Padayon nga Nag-uswag padulong sa Mahangturon nga Kaminyoon
Tibuok Kalibutan nga Debosyonal alang sa mga Young Adult • Mayo 5, 2019 • Salt Lake City Tabernacle
[Elder Carl B. Cook]
Si Sister Cook ug ako mapasalamaton nga makauban kamo karong gabhiuna. Kini nga sibya naghiusa kanato gikan sa tibuok kalibutan, lakip sa 99 ka nasud ug 39 ka pinulongan. Daghan kaninyo ang nagtan-aw niining buhi nga sibya. Ang uban motan-aw sa ibalik nga mga sibya tungod sa managlahi nga mga oras. Bisan asa kamo ug bisan unsang paagi kamo nagtan-aw niini nga debosyonal—welcome!
Atong hatagan og espesyal nga paghangup kadtong bag-o lang migradwar sa high school kinsa miapil niining tibuok kalibutan nga panagpundok sa unang higayon. Naglaum kami nga moapil kamo, isip kabahin sa inyong edukasyon, sa institute ug ubang mga klase sa relihiyon aron mapahimuslan ang espirituhanong pagkat-on nga anaa alang kaninyo. Ang pag-apil sa mga klase ug mga kalihokan maoy usa ka importante nga suporta nga motabang kaninyo nga magmalampusong monabigar niini nga panahon sa inyong kinabuhi.
[Sister Lynette H. Cook]
Panalangin namo nga makig-uban sa matag usa kaninyo. Nadasig ninyo kami ug napalambo ang among pagtuo sa umaabut. Nakadayeg kami sa paagi sa inyong pagsanong sa unsay gipanghimug-atan sa atong mga propeta ug mga apostoles. Ang inyong puno sa pagtuo nga pag-apil sa buhat sa family history, misyonaryo nga buhat, ug buhat sa templo—lakip ang pagserbisyo isip mga ordinance worker—makadasig. Mapasalamaton kami alang kaninyo, ug gimahal namo kamo.
[Elder Cook]
Akong sugdan karon pinaagi sa pagsaysay kaninyo sa kasinatian namo ni Sister Cook uban sa pipila ka mga young single adult sa Nairobi, Kenya. Aduna kami prangka nga diskusyon mahitungod sa kaminyoon panahon sa debosyonal. Gipangutana namo ang mga young adult unsay ilang gipangita diha sa usa ka mahangturong kapikas.
Human sa pipila ka komentaryo, naklaro nga ang ubang batan-ong lalaki mibati nga ang pipila ka batan-ong babaye gusto nga aduna silay degree sa unibersidad, sakyanan, ug komportableng dapit nga kapuy-an sa dili pa sila mokonsiderar nga makigminyo kanila. Sa laing bahin, mikomentaryo ang pipila ka batan-ong babaye, nga andam silang mohulat alang niana nga mga butang kon ang mga batan-ong lalaki aktibo nga naningkamot alang niini. Mahimo silang magtinabangay padulong niini.
Sulayan nato kana karong gabhiona. Mga ulitawo nga brother nga pwede na magminyo, bisan asa man kamo, mangutana ko ninyo. Pila man ninyo ang mibati nga kamo kugihan ug dunay maayong kinaiya, lig-on ang pagpamatuod ug espirituhanon, apan tingali mibati kamo nga dili kaayo andam sa temporal nga paagi nga makahimo sa usa ka babaye nga malipayon diha sa kaminyoon? Ipataas ang inyong kamot. Taas!
Karon kamo nga dalaga nga mga sister. Pila man ninyo ang andam nga mohulat alang sa temporal nga mga panalangin diha sa kaminyoon samtang magkat-on ug molambo kamo uban sa kugihan nga lalaki nga inyong gihigugma, tawo nga maayo og kinaiya, lig-on ang pagpamatuod ug espirituhanon? Ipataas ang inyong kamot. Taas!
Kon duna kaninyo ang mitan-aw sa tibuok kwarto ug nakakita og makainteres nga tawo nga mipataas sa iyang kamot, nan …
Didto sa Nairobi, mipaambit ko og kinutlo gikan sa Handbook 2 nga nagpasabut, “Ang kinaiya sa mga espiritu nga lalaki ug babaye mao nga sila nagkompleto sa usag usa. Ang mga lalaki ug mga babaye gitumong nga magdungan og pag-uswag ngadto sa kahimayaan.”1
Usa ka batan-ong lalaki mibarug ug mahinamong miingon, “Nindot kana! Siguro imbis nga mohangyo ko og tawo nga makigminyo nako, mangutana ko niya kon gusto ba niyang mouswag uban nako!”
Sa tinuod lang, morag adunay dakong kaalam sa ideya niining batan-ong lalaki. Sama sa gisulti sa usa ka African nga proverbio, “Kon gusto mo nga mapaspas, lakaw nga mag-inusara. Kon gusto mo nga layo og maabtan, lakaw nga mag-uban.” Oo, modugang ko, “Lakaw nga mag-uban, ug uban sa tabang sa Ginoo mag-uban kamo nga mouswag ug mokompleto sa usag usa.”
Gikan sa panglantaw sa matematika, ang usa pun-an og usa mahimong duha. Apan kon ang duha ka tawo magkahiusa, ang usa pun-an og usa mahimong labaw pa kaayo kay sa duha! Ug kon ang Ginoo parte sa inyong kinabuhi, ang sumada walay kinutuban ug mahangturon!
Sama sa inyo nang natag-an, maghisgut ta karong gabhiuna kabahin sa kaminyoon—nga pinalahi. Maghisgut ka kabahin sa pag-uswag padulong sa mahangturon nga kaminyoon. Ug kana naglakip sa tanan, lakip namo ni Sister Cook. Minyo o dili minyo ug bisan unsa pa ang edad, makahimo kita sa pag-uswag gikan sa asa kita karon.
Ang mahangturon nga kaminyoon mao ang pinakataas nga ordinansa sa ebanghelyo ni Jesukristo. Naglakip kini sa usa ka lalaki ug babaye nga masilyo sa templo ug ang ilang kaminyoon nga masilyo pinaagi sa Balaan nga Espiritu sa Saad. Pinaagi lamang sa pagdawat niini nga ordinansa sa pagkapari ug pagtuman sa atong mga pakigsaad nga madawat nato ang panalangin sa pagpadayon isip bana ug asawa, mahangturong mga kapikas human sa kamatayon.2
Aduna kitay tinguha sa atong kaugalingon alang sa mahangturong mga relasyon. Si Presidente Nelson miingon, “Ang pinakahalangdong tinguha sa kasingkasing sa tawo mao ang kaminyoon nga molahutay lapas sa kamatayon.”3
Ang mahangturong kaminyoon posible alang sa matag usa kanato. Bisan pa sa tanang lisud nga kahimtang nga giatubang sa mga anak sa atong Langitnong Amahan dinhi sa mortalidad, ang mahangturong kaminyoon posible diha sa Iyang mahangturong plano. “Walay usa nga gitakda nang daan nga makadawat og minos pa kay sa tanan nga aduna ang Amahan alang sa Iyang mga anak.”4 Kon kita matinud-anon, kita gisaaran sa tanan nga aduna ang atong Langitnong mga Ginikanan, lakip ang mahangturon nga kaminyoon nga usa ka tinuod nga panag-uban. Ang tanan nga nakadungog niini nga mensahe mahimong makadawat nianang gisaad nga panalangin.
Tungod kay “ang kaminyoon tali sa lalaki ug babaye mahinungdanon ngadto sa … walay katapusan nga plano [sa Dios],”5 ang kaaway ug ang iyang mga sumusunod nakig-away batok niini, ug ang panag-away sakit nga nagpadayon. Si Satanas dili gayud makasinati og mahangturong kaminyoon, ug sama sa gisulti sa mga kasulatan, “siya nagtinguha nga ang tanan nga mga tawo unta mahimo nga mauyamot sama ngadto kaniya.”6 “Kanang karaan nga bitin, … kinsa misupak batok sa Dios, … nagpasiugda og gubat batok sa mga santos sa Dios.”7
Sama sa unsa tan-awon ang gubat ni Satanas batok sa mahangturon nga kaminyoon? Hunahunaa ang mosunod: Kon kita, isip mga anak sa pakigsaad sa Dios, nagtinguha og gugma, ang kaaway nagpasiugda og kahigal. Kon magtinguha kita og hiyas, siya mobugal-bugal sa kaputli. Kon kita magtinguha og pagkabalaan, siya naghaylo ngadto sa kangitngit. Kon kita makasala, siya nag-awhag og kawalay kadasig kay sa paghinulsol.
Nagmugna siya og gamhanan kaayong makadaut nga impluwensya nga nakaapekto sa tibuok kalibutan: pornograpiya, kamaluibon, pagtamay gikan sa mga tawo sa “dako ug lapad nga gambalay,”8pagtinagsa-tagsa, kakulang sa pasalig, ug mga pakyas nga kaminyoon, sa pagngalan lang og pipila. Bisan kon makalikay kita sa pipila sa kalibutanong mga impluwensya, ang atong pagkakomportable makapakompiyansa kanato ug makapugong sa atong pag-uswag padulong sa mahangturong kaminyoon.
Apan kon mosalig kita sa Dios, mopakita og pagtuo, ug mosunod sa mga pagtulun-an sa ebanghelyo, makabuntog kita sa kanunay nga mga impluwensya sa pagkanegatibo nga moabut pinaagi sa teknolohiya, kalibutanon nga kalingawan, social media, ug usahay isip resulta sa subo nga mga sitwasyon nga atong nakita diha sa kinabuhi sa mga sakop sa pamilya ug mga higala.
Katuigan ang milabay, usa ka matinud-anon nga batan-ong lalaki misulti kanamo nga nawad-an siya og kadasig kalabut sa posibilidad sa malipayong kaminyoon. Dili lamang nga nagdiborsyo ang iyang mga ginikanan, apan usab ang matag tiya ug tiyo sa duha ka habig sa iyang pamilya. Miingon siya nga wala pa gayud siya makakita og malipayon nga kaminyoon sa personal nga paagi. Hinoon, uban sa tabang sa Ginoo, gibuntog niya ang iyang mga kahadlok ug naminyo sa templo. Siya ug ang iyang asawa nakakaplag og kalipay diha sa ilang kaminyoon ug dunay lima ka matahum nga mga anak.
Isip mga anak sa pakigsaad sa Dios, mahimo kitang mopataas sa atong mga ulo ug motan-aw sa umaabut uban sa hugot nga pagtuo ug pagsalig. Ang atong Manluluwas, si Jesukristo, nakabuntog sa kalibutan ug miantus alang sa atong mga sala, ug Siya mihatag og paagi aron kita molambo ug mouswag.
Sama sa nasaksihan natong tanan, ang kalangitan bukas ug ang pagpadayag nagdagayday pinaagi sa atong mga propeta ug mga apostoles sa paghatag kanato og mas dakong suporta batok sa kaaway. Ang Ginoo nagpundok sa Iyang kasundalohan—kita, ang Iyang mga anak sa pakigsaad—ngadto sa luwas nga mga palibut diin kita makaugmad og mahangturon nga mga kaminyoon ug mga pamilya, samtang nagkadautan ang kalibutan.
Busa, unsa ang personal ninyong mabuhat sa pagpakigbatok sa mga impluwensya sa kaaway? Unsaon ninyo pagpugong sa nagkadako nga pagkanegatibo kalabut sa kaminyoon? Unsaon ninyo sa pagbuntog sa gahum sa kaaway diha sa inyong kinabuhi ug padayon nga mag-uswag padulong sa malipayon, mahangturong kaminyoon ug pamilya? Ang tubag sayon ra. Mahimo kamong mosunod sa ebanghelyo ni Jesukristo, mosalig sa gahum sa Iyang Pag-ula, mangandam alang sa Iyang pagbalik, ug motabang sa uban sa pagbuhat sa ingon.
Kamo nga naminyo na mahimong mogiya sa agianan pinaagi sa pag-establisar og mga panimalay nga nakasentro sa ebanghelyo ug positibo nga mosulti mahitungod sa kaminyoon ngadto sa inyong dili pa minyo nga kaigsoonan kinsa nanag-uswag diha sa dalan sa pakigsaad.
Maayong Balita
Karong gabhiona, si Sister Cook ug ako gusto nga mopaambit og maayong balita mahitungod sa kaminyoon. Ug adunay daghang maayong balita!
Among sugdan pinaagi sa pagpaambit sa among matinuorong mga pagbati ug sa among lawom nga pagpamatuod nga ang malipayon ug malampuson nga mga kaminyoon ug mga pamilya mahimo nga matukod karon, sa dili hingpit nga mga tawo sama ninyo ug nako, kon tukuron nato kini sa ebanghelyo nga pundasyon sa pagtuo diha sa Langitnong Amahan, ni Jesukristo, ug sa Iyang Pag-ula; pag-ampo; paghinulsol; pagpasaylo; gugma; kamatinuoron; kamaunungon; panaghiusa; ug mga pakigsaad sa templo.9
Mipasabut si Presidente Nelson, “Ang matag kaminyoon magsugod nga dunay tiunay nga kakulangan. Kini naglakip sa duha ka dili perpekto nga mga tawo. Ang kalipay moabut ngadto kanila pinaagi lamang sa ilang matinguhaon nga paningkamot.”10 Ang pagtinguha og mahangturong kaminyoon dili makab-ut nga walay paningkamot ug paghunahuna. Usa kini ka tibuok kinabuhi nga panaw nga nagkinahanglan og pagpaubos, kakugi, ug mahunahunaong paningkamot sa bana ug sa asawa.
Ang labing maayong balita mao nga ang atong Manluluwas, si Jesukristo, ug ang Iyang Pag-ula nakahimong posible sa padayon nga pag-uswag. Nakatuyhad ang iyang mga bukton ngari kanato. Samtang mopakita kita og pagtuo diha Kaniya, mag-ampo, ug kinasingkasing nga maningkamot, ang mga milagro mahitabo sa atong kinabuhi. Ang maayo nga katuyoan mosangput sa paglihok, ang paghinulsol mosangput sa pagpasaylo, ang mga kahuyang mahimong kalig-on, ug ang atong mga bisyo mapulihan og hiyas. Ang atong mga pangandoy ug mga damgo alang sa malipayong kaminyoon matinuod samtang malig-on ug mahimo kitang sarang pinaagi sa Pag-ula ni Jesukristo, sa tinagsa ug isip magtiayon, usa ka adlaw matag higayon.
Maminaw kita karon ni Sister Cook. Mapasalamaton ko sa akong sinaligang kauban; Nasayud ko nga gimahal niya ang Ginoo ug mapasaligon Kaniya, ingon man ngari kanako. Si Lynette ang labing suod nakong higala. Siya ang akong gibahandi nga mahangturong kapikas.
[Sister Cook]
Mapasalamaton kaayo ko sa akong mahangturong kapikas. Mabination siya ug mapailubon kaayo. Ug malingaw usab kami nga mag-uban. Mapasalamaton ko sa panalangin nga makig-ambit sa kinabuhi uban kaniya ug mag-uban sa pag-uswag.
Karong gabhiuna manghinaut kami nga makatabang kaninyo nga madugangan ang inyong pagtuo nga kitang tanan, bisan unsa pa ang atong kahimtang ug mga kasaypanan, makauswag padulong sa mahangturong kaminyoon. Gusto namo kamong sultihan sa duha ka ordinaryo nga magtiayon kinsa naghimo niana. Kini nga mga managtiayon nasilyo sa templo. Mihimo sila og mga pakigsaad sa usag usa ug sa Dios nga motuman sa Iyang mga sugo ug mogamit sa mga baruganan sa ebanghelyo diha sa ilang kaminyoon. Mapasaligon sila nga mapadak-an ang ilang gugma ug panaghiusa sa usag usa ug ngadto sa Dios.
Samtang mopaambit ako niini nga mga istorya, hatagi og pihong pagtagad ang paningkamot nga ilang gihimo sa pagpalambo og Kristohanong mga hiyas, nga nagtabang sa pagmugna og mahangturong kaminyoon.
Si Dawie ug Elisa
Nahimamat namo si Dawie ug si Elisa11 pipila ka tuig na ang milabay didto sa South Africa. Naghulagway sila sa hingpit nga kalipay nga moabut sa usa ka relasyon kon ang bana ug asawa nagkahiusa.
Panahon sa debosyonal sa usa ka branch mahitungod sa pagpalig-on og mga pamilya, nangutana si Elder Cook sa grupo kon unsay ilang gibuhat sa paglig-on sa ilang kaminyoon. Mipaambit si Dawie og usa niya ka kasinatian uban sa iyang asawa. Namahaw sila usa ka Dominggo sa buntag. Dayon, tungod sa gilay-on sa ilang gipuy-an gikan sa meetinghouse, milakaw sila og duha ka oras padulong sa simbahan, miapil sa tulo ka oras nga mga miting, ug dayon milakaw og dugang duha ka oras sa pagpauli. Gikapoy sila ug gigutom, apan wala silay pagkaon. Sa katapusan nangatulog sila nga gutom.
Sa tungang gabii, nakamata sila, nagdaguok ang ilang mga tiyan. Dili maayo ang gibati ni Dawie nga wala siya makahatag og pagkaon kang Elisa. Nabalaka siya kon unsa ang gibati ni Elisa mahitungod kaniya. Apan imbis nga maguol o masuko, gisungog siya ni Elisa mahitungod sa kataw-anan nga mga tingog nga gihimo sa iyang tiyan. Nangatawa silang duha ug sa katapusan nakatulog og balik.
Sa debosyonal, mipahayag si Dawie og pasalamat sa iyang kamabination, suporta ug kamaunungon. Miingon siya, “Pwede unta ko niyang biyaan. Akong responsibilidad ang pagsuporta kaniya. Apan managsama kami.”
Sa dihang gihangyo sa pagpaambit sa iyang hunahuna mahitungod sa kasinatian, miingon si Elisa, “Siya ang labing suod nakong higala. Daghan kaayo siya og gibuhat alang nako. Kon duna koy problema sa mga tawo sa trabaho, motambag siya nako ug motabang nako nga mobati nga mas maayo.”
Dayag lang nga nakigbisog si Dawie ug Elisa sa mga hagit sa kinabuhi nga magkauban. Sa mga pulong ni Dawie, sila “managsama.” Ang pagkawalay pagkaon dili “iyang” problema o problema ni “Elisa” apan “ilang” problema. Wala nila gikonsiderar ang kakulang sa pagkaon nga usa ka dakong krisis sa kaminyoon apan isip usa ka temporaryong problema nga mahimo nilang masulbad nga magkauban. Migamit sila og pasiaw aron mapasayon ang sitwasyon. Mipakita sila og pagtuo pinaagi sa pagkatulog, nagdahum nga mapalambo nila ang ilang sitwasyon pagkasunod adlaw.
Dili lamang mapasaligon si Dawie ug Elisa sa usag usa, mapasaligon usab sila ngadto sa Dios. Aduna silay pagtuo nga kon mosunod sila sa Iyang mga sugo, motabang Siya kanila sa pagbuntog sa ilang mga hagit. Ug magkauban nilang gitagamtam ang panaw sa kinabuhi isip bana ug asawa. Wala nila tugoti ang lisud nga mga kahimtang nga mobulag kanila sa usag usa sa pisikal, emosyonal, o espiritwal nga paagi.12
Bag-o lang gipaambit ni Dawie ug Elisa kanato nga ang Ginoo nagpanalangin kanila. Daghan na sila karon og pagkaon dili lamang alang sa ilang kaugalingon, apan aduna silay igo nga ikapaambit usab sa uban nga nanginahanglan.13 Magkauban sila nga nag-uswag.
Si Presidente Nelson mitudlo kon unsaon nato sa pag-uswag isip magtiayon.14
Si Nate ug Lexi (Hugot nga Pagtuo diha ni Jesukristo ug sa Iyang Pag-ula)
Sunod, sultihan ko kamo mahitungod ni Nate ug Lexi.15 Usa sila ka makadasig nga ehemplo sa gahum nga moabut sa kaminyoon kon ang bana ug asawa magpakita og hugot nga pagtuo diha ni Jesukristo ug sa Iyang Pag-ula.
Si Nate ug Lexi naminyo ug matinguhaon nga makabaton og anak. Human sa pipila ka bulan nga pagpaabut, sa katapusan namabdos na si Lexi. Mahinamon nilang gipaambit ang balita. Sa walay swerte, paglabay sa mubong higayon human niana, nakuhaan si Lexi. Naguol sila pag-ayo.
Human sa pipila pa ka bulan, namabdos na usab si Lexi. Ang pagmabdos maayo nga milambo niining higayona. Sa hapit na matawo ang bata, mitambong ko og usa ka party uban ni Lexi. Ang tanan, lakip ni Lexi, nalipay pag-ayo nga hapit na ipanganak ang bata.
Wala madugay human niana, naguol kami nga makadungog nga namatay ang ilang bata. Gipanganak ni Lexi ang ilang patay nang daan nga anak nga babaye sa panganakan nga dapit nga puno sa mga inahan ug mga masuso. Makahugno kadto nga balita. Si Elder Cook ug ako mibisita ni Nate ug Lexi sa ilang panimalay. Nagdahum kami nga maabtan sila nga anaa sa hilabihan nga pagbangutan.
Sa among pagsulod sa ilang panimalay, mibati kami og malinawon nga diwa. Mainiton kaming gihangup ni Nate ug Lexi. Nagtapad sila sa paglingkod diha sa sofa ug naggunitay samtang gipaambit nila kanamo ang pipila ka detalye mahitungod sa pagkamatay sa ilang anak nga babaye. Misulti sila kanamo mahitungod sa malumong mga kalooy nga gipanalangin sa Ginoo kanila sa pagpagaan sa ilang palas-anon. Mipahayag sila og pasalamat alang sa ilang matahum nga bata, kinsa ginganlan nila og Hope. Mapasalamaton si Lexi sa oportunidad nga gimabdos ug gipanganak niya si Hope.
Ang hugot nga pagtuo ni Nate ug Lexi nakabayaw kanamo. Nahupay kami niining batan-ong magtiayon. Giingnan nako sila nga gibati nako nga usa ka milagro kon giunsa nila pag-atubang kini nga hagit. Pareho silang mitubag pinaagi sa pagpaambit sa ilang mga pagpamatuod sa makabayaw ug makapalig-on nga gahum ni Jesukristo ug sa Iyang Pag-ula. Bug-at ang ilang palas-anon, apan mitabang Siya kanila sa pagdala niini. Gitratar sila sa Ginoo uban sa kalumo, ug si Nate ug Lexi mitratar sa usag usa uban sa kalumo. Nahiusa sila sa Dios ug sa usag usa.
Uban sa tabang sa Ginoo, ang mga hagit makahiusa kanato. Si Elder D. Todd Christofferson miingon, “Kon walay Dios, kining malisud nga mga kasinatian makahimo og ingon sa walay paglaum, ug gani kanunay nga kasuko. Uban sa Dios, ang kahupayan mopuli sa kasakit, ang kalinaw mopuli sa kasamok, ug ang paglaum mopuli sa kasubo.”16
Nanghinaut kami nga ang mga istorya niini nga mga magtiayon makatabang sa paglig-on sa inyong pagtuo diha sa kaminyoon. Ang kinabuhi mahagiton, apan makahimo kita sa pag-uswag padulong sa mahangturong kaminyoon samtang gamiton nato ang mga baruganan sa ebanghelyo.
[Elder Cook]
Agig dugang sa mga magtiayon nga atong gipakita, daghan pang uban, sa tanang bahin sa kalibutan, ang nagtagamtam og malipayon ug nag-uswag nga mga kaminyoon. Nahimamat namo kini nga mga magtiayon bisan asa kami moadto. Naglakip sila og mga tawo sa tanang edad ug mga background. Modapit kami kaninyo sa pag-ila og pipila ka mga magtiayon nga personal ninyong nailhan. Tan-awa sila, pakigsulti kanila; pangutana kanila. Dili sila perpekto, apan makakat-on kamo kanila. Makatabang sila sa paglig-on sa inyong pagtuo sa mahangturon kinaiya sa kaminyoon ug modasig ninyo sa pagpalambo og Kristohanong mga hiyas nga mopanalangin kaninyo ug sa inyong kapikas sa kahangturan!
Mga babag
Tungod kay kita nagpuyo sa napukan nga kalibutan, kinahanglang mosagubang kita og mga babag—lakip diha sa atong mga relasyon. Maghisgut ko og pipila ka mga babag nga mahimo ninyong masugatan samtang naningkamot kamo nga mouswag padulong sa mahangturong kaminyoon.
Resonable nga mga Ekspektasyon
Ang usa ka komon nga babag sa kaminyoon mao ang pagbaton og dili resonable nga mga ekspektasyon sa tawo nga inyong minyoan. Ang atong ekspektasyon kinahanglan nga dili taas kaayo o ubos kaayo. Samtang bukas ug matinuoron kita nga makigsulti sa Langitnong Amahan pinaagi sa sinsero nga pag-ampo, uban sa tinuod nga katuyoan, Siya mogiya kanato.
Pagkumpiyansa
Ang pagkumpiyansa kasagaran usa ka babag sa mahangturon nga kaminyoon. Sayon ra nga mapakalma sa tawhanong seguridad nga magpakabuhi nga taas og kaikag sa kaugalingon ug ubos ra og mga responsibilidad. Mahimong makomportable kita sa atong kinabuhi ug dili mobati sa kadinalian nga motubo. Kini nga pagbati supak sa plano sa atong Langitnong Amahan. Ang tibuok katuyoan niining mortal nga kasinatian mao ang mahimong sama Kaniya. Dili kita mahimo kon dili kita andam nga motubo, mausab, ug mouswag. Kon anaa kamo sa kahimtang sa pagkakumpiyansa, pag-ampo ug pagpakita og pagtuo nga makalingkawas ug mouswag padulong sa mahangturong kaminyoon. Ang Langitnong Amahan makatabang kaninyo kon unsay inyong mabuhat sa inyong indibidwal nga kahimtang sa pag-uswag, ug Siya mopanalangin kaninyo.
Teknolohiya ug Media
Sa katapusan, usa sa dakong mga hampak ug mga babag sa atong panahon mao ang dili tukmang paggamit o sobrang paggamit sa teknolohiya ug media. Makadaut kini sa mga indibidwal ug mopugong og mga relasyon, sa pagpakig-date ug sa kaminyoon. Kon inyong makita ang inyong kaugalingon diha sa internet nga nag-pin, nag-post, nag-stream, nag-shoot, nag-like, nagdula, nakadaog, nakabuntog, nag-tweet, nag-snap, ug nag-swipe nga sobra pa kay sa inyong makita ang inyong kaugalingon nga personal nga nakig-atubang sa usa ka tinuod nga buhi nga tawo nakig-istorya, nangatawa, nakig-ambit, nagtabang, naglakaw, nangutana, nagkat-on, nag-atiman, ug naghatag, tingali ang teknolohiya ug media nagpugong kaninyo sa pag-uswag padulong sa tinuod nga kalipay sa mahangturon nga kaminyoon. Ang inter-aksyon sa internet dili haum nga puli sa tawhanong inter-aksyon—pakig-istorya sa tinuod nga mga tawo sa aktwal nga panahon.
Gipanghimug-atan ni Presidente Nelson ang kaimportante sa pagpalong sa mga celphone ug paghipos niini. Miingon siya, “Ang de-kalidad nga panahon importante kaayo! Ang mga magtiayon nagkinahanglan og panahon nga mag-uban aron sa pag-amuma sa ilang relasyon. Kinahanglang makat-on sila sa pagpaminaw, ug maminaw aron makakat-on gikan sa usag usa. Kana nga panahon kinahanglan nga planohon daan. Kon ang malipayong kaminyoon hilabihan ka importante, angay kining hatagan og saktong panahon.”17 Ang atong mga gawi sa teknolohiya sa dili pa ta minyo madala ngadto sa atong kaminyoon.
Makahimo Kamo Niini
Mga kaigsoonan, uban sa tabang sa Ginoo, makabuntog kamo sa bisan unsang mga babag nga inyong giatubang. Bisan asa kamo sa dalan sa pakigsaad, nga mopadulong sa mahangturong kaminyoon, ang Ginoo makatabang kaninyo sa pag-uswag aron manglakaw kamo sa dalan nga mag-uban—sa usa ka tawo nga inyong gimahal. Kon kamo dili minyo nga walay gilaumang kapares, nagkaproblema ang kaminyoon, diborsyado nga dunay mga anak, naningkamot nga mabuntog ang pagkaadik, nakasinati og mga problema sa panglawas, o nawad-an og kadasig sa bisan unsang paagi, ang makaayong tambal sa Ginoo moayo, moalim, ug molig-on kaninyo. Samtang modangup kamo Kaniya uban sa pagtuo, maghinulsol sa inyong mga sala, ug mopahimulos sa Iyang gahum sa pagtabang kaninyo nga mouswag, ang mga milagro mahitabo.
Ang mga ehemplo diha sa Basahon ni Mormon mopalambo sa atong pagtuo. Ganahan ko niadtong gisugo si Nephi sa paghimo og barko. Wala pa gayud siya makahimo og barko sukad, ug anaa siya sa kamingawan. Mahimo natong itandi ang iyang sitwasyon ngadto sa atong buluhaton sa pag-establisar og mahangturong kaminyoon niini nga kalibutan nga usahay mabati nga sama sa kamingawan.
Miingon si Nephi sa iyang kasinatian, “Ug kon kini mao nga ang mga katawhan maghupot sa mga sugo sa Dios siya moamuma kanila, ug molig-on kanila, ug mohatag og mga paagi diin sila makatuman sa butang diin siya misugo kanila.”18
Si Nephi mipakita og pagtuo, milihok uban sa kakugi, ug ang Ginoo mihatag kaniya og kahibalo sa pagtukod sa barko—usa ka barko nga midala kaniya ug sa iyang asawa ug pamilya tabok sa kadagatan padulong sa gisaad nga yuta.19
Kon si Nephi nakabuhat og barko uban sa tabang sa Ginoo, siguradong makatukod kita og mahangturong kaminyoon uban sa Iyang tabang. Sa tinuod lang, tingali ang pagtukod og kaminyoon medyo mas lisud kay sa pagtukod og barko, apan mahimo kini! Dili ba, Sister Cook?
Kinsa ang Inyong Minyoan?
Busa, alang niadtong dili pa minyo, kinsa man ang inyong minyoan? Siguradong walay kakulang sa tambag kon kinsa kana nga tukma nga tawo. Sa dihang batan-on pa ko, ang tambag sa akong amahan mao ang, “Anak, pagminyo alang sa kwarta, ug ang gugma moabut.” Ang tambag sa akong inahan mao ang, “Pagminyo alang sa gugma, ug ang kwarta moabut.” Wala madugay, ang akong mission president20 mitudlo nako, “Pagminyo alang sa kahangturan.”
Ang mahangturon nga kaminyoon maoy usa ka pakigsangga sa Dios, ug importante nga magtinguha kita sa Iyang tambag kon kinsa ang minyoan. Dili kita mopili sa atong kapikas base sa kwarta o kabtangan, ni tungod sa gugma lamang. Magtinguha kita og mahangturon nga kaminyoon.
Nagpasalamat ko sa mga pagtulun-an sa akong presidente sa misyon. Mapasalamaton usab ako sa tambag nga gihatag niya kanako samtang nangandam ko nga mopauli sa panimalay. Miingon siya nga kinahanglang padayon ko nga mag-uswag padulong sa akong mahangturong mga tumong. Misugyot siya nga mangandam ko alang sa kaminyoon ug dili maglangay-langay kon motumaw ang saktong oportunidad.
Mga Referral
Bisan sa labing maayong mga intensyon, dili kanunayng sayon ang pagpangita sa inyong mahangturong kapikas. Kasagaran, nagkinahanglan kini og hiniusang paningkamot. Sa akong unang tuig sa panimalay, nakahimamat ko og batan-ong mga babaye sa eskwelahan, sa institute, sa trabaho, ug sa simbahan. Nakig-date ko sa uban og kausa, sa pipila kaduha, apan walay usa sa akong mga pagpakig-date ang milambo lapas pa sa paghigalaay. Nagkinahanglan ko og tabang, mao nga mikontak ko sa usa ka kasaligan nga kanhi misyonaryo nga kompanyon, si Mark Allred, kinsa nagpuyo sa pikas nga bahin sa lungsod. Nangayo ko niya og referral—pakig-date nga referral, usa ka tawo nga mahangyo nako nga makig-date.
Si Mark nakaila nako, ug gikonsiderar niya ang batan-ong mga babaye nga iyang kaila. Human makahunahuna, gihatag niya kanako ang ngalan ni Lynette Hansen. Gibati niya nga bagay kami ug maganahan kami nga makig-uban sa usag usa, mao nga gikontak nako si Lynette. Sakto si Mark! Bulawanon siya, o ang unsay miresulta nga diyamante, nga referral. Nadasig si Mark.
Alang ninyo nga dili minyo, nasayud ko nga adunay daghang paagi nga mapangita ninyo ang inyong mahangturong kapikas, apan ang ubang pamaagi siguradong mas maayo kay sa uban. Pangitaa ang inyong kapikas sa mga dapit diin labing dakog kalagmitan nga inyong makaplagan ang inyong mahangturong kapikas. Mahangturong kapikas—dili manobra ang akong paghatag og gibug-aton niini.
Ikonsiderar ang pagpangayo og referral gikan sa nailhan ug sinaligan nga tinubdan. Aduna ba kamoy kanhi misyonaryo nga kompanyon, maunungon nga schoolmate, buotan nga higala gikan sa kanhi nga ward? Usa ka tawo nga nakaila ninyo? Unsa kaha kon mangayo mo niya og referral?
Kon makadawat mo og referral, pakita og pagtuo, kontaka ang tawo, ug sulayi kini. Sigurado gayud, adunay pipila ka referral nga dili maayo ang resulta, apan adunay dinasig usab nga mga referral nga makapausab og kinabuhi. Nagtuo ko nga kon mopakita kita og pagtuo, maglaum, ug ilakip ang Langitnong Amahan, mahitabo ang maayong mga butang.
Magkauban nga Mag-uswag
Sa dihang si Lynette ug ako misugod sa pagpakig-date, ganahan kaayo mi sa panahon nga kauban ang usag usa. Kanunay kaming magkita, ug nagkalig-on ang among panaghigalaay kada adlaw. Managlahi kami sa usag usa sa pipila ka paagi, apan nagkauyon kami sa tanang importante nga mga paagi. Nagkahigugmaay kami, ug sa katapusan miabut kami sa punto diin gibati namo nga kinahanglang mohimo kami og desisyon. Magminyo ba kami ug mag-uban sa pag-uswag? O mopadayon sa kinabuhi nga wala ang usag usa?
Gitimbang-timbang namo ang mga reyalidad sa kaminyoon. Asa man kami mopuyo? Unsaon man namo nga mabuhi sa pinansyal nga paagi nga layo sa among mga ginikanan? Sakto na ba ang panahon? Nag-uban kami nga nag-ampo mahitungod sa tanan namong kabalaka. Pareho namong gibati nga ang Langitnong Amahan mahimuot kon magminyo kami. Gibati namo nga motabang Siya kanamo sa pagbuntog sa mga babag nga atong giatubang.
Kasagaran niini nahitabo sa usa ka semester sa eskwelahan. Si Lynette maayo nga estudyante ug perming moadto sa librarya aron magtuon. Miadto sab ko sa librarya—aron makakita niya. Misaka ang akong mga grado, ug mius-us ang mga grado ni Lynette. Tinuod! Apan nagkauyon kami nga mao kadto ang among labing maayong semester sukad. Ngano man? Agig dugang sa kalipay nga among gibati kon mag-uban, nag-uswag kami padulong sa usa ka komon nga tumong. Gibati namo nga nahiangay sa usag usa ug sa Dios, ug nindot kadtong bation. Midako ang among pagtuo. Gibati namo nga uban sa tabang sa Ginoo, makabuntog kami sa bisan unsa. Napuno kami sa kalipay.
Nasilyo kami sa Ogden Utah Temple. Dul-an sa 40 ka tuig na ang milabay. Among nakaplagan sa among kaugalingon nga ang kaminyoon nagdala og mas dagkong kahigayunan sa kalipay kay sa bisan unsa pa nga tawhanong pakigrelasyon.21 Tungod kay plano kini sa Ginoo.
Daghan kaayo kita og gihisgutan karong gabhiuna. Manghinaut kami nga ang doktrina nga among gipaambit motuhop diha sa inyong kalag ug motabang kaninyo sa pag-uswag subay sa dalan sa pakigsaad padulong sa mahangturong kaminyoon. Manghinaut kami nga ang mga ehemplo nga among gipaambit mahitungod sa malipayon nga mga kaminyoon makadugang sa inyong pagtuo ug nga ang Espiritu mohunghong kaninyo og usa ka butang nga inyong mahimo aron mouswag. Tingali alang sa pipila kaninyo, ang Espiritu mihunghong kon kinsa ang ikauban ninyong mouswag!
Alang ninyo nga nagbuhat sa unsay kinahanglan ninyong buhaton sa pagtinguha og mahangturon nga kaminyoon, apan daw wala pay moabut—kon kamo dili minyo sa pagkakaron o anaa sa kaminyoon nga daw walay mga timailhan sa pag-uswag—mag-ampo kami nga mapanalanginan kamo nga magpabiling malaumon ug mobuhat sa inyong pinakamaayo , motampo sa buhat sa Ginoo, ug magpakabuhi uban sa kalipay. Miingon si Presidente Nelson, “Nasayud kita nga ang Ginoo mohukom sa matag usa kanato sumala sa mga tinguha sa atong mga kasingkasing, ingon man usab sa atong mga buhat, ug nga ang panalangin sa kahimayaan ihatag sa tanan nga angayan.”22 Pagmatinud-anon ug padayon sa unahan. Ang tanang panalangin inyong maangkon sumala sa panahon sa Ginoo. Nasayud ako nga tinuod kana.
Mga kaigsoonan, ang atong dakong oportunidad mao ang kanunay nga pag-uswag—ang paghimo ug paglig-on sa celestial nga mga kaminyoon ug mahangturong mga pamilya uban sa tabang sa Ginoo. Mopamatuod ko nga si Jesukristo mao ang atong Manluluwas ug atong Manunubos. Pinaagi Kaniya, malig-on kita sa pagbuhat sa tanang mga butang nga ang Langitnong Amahan nagdapit kanato sa pagbuhat. Ug hinaut nga ang Iyang mga panalangin maanaa kaninyo, sa pangalan ni Jesukristo, amen.
© 2019 pinaagi sa Intellectual Reserve, Inc. All rights reserved. Bersyon: 2/19. Hubad sa “Continually Progressing toward Eternal Marriage.” Cebuano. PD60008283 853