Haere tāmau noa ē tae atu i te fa’aipoipora’a mure ’ore

Elder Carl B. Cook

Nō te Hitu ’Ahuru

’E te tuahine Lynette H. Cook

Purera’a ’ati ti’a i te ao nā te Feiā ’Āpī Pa’ari • 5 nō Mē 2019 • Fare menemene nō Roto Miti

Elder Carl B. Cook

E ’oa’oa rahi tō te tuahine Cook ’e tō’u nei ’ia tae mai i rotopū ia ’outou i teie pō. Nā teie ha’apūrorora’a e hōpoi ia māua nā te ao ato’a nei, e 99 fenua ’e e 39 reo. E rave rahi o ’outou e māta’ita’i ’āfaro ti’a nei i teie ha’apūrorora’a. Te tahi pae e māta’ita’i rātou i te reira i te tahi atu taime, nō te mea, tē vai ra te tauira’a hora. Noa atu te vāhi tei reira ’outou ’e te huru nō tā ’outou māta’ita’ira’a i teie ha’apurorora’a, mānava ia outou !

Tē fa’atae atu nei māua i te mānava ta’a ’ē ia ’outou tei fāri’i i te parau tū’ite nō te fare ha’api’ira’a tuatoru ’aita i maoro a’e nei ’e ’o tei ’āmui mai nō te taime mātāmua i teie ha’apūrorora’a ’ati a’e te ao nei. Tē ti’aturi nei māua ē, e ’āmui atu ’outou i roto i te ha’api’ira’a institut ’e te tahi atu mau ha’api’ira’a fa’aro’o, ’ei tuha’a nō tā ’outou ha’api’ira’a, nō te fāri’i i te maita’i nō te ’apora’a mai i te pae vārua tei fa’ata’ahia nō ’outou. E riro te ’āmuira’a i roto i te mau ha’api’ira’a ’e te mau ’ohipara’a ’ei pōito fa’aorara’a faufa’a roa nō te tauturu ia ’outou ’ia rātere ma te manuia i roto i teie pu’e tau o tō ’outou orara’a.

[Te tuahine Lynette H.Cook]

’Ua ha’amaita’ihia māua ’ia tae mai i rotopū ia ’outou tāta’itahi. ’Ua fa’ateitei ’outou i tō māua vārua ’e ’ua fa’arahi i tō māua fa’aro’o i roto i te tau a muri a’e. Tē fa’ahiahia nei māua i te huru nō tō ’outou pāhonora’a i te mea tā te mau peropheta ’e te mau ’āpōsetolo i ha’apāpū mai. Tō ’outou ’āmuira’a ma te fa’aro’o i roto i te ’ohipa ’ā’amu ’utuāfare, te ’ohipa misiōnare, ’e te ’ohipa hiero—tae noa atu i te tāvinira’a ’ei mau rave ’ohipa ’ōro’a—’ua riro ïa ’ei fa’aurura’a. Tē māuruuru nei māua ia ’outou, ’e ’ua here māua ia ’outou.

Elder Cook

E ha’amata vau i teie pō nā roto i te fa’a’itera’a atu ia ’outou i te hō’ē ’itera’a tā māua te tuahine Cook i fāri’i i pīha’i iho i te tahi mau feiā ’āpī pa’ari ’ōtahi i Nairobi, Kenya. I roto i te hō’ē purera’a, tē paraparau ra mātou nō ni’a i te fa’aipoipora’a. ’Ua ui māua i te feiā ’āpī pa’ari e aha tā rātou e ’imi nei i roto i te hō’ē hoa mure ’ore.

I muri a’e i te tahi mau mana’o, e mea pāpū maita’i ē, ’ua feruri te tahi mau tamāroa ē, te tīa’i nei te tahi mau tamāhine ’ia roa’a ia rātou te fāito ha’api’ira’a tuatoru, ’ia roa’a hō’ē pere’o’o uira, ’e ’ia roa’a hō’ē vāhi orara’a maita’i hou ’a feruri ai e fa’aipoipo ia rātou. ’Āre’a te tahi atu mau tamāhine e rave rahi, ’ua parau rātou ē, e nehenehe rātou e tīa’i i te reira mau mea mai te mea ē, tē ’imi itoito ra te mau tamāroa i te reira. E nehenehe rātou e rave ’āmui i te reira.

E tāmata ana’e tātou i te reira i teie pō. E te mau taea’e ’ōtahi tei tae’ahia te matahiti nō te fa’aipoipo, i te mau vāhi ato’a tei reira ’outou, tē ui nei au i te hō’ē uira’a ia ’outou. E hia ’outou e feruri nei ē, e mau ta’ata rave ’ohipa pūai ’outou ’e te huru maita’i, e mea pūai i roto i te ’itera’a pāpū ’e e mea pāpū i te pae vārua, terā rā, tē feruri nei paha ’outou ē, ’aita ’outou i ineine roa i te pae tino nō te fa’a’oa’oa i te hō’ē tamāhine i roto i te fa’aipoipora’a ? ’Āfa’i i tō ’outou rima i ni’a. Fa’ateitei !

Teienei, ’outou e te mau tuahine ’ōtahi. E hia ’outou e hina’aro nei e tīa’i i te mau ha’amaita’ira’a pae tino i roto i te hō’ē fa’aipoipora’a, nō te ha’api’i mai ’e nō te tupu i te rahi i pīha’i iho i te hō’ē ta’ata rave ’ohipa pūai tā ’outou i here, hō’ē ta’ata maita’i, e mea pūai i roto i te ’itera’a pāpū ’e e mea pāpū i te pae vārua ? ’Āfa’i i tō ’outou rima i ni’a. Fa’ateitei !

Mai te mea ē, ’ua hi’o te hō’ē o ’outou nā roto i te piha ’e ’ua ’ite i te hō’ē ta’ata tā ’outou i ’ana’anatae tei ’āfa’i i tōna rima i ni’a, ahh…

I Nairobi, ’ua fa’a’ite au i te hō’ē fa’ahitira’a parau nō roto mai i te Buka arata’i 2 ’o tē fa’ata’a ra ē, « ’Ua hāmanihia te nātura o te vārua tāne ’e te vārua vahine ’ia ti’a ho’i i te tahi ’ia fa’ati’a i te tahi. ’Ua ’ōpuahia ’ia tupu ’āmui te tāne ’e te vahine ē tae atu i te fa’ateiteira’a »¹

nā ta’ata fa’aipopo e haere ra i ni’a i te mou’a

’Ua ti’a mai ra te hō’ē tamāroa i ni’a ’e ’ua parau mai ra ma te ’oa’oa, « mea maita’i roa ! Tē mana’o nei au ē, e ani au i te hō’ē tamāhine e hina’aro ānei ’oia e haere i mua ’e o vau, ’eiaha rā e ani iāna ’ia fa’aipoipo iā’u ».

Tē mana’o nei au ē, e pa’ari rahi tō roto i te mana’o o teie tamaiti. Mai te au i te parabole ’āfirita, « mai te mea e hina’aro ’oe e haere vitiviti, haere o ’oe ana’e. Mai te mea e hina’aro ’oe e haere ātea, ’a haere ’āmui ». E parau ato’a vau ē, « ’a haere ’āmui, ’e nā roto i te tauturu a te Fatu, e nehenehe ’outou e haere ’āmui i mua ’e e fa’ati’a i te tahi ’e te tahi ».

Nā roto i te hō’ē hi’ora’a nūmera, hō’ē e ’āmui i te hō’ē e roa’a mai e piti. Mai te mea rā ē, e tāhō’ē e piti nā ta’ata, hō’ē e ’āmui i te hō’ē e roa’a mai ïa hau roa atu i te piti ! ’E mai te mea ē, tei roto ato’a te Fatu i te reira nūmera, e mea hope ’ore ïa ’e te mure ’ore te nūmera ’āmui.

Mai tā ’outou i feruri, e paraparau tātou i teie ’āru’i nō ni’a i te fa’aipoipora’a—ma te ta’a ’ē ri’i. E paraparau tātou nō ni’a i te haerera’a i mua ē tae atu i te fa’aipoipora’a mure ’ore. ’E nō te tā’āto’ara’a te reira, tae noa atu i te tuahine Cook ’e o vau. E mea fa’aipoipo ānei ’e ’aore rā, te ’ōtahi, noa atu te huru o te matahiti, e nehenehe tātou pā’āto’a e haere i mua mai te vāhi tei reira tātou i teienei.

O te fa’aipoipora’a mure ’ore te ’ōro’a teitei roa a’e o te ’evanelia a Iesu Mesia. E parau te reira nō te hō’ē tāne ’e te hō’ē vahine i tā’atihia i roto i te hiero e ’ua tā’atihia tō rāua fa’aipoipora’a nā roto i te Vārua Mo’a o te fafaura’a. Nā roto ana’e i te fāri’ira’a i teie ’ōro’a o te autahu’ara’a ’e te ha’apa’ora’a i tā tātou mau fafaura’a, e ti’a ai ia tātou ’ia fāri’i i te ha’amaita’ira’a o te ora-tāmau-ra’a ’ei tāne ’e ’ei vahine fa’aipoipo, ’ei mau hoa mure ’ore i muri a’e i te pohe.²

Tē vai ra i roto ia tātou te hō’ē hina’aro nō te mau aura’a mure ’ore. ’Ua parau te peresideni Nelson, « Te hina’aro teitei a’e o te ’ā’au o te ta’ata, nō te hō’ē ïa fa’aipoipora’a ’o tē vai tāmau ’e tae atu i ō mai i te pohe ».³

tē tāpe’a nei i te rima i rāpae i te hiero

E nehenehe tātou tāta’itahi e fāri’i i te fa’aipoipora’a mure ’ore. Noa atu te tā’āto’ara’a o te mau fifi e fārereihia e te mau tamari’i a tō tātou Metua i te ao ra i roto i te tāhuti nei, e nehenehe te fa’aipoipora’a mure ’ore e tupu i roto i tāna fa’anahora’a mure ’ore. « ’Aore e ta’ata i fa’ata’a-ātea-hia nō te fāri’i iti a’e i te mau mea ato’a tā te Metua [i fa’ata’a] nō tāna mau tamari’i ».⁴ Mai te mea e ha’apa’o maita’i tātou, ’ua fafauhia mai ia tātou te mau mea ato’a a tō tātou Metua i te ao ra, tae roa atu i te fa’aipoipora’a mure ’ore, ’oia ho’i, te ’āpitira’a mau. ’Aore hō’ē ta’ata e fa’aro’o mai nei i teie poro’i e fa’a’erehia i tāua ha’amaita’ira’a i fafauhia ra.

Nō te « faufa’a te fa’aipoipora’a i rotopū i te tāne ’e te vahine i roto i te fa’anahora’a a te [Atua] »,⁵ tē aro nei te ’enemi i te reira, ’e e mea ’ū’ana te arora’a. E ’ore roa Sātane e fāna’o i te fa’aipoipora’a mure ’ore, ’e mai tā te mau pāpa’ira’a mo’a e parau ra, « tē tītau nei ’oia ’ia ro’ohia te tā’āta ato’a i te ’ati mai iāna ihora ».⁶ « Taua ’ōphī tahito ra, ’o tei ’orurehau atu i te Atua ra, ’o tē fa’atupu mai nei i te tāma’i i te feiā mo’a nō te Atua ».⁷

Mai te aha te huru te tāma’i a Sātane i ni’a i te fa’aipoipora’a mure ’ore ? A feruri nā i teie : Tātou te mau tamari’i fafauhia a te Atua, ’ia ’imi ana’e tātou i te here, e ha’afaufa’a te ’enemi i te nounou. ’Ia ’imi ana’e tātou i te orara’a mā, e fa’ainaina ’oia i te vi’ivi’i ’ore. ’Ia ’imi ana’e tātou i te mo’a, e ume ’oia ia tātou i roto i te pōiri. ’Ia hara ana’e tātou, e poro ’oia i te mana’o paruparu ’eiaha rā te tātarahapa.

tē arata’i nei te ’enemi ia tātou i te pōiri

tē hōro’a nei te ’enemi i te fiu o te ’ā’au

’Ua fa’atupu ’oia i te hō’ē miti fa’a’ī ha’avare o te mau fa’aurura’a ’ino e fa’a’ati nei i te fenua—te mau hōho’a faufau, te fa’aturi, te fa’a’ino a te ta’ata i roto i te « fare rahi ’e te ’ā’ano »,⁸ te mana’o ta’ata hō’ē noa, te ’erera’a i te fafaura’a pāpū, ’e te mau fa’aipoipora’a tei hi’a, nō te fa’ahiti noa i te tahi. Noa atu ē, e ’ape tātou i te mau fa’aurura’a o te ao nei, e nehenehe tō tātou orara’a fāna’o ta’oti’ahia e fa’ata’oto ia tātou i roto i te ti’aturi ’ore ia tātou iho, ’e e fa’a’ino i tō tātou haerera’a i mua ē tae atu i te fa’aipoipora’a mure ’ore.

Terā rā mai te mea ē, e ti’aturi tātou i te Atua, e fa’a’ohipa i tō tātou fa’aro’o, ’e e haere i ni’a i te fenua teitei a’e, e ti’a ïa tātou i ni’a a’e i te mau are tāviriviri o te mana’o pāto’ito’i nō roto mai i te mau rāve’a ’aravihi, te mau fa’a’oa’oara’a o te ao nei, te ha’apararera’a parau sōtiare, ’e i te tahi taime, i muri a’e i te mau ’ohipa fifi tā tātou e ’ite nei i roto i te orara’a o te mau melo o te ’utuāfare ’e o te mau hoa.

E rave rahi matahiti i ma’iri a’e nei, ’ua fa’a’ite mai te hō’ē tamaiti ha’apa’o ia māua ē, ’ua topa roa tōna mōrare nō ni’a i te noa’ara’a te hō’ē fa’aipoipora’a ’oa’oa. E ’ere tōna ana’e nā metua tei fa’ata’a, tōna ato’a rā mau tonton ’e te mau tati i nā pae e piti o tōna ’utuāfare. ’Ua parau mai ’oia ē, ’aore ā ’oia i ’ite a’e nei i te hō’ē fa’aipoipora’a ’oa’oa fātata mai iāna. Terā rā, nā roto i te tauturu a te Fatu, ’ua ti’a ’oia i ni’a a’e i tōna mau mata’u ’e ’ua fa’aipoipo i roto i te hiero. Tē iteahia nei ia rāua tāna vahine te ’oa’oa i roto i tō rāua fa’aipoipora’a ’e e pae tamari’i nehenehe tā rāua.

’Ei mau tamari’i fafauhia nā te Atua, e nehenehe tātou e fa’ateitei i tō tātou upo’o ’e e hi’o i mua i tō tātou ananahi ma te fa’aro’o ’e te ti’aturi. ’Ua upo’oti’a tō tātou Fa’aora, ’o Iesu Mesia, i ni’a i te ao nei, ’ua mamae nō tā tātou mau hara, ’e ’ua hōro’a mai i te hō’ē rāve’a ’ia manuia tātou ’e ’ia haere ato’a i mua.

Mai tā tātou pā’āto’a e ’ite nei, ’ua matara te mau ra’i ’e tē tae mai nei te heheura’a nā roto i tō tātou mau peropheta ’e te mau ’āpōsetolo nō te tauturu ia tātou ’ia ha’apa’ari i te rēni i rōpū ia tātou ’e te ’enemi. Tē ha’aputuputu nei te Fatu i tōna mau pūai—o tātou, tāna mau tamari’i fafauhia—i roto i te hō’ē heipuni pāpū i reira e ti’a ai ia tātou ’ia ha’amau i te fa’aipoipora’a ’e te mau ’utuāfare mure ’ore, i te taime mau ’a ’ino ai te ao nei.

E aha te ti’a ia ’outou ’ia rave nō te ’aro i te mau fa’aurura’a a te ’enemi ? Nāhea e ti’a ai ia ’outou ’ia tāpe’a i te ’are pāto’i e hā’ati nei i te fa’aipoipora’a ? Nāhea e ti’a ai ia ’outou ’ia ha’avī i te pūai o te ’enemi i roto i tō ’outou orara’a ’e ’ia haere tāmau noa i mua e tae atu ai i te hō’ē fa’aipoipora’a ’e te ’utuāfare ’oa’oa ’e te mure ’ore ? ’Ōhie roa te pāhonora’a. E nehenehe tā ’outou e ora i te ’evanelia a Iesu Mesia, e fa’a’ohipa i te mana o tōna tāra’ehara, e fa’aineine nō tōna ho’ira’a mai, ’e e tauturu ia vetahi ’ē ’ia nā reira ato’a.

’Outou tei fa’aipoipohia, e nehenehe ’outou e fa’a’ite i te ’ē’a, nā roto i te ha’amaura’a i te mau fare tei fa’atumuhia i ni’a i te ’evanelia ’e ma te paraparau-maita’i-ra’a nō ni’a i te fa’aipoipora’a i tō ’outou mau taea’e ’e te mau tuahine ’ōtahi ’o tē haere nei i mua i ni’a i te ’ē’a nō te fafaura’a.

Parau ’āpī maita’i

I teie pō, tē hina’aro nei māua te tuahine Cook e fa’a’ite atu i te tahi mau parau ’āpī maita’i nō ni’a i te fa’aipoipora’a. ’E e mea rahi roa !

Tē hina’aro nei māua e ha’amata nā roto i te fa’a’itera’a atu i tō māua mau mana’o ’oa’oa i roto i tō māua fa’aipoipora’a ’e tō māua ’itera’a pāpū hōhonu ē, e nehenehe te fa’aipoipora’a ’e te ’utuāfare ’oa’oa ’e te manuia e patuhia i teie mahana, nā te mau ta’ata ’aore i maita’i hope roa mai ia ’outou ’e iā’u nei, mai te mea ē, e ha’amau tātou i te reira i ni’a i te niu o te ’evanelia o te fa’aro’o i te Metua i te ao ra, ia Iesu Mesia, ’e i tōna tāra’ehara ; te pure ; te fa’a’orera’a hara ; te here ; te ha’avare ’ore ; te ha’apa’o ; te tāhō’ē ; ’e te mau fafaura’a o te hiero.⁹

’Ua fa’ata’a mai te peresideni Nelson ē, « e ha’amata te fa’aipoipora’a tāta’itahi nā roto e piti fifi. Tei roto i te reira e piti nā ta’ata ’aita i maita’i hope roa. E fāri’i rāua i te ’oa’oa nā roto ana’e i tā rāua tauto’ora’a tu’utu’u ’ore ».¹⁰ E’ita te fāna’ora’a i te hō’ē fa’aipoipora’a mure ’ore i te hō’ē mea e tupu noa mai. E tere nō te orara’a tā’āto’a o te tītau i te ha’eha’a, te itoito, ’e te ’ohipa pāpū nō te tāne ’e te vahine.

Te parau ’āpī maita’i a’e maori rā, nā Iesu Mesia ’e tōna tāra’ehara e tauturu ’ia haere tāmau noa i mua. Tē toro nei tōna nā rima ia tātou. Mai te mea ē, e fa’a’ite tātou i te fa’aro’o i roto iāna, e pure ho’i, ’e e tauto’o itoito, e tupu te mau temeio i roto i tō tātou orara’a. E hōro’a mai te mana’o maita’i i te ’ohipa, te tātarahapa nō te fa’a’orera’a hara, e hōro’a te paruparu i te rāve’a nō te pūai, ’e e monohia tā tātou mau peu ha’iri’iri nā te peu maita’i. E riro mai tā tātou mau tīa’ira’a ’e te mau moemoeāra’a nō te hō’ē fa’aipoipora’a ’oa’oa ’ei ’ohipa mau, i te mea ē, e ha’apūaihia tātou ’e e tauturuhia nā roto i te tāra’ehara a Iesu Mesia, nō te ta’ata hō’ē, ’e nō te feiā fa’aipoipo, hō’ē mahana i te taime hō’ē.

E fa’aro’o mai tātou i te tuahine Cook i teienei. Tē māuruuru nei au nō tō’u hoa ti’aturihia ; ’ua ’ite au ē, tē here nei ’oia i te Fatu ’e ’ua fafau iāna, mai iā’u ato’a nei. ’Ua riro Lynette ’ei hoa rahi nō’u. O ’oia tō’u hoa mure ’ore faufa’a rahi.

[Te tuahine Cook]

E māuruuru rahi tō’u nō tō’u hoa mure ’ore. E ta’ata maita’i ’oia ’e te fa’a’oroma’i rahi. ’E e ’ārearea ’āmui ato’a māua E māuruuru rahi tō’u nō te ha’amaita’ira’a o te orara’a i pīha’i iho iāna ’e te haere-’āmui-ra’a i mua.

Tē hina’aro nei māua e fa’arahi i tō ’outou fa’aro’o, ’ia nehenehe ia tātou pā’āto’a ’ia haere i mua ē tae atu i te fa’aipoipora’a mure ’ore, noa atu tō tātou huru orara’a ’e tō tātou parau-ti’a ’ore. Tē hina’aro nei māua e paraparau atu ia ’outou nō ni’a e piti nā ta’ata fa’aipoipo, ’o tē rave nei i te reira. ’Ua tā’atihia teie mau ta’ata i roto i te hiero. ’Ua fafau rātou i te mau fafaura’a te tahi ’e te tahi ’e i te Atua ’ia ha’apa’o i tāna mau fa’auera’a ’e tia fa’a’ohipa i te mau parau tumu o te ’evanelia i roto i tō rātou fa’aipoipora’a. ’Ua fafau rātou ’ia fa’arahi i tō rātou here ’e te tāhō’ē nō te tahi ’e te tahi ’e i te Atua.

’Ia fa’a’ite atu vau i teie mau ’ā’amu, ’a ha’apa’o maita’i i te tauto’ora’a tā rātou i rave nō te fa’ahotu i te huru Mesia, o te riro ’ei ’ōfa’i patu nō te hō’ē fa’aipoipora’a mure ’ore.

Dawie ’e ’o Elisa

’Ua fārerei māua ia Dawie ’e ’ia Elisa¹¹ te tahi tau matahiti i ma’iri a’e nei i ’Āfirita. ’Ua riro rāua ’ei hi’ora’a nō te oa’oa e tupu i roto i te hō’ē autā’atira’a mai te mea ē, ’ua tāhō’ēhia te hō’ē tāne ’e te hō’ē vahine

I roto i te hō’ē purera’a nō te ha’apūai i te mau ’utuāfare, ’ua ui o Elder Cook i te pupu e aha tā rātou i rave nō te ha’apūai i tō rātou fa’aipoipora’a. ’Ua fa’a’ite ’o Dawie i te hō’ē ’itera’a tei tupu i ni’a iāna ’e tāna vahine. ’Ua tāma’a rāua i te po’ipo’i sābati. Ē nō te ātea tō rāua fa’aeara’a i te fare purera’a, ’ua haere noa rāua nā raro e piti hora ē tae atu i te fare purera’a, e toru hora purera’a, ’e ’ua ho’i fa’ahou i te fare e piti hora te maoro. ’Ua rohirohi ’e ’ua po’ia rāua, ’aita rā tā rāua e mā’a. I te pae hope’a, ’ua haere rāua e ta’oto ma te po’ia.

I te maorora’a pō, ’ua ara mai rāua to’opiti, ma te ’oro’oro noa te ’ōpū. ’Ua pe’ape’a roa ’o Dawie ’aita ’oia i fa’anaho i te mā’a nā Elisa. ’Ua pe’ape’a ’oia ’ia feruri ē, e aha tōna mana’o nō ni’a iāna. ’Aita ’o Elisa i ’ino’ino ’aore rā, i riri, ’ua fa’ao’o’o rā ’oia iāna nō te māniania o te ’ōpū. ’Ua ’ata’ata rāua to’opiti ’e ’ua ta’oto fa’ahou.

I roto i te purera’a, ’ua fa’a’ite ’o Dawie i te māuruuru nō te maita’i o Elisa, tāna pāturu, ’e tōna parau-ti’a. ’Ua parau ’oia, « ’ua nehenehe ia Elisa ’ia fa’aru’e mai iā’u. E hōpoi’a nā’u ’ia pāturu iāna. Terā rā, hō’ē ā tō māua huru ».

I te anira’ahia Elisa ’ia fa’a’ite i tōna mau mana’o nō ni’a i tāua ’ohipa i tupu ra, ’ua parau ’oia, « ’o ’oia tō’u hoa maita’i roa a’e. E ’ohipa rahi tāna i rave nō’u. ’Ia tupu ana’e tō’u fifi ’e te ta’ata i te ravera’a ’ohipa, e hōro’a mai ’oia i te mana’o ’e e tauturu mai ’oia iā’u ’ia maita’i a’e ».

E mea pāpū maita’i ē, ’ua ’ohipa ’āmui ’o Dawie ’e ’o Elisa i roto i te mau tītaura’a o te orara’a. I te reo o Dawie, « hō’ē ā » tō rāua huru. Te ’erera’a i te mā’a, e ’ere te reira i te fifi nō te tahi ’aore rā, nō te tahi, nō « rāua » rā. ’Aita rāua i fa’ariro i te ’erera’a i te mā’a ’ei fifi rahi nō te fa’aipoipora’a, ’ei fifi rā nō te tahi noa taime, o tā rāua e tātara ’āmui. ’Ua fa’a’ohipa rāua i te huru ’ārearea nō te tāmarū i te fifi. ’Ua fa’a’ite rāua i te fa’aro’o nā roto i te haerera’a e ta’oto, ma te feruri ē, e nehenehe rāua e tātara i te reira fifi ia po’ipo’i a’e.

’Aita ’o Dawie ’e ’o Elisa i fafau noa i te tahi ’e te tahi, ’ua fafau ato’a rā rāua i te Atua. ’Ua ti’aturi rāua ē, mai te mea e ha’apa’o rāua i tāna mau fa’auera’a, e tauturu mai ’oia ia rāua ’ia tātara i tā rāua mau tītaura’a. ’E tē ’oa’oa ’āmui nei rāua i te tere o te orara’a nei ’ei tāne ’e ’ei vahine fa’aipoipo. ’Aita rāua e vaiiho nei i te mau fifi o te orara’a ’ia fa’ata’a ’ē ia rāua te tahi i te tahi i te tino, i te mana’o ’aore rā, i te vārua.¹²

’Aita i maoro a’e nei ’ua fa’a’ite mai ’o Dawie ’e ’o Elisa ia māua ē, tē ha’amaita’i nei te Fatu ia rāua. I teienei e mea rahi tā rāua mā’a ’eiaha nā rāua ana’e, e nava’i ato’a rā nō te hōro’a nā te feiā nava’i ’ore.¹³ Tē haere ’āmui nei rāua i mua.

Tē ha’api’i nei te peresideni Nelson nāhea e nehenehe ai ia tātou ’ia haere i mua ’ei feiā fa’aipoipo.¹⁴

Nate ’e ’o Lexi (fa’aro’o ia Iesu Mesia ’e i tōna tāra’ehara)

E parau atu vau ia ’outou nō ni’a ia Nate ’e ’o Lexi.¹⁵ ’Ua riro rāua ’ei hi’ora’a fa’auru nō te mana o te tae mai i roto i te fa’aipoipora’a ’ia fa’a’ite ana’e te tāne ’e te vahine i te fa’aro’o ia Iesu Mesia ’e i tōna tāra’ehara.

’Ua fa’aipoipo ’o Nate ’e ’o Lexi ’e ’ua hina’aro roa rāua i te hō’ē ’aiū. I muri a’e e rave rahi ’āva’e i te tīa’ira’a, ’ua hapū. ’Ua fa’a’ite rāua i te parau ’āpī ma te ’oa’oa rahi. Te vāhi pe’ape’a rā, tau taime i muri mai, ’ua marua te tamari’i a Lexi. ’Ua ’oto roa rāua.

I muri a’e e rave rahi ’āva’e, ’ua hapū fa’ahou o Lexi. ’Ua tupu maita’i te hapūra’a i te reira taime. Nā mua ri’i noa a’e e fānauhia mai ai te ’aiū, ’ua haere māua o Lexi i te hō’ē fa’a’oa’oara’a. Pauroa te ta’ata, tae noa atu ia Lexi, tei ’oa’oa i te mea ē, fātata roa tō rāua ’aiū i te tae mai.

’Aita rā i maoro i muri iho, ’ua ’oto roa māua i te fa’aro’ora’a ē, ’ua pohe tā rāua ’aiū. ’Ua fānau mai ’o Lexi i te hō’ē tamāhine pohe i roto i te hō’ē piha fānaura’a tei ’ī roa i te mau mama ’e te mau ’aiū. E parau ’ati mau te reira. ’Ua haere atu māua Elder Cook e fārerei ia Nate ’e ’o Lexi i tō rāua fare. ’Ua mana’o māua ē, e ’ite māua ia rāua i roto i te ’oto rahi.

’A tomo atu ai māua i ō rāua, ’ua ’ite māua i te hō’ē vārua hau. ’Ua fāri’i mai o Nate ’e o Lexi ia māua ma te māhanahana. ’Ua pārahi rāua i ni’a i te tofa te tahi i pīha’i iho i te tahi ma te tāpe’a i te tahi ’e te tahi ’a fa’a’ite mai ai ia māua i te tahi mau parau nō ni’a i te ’erera’a rāua i tā rāua tamāhine. ’Ua fa’a’ite mai rāua i te maita’i here o te Fatu i te ha’amāmāra’a i tā rāua hōpoi’a. ’Ua fa’a’ite mai rāua i te māuruuru nō tā rāua ’aiū iti nehenehe, tā rāua i topa i te i’oa, ’o Hope (Ti’aturi). ’Ua mauruuru o Lexi nō te taime tāna i amo ia Hope ’e i te fānaura’a.

’Ua fa’ateitei te fa’aro’o o Nate ’e o Lexi ia māua. ’Ua tāmāhanahanahia māua nā teie nā ta’ata fa’aipoipo ’āpī. ’Ua parau atu vau ia rāua ē, ’ua mana’o vau ē, e temeio te huru o tō rāua āraira’a i teie fifi. ’Ua pāhono mai rāua to’opiti ma te fa’a’ite mai i tō rāua ’itera’a pāpū nō ni’a i te mana fa’ateitei ’e te ha’apūai o Iesu Mesia ’e tōna tāra’ehara. E mea teimaha tā rāua hōpoi’a, terā rā ’ua tauturu Iesu Mesia ia rāua ’ia amo i te reira. ’Ua ha’apa’o te Fatu ia rāua ma te here, ’e ’ua ha’apa’o ato’a ’o Nate ’e ’o Lexi i te tahi e te tahi ma te here. ’Ua tāhō’ēhia rāua ’e te Atua ’e i te tahi ’e te tahi.

Nā roto i te tauturu a te Fatu, e nehenehe te mau tāmatara’a e tāhō’ē ia tātou. ’Ua parau o Elder D. Todd Christofferson, « ’ia ’ore ana’e te Atua, e fa’ahotu mai te mau ’itera’a rumaruma i te ’oto, te mana’o paruparu ’e te pe’ape’a rahi. Mai te mea ē, tē vai ra te Atua, e mono te tāmāhanahana i te māuiui, e mono te hau i te ʼāhuehue, ʼe e mono te tiʼaturi i te ʼoto ».¹⁶

Tē ti’aturi nei māua ē, e tauturu te ’ā’amu o teie mau ta’ata fa’aipoipo ’ia ha’apūai i tō ’outou fa’aro’o i roto i te fa’aipoipora’a. E mea fifi te orara’a, e nehenehe rā tātou pā’āto’a e haere i mua e tae atu ai i te fa’aipoipora’a mure ’ore mai te mea ē, e fa’a’ohipa tātou i te mau parau tumu o te ’evanelia.

[Elder Cook]

Ta’a ’ē atu te feiā fa’aipoipo tā māua i fa’a’ite atu, e rave rahi atu, i te mau vāhi ato’a o te ao nei, ’o tē pōpou nei i te fa’aipoipora’a ’oa’oa ’e ’o te tupu i te rahi. Tē fārerei nei mātou i teie mau feiā fa’aipoipo i te mau vāhi ato’a tā mātou i haere. E mau ta’ata nō te mau huru matahiti ato’a ’e te mau huru orara’a ato’a. Tē ani atu nei māua ia ’outou ’ia ’imi i te tahi mau ta’ata fa’aipoipo tā ’outou i mātau maita’i. ’A hi’o maita’i ia rātou, ’a paraparau ia rātou, ’a ui ia rātou i te mau uira’a. E’ita rātou i te mea maita’i hope roa, e nehenehe rā tā ’outou e ’apo mai nā roto mai ia rātou. E nehenehe rātou e tauturu i te ha’apūai i tō ’outou fa’aro’o i roto i te nātura mure ’ore o te fa’aipoipora’a, ’e e fa’auru ho’i ia ’outou ’ia fa’ahotu i te huru Mesia ’o te ha’amaita’i ia ’outou ’e i tō ’outou hoa a muri noa atu !

Te mau fifi

Nō te mea te ora nei tātou i roto i te hō’ē ao hi’a, e fārerei tātou i te mau fifi—i roto ato’a i tō tātou mau autā’atira’a. E fa’a’ite atu vau i te tahi mau fifi tā ’outou e nehenehe e fārerei ’a tūtava ai ’outou ’ia haere i mua i roto i te fa’aipoipora’a mure ’ore.

Te mau tītaura’a tano

Hō’ē fifi mātarohia i roto i te fa’aipoipora’a o te fa’atupura’a ïa i te mau tīa’ira’a ti’a ’ore nō ni’a i te ta’ata tā ’outou e fa’aipoipo. ’Eiaha tā tātou mau tīa’ira’a ’ia teitei roa ’e ’aore rā, ’ia ha’eha’a roa. Mai te mea ē, e paraparau pāpū tātou i te Metua i te ao ra ma te ’ā’au tae, nā roto i te pure ’ā’au tae mau, ’e te mana’o pāpū, e arata’i ’oia ia tātou.

Te māuruuru iāna iho

Pinepine te māuruuru iāna iho i te riro ’ei fifi nō te fa’aipoipora’a mure ’ore. E mea ’ōhie ia ta’oto i roto i te pārurura’a tino ma te ora i te hō’ē orara’a ta’ata hō’ē, ma te hōpoi’a iti roa. E riro paha tātou i te au maita’i i roto i tō tātou orara’a ma te mana’o ē, ’aita e rūra’a nō te tupu i te rahi. ’Aita te reira mana’o i tū’ati i te fa’anahora’a a tō tātou Metua i te ao ra. Te fā tā’āto’a o teie orara’a tāhuti nei ’o te rirora’a ïa mai iāna te huru. E’ita tātou e riro mai te mea ē, ’aita tātou e hina’aro e fa’atoro, e taui, ’e e haere i mua. Mai te mea ē, tei roto ’outou i te huru māuruuru ia ’outou iho, ’a pure ’e ’a fa’a’ohipa i te fa’aro’o nō te fa’aora mai ia ’outou ’e ’ia haere i mua ē tae atu ai i te fa’aipoipora’a mure ’ore. E nehenehe te Metua i te ao ra e tauturu ia ’outou ’ia ’ite e aha te nehenehe ia ’outou ’ia rave i roto i tō ’outou huru nō te haere i mua, ’e e ha’amaita’i ’oia ia ’outou.

Te mau rāve’a ’aravihi ’e te ha’apararera’a sōtiare

I te hōpe’ara’a, hō’ē o te mau ’ati ’e te mau fifi rahi o tō tātou nei tau, ’o te fa’a’ohipara’a tano ’ore ïa ’e ’aore rā, te fa’a’ohipa-’ū’ana-ra’a i te mau rāve’a ’aravihi ’e te ha’apararera’a sōtiare. Tē ha’apēpē nei te reira i te ta’ata ’e tē ha’afifi nei i te mau aura’a i roto i te ha’amātaura’a ’e i roto i te fa’aipoipora’a. Mai te mea ē, e rahi a’e tō ’outou taime i ni’a i te itenati nō te pine, nō te pāpa’i i te rata, nō te ha’apūroro, nō te pupuhi, nō te here, nō te ha’uti, nō te upo’oti’a, nō te pau, nō te tweet, nō te pata i te hōho’a, i te taime i mua i te hō’ē ta’ata mau nō te paraparau, nō te ata, nō te fa’a’ite, nō te tauturu, nō te haere, nō te ani, nō te ha’api’i, nō te ’atu’atu ’e nō te hōro’a, penei a’e te tāpe’a nei te mau rāve’a ’aravihi ’e te ha’apararera’a sōtiare ia ’outou ’ia haere i mua e tae atu ai i te ’oa’oa mau o te hō’ē fa’aipoipora’a mure ’ore. E ’ere te fārereira’a itenati i te hō’ē rāve’a tano nō te mono i te fārereira’a ta’ata—te fārereira’a i te ta’ata mau i te taime mau.

’Ua ha’apāpū te peresideni Nelson i te faufa’a nō te tūpohera’a i te niuniu ’āfa’ifa’i ’e te tu’ura’a i te reira i te hiti. ’Ua parau ’oia ē, « e mea faufa’a roa te taime ’āmuira’a maita’i ! E hina’aro te mau ta’ata fa’aipoipo i te taime ’āmuira’a nō te fa’a’amu i tō rātou autā’atira’a. E ti’a ia rātou ’ia ha’api’i i te fa’aro’o, ’e ’ia fa’aro’o nō te ’apo mai nā roto mai i te tahi ’e te tahi. Tītauhia ’ia fa’anaho i tāua taime ra nā mua roa. Mai te mea e mea faufa’a rahi te fa’aipoipora’a ’oa’oa, e taime faufa’a ato’a ïa te au i te reira ».¹⁷ Tā tātou mau peu nō te mau rāve’a ’aravihi i te mau matahiti ’a vai ’ōtahi ai tātou, ’ua ta’ita’ihia mai ïa i roto i tō tātou fa’aipoipora’a.

E nehenehe ’outou e nā reira !

E te mau taea’e ’e te mau tuahine, nā roto i te tauturu a te Atua, e upo’oti’a ’outou i roto i te mau huru fifi ato’a tā ’outou e fa’aruru. Noa atu te vāhi i ni’a i te ’ē’a nō te fafaura’a tei reira ’outou, ’o te arata’i atu i te fa’aipoipora’a mure ’ore, e nehenehe te Fatu e tauturu ia ’outou ’ia haere i mua ’ia ti’a ia ’outou ’ia haere ’āmui nā ni’a i te ’ē’a—’e te hō’ē ta’ata tā ’outou e here nei. E ta’ata ’ōtahi ānei ’outou ma te tīa’ira’a ’ore, tei roto ānei i te fa’aipoipora’a fifi, ’ua ta’a ānei ’e tei ia ’outou te mau tamari’i, tē ha’a nei nō te upo’oti’a i te hō’ē fifi fa’atiti, tē fifi ra ānei i te pae nō te ea, ’e ’aore rā, ’ua paruparu ānei te mana’o, e nehenehe te rā’au fa’aora a te Fatu e tātā’i, ’e e ha’apūai ia ’outou. Mai te mea ē, e fāriu atu ’outou i ni’a iāna nā roto i te fa’aro’o, e tātarahapa i tā ’outou mau hara, ’e e fa’a’ohipa i tōna mana nō te tauturu ia ’outou ’ia haere i mua, e tupu te mau temeio.

Nā te mau hi’ora’a i roto i te buka a Moromona e fa’arahi i tō tātou fa’aro’o. E mea au nā’u te taime ’a fa’auehia ai Nephi ’ia hāmani i te hō’ē pahī. ’Aore ā ’oia i hāmani a’e nei i te hō’ē pahī, ’e tei roto ’oia i te medebara. E nehenehe tātou e fa’aau i terā huru tōna ’e o tātou ’e tā tātou ’ohipa ha’amaura’a i te hō’ē fa’aipoipora’a mure ’ore i roto i teie ao, i te tahi taime mai te huru ra ’o te hō’ē medebara.

’Ua parau o Nephi nō ni’a i tāua ’ohipa ra, « e mai te mea e ha’apa’o te tamari’i a te ta’ata nei i te mau fa’aue a te Atua, e tauturu mai ïa ’oia ia rātou, e fa’aitoito ia rātou, ’e e fa’atupu ho’i ’oia i te rāve’a e ti’a ai ia rātou ’ia rave i te mea tāna i fa’aue mai ia rātou ».¹⁸

’Ua fa’a’ite Nephi i te fa’aro’o, ’ua rave ma te itoito, ’e ’ua tauturu te Fatu iāna ’ia hāmani i te hō’ē pahī—e pahī tei ’āfa’i iāna ’e tāna vahine ’e te ’utuāfare nā ni’a i te moana ē tae atu i te fenua i parauhia ra.¹⁹

Mai te mea ē, e nehenhe tā Nephi e hāmani i te hō’ē pahī ma te tauturu a te Fatu, e mea pāpū ē, e nehenehe tā tātou e hāmani i te hō’ē fa’aipoipora’a mure ’ore nā roto i tāna tauturu. Penei a’e e mea huru pa’ari a’e ’ia hāmani i te hō’ē fa’aipoipora’a i te hāmani i te hō’ē pahī, terā rā, e nehenehe ! E ’ere ānei, e te tuahine Cook ?

O vai tā ’outou e fa’aipoipo ?

Nō reira, ’outou e te feiā ’āpī ’ōtahi, o vai tā ’outou e fa’aipoipo ? Pāpū roa ē, e’ita e pau te a’o nō te fa’ata’a i te ta’ata tano. I tō’u taure’are’ara’a, teie te a’o a tō’u metua tāne, « tamaiti, ’a fa’aipoipo nō te moni, e tae mai ihoā te here ». Teie te a’o a tō’u metua vahine, « ’a fa’aipoipo nō te here, e tae mai ihoā te moni ». I muri a’e, ’ua ha’api’i mai tō’u peresideni misiōni²⁰ iā’u ē, « ’a fa’aipoipo nō te tau mure ’ore ».

fa’aipoipora’a nō te tau e ’a muri noa atu

Te fa’aipoipora’a mure ’ore o te hō’ē ïa ’āpitira’a ’e te Atua, ’e e mea tītauhia ia tātou ’ia ’imi i tāna parau a’o nō te ’ite ē, o vai te fa’aipoipo. ’Eiaha tātou e mā’iti i tō tātou hoa nō te moni ’aore rā, nō te mau faufa’a, ’eiaha ato’a nō te here noa. E ’imi tātou i te hō’ē fa’aipoipora’a mure ’ore.

’Ua māuruuru vau i te mau ha’api’ira’a a tō’u peresideni misiōni. ’Ua māuruuru ato’a vau nō te parau a’o tāna i hōro’a mai iā’u ’a fa’aineine ai au e ho’i i te fare. ’Ua parau mai ’oia ē, ’ia tāmau noa vau i te haere i mua i roto i tā’u mau fā mure ’ore. ’Ua parau mai ’oia ’ia fa’aineine au i tō’u fa’aipoipora’a ’e ’eiaha e tīa’i ’ia fā mai te hō’ē rāve’a.

Te mau ta’ata mātau

Noa atu te mau mana’o maita’i roa, e ’ere i te mea ’ōhie ’ia ’imi i tō ’outou hoa mure ’ore. Pinepine e tītauhia te ’ohipara’a ’āmui. I roto i te matahiti mātāmua ’a ho’i mai ai au i te fare, ’ua fārerei au i te mau tamāhine i te fare ha’api’ira’a, i te institut, i te ’ohipa, ’e i te fare purera’a. ’Ua arapae au i te tahi hō’ē taime, te tahi e piti taime, ’aita rā hō’ē o tā’u mau arapaera’a i hau atu i te mana’o hoa noa. ’Ua hina’aro vau i te tauturu, nō reira ’ua fārerei au i te hō’ē hoa misiōnare tahito pāpū, o Mark Allred, tē ora ra i te tahi atu pae o te ’oire. ’Ua ani au iāna i te hō’ē i’oa o te hō’ē ta’ata mātau—hō’ē ta’ata e nehenehe tā’u e arapae.

’Ua ’ite o Mark iā’u, ’e ’ua mā’iti ’oia i te mau feiā ’āpī tamahine tāna i mātau. I muri a’e, ’ua hōro’a mai ’oia i te i’oa o Lynette Hansen. ’Ua mana’o ’oia ē, e tano maita’i māua ’e e ’oa’oa māua ’ia fārerei i te tahi ’e te tahi, nō reira, ’ua fārerei au iāna. ’Ua tano roa o Mark ! Mai te au i te auro, ’aore rā, tē fātata ra i te huri ’ei taiamoni, teie ta’ata mātau. ’Ua fa’auruhia ’oia.

Nō ’outou e feiā ’ōtahi, ’ua ’ite au ē tē vai ra e rave rahi rāve’a e nehenehe ’outou e ’imi i tō ’outou hoa mure ’ore, terā rā, tē vai ra te tahi mau rāve’a e mea maita’i roa a’e i te tahi atu. ’A ’imi i tō ’outou hoa i te mau vāhi e mea pāpū i te ’itehia ia ’outou tō ’outou hoa mure ’ore. Hoa mure ’ore—e’ita tā’u e nehenehe ’eiaha e ha’apāpū i teie.

’A feruri i te ani i te i’oa i te hō’ē ta’ata mātau ’e te ti’aturihia. Tē vai ra ānei tō ’outou hō’ē hoa misiōnare tahito, hō’ē hoa ha’api’ira’a pāpū, ’aore rā, hō’ē hoa maita’i nō te hō’ē pāroita tahito ? Hō’ē ta’ata tei ’ite ia ’outou ? ’A ani iāna i te i’oa o te hō’ē ta’ata mātau ?

Mai te mea e fāri’i ’outou i te i’oa o te hō’ē ta’ata mātau, ’a fa’a’ohipa i te fa’aro’o, ’a fārerei i te reira ta’ata, ’e ’a tāmata. E mea pāpū ē, tē vai ra te tahi mau i’oa ta’ata mātau ’aita e haere, terā rā tē vai ato’a ra te mau ta’ata mātau o te taui i te orara’a. Tē ti’aturi nei au ē, mai te mea e fa’a’ohipa tātou i te fa’aro’o, ’ia ti’aturi, ’e ’ia ’āpiti mai i te Metua i te ao ra, e tupu te mau ’ohipa maita’i.

Te haere-’āmui-ra’a i mua

I te ha’amatara’a māua o Lynette i te ha’amātau, ’ua ’oa’oa roa māua i te tahi ’e te tahi. E fārerei pinepine māua, e ’ua tupu i te rahi tō māua auhoara’a i te mau mahana ato’a. E mea ta’a ’ē māua te tahi i te tahi i roto i te tahi mau mea, terā rā, ’ua tū’ati tō māua huru i roto i te mau mea faufa’a. I te hope’a, ’ua tae i te taime ’ua feruri māua ē, e ti’a ia māua ’ia rave i te hō’ē fa’aotira’a. E fa’aipoipo ānei māua ’e ’a haere ’āmui ai i mua ? ’Aore rā, e rave ānei i te tahi atu fa’anahora’a ?

’Ua hi’opo’a māua i te mau mea nō te fa’aipoipora’a. I hea māua e ora ai ? Nāhea māua i te ora i te pae moni i te ātea ’ē i tō māua mau metua ? ’Ua tano ānei te taime ? ’Ua pure ’āmui māua nō ni’a i te tā’āto’ara’a o tō māua mau mana’o. ’Ua mana’o māua to’opiti ato’a ē, e ’oa’oa te Metua i te ao ra mai te mea ē, e fa’aipoipo māua. ’Ua mana’o māua ē, e tauturu mai ’oia ia māua ’ia upo’oti’a i ni’a i te mau fifi tā māua e fārerei.

’Ua tupu te rahira’a o teie mau mea i roto i te hō’ē pu’e tau ha’api’ira’a. E pīahi maita’i o Lynette ’e ’ua haere pinepine ’oia i te piha vaira’a buka nō te tuatāpapa. ’Ua haere ato’a vau i te piha vaira’a buka—nō te hi’o iāna. ’Ua mara’a tā’u mau nota ha’api’ira’a ’e ’ua topa tō Lynette i raro. E parau mau ! Terā rā ’ua tū’ati tō māua mana’o ē, e pu’e tau ha’api’ira’a maita’i roa a’e teie nō māua. Nō te aha te reira ? Ta’a ’ē atu te ’oa’oa tā māua i fāri’i ’ia ’āmui ana’e māua, ’ua haere ato’a māua i mua i roto i te hō’ē ā ’ōpuara’a. ’Ua tū’ati māua te tahi i te tahi ’e i te Atua, ’e e mea maita’i roa te reira. ’Ua tupu tō māua fa’aro’o i te rahi. ’Ua ’ite a’era māua ē, nā roto i te tauturu a te Fatu, e nehenehe māua e upo’oti’a i ni’a i te mau mea ato’a. ’Ua ’ī roa māua i te ’oa’oa.

’Ua tā’atihia māua i roto i te hiero nō Ogden Utah. Fātata e 40 matahiti i teienei. ’Ua ’itehia ia māua ē, e hōro’a mai te fa’aipoipora’a i te mau rāve’a rahi a’e nō te ’oa’oa i tā te tahi atu mau autā’atira’a ta’ata e hōro’a mai.²¹ Nō te mea ’o te fa’anahora’a te reira a te Fatu.

Elder ’e te tuahine Cook i tō rāua mahana fa’aipoipora’a

E rave rahi mau mea tā tātou i paraparau i teie pō. Tē ti’aturi nei māua ē, e ma’iri mai te ha’api’ira’a tumu tā māua i fa’a’ite atu, i ni’a i tō ’outou ’ā’au ’e e tauturu ia ’outou ’ia haere i mua nā ni’a i te ’ē’a nō te fafaura’a e tae atu ai i te fa’aipoipora’a mure ’ore. Tē ti’aturi nei māua ē, te mau hi’ora’a tā māua i fa’a’ite atu nō te mau fa’aipoipora’a ’oa’oa, e fa’arahi te reira i tō ’outou fa’aro’o ’e ’ua muhumuhu mai te Vārua ia ’outou i te hō’ē mea tā ’outou e nehenehe e rave nō te haere i mua. Penei a’e nō te tahi pae o ’outou, ’ua muhumuhu mai te Vārua ē, o vai tā ’outou e ’āpiti nō te haere i mua !

Nō ’outou ’o tē rave nei i tei tītauhia ia ’outou nō te fāna’o i te fa’aipoipora’a mure ’ore terā rā, mai te huru ra ē, ’aore hō’ē mea i ’itehia atura—e ta’ata ’ōtahi ānei ’outou ’aore rā, tei roto i te fa’aipoipora’a ma te haere marū noa i mua—tē pure nei māua ’ia ha’amaita’ihia ’outou ’ia ti’aturi tāmau noa, ’e ’ia rave ma te pūai maita’i roa, ’ia rave i te ’ohipa a te Fatu, ’e ’ia ora ma te ’oa’oa. ’Ua parau te peresideni Nelson ē, « ’ua ’ite tātou ē, e ha’avā te Fatu ia tātou tāta’itahi mai te au i te mau hina’aro o tō tātou ’ā’au, ’e tā tātou mau ’ohipa, ’e e hōro’ahia te ha’amaita’ira’a o te fa’ateiteira’a i te mau ta’ata ti’amā ato’a ».²² ’A ha’apa’o māite ’e ’a haere i mua. E fāri’i ’outou i te mau ha’amaita’ira’a ato’a i te taime a te Fatu. ’Ua ’ite au e parau mau te reira.

E te mau taea’e ’e te mau tuahine, tā tātou rāve’a rahi, o te haere-tāmau-ra’a ïa i mua—nō te fa’atupu ’e nō te ha’apūai i te mau fa’aipoipora’a mure ’ore ’e te mau ’utuāfare mure ’ore nā roto i te tauturu a te Fatu. Tē fa’a’ite pāpū nei au ē, ’o Iesu Mesia tō tātou Fa’aora ’e tō tātou tāra’ehara. Nā roto iāna, e nehenehe tātou e ha’apūaihia nō te rave i te mau mea ato’a tā te Metua i te ao ra e ani mai nei ia tātou ’ia rave. Tē vaiiho atu nei au i teie ’itera’a pāpū i roto ia ’outou, nā roto i te i’oa o Iesu Mesia ra, ’āmene.