Ang Ginoo Motabang Kanato sa Pagtukod sa Iyang Gingharian
Tibuok Kalibutan nga Debosyonal alang sa mga Young Adult
Enero 12, 2020
Salamat sa choir niadtong maanindot nga musika. Paborito kato namo. Salamat sa nindot kaayo nga pagkanta. Minahal kong mga kaigsoonan, nalipay kaayo kong makapamulong ninyo karong gabhiona. Daghan kog gipamalandong bag-o lang bahin sa mga butang nga nakapalig-on sa akong pagtuo sa tibuok nakong kinabuhi. Usa ka butang nga akong nahibaloan mao nga ang atong Amahan sa Langit motabang gyud nato, ilabi na kon maningkamot kita nga buhaton ang tanan kutob sa atong mahimo sa pagtuman sa Iyang mga sugo ug sa pagtukod sa Iyang gingharian dinhi sa yuta.
Si propeta Nephi mipakita niining pagtuo sa tibuok niyang kinabuhi. Bisan kon nag-antus siya og daghang kalisdanan ug pagsupak, kanunay siyang nagpabilin nga makanunayon ug kanunay nga nagpasalamat sa Dios alang sa Iyang mga panalangin. Iya kining gisulti human sa walo ka tuig nga paglatagaw sa usa ka mamingaw nga desyerto:
“Kon … ang mga katawhan maghupot sa mga sugo sa Dios siya moamuma kanila, ug molig-on kanila, ug mohatag og mga paagi diin sila makatuman sa butang diin siya misugo kanila; busa, siya mihatag og mga paagi alang kanamo samtang kami nagpuyo diha sa kamingawan.”1
Nasayud ko nga kining baruganan tinuod. Gusto kong mopaambit og usa ka istorya gikan sa kasaysayan sa Simbahan. Sa hinapus sa mga 1830 kadaghanan sa mga miyembro sa Simbahan nagpundok sa estado sa Missouri, diin naglaum sila nga moestablisar sa Zion. Apan sa 1839 ang mga manggugubot nga panon mipugos kanila sa pagbiya sa estado. Sa pagkaguba sa ilang mga balay ug ang ilang binuhing mga hayop ug mga butang gikawat, mibiyahe sila sa Illinois, diin mipuyo sila sa lamakan diha sa kilid sa Suba sa Mississippi. Ilang gipahubsan ang lamak ug miestablisar og nindot nga dapit nga gitawag nila og Nauvoo. Apan nagpadayon ang negatibong sentimento batok sa Simbahan, ug si Propeta Joseph Smith gimartir uban sa iyang igsoong si Hyrum lima pa lang ka tuig human niana. Mao pa gani pagkahuman sa ilang templo, napugos na usab sila pagpahawa niadtong Pebrero sa 1846, mibiya tabok sa Suba sa Mississippi sa tunga-tunga sa tingtugnaw. Apil nila mao ang usa ka tawo nga ginganlan og Benjamin F. Johnson, ang papa sa akong lolo sa tuhod, uban sa iyang pamilya nga dunay gagmayng mga anak. Gihulagway niya kadto nga panahon sa iyang autobiography:
“Karon ania kami, nagsugod sa tunga-tunga sa tingtugnaw nga walay kwarta, sa usa ka biyahe nga wala kahibalo sa gitas-on o gidugayon sa among biyahe … nga dala lamang ang mga probisyon nga igo rang makasustiner namo og pipila ka semana ang labing dugay, ug dunay dili maayong panglawas nga sa miaging tuig o sobra pa lisud gayud kaayo. Kasagaran nag-antus ko og hilabihan, grabe kasakit sa akong tiyan, nga usahay makapahimo sa singot nga magsugod gikan sa matag lungag sa panit. … Kini uban sa laing mga problema sa tiyan maoy nakapahimo nakong dili angayan alang sa maong makapaluya nga mga trabaho. Ang mga katungdanan lang gani sa pag-atiman sa mga kahayupan ug ubang mga katungdanan sa kampo lisud gayud alang nako. …
“Human sa pipila ka adlaw sa kampo, nagsugod na ang uban sa pagreklamo sa kalisud ug dili maayong pagkaon, apan si Presidente Brigham Young miistorya kanila nga sama sa ngulob sa usa ka leon, ug giingnan sila nga ang tanang dili makahimo magsugod na sa paglata og mga beans ug mais, kinahanglang mosalig sa Dios ug magmapasalamaton sa unsay ilang nakuha, o kinahanglan dayon silang mobalik, kay ang kampo sa mga Santos mahimong usa ka dili maayong dapit alang kanila. Gikonsiderar nako kini isip pulong sa Ginoo, apan unsa may angay nakong buhaton? Sulod sa taas nga panahon, wala ko makakaon og cornbread o beans, kay nakahatag kini niadtong dili maantus nga mga sakit sa tiyan. Unsaon man nako pagpadayon sa biyahe, nga kasagaran sa among pagkaon mais ug beans man? Gibati nako nga usa kini ka hilisgutan bahin sa kinabuhi o kamatayon ngari nako.”
Hunongon una nako ang istorya dinhi aron moingon nga dili kaayo daghang katuigan ang milabay, ang iyang 22 anyos nga igsoong babaye namatay sa susamang mga problema sa tiyan, mao nga tingali wala siya magtumo-tumo sa iyang mga kahadlok. Mipadayon siya sa pag-ingon:
“Akong gihisgutan ang maong butang ngadto sa akong pamilya. Ako silang giingnan nga atua ko didto aron mosalig sa Ginoo, ug kon Siya wala mag-uban namo, siguradong Siya wala sa likod namo, ug kinahanglang dili ko mobalik. Andam kong mokaon sa maong pagkaon kon unsay anaa namo ug magmapasalamaton alang niini. Ug kon wala kami atimana sa Ginoo karon, kon mas sayo kaming tanan nga mangamatay, mas maayo, kay dili kami makahimo sa pag-atiman sa among kaugalingon o sa pagpanalipod sa among kinabuhi niini nga biyahe.”
Usa ka bulan human niana iya kining gi-report sa iyang journal:
“Ang beans ug mais nga dili nako makaon kaniadto, matagamtam na nako, ug sukad nianang panahona ang epekto kaniadto wala na mobalik nako atol sa biyahe. Gisultihan nako ang Ginoo kon unsay giingon sa Iyang sulugoon, nga pinaagi sa Iyang tabang matuman nako ang tanang gikinahanglan, ug kon Iyang pagbuot nga mabuhi ko isip Iyang sulugoon, kinahanglan gayud Niyang himoon nga maagwanta sa akong tiyan ang pagkaon, nga ako nasayud nga Iyang gibuhat.”
Ang hugot nga pagtuo sa akong mga katigulangan ug ang ehemplo sa mga propeta nakapalig-on nako sa akong pagpakabuhi ug nakatabang nako nga mosalig sa Ginoo, bisan sa lisud nga mga panahon. Nahinumduman nako sa sayong bahin sa among kaminyoon sa dihang lisud kaayo ang among panalapi. Duna mi duha ka gagmayng anak atol sa tulo ka tuig nga si Elder Christofferson anaa sa graduate school. Nakadesisyon mi nga human mi nagsugod og pamilya dili ko motrabaho gawas sa panimalay, mao nga naningkamot ko kutob sa akong mahimo diha sa panimalay nga makakwarta og gamay aron makatabang sa pagsuporta namo. Ang akong bana dunay pipila ka part-time job ug trabaho sa summer, nga nakasangkap sa dakong bahin sa among kinitaan. Apan, apiki gihapon mi. Duna mi panultihon nga kon dili kini pagkaon, abang, o gasolina sa among karaan nga sakyanan, dili mi kinahanglang mopalit niini.
Usa ka Dominggo pipila ka bulan na lang sa dili pa mogradwar si Elder Christofferson, ang among bishop mipresentar og plano sa pagpundo alang sa building sa pag-renovate sa among karaang chapel. Magkinahanglan kini sa matag pamilya nga mobayad og kantidad aron magamit sa mga gastuhan. Wala na kitay mga kantidad nga ipundo alang sa building, apan niadtong panahona ang mga ward ug mga stake mitabang pagbayad og bahin sa mga gastuhan sa building o pag-renovate sa mga chapel, nga dugang sa mga donasyon sa ikapulo, nga amo usab nga gibayaran.
Sama sa ubang mga miyembro sa ward, nakigsabut mi sa bishop aron mahisgutan kon unsay among madonar base sa among kinitaan. Ang among gisugyot nga kantidad dili dako, apan gamay na lang kaayo ang nahabilin namong kwarta. Ang ubang mga graduate student nga pareho namo og sitwasyon ug mobiya sa dili madugay naghunahuna nga dili makiangayon nga mobayad sa pundo alang sa building kay wala na man sila kon mahuman na ang mga pag-renovate. Sa gihapon, nakadesisyon mi nga mobayad sa donasyon sa pundo alang sa building, bisan kon wala mi masayud kon unsaon namo pagpaigo hangtud sa katapusan sa tuig sa ting-eskwela. Karon, siguro maghunahuna mo nga igo ra namong ipagawas ang credit card ug i-charge ang among binulang mga gasto ug bayaran kadto sa takdang panahon, apan gikan mi sa lahing panahon. Niadtong panahona dili ka makakuha og credit card gawas kon duna kay pruweba sa full-time nga trabaho, ug ang imong kinitaan kinahanglan anaa sa piho nga lebel. Mao nga dili mi kwalipikado alang sa usa ka credit card. Morag higpit ra kana, apan ang mas estrikto nga polisiya kon kinsay makabaton og credit card karon makaluwas unta sa daghang tawo gikan sa mga kalisdanan sa utang nga ilang nasinati karon.
Hinoon, pipila ka semana lang human niana mibiyahe mi sa usa ka hilum nga dalan usa ka gabii ug mihunong sa usa ka stop sign. Niana gyung higayuna nakadungog mi sa kusog nga agik-ik sa mga brake ug ang likod sa among karaang sakyanan naigo. Nikanaug si Elder Christofferson aron sa pag-imbestigar samtang ako nagpabalin sa sakyanan. Pagkataud-taud, mibalik siya sa sakyanan, ug gipangutana nako siya kon unsay nahitabo. Miingon siya nga ang bumper ra ang naguba. Ang tawo nga nakabangga namo usa ka nagbiyahe nga salesman ug nagpuyo sa laing siyudad. Nakabantay siya nga dili maayo ang iyang mga brake apan wala masayud nga ingon niana kini ka grabe. Nagkinahanglan siya sa iyang sakyanan sa pagtrabaho ug naglaum nga siya nga makigsabut lang kanato sa hilum aron dili mapatas-an ang insurance sa iyang sakyanan ug dili mahatagan og tiket nga kinahanglan pa usab niyang bayran. Total, walay usa nga naangol. Siguro siya mismo nagbadyet gayud. Miingon siya nga kon makakuha mi og sinulat nga estimate sa gastuhon sa pag-ayo ug madala kini sa kwarto sa iyang motel sa tumoy sa lungsod, bayaran mi niya mismo.
Karon wala ko matawo kagahapon. Naghunahuna ko nga ang akong bana nga hingpit nakong gisaligan medyo natunto niini nga kaso. Naghunahuna ba gyud siya nga kining tawhana motuman sa iyang saad? Unsay mga tsansa nga kining tawhana dili mosibat sa lungsod? Si Elder Christofferson nakakuha og estimate alang sa pag-ayo, ug miadto siya nianang motel ug nakit-an ang tawo. Kana nga tawo misulat og tseke alang sa kantidad, ug tag-ana unsa? Ang tseke wala motalbog!
Karon alang sa nahabilin sa istorya. Kana nga tseke hapit pareho sa samang kantidad sa pundo alang sa building nga among gibayaran. Sigurado mi nga makahulat hangtud nga duna siyay klaro nga sweldo nga gamiton sa pagpa-ayo, ug nianang panahona, makasustenir mi sa among panginahanglan, nga nagduha-duha mi nga among mahimo. Usa kadto ka saksi ngari namo nga ang Ginoo, sama sa giingon ni Nephi, “Mohatag og mga paagi diin kami makatuman sa butang diin Siya misugo.”2 Ako nakakat-on nga ang hugot nga pagtuo kasagaran nagpasabut nga motaak ngadto sa walay kasigurohan, apan sa atong pagbuhat sa ingon, ako nahibalo nga ang Ginoo modan-ag sa atong agianan. Mapasalamaton ko sa usa ka mahigugmaong Langitnong Amahan nga nagbantay kanato ug nagpakabana kanato. Nasayud ko nga kini Iyang Simbahan ug ang atong Manluluwas buhi. Nagpasalamat ko sa Ginoo alang sa mga panalangin nga nahatag sa ebanghelyo sa among kinabuhi. Sa ngalan ni Jesukristo, amen.