33:28

“Dou Kakua ni Vakatitiqa, ia Mo Dou Vakabauta Ga.”

Elder Dale G. Renlund

Ena Kuoramu ni iApositolo Le Tinikarua

Vata kei Sister Ruth L. Renlund

Lotu ni iTabagone Qase Cake e Vuravura Raraba • 13 ni Janueri , 2019 • Brigham Young University–Hawaii

Elder Dale G. Renlund:Vinaka vakalevu na mai duavata kei keimami nikua. Keitou kila ni tu na veika mo ni cakava. Sa neitou masu me vakalougatataki kemuni na Kalou ena nomuni solibula. Au vakavinavinaka ena vuku ni Turaga kei na Nona Lotu baleta na nomuni vakabauta kei na yalodina.

Sister Ruth L. Renlund:Sa totoka dina na tiko eke. E vakasakiti na matasere ka cau vakalevu ki na Yalo ni soqoni. Keitou vakavinavinakataki ira na kena vo era dabe tiko ka vakadinadinataka na nodra itavi ena nomuni bula kei na neimami. Keitou qoroya na nodra ivakaraitaki ni bula vakatisaipeli.

Keitou vakauqeti me keitou vosa ena dua na ulutaga keitou sa vakasamataka tiko mai ena loma ni vica na vula: vakabauta kei na vakatitiqa. Ena yabaki sa oti, ena vula o June, keitou a wasea e dua na italanoa vakaibalebale ena nodra tuberi vakayabaki na qasenivuli ni Semineri kei na Inisitute ni Lotu. Ni da tekivu nikua, keitou vinakata me keitou wasea tale vei keda na italanoa vakaibalebale oya.

Elder Dale G. Renlund:Raitayaloyalotaka ni tavuki nomu waqa ni o soko tu e wasawasa. O dara tiko e dua na iqaloqalo ka sa vakayauwa na nomu qalova tiko yani e dua na baravi o vakabauta ni voleka duadua, ia o sega ni vakadeitaka rawa. Sa mamaca sara mai vakalevu na lomamu, ni gauna mo tekivu qalo tale kina, sa cawiri na ulumu ka o oca. Ena nomu vakatulewa vinaka duadua e rauta ni 30 na kilomita se 18 na maile, na yawa ni vanua. O sa rere baleta ni sega ni rawa ni o qalova na vanua ya. O sa rogoca sara na rorogo mai ni idini. Na rorogo sa vaka me lako tiko mai vei iko; o sa nuitaka vakalevu ni ko sa bula. Ni ko rai yani, o sa raica e dua na waqa ni qoli lailai ni lako tiko mai.

Sister Ruth L. Renlund:“Isa, vinaka lomalagi,” o nanuma ni sa raici iko o kavetani!” Sa kele na waqa, ka vukei iko mo vodo e dua na dauqoli e veigauna. Ena vakavinavinaka o sa qasi yani mo laki dabe, ka yaco vei iko na vakacegu. A solia vei iko o dauqoli e dua na tavaya wai ka so na bisikete soda. O veikanayaka yani ena koco. Na wai kei na bisikete soda a solia na kaukauwa mo bulabula cake. O sa kune vakacegu ka marau vakalevu. O sa lako tiko ki vale.

Ni sa tekivu mo bula cake ka kaukauwa mai, o sa tekivu goleva eso na ka o a sega ni raica e liu. Na wai mai na tavaya sa vaka me gunu ca ka o sega ni taleitaka ke vakatauvatani ki na Evian se Perrier. E kana vinaka na bisikete ia o taleitaka eso na lewe ni manumanu totoka vata kei na kena jokoliti vinaka. O sa raica talega ni o dauqoli sa qase sara, ka kabasu na nona ivava kei na tarausese balavu. Na nona isala sa makawa sara, ka vaka me sa didivara tiko o koya.

Elder Dale G. Elder Renlund:O raica talega ni sa makawa na waqa ka sa kabibi tu na mua imatau e liu ni waqa. Eso na boro ni waqa sa tavoci, madra, ka tacece. O raica talega ni sorova vakalailai o dauqoli na uli, e gole na waqa ki na imatau. O sa tekivu lomaleqa ni waqa oqo kei kavetani rau na sega ni vakabulai iko rawa. O sa taroga vei dauqoli na kabibi kei na leqa tiko ni uli. A qai kaya ni sega tu ni lomaleqataka na ka oqori baleta ni dau sokotaka na waqa oqo ena veivanua ni qoli, ena wasawasa vata ga, ena veisiga ni vica vata na yabaki. Sa dau kauti koya bula na waqa oqo ka vakararavi tu ga kina ena nona ilakolako.

O sa kurabui sara! E rawa vakacava me sega ni lomaleqataka na kabibi kei na uli? Ia na cava o sega ni taleitaka kina na kakana o kania? Na levu ga ni nomu vakasamataka tiko na waqa kei na dauqoli, na levu cake ni nomu lomaleqa. O taroga na nomu a vakatulewataka mo vodo mai ena imatai ni gauna. Sa tubu cake nomu veilecayaki. Oti, o sa tarovi dauqoli me kelea na waqa mo lade lesu i wasawasa. Dina ga o se yawa toka ena 20 na kilomita, se 12 na maile,mai vanua, sa sega ni o rawata mo tiko tale ena waqa. Ena yalorarawa, a vakelea na waqa o dauqoli ka vukei iko tale yani i wai. O sa tu duadua tale.

Sister Ruth L. Renlund:Vakasamataka na italanoa oqo ni dua na italanoa vakaibalebale ka matatataka kina na Lotu na waqa kei na dauqoli e matatataki ira era veiqaravi ena Lotu. ¹Na inaki vakatabakidua ni Lotu i Jisu Karisito ni Yalododonu Edaidai me vukei Tamada Vakalomalagi kei Jisu Karisito ena Nodrau cakacaka me rau vakavuna nodra bula tawamudu na luvena na Kalou.²E vakarautaka na salatu ni veiyalayalati, na sala me da lesu kina vei Tamada Vakalomalagi. O ira era veiqaravi ena Lotu, e dina ni ra sega ni vinaka sara, era yaga me ra vukei keda ka vakayaloqaqataki keda ena salatu ni veiyalayalati

Na cava e vakavulica vei keda na waqa kei dauqoli baleta na Lotu? Na kabibi kei na tacece ni iboro ena Lotu e veisautaka beka na nona igu me vakarautaka na cakacaka vakalotu ni veivakabulai kei na bula vakalou me vukea noda vakataka na Tamada mai Lomalagi? Kevaka me ququmi ligairua toka o dauqoli ena iuli me muadonu tiko, ena vakaleqa beka oqori na nodrau rawata o koya kei na waqa me rau kauti keda bula yani ki na vanua eda via lako kina? E sega ni gadrevi mo daurairai tabaki, me vakataki watiqu, mo kila ni sisi lesu yani ki wasawasa ka sega ni tiko ga e waqa e rerevaki sara. Ni da raibaleta na iyaloyalo levu, e rawa ni ra rairai levu sara ena noda vakasama na kalobi lalai kei na tacece ni boro.

Na lewenilotu e gadreva na nona ivakadinadina vakataki koya baleta na dina ni Lotu vakalesui mai. Ni sega na saumaki dina, oka kina na veisau levu ni yalo, sa na tekivu mo raica vakabibi na ibalebale ni bisikete vakatubu se na iboro tacece.

E kaya o Peresitedi Russell M. Nelson ena koniferedi ni Epereli 2018: “Kua tale ni lomatarotarotaka se cava e dina [raica naMoronai 10:5]. E sega ni dodonu mo lecava ko cei mo vakabauta dina. Mai na ivakatakila vei iko, ko rawa ni ciqoma kina nomu ivakadinadina vakai iko ni Vola i Momani e vosa ni Kalou, o Josefa Simici e dua na parofita, ka ni sai koya oqo na Lotu ni Turaga. Se cava era na tukuna se cakava eso, e sega ni rawa ni dua e kauta tani e dua na ivakadinadina a tukuni ki yalomu kei na nomu vakasama baleta na ka dina.”³Na ivakadinadina oqo sa bibi vakalevu cake sara oqo mai na veigauna kecega.

Elder Dale G. Renlund:Na tekivu ni noqu ivakadinadina a yaco niu a se tiko mai Göteborg, Sweden. Au a yabaki 11 tiko kina. A veisureti kina o peresitedi ni kaulotu vei ira kece na itabagone me ra wilika na iVola i Momani. Au ciqoma na bolebole oya ka tekivu wilika. Ena loma ni noqu wiliwili, a tukuna vei au e dua vei rau na daunivakasala nei peresitedi ni kaulotu ni dodonu me keimami masulaka na ka keimami wilika. Au nanuma vinaka toka na yakavi o ya ena noqu cakava na veisureti. Au tekiduru ena yasa ni noqu idavodavo, kau cavuta e dua na masu rawarawa sara meu kila se dina na iVola i Momani.

Au a sega ni rogoca e dua na domo, ia e vaka me kaya mai na Kalou, “Au sa kaya tiko vei iko ni sa dina sara.” Na ka oqori a veisautaki au; e veisautaka noqu bula. Sa tekivu kina meu vakadinata, na cakacaka ni tiko ga ena salatu ni veiyalayalati ka saga me levu cake ka saga me vinaka cake. Mai Göteborg au a vulica kina meu veivutuni. Mai Göteborg au a kila kina na noqu iVakabula. Mai Göteborg au dau raici ira cake era vakalevulevuya nodra veikacivi ka ra cakacaka kaukauwa me tarai cake na matanitu ni Kalou. Sa yaco o Göteborg me noqu “wai ko Momani.”⁴

Sister Ruth L. Renlund:Na vanua cava o a kila kina na nomu Dauveivueti? Na cava o a vakila? Kevaka o sa guilecava, keitou uqeti kemuni mo cakava e dua na ka mo vakalesuya tale mai na veika o a vakila. Na kila ka oqo kei na yalo vakaoqo sa itekitekivu ni vakabauta.

Na vakabauta sa digidigi ni tamata yadua me cakava. Na vakabauta e sega ni gadrevi tiko e dua na ka me dina ka vakauqeti iko vakadokadoka ni sa vakakina. Na vakabauta sa ivakadei ni sa dina na ka eda sega ni raica e matada vakayago. E ivakavuvuli talega ni cakacaka na vakabauta.

Na “vakabauta e dodonu me vakaiusututaki vei Jisu Karisito me rawa ni liutaka kina e dua me vakabulai. … Ena tudei na vakabauta ni da rogoca ni vakavulici na kosipeli mai vei ira na [qasenivuli] vakadonui ka talai ira mai na Kalou [raica naRoma 10:14–17]. Na caka mana e sega ni solia na vakabauta, ia na vakabauta kaukauwa sa ikoya e bucini mai na talairawarawa ki na kosipeli i Jisu Karisito. Ena dua tale na kena itukutukuni, na vakabauta e vu mai na buladodonu [raica naAlama 32:40–43].”⁵E sega ni yaco mai na vakabauta ena noda lavaka yani na ivakatakilakila vua na Kalou ia ena noda talairawarawa ka muria na Nona ivakaro.

Elder Dale G. Renlund:E vinakata na Kalou me da vakabauta me rawa kina ni vakalougatataki keda.⁶Na vakabauta sai koya na ki ka na dolava na loloma cecere ni Kalou. Me na vakatulewataka mada e dua ni vinakata me vakabauta oti me qai cakacaka ena vakabauta me rawa ni qai tubu na vakabauta. E vakavulica o Alama: “Ia raica, kevaka mo ni yadra mada ka vakayadrata na yagomuni, mo ni vakatovotovotaka kina na noqu vosa, ka vakatovolea vakalailai na vakabauta, io, kevaka mada ga ko ni gadreva mo ni vakabauta, mo ni laiva na gagadre oqo me kadre e lomamuni, me yacova ni ko ni sa vakabauta ena kena ivakarau ka rawa mo ni vakabauta kina e dua na tiki lailai ni noqu vosa.”⁷Me tubu na vakabauta, me na digitaka e dua me tu vua na vakabauta oti qai cakacakataka.

Sister Ruth L. Renlund:Nona gadreva na vakabauta e dua e dodonu me vuana na cakacaka. Ena vuqa na sala, eda vakaraitaka noda vakabauta e yavada.

Na ivakavuvuli oqo e cavuti ena yalayala ni iVola i Momani a muria na watiqu ni se yabaki 11. “Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.”⁸

Ni ko tekivu ena taro, “E rawa beka me ra sega ni ka dina oqo?” e mua ki na vakabauta. “E rawa beka me ra sega ni ka dina oqo?” e dua na taro ka tukuna tiko e lomana ni ka dina. Taura mada, kevaka au kaya, “Tou na sega beka ni draiva mai Onolulu ki na baravi ena vualiku,” sa tukuna tiko e yalona ni tou na draiva. Na taro e veiuqeti kina o Moronai me da taroga me baleta na iVola i Momani e vakavuna mai na vakabauta ka na vakvurea e levu cake na vakabauta.

Ni ko tekivu ena taro, “E rawa beka me sega ni ka lasu oqo?” e mua ki na vakatitiqa. Na vakatitiqa e sega vakadua ni mua ki na vakabauta.

Elder Dale G. Renlund:Dua na gauna niu tiko ena dua na koniferedi ni iteki, a kerei au o peresitedi ni iteki meu sikova e dua na tagane au na vakatoka o Stephen. E a lewe ni Lotu yalodina o Stephen. A kaulotu e liu o koya ka vakamau e valetabu. A veiqaravi ena yalodina ena vica na yabaki ia a tekivu me vakatitiqataka na Lotu. Niu sa laki raici Stephen, a kaya ni lomatarotarotaka tiko ni o Josefa Simici a tukuna e va na ivakadewa ni Matai ni Raivotu. E nanuma ni rairai kena ibalebale qo ni a bulia ga o Josefa Simici na veika a sotava.

Au a vagolei Stephen vua e dua na turaga ka sa vakadikeva taucoko na va na ivakadewa ena vica vata na yabaki sa oti. A gole o Stephen vei koya na dauvakadidike oqo. Niu sotavi Stephen tale au a kaya, “Cava o sa nanuma baleta na iMatai ni Raivotu?”

A kaya, “Au sa yalo vinaka kina ni sa saumi mai na noqu vakatataro. Sa sega tale ni vakaleqai au. Ia oqo au sa taroga tiko na vakawati tiko vakarua a caka tiko mai Nauvoo ni oti talega na Manifesto ena 1890. E vakaleqai au sara tikoga.”

Au mani kerei Stephen me rau sota kei na dua sa vakadikeva vinaka sara na ulutaga oqo mai na veivurevure nuitaki eso. Ni oti na veivosaki o ya, au a qiriti Stephen ka taroga se sa vakacava tiko.

A kaya, “Ia sa sega tale niu kauwai tale kina vakadua. Au sa kila na cava a yaco, ka sa wali na noqu kauwai. Ia oqo au kauwai tiko ena kena a sega ni soli na matabete vei ira era kawa mai Aferika.”

Sister Ruth L. Renlund:Ka ni rarawa, ni a digitaka o Stephen me dua sa dau vakatitiqa. O koya, e marautaka cake na vakatiiqa mai na kila⁹ka cukiraka ki cake ena vakatitiqa na veika a teivaka ena vakabauta.¹⁰Ni toso na gauna, ni wali rawa e dua na kauwai, sa kune tale e dua. Veitalia na levu ni nona saga e dua me sauma na veitaro oqo, ena kunea o koya e dua tale na ulutaga e kauwaitaka. E vakanamata o koya ena kalobi ni waqa ka sega ena veika e tu ena waqa me tuberi koya yani ki na veivakalougatataki ni Veisorovaki i Jisu Karisito. Na ka e cakava tiko o Stephen e dua na iwalewale ni “Church history whack-a-mole.” O ni kila nodra qito na gone ni dau lade cake mai e dua na manivusi ena kena vava ena gauna o mokuta kina e dua e lade cake tale mai e dua.

Na itukutuku titobu vakavuku ena rawa beka ni walia ena dua na gauna lekaleka na kauwai titobu vakavuku, e sega ni taucoko na iwali ni itukutuku vakuri baleta ena ivola i Paula vei ira mai Korinica, “Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua, a sa sega ni kila rawa ko koya, ni ra sa kilai vakayalo ga.”¹¹Ena gadrevi talega na vakabauti Jisu Karisito kei na ivakadinadina e solia na Yalo.

E levu a dau tu nodra taro, a dau curuma nodra vakasama na vakatitiqa, ka dredre nodra vakadeitaki ira vakayalo ia era a yalodina tikoga ka dei toka ga ena salatu ni veiyalayalati. E vakavuqa, ni ra masu, era ciqoma na kena isau, a ciqoma o Elder Neil L. Andersen ena vica vata na yabaki sa oti ni taroga tiko se sa vakarau vinaka me curuma yani na buturara ni kaulotu. Ni masu, a votu mai na vakasama: “O sega ni kila na ka taucoko, ia sa veirauti na ka o sa kila tu!”¹²Ena so na gauna—dau vakavuqa—ni na vaqo na nona isaunitaro na Turaga, “Sa veirauti na ka o sa kila tu mo toka ga kina ena salatu ni veiyalayalati.”

Ni tarogi o Nifai se kila se cava na nona vakalolovirataki koya na Kalou, qai kaya, “Au kila ni sa lomani ira na luvena na [Kalou]; ia au sa sega ga ni kila na ibalebale ni veika kece.”¹³Sa veirauti na veika e kila. Ena bula oqo, eda na sega ni kila na ibalebale ni veika kece, ia sa veirauti na ka eda kila. Na keda icavacava e vakatau ena noda vakatovotovotaka na vakabauta sa kunekunetaki ka na tubucake ni da sa cakacaka ena vakabauta.

Elder Dale G. Renlund:Na vakatitiqa e sega ka na sega vakadua ni vakatekivuna na vakabauta me vaka na kena sega ni vakatautaki ki na butobuto na buli ni rarama. A sega ni tukuni vei Pita, ni sa lutudromu tiko i wai ena nona saga me taubale kina, “O iko Pita, ke a levu cake na nomu vakatitiqa.” Sega, a tukuni vua “O iko sa lailai na nomu vakabauta o sa vakatitiqa ena vuku ni cava?”¹⁴

EnaLectures on Faith,na kedrau duidui na vakabauta kei na vakatitiqa e vakamacalataki kina: “Ni tiko na vakatitiqa kei na veilecayaki … sa sega kina na vakabauta, sega vakadua. Na vakatitiqa kei na vakabauta e sega ni tiko vua e dua na tamata ena gauna vata ga; … ni o ira sa tu e nodra vakasama na vakatitiqa kei na rere ena sega ni rawa me ra yalodei tu; ni sega na yalodei sa malumalumu na vakabauta; ni malumalumu na vakabauta ena sega ni rawa vua e dua me vorata rawa na veisaqasaqa, veika dredre, kei na rarawa era na sotava me rawa ni ra itaukei ni Kalou, ka itaukei vata kei Karisito Jisu; ena malumalumu na nodra vakasama, ka na rawai ira na meca ka vakarusai ira.”¹⁵

Oqo na ka e yaco dina vei Stephen. A vakatara me vakatitiqa ka veilecayaki na nona vakasama. Ni toso na gauna, a sega vua na kaukauwa me vorata na bolebole ena sotava e dua ni sa lewena na Lotu. Sa malumalumu na nona vakasama, ka yali na nona vakabauta.

Sister Ruth L. Renlund:Me tu noda lomatarotaro me baleta na Lotu kei na kena ivunau e donu tu ka wakatu ni vulica na kosipeli. A vakadinata o Josefa Simici ni gauna e wilika kina “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.”¹⁶

Ia e tiko ena itukutuku, “Ia me kerekere ena vakabauta, me kakua ni vakatitiqa.”¹⁷

Ena dua tale na kena ivosavosa, kerea vua na Kalou, kua ni vakatitiqa ni na solia mai o Koya na kena isau. E tomani tale kina “Ko koya sa vakatitiqa, sa vaka na ua ni waitui, sa cagina ena cagi ka veitubuyaki. Ia me kakua ni nanuma na tamata ko ya ni na rawata e dua na ka mai vua na Turaga. A tamata lomalomarua, sa yamekemeke e na nona ivalavala kecega.”¹⁸

Me ciqomi na mataqali isau ni taro a vaqara o Josefa Simici, me ciqomi na kena eda gadreva, me da na toro yani vua na Kalou ena yalo sa vakadinata kei na vakasama e gadreva me vakatakilai mai na veika ni Kalou.

Elder Dale G. Renlund:Keirau taleitaka na malanivosa a cavuta o Elder John A. Widtsoe, e dua na iApositolo ena itekivu ni itabagauna oqo. Au na moica vata na veika a tukuna. Na vakatitiqa, vakavo kevaka e veisau me vakatataro mai na kena ivurevure nuitaki ka vakabauti, e sega na betena se na kena yaga. Na dauvakatitiqa sega ni yavala, e dua sa vakadonui koya, sega ni lomana me sasaga, me cakacaka me rawa ni raica na veika vakalou, ena yaco me tawavakabauta ka butobuto sara. Sa na tubu na nona vakatitiqa me masirumu gaga ena buto ni lomana kei na yalona. Me yacova, ni sa vaka na manumanu ena qara, e vakaisosomitaka na ile ena veivakalialiai, na cakacaka ena vakasavuliga, ka yaco me tamata vucesa. Na vakatitiqa e sega ni cala vakavo ga kevaka sa yaco ga kina. Na vakatitiqa e vakani koya ka tubu tikoga, ka vakasucuma e vuqa tale na vakatitiqa, sa ka butobuto.¹⁹

Sa dina sara na vosa nei Elder Widstoe. Na vakatitiqa tu vakadua e sega ni mua ki na kila na iVakabula, o Jisu Karisito kei na Nona Veisorovaki; e sega ni vakavuna me kilai ni dua tiko na Tamada Vakalomalagi yalovinaka ka dauloloma ka a vakatekivuna na ituvatuva cecere ni veivakabulai. Sa rawa meda kila na dina ni cakacaka oqo ni gauna oqo, ia ena gadrevi me da digia na vakabauta, sega na vakatitiqa, ka me da gole ki na ivurevure nuitaki ka vakabauti ni isaunitaro.

Sister Ruth L. Sister Renlund:A tukuna talega o Alama na ka oqo. A kaya “Ia oqo, ko koya sa vakaukauwataka na lomana, ena rawata ko koya na iwase lailai ga ni vosa; ia ko koya sa sega ni vakaukauwataka na lomana, ena rawata ko koya na iwase levu ni vosa, me yacova ni sa soli vua me kila na veika vuni ni Kalou me yacova ni sa kila taucoko sara. Ia ko ira sa vakaukauwataka na lomadra, sa soli vei ira e dua na iwase lailai ga ni vosa; me yacova ni ra sa sega ni kila e dua na ka me baleta na nona veika vuni; ia sa yaco me ra tauri vakavesu mai vua na tevoro, ka sa kauti ira sobu ena nona lewa ki na rusa.”²⁰

O na taro ivakasala vakailavo beka mai vua e dua sa sega tu nona ilavo ka dinau tu?

Elder Dale G. Renlund:O na taroga beka na ivakasala ni bula mai vua e dua na dauvolitaki waiwai ni gata?

Sister Ruth L. Renlund:O cei mo na ciqoma nona ivakasala baleta na ta vakababa ena tenisi—e dua na dauvakasala ni vacagicagi ni muanimacawa se o Roger Federer?

Elder Dale G. Renlund:Ia a cava mo vakaravita kina nomu tiko vinaka tawamudu vei ira era sa beqaravu tu vakayalo baleta ni ra sa cavuraka ena vakatitiqa na veika era a teivaka ena vakabauta ena dua na gauna²¹se o ira, me vaka e kaya o Jeremaia, “era sa biuti [Karisito] na mata ni wai bula, ka ra sa taya me nodra na ikeli ni wai, na ikeli ni wai ca, ka sa lu tikotikoga?”²²O ira oqo era sa lako tani mai na mata ni wai bula ka vinakata mo vakabauta e dua na ka e sega kina na wai.

Sister Ruth L. Renlund:Taciqu kei na ganequ, e rawa ni o ni kila ni tiko na Karisito Bula.²³E sega ni rawa ni sosomitaka na vulica na ivolanikalou kei na wilika nodra vosa na parofita kei na iapositolo na qito ena kompiuta. Maroroya nomu vakabauta ena nomu lako ki na ivurevure nuitaki mo kunea na isau ni nomu taro.

Elder Dale G. Renlund:Ni da tovolea me da kila se dina e dua na ka se sega, sa solia tu vei keda na parofita o Momani e dua na ivakarau me da muria:

“O koya oqo, a ka kecega sa vinaka sa mai vua na Kalou; ia na ka kecega e ca sa mai vua na tevoro; …

Ia raica, sa veisureti ka veivakayarayarataki tikoga ki na vinaka na veika sa mai vua na Kalou; a sa uqeti mai vua na Kalou na veika kecega sa sureta ka vakayayarataka na tamata me ra caka vinaka ka lomana na Kalou ka qaravi koya.

“… Raica, oi kemudou na wekaqu, sa soli vei kemudou mo dou lewa, mo dou kila kina na ka vinaka mai na ka ca; ka sa matata vinaka sara na sala mo dou vakatulewa kina, me vaka ga dou sa kila na rarama mai na butobuto.

“Raica, sa soli vei ira na tamata kecega na Yalo i Karisito me ra kila kina na vinaka mai na ca; o koya au sa vakaraitaka kina vei kemudou na sala mo dou vakatulewa kina; ni veika kecega sa veisureti me da caka vinaka, ka veivakauqeti me vakabauti na Karisito, sa talai yani ena kaukauwa kei na isolisoli i Karisito; ia dou na kila vakaidina kina ni sa mai vua na Kalou.

Ia na ka cava ga sa vakauqeta na tamata me kitaka na ca, ka kakua ni vakabauta na Karisito ka me cakitaki koya ka kakua ni qarava na Kalou, dou na kila vakaidina sara ni sa mai vua na tevoro.”²⁴

E ka rawarawa. Ke nomu digidigi e liutaki iko mo caka vinaka ka vakadinata na Karisito, sa mai vua na Kalou. Ke nomu digidigi sa vagolei iko mo caka cala ka cakitaki Karisito, sa mai vua na tevoro. Ni ko lako ena salatu ni veiyalayalati, sa rawa mo kila ni veika e vakasevataki iko mai na salatu, ka uqeti iko mo kua ni vakabauti Karisito, sa ka cala. Na veika e uqeti iko mo vakadinata na Kalou, mo lomani Koya, ka muria na Nona ivakaro sa mai vua na Kalou. O na calata na veika bibi vakayalo, kevaka o digitaka mo vakatitiqa tikoga, qai kuria na isaunitaro mai na veivurevure sega kina na vakabauta kei na yalodina.²⁵

Sister Ruth L. Renlund:Lesu tale ki na neirau italanoa vakaibalebale, o ira era digitaka me ra tikoga ena boto makawa, kalobi tu ka sa siyawa na kena iboro o ira era vakadinadinataka ni na vakabulai ira na waqa mai na luvu ka rawa ni kauti ira yani vakavinaka ki baravi. Ena dua tale na kena ivosavosataki, era gole ki na salatu ni veiyalayalati ka tiko ga ena salatu ni veiyalayalati. Ni ra sa vosota ki na ivakataotioti, na yalayala ni bula tawamudu sa vakabalavutaki. Oqo na isolisoli cecere ni Kalou sa solia mai. Ena cakacaka oqo eda sa kilai Jisu Karisito kina, ni sa bula dina tiko o Koya, ka meda kila na Nona loloma kei na yalololoma.

E kaya na Vunau kei na Veiyalayalati “Raica sa soli vei ira e so ena cakacaka ni Yalo Tabu, me ra kila ni sai Jisu Karisito na Luve ni Kalou, ka ni a vakoti ki na kauveilatai ena vuku ni ivalavala ca ni vuravura. Sa soli vei ira eso tale me ra vakabauta na nodra vosa; raica era na rawata na bula tawamudu kevaka era sa yalodina tikoga.”²⁶Raica ni tautauvata ga na kena isau se o kila se o vakadinata—bula tawamudu vei ira na yalodina.

Elder Dale G. Elder Renlund:Ena Epereli 2009, au a tokoni meu dua na Vakaitutu Raraba ena Lotu. Ena Okotova 2009, au a sureti meu vosa ena koniferedi raraba. Au a nanamaki me na vakarorogo rawa o tamaqu ki na koniferedi. A cakacaka vakaukauwa vaka dautara vale ena nona bula taucoko, ni sa yabaki 92, sa ca vakalevu sara na dakuna. A sega ni gole rawa mai ki na Vale ni Koniferedi. A qai vakarautaka e dua na ganequ me na sarava ena TV ena nona vale mai Salt Lake City.

Ni oti na koniferedi au a gole ki nona vale meu taroga na nona nanuma baleta na noqu vosa. E sega tu ni dau vosa vakalevu ka sega soti ni dau veivakacaucautaki.

Au a kaya, “Ta, o a sarava na koniferedi?”

A kaya, “Io.”

Au a kaya, “Ta, o a rogoca na noqu vosa?”

A kaya, “Io.”

Au a kaya, “Io, Ta, cava nomu nanuma?”

A kaya mai, “Io, a vinaka. Au a via dokai au.”

Ia au a raica ni vaka me vakasama tiko, baleta ni via wasea vei au na nona tadra ena bogi rua sa oti. E sega ni dautadra. E sega ni dau vakanananu totoka. Au sega mada ni kila me a bau lasu. A dau dei sara ka kila ga me vosa dina. A kaya, “Au a tadra niu sa mate ka raica na iVakabula, o Jisu Karisito. A mokoti au ka kaya ni sa vosoti na noqu ivalavala ca. Dale, a marau na yaloqu.” O ya sara ga na nona vosa, kau sa sega ni via taroga e dua tale na ka. A mani leqa ni oti e rua na vula ni keirau tiko kei Ruth mai Madgascar.

O tamaqu, ni oti nona lewena na Lotu mai Larsmo, Finiladi ni se qai yabaki 24, a bula voli ena rarama kei na kila sa mai ciqoma. A cakava na ka kece sa dau kerei vua me cakava. A yaco me dua a rawata na isolisoli ni Yalo Tabu me kila ni ko Jisu na Karisito ka mate ena kauveilatai ena vuku ni ivalavala ca ni tamata, kei na nona ca. Na rawata na isolisoli oqo e sega ni ka ni tagane se yalewa ka sega ni ilesilesi ni matabete–me vakararavi kina. Sai koya na icovi yalataki ena digitaki ni vakabauta kei na digitaki ni salatu ni veiyalayalati.²⁷

Sister Ruth L. Renlund:Ia, me da na taracake vakacava na vakabauta ka vakaukauwataka tiko? E ka ni cakacaka. O sa bau tiko mada ena dua na kalasi ni math—taura mada na calculus—ka sarava nona cakacakataka na parofesa e dua na fika? E dewa beka ga mai vakasauri vei iko na nona kila ka baleta ni o sarava tiko na parofesa ena nona raica na kena isau? Ka ni rarawa ni sega. Mo rawata na kila—na kila vata e tu vei parofesa—o na gadreva mo cakacakataka vakataki iko e dua na fika ni calculus; o na gadreva mo vulica ka cakacakataka na vakatovotovo vakafika me yacova ni sa matau vei iko na kena iwalewale, na taro, kei na ivakatakarakara.

Sa vakakina, me kunei na vakabauta ka vaqaqacotaki na vakabauta e ka ni cakacaka. Eda na vakauqeti beka mai vua e dua e cecere nona vakabauta, ia ena sega ni dewa mai vei keda nona vakabauta ena iwalewale oya. Me da na vuli vakataki keda mai na ivolanikalou kei na nodra vosa na parofita bula. Sa dodonu me da masu, cakacaka vakaukauwa ena noda veitaratara kei Tamada Vakalomalagi ena yaca i Jisu Karisito. Sa ka bibi sara noda vakaivotavota ena sakaramede e veimacawa ena bula kilikili ka vakananuma na nona loloma veivueti ena vukuda na Kalou me solia kina na Luvena me mai sorovaka noda ivalavala ca. Na veicakacaka vakatamata yadua sega ni kilai oqo ni yalodina e tara cake ka maroroya na vakabauta.

Elder Dale G. Renlund:Na imatai ni noqu ilesilesi vakalewe ni Kuoramu ni iApositolo Le Tinikarua meu gole ka tukuna ki na Tabana ni iTukutuku Makawa ni Lotu niu sa na sosomitaki Elder Jeffrey R. Holland vakadaunivakasala ena nodratou tabana. Me vaka o na rawa ni vakasamataka, ni a yaco na “tagi, kei na lolosi, kei na vakasequruquru bati”²⁸ni ra sa kila ni sa na sosomitaki na nodra daunivakasala lomani. A yaco me oti na pepa Kleenex

A tiki ni noqu itavi vakadaunivakasala ena Tabana ni iTukutuku Makawa ni Lotu, meu wilika taucokoThe Joseph Smith Papers.Au sa wilika talega na imatai ni ivola italanoa ni itukutuku makawa ni Lotu ka vakatokai naSaints. ²⁹Niu wilika na veika kece a vola o Josefa Simici se tukuni ni a vola sa vaqaqacotaka na noqu ivakadinadina ni sa parofita o koya, digitaki koya na Kalou me vakalesua mai na Nona cakacaka e vuravura.

E dau dinata tikoga o Josefa Simici na nona ivakadinadina. E dau dei o koya. E vakadeitaka ena nona itovo ni a raica dina na Tamada Vakalomalagi kei Jisu Karisito; Moronai; Joni na Dauveipapitaisotaki; Pita, Jemesa, kei Joni; Mosese; Ilaisa; kei Ilaija. A vakaitovotaki koya me vaka e dua a tu vua na peleti koula ka vakadewataka na itukutuku makawa ena isolisoli kei na kaukauwa ni Kalou. A vakaitovotaki koya me vaka e dua sa ciqoma na ivakatakila mai vei Jisu Karisito. A vakaitovotaki koya me vaka e dua sa ciqoma na matabete kei na idola ni bula savasava vaka-iApositolo.

Au kila ena vuqa na sala kaukauwa ka dodonu mai na lima na noqu wakilakila e kila rawa ka vakaraitaka niu o Josefa Simici a raica na ka a raica, vakadewataka na iVola i Momani ena isolisoli kei na kaukauwa ni Kalou, ka ciqoma na matabete kei na kena idola veiqaravi ni nodra vakabulai na kawatamata. Au kila ni dina na ka oqo. Au kila ni idola oqo era sa tiko e vuravura nikua ni o Peresitedi Nelson sa isosomi i Josefa Simici e vuravura.

Na veika eda raica ni kabibi ka iboro tacece ena waqa makawa ena rawa me vakadonui vakalou ka dusimaki vakalou mai na rai tawamudu. Sa tara talega na Turaga na kabibi kei na iboro sa tacece se sa vakayagataka me Nona ga. Au kila ga vakai au ni Turaga, o Jisu Karisito, sa dusimaka na Nona cakacaka e vuravura nikua. Era kilai Koya vinaka na Nona italai nikua.

Sister Ruth L. Sister Renlund:Au vakavinavinataka meu kuria kina noqu vakadinadina niu kila ni o Jisu Karisito na noda iVakabula. Ni da cakacakataka na vakabauta, ka sega ni vakatitiqa, ena Nona veisorovaki kei na vua ni nona Veisorovaki, ena vakalougatataki na noda bula ka tawamudu. Au vakavinavinataka ni sa vakalesui tale mai na Nona Lotu edaidai kei na veivakakalougatataki taucoko e soli tu vei ira na luve ni Kalou e vuravura.

Elder Dale G. Renlund:e bula tiko o Jisu Karisito na iVakabula kei vuravura. Au vakadinadinataka na Nona yalololoma, loloma, kei na kauwai vei ira kece na luve ni Kalou. Au vakadinadinataka na Nona solibula veisorovaki baleti iko kei au. Niu sa mai kila na iVakabula, au sa vulica na Nona gagadre cecere me veivuke me vakamamacataka na mavoa ka semata na yalo kavoro.

Au masuta me nomuni na nona veivakalougatataki cecere duadua na Kalou. Au masuta mo ni taracake na vakabauti Jisu Karisito, mo ni “kakua ni vakatitiqa, ia mo dou vakabauta ga.”³⁰Au sureti kemuni mo ni vakalevutaka na nomuni vakabauti Karisito ena nomuni vulica na ivolanikalou kei na nodra vosa na parofita bula, masu ka veitalanoa kei Tamada Vakalomalagi, ka yalodina ena nomuni vakavakarau ka vakaivotavota ena bula kilikili ena sakaramede e veimacawa. Ena vakalougatataki kemuni na Kalou ena nomuni vakaitavi ena veicakacaka yalodina, yadua, sega ni laurai oqo ka veiqaravi vei ira na tani. Ena yacai Jisu Karisito, emeni.