2:3

Faamoemoe o Isaraelu

Peresitene Russell M. Nelson ma Sister Wendy W. Nelson

Peresitene Russell M. Nelson: E le lava upu e faailoa atu ai lo tatou agaga faafetai i lena aufaipese seminare. Oka, na lelei le tou faia o lena mea. Faafetai tele. Faafetai tele lava. Ao ou vaai atu i lenei Maota Autu mo Konafesi ua faatumulia i Au Paia o Aso e Gata Ai aulelei, ou te lagona ua ou maua le aiga toatele na ou faamoemoe i ai. E 22,000 outou o loo iinei i lenei po ma le faitau afe o isi o loo faatasi ma i tatou i lenei faasalalauga.

E maeu le ma fiafia ma Sister Nelson e faatasi ma outou i lenei po. Ma te fiafia lava matou te mafuta ma outou, le autalavou o Le Ekalesia a Iesu Keriso o le Au Paia o Aso e Gata Ai.

Ma’imau e pe ana mafai ona ma faalogologo atu ia te outou taitoatasi e uiga i o outou aafiaga i le tapenapena ai mo la tatou faatasiga i le lalolagi atoa, a o outou faitau i aso taitasi mai le Tusi a Mamona ma a o outou tatalo e faalogo i le mea o loo naunau le Alii e aoao atu ia te outou.

Ou te toe faailoa atu lo ma faafetai i le aufaipese a le seminare mo le lagiina o la tatou viiga amata ma na lagona. O lena viiga—”Ia Viia Oe Le Atua”—”e liliu atu ai lava o tatou loto i le Perofeta o Iosefa Samita. Oka so tatou nofo aitalafu ia te ia! O ia o le Perofeta o lenei tisipenisione mulimuli! Se’i vaai faalemafaufau i ai! Na pei o lo outou matutua ae musuia o ia e upu a le Aposetolo o Iakopo: “Afai e leai se poto i so outou, ina ole atu ia i le Atua.”¹

O na upu na uunaia malosi ai le taulealea o Iosefa e alu i se vao o laau sa lata ane, lea na ia sasaa atu ai lona loto i le Atua.

Sa matala mai le lagi! Sa vaai Iosefa i le Tama ma le Alo ma sa ia aoaoina mo ia lava le mea e alu i ai mo tali i ana fesili.

Ou te aioi atu nei ia te outou taitoatasi ia faia e pei ona sa faia e le alii talavou o Iosefa. Ave sa’o atu lava au fesili i lou Tama i le Lagi i le tatalo. Aioi atu ia te Ia, i le suafa o Iesu Keriso, e taiala oe. E mafai ona e aoao ai mo oe lava--i le taimi nei lava i lou matua---le ala e maua ai faaaliga patino. Ma e leai se mea o le a faia se eseesega tele i lou olaga nai lo lena!

Ou te folafola atu ia te oe---e le o le tagata lena e nofo i ou autafa, ae o oe--, po o fea lava le mea lena e te i ai i le lalolagi, po o fea lava o e i ai i luga o le ala o le feagaiga---tusa lava pe, i le taimi lenei, e te le o i le ogatotonu o le ala---ou te folafola atu ia te oe afai o le a e faia ma le lotofaamaoni ma tumau ai pea lava i le galuega faaleagaga e manaomia e atina’e ai le tomai taua, faaleagaga o le aoao pe faapefea ona faalogo i musumusuga a le Agaga Paia, o le a e maua taitaiga uma o le a e manaomia i lou olaga. O le a tuuina atu ia te oe tali o au fesili i le ala lava ma le taimi a le Alii. Ma aua nei galo le fautuaga a ou matua ma taitai o le Ekalesia. O loo latou sailia foi faaaliga mo oe.

A e iloa o loo faatonutonuina e le Atua lou olaga, po o a lava luitau ma tulaga le fiafia o le a oo mai, o le a e lagonaina lava le olioli ma le toafilemu.

O le taimi nei, ma te fia talanoa atu ia te outou e uiga i le luitau aupito silisili, le mafuaaga aupito silisili, ma le galuega aupito silisili o i le lalolagi. Ma ma te mananao ia avea oe o se vaega o lena mea!

Ua ou talosagaina Sister Nelson e saunia se matalalaga mo lena savali taua. Faamolemole, Sister Nelson.

Sister Wendy W. Nelson : O’u uso e ma tuagane talavou, o e ma te alolofa ma talitonuina, ou te fia amata i le faamatala atu ia te outou, sa ma vaai ma lo’u toalua i se tasi aso ao ma ui atu i atumauga o Iuta i se taavale mo nuu a uta.

Sa o se aso mafanafana o le tautotogo. Sa ma fiafia e i ai i le vao o laau lanu auro ma matagofie, uumi ma sasa’o, agai uma i le lagi.

Ona, ma toe liliu lea i se tulimanu ma sa ou vaai ai se laau sa faamanatu mai ai ia te a’u ma o’u lagona i le tele o faatasiga.

Pe e te iloaina lena faalogona? E te autilotilo solo ma e foliga mai ia te oe e uumi uma tagata ma ua tau atu i le lagi, pe a.

Ua latou iloa mea uma. Ua tonu lelei o latou ofu, e foliga mai e sa’o mea uma latou te tautatala ai, e leai ni o latou faafitauli, e usiusitai atoatoa---ma e foliga mai latou te le faia lava se mea sese i o latou olaga.

Ia, ma, o oe lena ma a’u!

O’u uso e ma tuagane pele, ua oo i le taimi e tuu ai lo tatou faatusatusaina o i tatou lava i isi tagata. Ua oo i le taimi e tuu ese ai na vaaiga sese ia i tatou lava ma isi. O le mea moni, tatou te le o faamaoni e aunoa ma le faamoemoe e pei ona tatou mafaufau i ai, ma o isi e le o atoatoa e pei ona foliga mai ai—-sei vagana ai, ioe, lo tatou Faaola, o Iesu Keriso.

Na pau lava le mea e taua moni o le, o oe ma a’u o loo faia le mea tonu lava ua tatou tautino atu ai---ua osifeagaiga ai---i le muai olaga ma lo tatou Tama Faalelagi e faapea o le a tatou faia a o tatou i ai i le lalolagi.

O lea la, sei ou fesili atu ia te oe: O le a le mea na e fanau mai e fai?

Maimau e pe ana mafai ona tatou matamata i se vitio e 10-minute i le YouTube o lou olaga i le muai olaga.

Sa aoao mai e le Perofeta o Iosefa Samita pe mafai ona e pulato’a ae i le lagi mo se lima minute, o le a e iloa atili ai e uiga i se autu nai lo se mea sa e suesueina i lou olaga atoa.² O lea la, mafaufau faapea afai e mafai ona e pulatoa ae i le lagi mo le 10 minute i lou olaga i le muai olaga!

E moni ua tatou iloa sa tosoina ma le poto e le Alii se veli i luga o na manatuaga. Ae, mo na o sina minute, manatu faapea o le aafiaga o lou olaga pe ana fai e faataga ona e matamata mo se 10 minute i lou olaga i le muai olaga.

Ou te talitonu e mafai ona e vaai ia te oe lava o ola faatasi ma ou Matua Faalelagi ma Iesu Keriso; pe ana mafai ona e vaai i mea na e faia i le muai olaga ma vaai ia te oe lava o faia ni tautinoga—faapea ma feagaiga—ma isi, e aofia ai ou faufautua ma faiaoga; pe ana mafai ona e vaai ia te oe lava o tali atu ma le lototoa i osofaiga i upumoni ma tu atu ma le toa mo Iesu Keriso, ou te talitonu o le a maua e outou taitoatasi le mana faateleina, tautinoga, ma le vaaiga faavavau e fesoasoani ia te oe e foia soo se ma ou masalosalo, le mautonu, tauiviga, ma faafitauli uma. Mea Uma!

Ou te taitonu a mafai ona e manatua le tagata lea na e fai mai o le a e fesoasoani i ai a o e i ai iinei i le lalolagi, po o a foi aafiaga tiga na e ioe e te ui ai, po o le a moni lava le tulaga faigata o loo e i ai i le taimi nei---pe o le a i ai---o le a e faapea ane “Oi, o lea la ua ou manatua. O lea la ua ou malamalama. O lea ua manino mai le tulaga faigata lea ia te au. Faatasi ai ma le fesoasoani a le Alii, e mafai ona ou faia le mea lea!”

Nei la, o se tasi lea o mea ou te valaaulia oe e te mafaufau i ai. Ou te fia manao ia e mafaufau faapea na taitasi i tatou ma o mai i lenei lalolagi ma se lola ua faapipii i o tatou agaga e igoa o le “O Mea e Fai A o I Ai i le Lalolagi.”

Se’i o tatou talanoa pe o le a se mea atonu o i ai i le lola. Se’i o tatou talanoa i ni mea se lima e mautinoa lava e tusia i luga o le lola e tusa ai ma le talalelei a Iesu Keriso.

Muamua, na e sau ia maua se tino faitino. Ma o lena mea, au uo, o se mea taua.

Lua, na e sau ia suesueina oe.

Tasi o le mea, pe ua e matauina o le suesueina o i tatou e tele taimi e aofia ai le aoao ia pulea manaoga o o tatou tino ma naunauga, lea e mafai ona faigata ona taofiofi? Afai o e tauivi i le taimi nei ma aafiaga faifai pea o soo se ituaiga o faatautala po o agasala matuia e le’i salamoina, ou te uunaia oe e faasaoloto mai oe lava e ala i le talanoa i lou epikopo—i le aso. O loo ia umia ki o le perisitua e mafai ona fesoasoani ai ia te oe.

O se mea lona tolu e fai a o i ai i le lalolagi: filifili e mulimuli ia Iesu Keriso ma tu atu mo Ia, e pei lava ona sa e faia i le muai olaga.

Fa, filifili ia salamo i aso uma ma ‘ai ma inu i le faamanatuga i vaiaso uma. Ao e faia lea mea, o le a faamaloloina oe faaleagaga, faamalosia, ma faalauteleina ma mulimuli ane faapaiaina ma faaeaina e ala i le Togiola a Iesu Keriso.

Ma se mea la lea lona lima i lau lisi o le sue ma faataunuu au misiona i le olaga nei. A’u uo talavou pele, i le muai olaga na tofia ai oe ma a’u i se misiona ofoofogia e faataunuu a o i ai iinei i le lalolagi.

Ua i ai ia te i tatou ia avanoa e faataunuu ai a tatou misiona o le olaga nei, ae le faapea e tatau ona tatou faia. E leai a se isi na te faamalosia i tatou e fai. Ua i ai lo tatou faitalia e filifili ai pe faapefea ona faaalu lo tatou taimi ma le faitalia, o a tatou taleni ma punaoa. O le mea moni, o le mea tatou te filifili e fai o le vaega lena o le suesueina o i tatou.

O le filifiliga e a oe ma a’u. Pe o le a tatou filifili ea e faia soo se mea e tatau ai ina ia faataunuu ai le misiona matagofie na ala ai ona auina mai i tatou i le lalolagi?

A o olaola lena fesili i lou mafaufau, se’i o tatou see atu ma talanoa e uiga i le mafuaaga ua e i ai i lenei lalolagi---i lenei taimi faapitoa o le taimi aupito tulaga ese i le talafaasolopito o le lalolagi.

Aisea ua e i ai i le lalolagi i le taimi nei?

Aisea na e le fanau mai ai i le vaitau o le 1880? po o le 30 tausaga mai le taimi nei?

Se’i ou faamatala atua ia te oe se aafiaga sa aoao patino ai au e uiga i aso faasolopito o loo tatou ola ai nei.

E tele ina tatou talanoa e uiga i le ola ai i aso e gata ai. O le mea moni lava, o i tatou, o le Au Paia o Aso e Gata Ai. Ae atonu o nei aso e gata ai e sili atu ona “mulimuli” nai lo le mea ua tatou manatu i ai.

Na oo ina moni lava lenei upumoni ia te a’u ona o mea sa ou oo i ai i se vaitau e 24-itula na amata i le aso 15 Iuni, 2013. Sa ma i ai ma lo’u toalua i Moscow, i Rusia.

A o faia se fonotaga a Peresitene Nelson ma taitai perisitua i le eria, sa ou maua le avanoa e feiloai ai ma le toeitiiti atoa le 100 o o tatou uso. Ou te alofa i o tatou uso Rusia. E ofoofogia lava i latou!

Ina ua ou laa atu i le pulelaa e lauga atu, sa ou maua au lava o fai atu ni mea ou te lei faamoemoeina. Sa ou fai atu i tamaitai: “Ou te fia iloaina outou e ala i le gafa. Faamolemole tulai mai pe a ta’ua le ituaiga o Isaraelu o loo tautino mai le gafa i lou faamanuiaga faapeteriaka.”

“Peniamina?” Na tutu a’e ni nai tamaitai.

“Tanu!” Na tutu ae foi nisi.

“Reupena?” Na toe tutu ae foi ma nisi.

“Nafatali?” Na tutu foi nisi.

A o tolaulauina igoa o ituaiga e toasefululua o Isaraelu---mai ia Asera e oo ia Sepulona---a o tutu a’e tamaitai, sa matou maofa i le mea sa matou molimauina, lagonaina, ma aoaoina.

E toafia ituaiga o Isaraelu tou te manatu sa i ai sui i lena faatasiga laitiiti o ni nai tamaitai e le atoa se to’a 100 i lena Aso Toonai i Moscow?

Sefulutasi! E sefulutasi ituaiga o Isaraelu na i ai sui i lena potu e tasi! Na pau le ituaiga na misi o le ituaiga o Levi. Sa ou tei lava. Sa o se taimi faagaeetia faaleagaga mo a’u.

I le taimi lava na maea ai na fonotaga sa ma o sa’o lava ma lo’u toalua i Yerevan, Armenia. O tagata muamua sa ma feiloai i ai ina ua ma o ese mai le vaalele o le peresitene o le misiona ma lona faletua. Masalo, na faalogo o ia [le faletua] i lea aafiaga i Moscow, sa ia fai mai ai ma se sagisagi fiafia i lona leo, “O a’u o le ituaiga o Levi!”

Vaai faalemafaufau i lo matou fiafia ina ua ma feiloai ma loʻu toalua i a latou faifeautalai i le aso na sosoo ai, e aofia ai se toeaina mai le ituaiga o Levi na sau mai Gilbert, Arisona.

Ia, a ou laitiiti ma ou i ai i le Peraimeri i Raymond, Alberta i Kanata, sa ou aoaoina ai e faapea i aso e gata ai---a o lei oo i le Afio Mai Faalua o le Faaola---o le a faapotopoto ai ituaiga e sefululua o Isaraelu. Sa o se mea e meia ai i lena upumoni, ma i le taimi foi lea, e fai lava si lofituina mo a’u e malamalama ai. Mafaufau pe na faapei o’u lagona i le faatasi ai ma tagata o ituaiga e toasefululua o Isaraelu i totonu o le 24 itula!

Na ou iloaina talu mai lena taimi masalo sa le tatau ona ou fesili i na uso e faailoa mai i latou e ala i le gafa ona o faamanuiaga faapeteriaka e paia ma o le tautinoina o le gafa e patino. Peitai, ou te faafetai mo le avanoa na ou vaai tino ai i fua o le faapotopotoina o Isaraelu. O le mea na oo i ai lena aafiaga e lei aveesea lava mai lo’u loto ma lo’u mafaufau.

O’u uso e ma tuagane pele, e moni lava o aso nei e gata ai! E le’i i ai lava se taimi faapenei i le talafaasolopito o lenei lalolagi. E le’i i ai lava! I le muai olaga, sa tautino atu ai e oe ma au e faia se galuega tele iinei i le lalolagi. Ma faatasi ai ma le fesoasoaniga a le Alii, o le a tatou faia. I le suafa, o Iesu Keriso, amene.

Peresitene Nelson: Faafetai, Wendy. Ou te alofa ia te oe! Pe le matagofie ea lena mea?

O’u uso e ma tuafaine pele, o aso nei e gata ai, ma ua faanatinati e le Alii Lana galuega e faapotopoto Isaraelu. O lena faapotopotoina o le mea aupito sili lea ona taua o loo tupu i le lalolagi i le taimi nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. Ma afai e te filifili e, pe afai e te manao ai, e mafai ona avea oe o se vaega taua o lena mea. E mafai ona avea oe o se vaega tele o se mea tele, se mea maoae, se mea e malualii!

Pe a tatou talanoa i le faapotopotoina, ua na ona tatou fai atu lava o lenei upumoni faalefaavae: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. Latou te filifili mo i latou lava pe latou te mananao e iloa atili.

O i latou o o latou gafa e mai ituaiga eseese o Isaraelu o i latou ia o le a sili ona liliu atu o latou loto i le Alii. Na ia fetalai mai, “O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au.”³ O i latou o e o le aiga o Isaraelu o le a sili ona faigofie ona iloa le Alii o Iesu Keriso o lo latou Faaola ma mananao ina ia faapotopoto i Lana lafu. O le a latou mananao e avea o ni tagata o Lana Ekalesia, osia feagaiga ma Ia ma le Tama Faalelagi, ma talia a la sauniga e tatau ai.

Na tau atu e le Alii i le Perofeta o Iosefa Samita e faapea o le taimi nei, o lona uiga o o tatou taimi, o le itula lona sefulu ma le tasi lea ma o le toe taimi o le a valaauina ai e le Alii le aufaigaluega i Lona tovine mo le faamoemoega faanatinati o le faapotopotoina o le au filifilia mai itu e fa o le lalolagi.⁴

O la’u fesili i le po nei ia te outou uma e i le va o le 12 ma le 18 o lenei: Pe tou te mananao e avea o se vaega tele o le lu’i aupito silisili, le mafuaaga aupito silisili, ma le galuega aupito silisili i le lalolagi i le taimi nei?

Pe tou te mananao e fesoasoani i le faapotopotoina o Isaraelu i nei aso taua e gata ai? Pe tou te, outou o le au filifilia, o le a loto e fesoasoani i le sailia o le au filifilia e lei faalogo lava i le savali o le talalelei toefuataiina? Pe tou te mananao e avea ma “avefeau televavave” lea na tautala i ai le perofeta o Isaia?⁵

O lenei, o le auai i le faapotopotoina o Isaraelu atonu o le a manaomia ai sina osigataulaga i la outou pitolaau. Atonu foi e manaomia ai ni nai suiga o lou olaga. O le a mautinoa lava e alu sina vaega o lou taimi ma le malosi ma au taleni na avatu e le Atua. O e fiafia i ai?

Tau lava ina mafaufau i le manaia ma le faanatinati o lena galuega uma: o perofeta uma e amata mai ia Atamu sa vaai i o tatou aso. Ma sa talanoa perofeta taitasi e uiga i o tatou aso---o tatou taimi----pe a faapotopotoina ia Isaraelu ma o le a saunia le lalolagi mo le Afio Mai Faalua o le Faaola. Mafaufau i ai! Mai i tagata uma ua ola ai i le paneta o le lalolagi, o i tatou o tagata ua auai i lenei mea maoae faaiu, o le faapotopotoina. Se mea ina a ofoofogia!

Sa faapolopolo e lo tatou Tama Faalelagi Ana agaga aupito sili ona tamalii—atonu e mafai ona ou fai atu o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou!

Ou te molimau atu o le faapotopotoina o le taimi nei, ma e moni. I le tausaga sa ou fanau mai ai, o le faitau aofai o le Ekalesia sa i lalo ifo o le 600,000 ma sa leai ni tagata auai i Amerika i Saute. O le asō, ua silia ma le 16 miliona tagata o le ekalesia, ma e toeitiiti atoa le 3 miliona o tagata auai i Amerika i Saute.

Sei ou faamatala atu ia te oe se mea na tupu ia te aʻu i le 1979. Sa avea a’u ma Peresitene Aoao o le Aoga Sa i lena taimi. Sa valaauliaina a’u e auai i se fonotaga a taitai o le Ekalesia lea na saunoa ai le Peresitene o le Ekalesia, o Peresitene Spencer W. Kimball. Sa ia faatonuina i matou taitoatasi e tatalo ina ia tatala faitotoa o malo ina ia mafai ona avatu le talalelei a Iesu Keriso i tagata uma o le lalolagi. Sa ia ta’ua patino lava ia Saina ma sa talosaga mai ia matou tatalo mo tagata o Saina. Sa ia saunoa mai foi, “E tatau ona matou auauna atu i tagata o Saina. E tatau ona matou aoaoina le latou gagana. E tatau ona matou tatalo mo i latou ma fesoasoani ia i latou.”

Sa ou foi i le fale i lo’u toalua, o Dantzel (o le na maliu i le silia ma le 13 nei tausaga), ma fai atu, “Na talosagaina i matou taitoatasi e Peresitene Kimball i lena fonotaga e aoao le faa-Saina! Ma ou te lei faalogo ia te ia o faapea mai, ‘Tagata uma vagana ai Uso Nelson!’ O lea la, pe e te manao ta te aoao faatasi ma a’u le Faa-Saina Meniterini?” Oi ioe, sa ia malie mai ai ma sa aoaoina i ma’ua i le Meniterini.

O le ono vaiaso talu ona mavae le talosaga a Peresitene Kimball, sa ou auai i le fonotaga faaletausaga a le Faalapotopotoga a Amerika mo Fomai Tipitipi o le Fatafata [Thoracic Surgery]. Sa faia i Boston, Massachusetts. O lena taeao, sa ou tatalo ai i lo’u potu i le faletalimalo mo tagata o Saina, e pei lava ona sa talosagaina ai e Peresitene Kimball. Sa ou alu ai i le fono muamua o le aso ma nofo i le mea e masani ona ou nofo ai---i le pito i luma o le potu. Peitai, ao faagasolo le fono, sa amata ona faateleina lou le toafimalie i lo’u nofoa. Ma ina ua faamuiti ia moli mo se tolaulauga o ata faasolosolo, sa ou aluese mai lo’u nofoa ma savali lemu ese i tua o le potu---o se nofoaga ou te le masani ona ou nofo ai. Ina ua toe mumu mai le moli, sa ou vaaia ua ou nofo i autafa o se fomai Saina. Sa ia faailoa maia ia lava o Polofesa Wu Ying-Kai mai Beijin, Saina!

Ina ua uma se talatalanoaga manaia ma ia, sa ou tuuina atu se valaaulia mo ia e asiasi mai ai i le Aai o Sate Leki, ma tuuina mai se tautalaga i le Aoga Faafomai a le Iunivesite o Iuta. Sa ia talia fiafia ma sa maoae lana faatinoga. Ona ia toe foi lea i Saina.

E lei leva, ae ia valaaulia au e avea o se polofesa asiasi atu o le au tipitipi i le Iunivesite Faafomai o Shandong i Jinan, Saina. Na o’o atu ai i nisi valaaulia mo a’u e avea o se polofesa asiasi atu i isi iunivesite e lua i Saina.

O nei poto masani ofoofogia faapolofesa---a o lei oo i lo’u valaauga i le Toasefululua---na palealuga ina ua talosagaina au e fomai tipitipi Saina e faia se taotoga o le fatu ina ia faasaoina ai le ola o lo latou tagata pese aupito lauiloa. Sa faia lena mea, ma faafetai sa manuia lena taotoga. Sa avea ma [taotoga] mulimuli o lo’u olaga faapolofesa.

Mo le toetoe atoa le 40 tausaga, sa ou tatalo ai mo tagata o Saina. Ou te olioli lava i la’u asosi ai ma paaga faafomai ma isi uo i Saina. O se olioliga mo a’u le ta’ua aloaia o se “uo ua leva a Saina.”

O la’u molimau a tatou mulimuli po o le a lava le mea e faatonuina ai i tatou e le perofeta a le Atua e fai, o le a tatala lava le ala ma o le a suia olaga.

O nei la, ou te faamoemoe ua e fesili ifo ia te oe lava, “O le a se mea e mafai ona ou faia, o se talavou, e fesoasoani ai e faapotopoto ia Isaraelu? Sa ma fai atua ma Sister Nelson lena lava fesili, ma nai nisi foi, i se vaega o talavou mai le tai 12 i le 18.

Sa muamua ona ma fesili atu “O le a le faapotopotoina o Isaraelu? O le a le uiga o lea mea ia te oe?” E eseese lava a latou tali, ae o le toatele sa latou ta’u maia sa latou le mautinoa lelei pe o le a. O le po nei, ma te mananao ia outou iloa o le faapotopotoina o Isaraelu o lona uiga moni lava o le ofoina atu lea o le talalelei a Iesu Keriso i fanau a le Atua i itu uma o le veli, o e e lei osia feagaiga taua ma le Atua pe ua maua o latou sauniga e tatau ai.

Ua tatau ona maua e fanau uma a le Tama Faalelagi le avanoa e filifili ai e mulimuli ia Iesu Keriso, e talia ai ma maua Lana talalelei ma ona faamanuiaga uma---ioe, faamanuiaga uma na folafola mai e le Atua i le gafa o Aperaamo, Isaako, ma Iakopo, o le, ua tou iloa, ua lauiloa foi o Isaraelu.

La’u autalavou pele tulagaese---na auina mai outou i le lalolagi i lenei taimi patino, lenei taimi aupito taua i le talafaasolopito o le lalolagi, e fesoasoani e faapotopoto ia Isaraelu. E leai se mea o tupu i le lalolagi i le taimi nei, e sili atu ona taua nai lo lena. E leai seisi mea e sli atu lona taunuuga. E matua leai lava.

O lenei faapotopotoina e tatau ona avea o mea taua uma ia ia te oe. O le misiona lenei na auina mai ai oe i le lalolagi.

O la’u fesili la lea ia te oe “Pe ua e loto ea e auai i se vaega o talavou a le Alii e fesoasoani e faapotopoto ia Isaraelu?” Faamolemole ia mafaufau i lenei mea. Aua e te vave tali mai i ai.

Sei tatou toe foi i isi fesili na fesili ai Sister Nelson ma a’u i a tatou uo talavou. Sa ma fesili atu foi, “Afai sa valaaulia e le perofeta tagata uma ua tai 12 e oo i le 18 i le Ekalesia e auai ia fesoasoani e faapotopoto ia Isaraelu, o le a se mea e te loto e fai?”

Sa tali mai le autalavou ma faamatalaga musuia e pei o, “Afai e valaaulia i matou e le perofeta e fesoasoani i le faapotopotoina mai o Isaraelu, o le a ou auai atoatoa e faatino. O le a ou tuu soo se mea o o’u faia ae fesoasoani! O le a ou alu ma faia po o le a lava e faatonuina ai au e fai, aua o le perofeta o se faifeau mai le Atua.”

Na aofia ai foi ia latou tali: “O le a ou naunau ia faia atili galuega o talafaasolopito mo aiga. O le a ou faia se taumafaiga sili atu e talanoa faasamasamanoa ai ma isi e uiga i le talalelei. O le a ou avea ma faataitaiga lelei i le faaalia o uiga faaKeriso. O le a ou faia nisi mau papatisoga mo e ua maliliu; suia vaega o le ala o ola ai lo’u olaga ma filifiliga ou te faia; malaga i soo se mea e finagalo o ia ou te alu i ai, aoao se gagana fou, feiloai atu i tagata fou; tuu atu la’u kopi o le Tusi a Mamona ia i latou e lei faitau lava i ai. Ma o le a avea au ma se tagata aupito sili ona agalelei i le mea ou te mafaia.”

Sa ma fesili atu foi i nei talavou po o le a le mea latou te loto ia ositaulaga ina ia mafai ai ona latou fesoasoani e faapotopoto ia Isaraelu. E toe faapea atu foi, sa faagaeetiaina lava i ma’ua e le au talavou. Sa latou tali mai: “O le a faaitiiti lo’u taimi i taaloga ina ia mafai ona ou i ai iina mo se tagata e manaomia le upumoni. O le a ou ositaulagaina le feofeoai ma uo ae valaaulia i latou e o mai i le malumalu. O le a ou faaitiitia moni lava le taimi i la’u telefoni. O le a ou tipia nisi taimi o matamata ai. O le [a oo] foi ina ou loto e ositaulagaina a’u malologa i afiafi o Aso Sa!”

Sa ma fesili, “Afai e te manao e auai e fesoasoani i le faapotopotoina o Isaraelu, o le a se mea e te manao e amata ona fai pe tuu e le toe faia? Sa latou tali mai e pei o “O le a ou suesue atili i tusitusiga paia, ma le maua’i atili, ina ia mafai ona ou taliina fesili e ono fesili mai ai tagata ia te au. O le a faaitiitia lo’u taimi i faasalalauga faaagafesootai; ia punouai atili i le faia o faatinoga o le galuega faafaifeautalai a tagata o le au paia, e aofia ai galuega auauna atu i aso taitasi. O le a ou faaitiitia le taimi ou te faaaogaina i la’u telefoni, ma, a o ou i luga o la’u telefoni, e mafai ona ou faalauiloaina mau po o isi feau faaleagaga i faasalalauga faaagafesootai. O le a ou suesue i lauga o konafesi aoao aua e maualuga lo latou taua. O le a ou ‘ai i meaai paleni ina ia ou malosi ai. O le a taofi lou mafaufau faapea o mea uma lava e faatatau ia te a’u.” Faafetai atu, uso e ma tuafafine, mo a outou tali i a ma fesili.

Mafaufau i le mea lenei, o’u uso e ma tuafafine talavou pele, o le taimi nei o loo ou sauniuni mo le aso o le a manaomia ai ona ou tuuina atu se tala i le Perofeta o Iosefa Samita, Peresitene Polika Iaga, ma isi---ma o le taualuga lava i le Alii---e uiga i la’u tausimea o se perofeta a le Atua i le lalolagi i le taimi nei. Ou te le manao e fesili mai, “Uso Nelson, aisea na e le faamanino atili atu ai i le autalavou e uiga i lo latou vaega i le faapotopotoina o Isaraelu? Aisea na e le matuai malosi ai e faagauai mai i latou ia auai e faatino?”

O lea la, ou te valaaulia nei tamaitai talavou uma ma alii talavou uma i le va o tausaga o le 12 ma le 18 o Le Ekalesia a Iesu Keriso o le Au Paia o Aso e Gata Ai ia auai i le ‘autau a le autalavou a le Alii e fesoasoani e faapotopoto mai Isaraelu.

O le a le mea o le a fesoasoani ia te oe? Ao e faaauau ona faitau i aso taitasi mai le Tusi a Mamona, o le a e aoao i aoaoga faavae o le faapotopotoina,⁶ upumoni e uiga ia Iesu Keriso, Lana Togiola, ma le atoaga o Lana talalelei e le o maua i le Tusi Paia. O le Tusi a Mamona o le totonugalemu lea o le faapotopotoina o Isaraelu.⁷ O le mea moni, afai e leai se Tusi a Mamona, o le a le tupu le faapotopotoina folafolaina o Isaraelu.

O le faia o lena mea, ou te valaaulia ai oe ia sauniuni oe lava e ala i le faia o isi mea e lima---o mea e lima o le a suia ai oe ma fesoasoani e te suia ai le lalolagi.

Muamua, ou te valaaulia oe ia tuuitiitia lou faalagolago pea lava i faasalalauga faaagafesootai, ina ia faaitiitia ai lona tosinaga faalelalolagi ia te oe.

Sei ou faamatala atu e uiga i se alii talavou pei o lo outou matutua, o le atalii o se atalii a sa’u uo pele. E lauiloa o ia i ana uo ma o se taitai i lana aoga maualuga. Talu ai nei, sa maua ai e ona matua ni mea i luga o lana telefoni sa lei talafeagai mo se e mulimuli ia Keriso. Sa la tauanauina pea o ia e taofi le faaaogaina o faasalalauga faaagafesootai mo se taimi. Sa la faafesuiaia lana telefoni poto i se telefoni mo na o valaau, ma sa atuatuvale o ia. Pe o le a faapefea ona fesootai ma ana uo?

Muamua sa matuai ita lava o ia i ona matua, ae ina ua mavae ni nai aso, sa ia faafetai atu ia te i laua i le aveeseina o lana telefoni poto. “Ua ou lagonaina le saoloto mo le uluai taimi i se taimi umi tele,” o lana tala lea. O le taimi nei, ua valaau atu i ana uo i lena telefoni mo valaau fesootai ai ma i latou. Na ia talanoa moni ma i latou nai lo le tesi atu i taimi uma!

O a isi suiga ua tutupu i le olaga o lenei alii talavou?“ Fai mai a ia ua fiafia nei ua saoloto mai le olaga taufaasese e fatuina e fesootaiga faaagafesootai. Ua aafia lelei o ia i le olaga nai lo le alu o lona taimi uma i le telefoni. Ua auai o ia i gaoioiga faafiafia i fafo nai lo le taaalo i taaloga vitio. Ua sili atu ona faamoemoeina ma fesoasoani i lona aiga. Na te sailia avanoa e auauna atu ai. Ua lelei atu lana faalogologo i le lotu, ua susulu manaia ona foliga, ma ua sili atu lona fiafia, ma o loo sauniuni lelei mo lana misiona! Ua tutupu nei mea uma ona sa ia taofia o ia lava mai tosinaga le lelei o faasalalauga faaagafesootai.

O lea la, o la’u valaaulia muamua ia te oe i le aso o le tuu lou faalagolago pea lava i faasalalauga faaagafesootai e ala i lou le faaaogaina o fesootaiga faaagafesootai mo le fitu aso. Ou te faapea atu e i ai mea lelei e uiga i faasalalauga faaagafesootai. Ae afai e tele atu lau gauai i ai nai lo musumusuga a le Agaga, ua e tuuina oe lava i se tulaga matautia faaleagaga---faapea foi tulaga matautia o le oo i le tuuatoatasi ma le faanoanoa. Ua tatou iloa uma lava talavou o e na tosina atu e ala i ala faaagafesootai e faia ma fai atu upu latou te le faia lava pe fai atu i se tagata. O le faasaua o se tasi nei o faataitaiga.

O le isi itu leaga o faasalalauga faaagafesootai e na te fatuina se lagona o le taufaasese. E faasalalau e tagata uma a latou ata aupito malie, matautuia, ma mananaia, lea e fatuina ai se vaaiga taufaasese faapea o loo ola tagata uma i se olaga malie, matautuia, ma manaia sei vagana ai oe. O le tele lava o mea e aliae mai ia outou polokalama eseese faaagafesootai e le moni. O le mea lea ia taofia oe lava mai mea e le moni mo le fitu aso!

Filifili ni aso sosoo se fitu ma fai loa lava! Vaai pe e te matauina se eseesega i ou lagona ma ou mafaufauga, e oo lava i le ala e te mafaufau ai, i na aso e fitu. A uma aso e fitu, matau pe i ai ni nai mea e te manao e taofi le faia ma ni nai mea ua e manao nei e amata.

O lea taofiga faapitoa o fesootaiga faaagafesootai e tatau ona na o le va lava o oe ma le Alii. O lau faailoga lena ia te Ia ua e loto e laa ese mai le lalolagi ina ia mafai ai ona e auai i Lana ‘autau talavou.

O la’u valaaulia lona lua ia e faia se osigataulaga i vaiaso taitasi o le taimi i le Alii, mo vaiaso sosoo e tolu, ia ta’u atu ia te Ia ua e manao e avea o se tasi o Lana ‘autau talavou---e sili atu i lo lou manao i se isi lava mea. Mo vaiaso e tolu ia e lafoai se mea e te manao e fai ae faaaoga lena taimi e fesoasoani ai e faapotopoto mai Isaraelu.

Soo se taimi e te faia ai soo se mea e fesoasoani ai i soo se tasi—po o le fea lava itu o le veli---ua e faia feagaiga taua ma le Atua ma maua o latou papatisoga e tatau ai ma sauniga o le malumalu, ua e fesoasoani i le faapotopotoina o Isaraelu. E faigofie lava.

A o e tatalo e uiga i lenei taulagaina o taimi, o le a taialaina oe ia iloa po o le a le mea e mafai ona e lafoai i lena vaiaso ma po o le a foi le mea e mafai ona e faia i lena vaiaso e fesoasoani ai e faapotopoto ia Isaraelu. Mo se faataitaiga, atonu e taofia e se tagata tapolo talavou se taaloga tapolo ma faaalu lena taimi i le vaipapatisoga o le malumalu.

O la’u valaaulia lona tolu e mo oe ia faia se iloiloga totoa ma le Alii o lou olaga, ma atonu ma lou epikopo, e faamautinoa ai o loo e lagonaina ua e tu mausali i le ala o le feagaiga. Afai ua e se ese mai le ala o le feagaiga, pe o i ai ni nai mea e manaomia ona e lafoai ina ia fesoasoani ai i lou mafaufau ma le loto ia mama a’ia’i atili, o le asō o le taimi tonu lea e salamo ai.

Afai e te le o mautinoa lelei pe faapefea ona salamo, talanoa i lou epikopo po o ou matua po o i latou uma. O le a fesoasoani i latou ia e malamalama i le Togiola a Iesu Keriso. O le a latou fesoasoani ia e iloa le olioli moni e aumaia pea lava e le salamo moni.

Faamolemole aua nei e toe aluese mai le ala o le feagaiga mo se isi lava minute se tasi. Faamolemole toe foi mai e ala i le salamo moni, i le taimi nei. Matou te manaomia oe ia faatasi ma i matou i le autau a le autalavou a le Alii. O le a le toe tutusa lava e aunoa ma oe!

O la’u valaaulia lona fa e mo oe ia e tatalo i aso taitasi ina ia maua e fanau uma a le Atua faamanuiaga o le talalelei a Iesu Keriso. O oe ma a’u o loo ola e vaai, ma o le a faaauau pea ona vaai, ua faapotopoto Isaraelu ma le mana tele. Ma o le a avea oe o se vaega o le mana i tua atu o lena faapotopotoina!

O la’u valaaulia lona lima e mo oe ia e tu matilatila mai ma ia ese mai le lalolagi. Ua e iloa ma ou iloa e tatau ona avea oe o se malamalama i le lalolagi. O le mea lea, ua manaomia oe e le Alii ia foliga e pei o, ia leo e pei o, ma aga e pei o, laei e pei o se soo moni o Iesu Keriso. Ioe, o loo e nofo ai i le lalolagi, ae e matuai ese lava ou tulaga faatonuina mai le lalolagi e fesoasoani ai ia te oe ia taumamao mai pisia o le lalolagi.

Faatasi ai ma le Agaga Paia o lau soa, ua mafai ai ona e iloa atu e ala i le aganuu ua lauiloa ma ua taia ai o tatou tagata. E mafai ona sili atu lou atamai nai lo le mea sa i a i tupulaga ua mavae atu. Ma afai e ta’ua oe i nisi taimi o se tagata e “ese lava,” ia avea lena tulaga ese o se pine o le mamalu ma ia e fiafia o loo susulu malamalama atu lou moli i lenei lalolagi ua faapogisaina!

Faatu se tagavai mo le lalolagi uma! Taofimau i lou tulaga ese! O le tamaitusi ua ta’ua o le Mo le Malosi o le Autalavou o lau tagavai lena. O le tagavai ua faamoemoe mai le Alii i Lana autalavou uma ina ia uumauina. I le avea ai ma Ana perofeta, ou te aioi atu ia e toe suesue i lenei tamaitusi. Ia faitauina ma le lototatalo e faapei e te lei faitauina muamua. Ia makaina. Talanoa e uiga i ai. Talanoa e uiga i tulaga faatonuina ma au uo. Filifili pe faapefea ona e ola i nei tulaga faatonuina, ou tulaga faatonuina, ma le sa’o atoatoa.

Ia i ai sau lava kopi. O le po nei la i le faaiuga o le sauniga, afai e te filifili e auai ai, faamolemole ave se kopi o le Mo Le Malosi o le Autalavou ma, avea o se vaega o le fesoasoani e faapotopoto mai Isaraelu, avatu le kopi fou lea i se uo e le iloaina ou tulaga faatonuina, pe le o ola ai foi.

Tatalo po o ai e manaomia lenei tamaitusi. O le a taialaina lava oe Ma o le a avea o se mea fiafia.

Sei ou otootoina atu nei e ala i le iloiloina o o’u valaaulia e lima mo outou ina ia faagauai atu le ‘autau talavou a le Alii i le faapotopotoina o Isaraelu:

Faia se taofiga mai faasalalauga faaagafesootai mo aso e fitu.
Fai se ositaulaga faalevaiaso o le taimi i le Alii mo le tolu vaiaso.
Ia tumau i le ala o le feagaiga. Afai o e i tua, salamo ma toe foi i le ala.
Tatalo i aso uma ina ia maua e fanau uma a le Atua faamanuiaga o le talalelei a Iesu Keriso.
Ia tu matilatila atu. Ia ese. Avea o se malamalama! Avatu i se uo se kopi e tasi o le tamaitusi Mo le Malosi o le Autalavou.

O’u uso e ma tuafafine pele, o outou o e aupito silisili ua auina mai e le Alii i lenei lalolagi. Ua ia te outou le gafatia e atamamai ma popoto atili atu ma tele atu le aafiaga i le lalolagi nai lo le tupulaga ua mavae atu!

A o faaiu atu, ou te valaaulia outou e tutu faatasi ma le autalavou mai i le salafa o le lalolagi ma lagona le lofituina o le avea ai ma se sui auai o le autau talavou a le Alii i le ‘autau a Siona e ala i le lagiina o le viiga faaiu, “Faamoemoe o Isaraelu.”

Mai le taele o lo’u agaga, ou te molimau atu ia te outou o le galuega lenei a le Atua Silisiliese. O loo soifua o Ia. O Iesu o le Keriso. O Lana Ekalesia lenei, ua toefuatai mai e faataunuu ai Lona taunuuga paia, e aofia ai ma le faapotopotoina na folafola mai o Isaraelu.

O outou o le faamoemoe o Isaraelu o fanau o le aso na folafolaina”!⁸ Ou te molimau atu ai i le suafa o Iesu Keriso, amene.