ni gauna.” Ia oqo sa qiriti ira nona itokani ena nona talevoni vakaisogo. A vosa vei ira ka sega tale ni vakauitukutuku ena talevoni me vaka e liu!

Na veisau cava tale sa yaco ena bula nei cauravou oqo? Sa kaya ni sa taleitaka me galala mai na bula lasu e bulia na itukutuku raraba. Sa vakaitavi ena bula dina ka sega ni ravica tiko na uluna na talevoni e veigauna. Sa vakaitavi ena itaviqaravi bulabula e tautuba ka sega ni qito vidio tiko. Sa bula vakadodonu ka veivukei ena nona itikotiko. Sa vakasaqara na madigi me veiqaravi. Sa vakarorogo vakavinaka ena lotu, sa ramase kena irairai, sa marau vakalevu, ka sa maqusa tiko me laki kaulotu! A yaco oqo baleta ni a galala mai na veika vakatani ni itukutuku raraba.

Sa imatai kina ni noqu veisureti nikua mo ni kakua ni vakararavi tiko ena itukutuku raraba ka lolo me vitu na siga mai na itukutuku raraba. Au kila ni sa tu na ka dodonu ena itukutuku raraba. Ia kevaka mo sa yalomu dina ena itukutuku raraba ka sega ni rogoca na domo vinaka ni Yalotabu, o sa na biuti iko mo na kune ca vakayalo—ka vakakina nomu rawa ni vakila na galili levu kei na lomaocaoca ni bula. E daru sa kila ni itabagone era sa uqeti tu ena itukutuku raraba me ra cakava ka cavuta na veika era sega ni cakava se kaya rawa e matanavotu. Na veivakacacani e dua.

Dua na tiki lolovira ni itukutuku raraba o ya ni bulia e dua na vakasama lasu. Na tamata yadua era tabaka nodra ka ni lasa, gade, kei na iyaloyalo warumisa, e bulia na vakanananu cala ni ra sa lasa tiko ka segai o iko, ka ra sa gade vinaka tiko, ka bula mamarau. Vuqa na veika era laurai ena itukutuku raraba e ra ka vakatani, se ka lasu. Mo sa cegu mada mai na lasu oqo me vitu na siga!

Digitaka e vitu na siga veitarataravi ka cakava sara! Raica ke o kunea e dua na duidui ena veika o vakila se vakanananutaka, nomu ivakarau ni vakanananu, ena vitu na siga oqori. Ni oti na vitu na siga, raica ke so na veika o sa sega ni via cakava kei na veika o sa via tekivu cakava sara.

Na lolo digitaki oqo ni itukutuku raraba e dodonu me nomu ga o iko kei na Turaga. Sa nomu ivakatakilakila Vua ni sa lomamu dina mo lako tani mai vuravura mo laki lewena na Nona mataivalu ni itabagone.

Na ikarua ni noqu veisureti o ya mo soligauna ena veimacawa vua na Turaga, me tolu na macawa veitaravi, mo vakaraitaka Vua ni ko via lewe ni Nona mataivalu ni itabagone—sega tale ni dua na ka. Ena tolu na macawa oqo biuta eso nomu itovo talei ka taura na gauna oqori mo sokumuni ira na Isireli.

Na gauna o cakava kina e dua na ka e vukea kina e dua ena yasa e rua ni ilati—cakava nomu veiyalayalati kei na Kalou ka ciqoma nodra cakacaka tabu bibi ni papitaiso kei na valetabu, o sa sokumuni Isireli tiko. E rawarawa sara tu ga.

Ni ko masulaka na soligauna oqo, o na dusimaki mo kila na cava mo kua ni cakava kei na cava mo na cakava ena macawa o ya mo sokumuni Isireli kina. Me vakataka, ni rawa vua e dua na dauqito me kua ni laki qito ka me na laki tiko ena tobu ni papitaiso.

Na ikatolu ni noqu veisureti o ya mo dikeva mada nomu bula kei na Turaga, kei nomu itubutubu ka vakakina vei bisopi, me vakadeitaki ni sa teivaki tu na yavamu ena salatu ni veiyalayalati. Ke o sa gole tani, se tiko eso na ka mo sa biuta me vukea me savasava nomu vakasama kei na yalomu, nikua ga sa gauna vinaka mo veisau kina.

Ke o sega ni kila mo veivutuni vakacava, raici nomu bisopi se nomu itubutubu se ruarua. E ratou na vukei iko mo kila vinaka na Veisorovaki i Jisu Karisito. E ratou na vukei iko mo sotava na reki e kauta maina veivutuni dina

Kua tale ni tiko tani mai na salatu ni veiyalayalati me dua tale na miniti. Yalovinaka lesu mai ena veivutuni dina, nikua. Keimami gadrevi iko ena mataivalu ni itabagone ni Turaga. E sega ni vinaka ke o yali maivei keimami!

Na ikava ni noqu veisureti o ya mo masulaki ira e veisiga na luve ni Kalou mera ciqoma na kalougata ni kosipeli i Jisu Karisito. E daru sa raica tiko, ka daru na raica tikoga, na sokumuni ni Isireli ena kaukauwa cecere. Ka rawa mo tiki ni kaukauwa oqo sa veivakasokumuni tiko!

Na ikalima ni noqu veisureti vei iko o ya mo kilai ka duatani mai vei vuravura. E daru sa kila vinaka tu ni dodonu mo dua na rarama kei vuravura. Koya gona, sa gadreva na Turaga mo irairai, vosa, itovo, ka isulusulu vakatisaipeli dina i Jisu Karisito. O bula tiko oqo e vuravura, ia sa duidui sara nomu itagede mai vei vuravura me na vukea me kua ni tauvi iko na duka ni vuravura.

Ni sa nomu itokani na Yalo Tabu, ko na rai basikata na itovo veilasamaki vakavuravura sa vakacacana tu na noda bula. Sa rawa mo vuku cake sara mai vei ira na itabatamata taumada. Ke so na gauna o vakatokai mo “lialia,” daramaka na itokayaca dokai oqo ka marautaka ga ni ramase tiko na nomu cina ena vuravura butobuto oqo!

Mo ivakatagedegede ki na vuravura oqo! Mo na duatani tikoga! Na tikidua Me iSakisaki ni iTabagone sa nomuivakatagedegede. Sa itagede sa namaka tiko na Turaga mera tutaka na Nona itabagone. Niu Nona parofita, au kerea mo vulica tale na tikidua oqo. Mo wilika ena masumasu me vaka se qai kena imatai. Makataka tiko. Veitalanoataka mada Tukuna na itagede oqo vei ira nomu itokani. Lewa mo bulataka vakacava na itagede oqo, nomu itagede, ena kena e dodonu vinaka.

Sa tiko na nomu ilavelave. Ni sa na oti na soqoni oqo nikua, ke o gadreva mo vakaitavi, yalovinaka taura na tikidua Me iSakisaki ni iTabagone ka solia yani ki na itokani e sega tu ni kila nomu itagede, se sega tu ni bulataka o koya.

Masulaka o cei e gadreva na tikidua oqo. Ko na dusimaki. Ena ka marautaki sara.

Meu taleva lesu na usutu ni lima ni noqu veisureti mo lewena kina na mataivalu itabagone ni Turaga ni sokumuni Isireli:

Lolo me vitu na siga mai na itukutuku raraba.
Cakava e dua na soligauna vua na Turaga me tolu na macawa.
Mo tiko ga ena salatu ni veiyalayalati. Ke o sa tu tani, veivutuni ka lesu ena salatu.
Masulaki ira e veisiga na luve ni Kalou mera ciqoma na kalougata ni kosipeli i Jisu Karisito.
Mo tu qaqa. Mo duatani. Mo dua na rarama! Solia ki na dua na itokani na ivolalailai Me iSakisaki ni iTabagone.

Taciqu kei na ganequ itabagone, sai kemuni na isakisaki ni Turagase qai bautala mai vuravura. Sa tu vei kemuni na kila kei na vuku kei na kena igu mo rawai vuravura kina ni vakatauvatani kei na itabatamata taumada!

Meu tinia, au sureti iko mo tucake vata kei ira na itabagone e vuravura raraba ka ivakadinadina ni ko sa lewena na mataivalu itabagone ni Turaga e Saioni ka lagata na sere ni suka, “Hope of Israel.”

Mai na vu ni yaloqu taucoko, au vakadinadinataka ni oqo na cakacaka ni Kalou sa Cecere. E bula o Koya. O Jisu na Karisito. Oqo na Nona Lotu, vakalesuimai me caka na kena inaki, oka kina na sokumuni Isireli sa yalataki tu.

Sai kemuni na inuinui kei Isireli, “gone ni siga sa yalataki tu”!⁸ Au sa vakadinadinataka oqo ena yaca i Jisu Karisito, emeni.