Pagpili ug Pasalig
Tibuok Kalibutan nga Debosyonal alang sa mga Young Adult
Dominggo, Enero 12, 2020
Nagpasalamat ko sa akong Langitnong Amahan alang sa pribilehiyo nga makauban kamong tanan karong gabhiona. Ug magpasalamat ko sa akong asawa ug moendorso sa iyang mga mensahe. Ug espesyal nga pasalamat sa labihan ka nindot nga choir. Sila usa ka dugang nga pamatuod sa kabililhon sa Institute. Ganahan kaayo ko sa Institute. Hinaut nga kamong tanan nga adunay oportunidad wala lamang magpa-enrol, apan nagtambong ug aktibong nag-apil sa Institute. Kini usa sa labing maayo nga mga butang nga atong buhaton dinhi sa Simbahan. Ang gikanta sa choir bag-ohay lang, sa inyong nahibaloan, mao ang usa ka himno nga gisulat ni Presidente Russell M. Nelson. Ang mga pulong iyaha, ug ang pagbati ug ang pagkanta mituhop sa akong kasingkasing sama sa akong pagtuo nga mao usab sa inyuha. Ug akong ipahayag kaninyo ang iyang gugma ug ang iyang pagtimbaya. Mahimong ako maglakip og usa ka pulong sa pagpasalamat ngadto kang Presidente Astrid Tuminez ug sa administrasyon ug mga kawani sa Utah Valley University alang sa ilang mabinationg kamaabi-abihon niini nga okasyon.
Pipila ka tuig ang milabay, si Elder L. Tom Perry ug ako parehong naa sa among assignment sa Siyudad sa New York. Samtang didto mi gibisitahan namo ang makasaysayanon nga sinagoga sa Brooklyn. Ang sinagoga kaniadto usa ka nindot nga building sa kasilinganan, ug tingali hangtud karon, usa sa mas madanihong seksyon sa maong dapit. Ang babaye nga nagserbisyo isip rabbi sa Jewish Reform nga kongregasyon mainitong miabi-abi ug mipakita kanamo sa makasaysayanong building. Sa una, elegante kini nga estraktura, apan karon klarong dako-dako na kini og ayuhunon. Miingon ang rabbi nga ang iyang kongregasyon nagkagamay ug ang mga pundo nga pangmintenar sa sinagoga ug sa mga programa, lakip ang inadlaw nga klase, dili paigo.
Sa padayon namong pag-istorya, miingon siya nga, ang mga young adult may pasalig sa Judeo nilang panulundon, apan hinoon sa unsang rason, nagduha-duha na sila sa pagtambong ug sa pagkahimong mapasaligong mga miyembro sa sinagoga. Bisan pa niana, ang building gipabanus-banusan nila og gamit sa mga sosyal nga kalihokan. Naingon kini og usa ka pundukanang dapit kanila, ug sa kasagaran mohatag sila og mga donasyon aron itabang sa mga gastuhan bugti sa ilang paggamit sa mga pasilidad, apan diyutay ra ang magpamiyembro sa kongregasyon nga nagsimba didto.
Gihisgutan namo ni Elder Perry kauban sa rabbi nganong ingon kaha niini. Makita sa iyang gipanulti bahin niining daghang young adult, nga kadaghanan nila dili minyo, nga wala nila tagai og dakong prayoridad ang relihiyon sa ilang kinabuhi. Ang uban dili lang gyud gustong mohimo og pasalig niini o sa bisan unsang sinagoga. Naghunahuna si Elder Perry kon manipestasyon ba kini sa inila (o gikaintapan) nga “FOMO”—fear of missing out [kahadlok nga mawagtangan]—nga kon mopasalig sila ngadto niini basin mawagtang kanila ang ubang butang.
Mao gayud kini ang butang nga gusto nakong ihisgot kaninyo karon—pagpili ug papasalig.
Tukion nato sa pagsugod nga ang “kahadlok nga mawagtangan” sa usa ka punto, usa ka makatarunganon nga pagbati. Kutob sa mahimo, tanan kita gustong mosinati sa pinakamaayong mga butang ug makakab-ot sa pinakamaayong mga kapilian sa kinabuhi. Apan ang paglangay nga ingon og hangtud sa hangtud nga pagpili o pasalig kay basin unya mawagtangan sa ubang butang nga tingali mas maayo, dili makatarunganon. Ang matag pagpili mosira sa ubang posibilidad: kon pilion nimong motrabaho o moeskwela sa buntag, dili mahimong idungan nimo ang salida sa Netflix (mahimo ba na?); kon mag-major ka og civil engineering, dili ka maka-major og history, o art, o biology, o bisan unsa (gawas kon naa ra ka nagpuyo sa eskwelahan); kon mobiyahe ka sa Victoria Falls sa Africa karon, dili nimo ikadungan ang pagbiyahe sa laing dapit nianang gutloa, ug tingali dili nimo maadto ang ubang dapit nga gusto nimong adtuon; kon pilion nimo ang pagmisyon, biyaan nimo ang sosyal nga kalihokan nianang higayuna; ug uban pa. Gawas kon mopili ka ug mopasalig ngadto sa pihong direksyon, magkausab-usab ang imong kinabuhi, ug sa katapusan, mawagtangan ka sa pinakamaayong mga butang.
Sigun sa nabantayan sa akong asawa, “Dili nimo maangkon ang tanan—kay asa man nimo kini ibutang?” Dili nato maangkon ang tanan nga atong ganahan, ug dili nato mabuhat ang tanan nga ganahan natong buhaton. Bisan og limitahan ninyo ang inyong mga pagpili ngadto sa mga butang lamang nga “maayo og dungog o dalaygon,”1 sa gihapon dili ninyo maangkon o masinati ang tanan. Wala gyuy igong panahon, paagi, o luna sa kinabuhi dinhi sa mortalidad. Mao nga, mopasalig gayud kita sa pihong mga pagpili kay nasayud nga sa paghimo niini, dili ka na pwede sa uban, bisan maayo pa kini. Angayan sab natong hunahunaon nga ang walay hinungdang paglangay sa usa ka pagpili usa usab ka kapilian.
Ang kaminyoon nag-una nga ehemplo. Sa pagpili og kapares, dili ka na pwede sa uban. Miingon ang Ginoo, “Higugmaa ang inyong asawa sa inyong tibuok nga kasingkasing, ug unong ngadto kaniya ug wala nay lain.”2 Tungod kay katapusan na kini nga pagpili, ang uban mosibug sa pasalig sa tawo nga ilang ganahan, sa tawo nga ilang gimahal ug diin sila malipayong molambo ug sa kahangturan, sa kabalaka basin duna pay mas hingpit nga ikapares ugma damlag nga dili nila gustong mawagtang. Nahinumdom ko og usa ka batan-ong lalaki nga akong nakaila kinsa misalikway sa talagsaong potensyal nga kapares kay nagtuo siya nga daghan kaayo siya og pinastahan nga ngipon. Ang reaksyon nako mao nga ikaw gusto og perpekto nga wala diha, ikaw ba nakahunahuna nga ikaw mismo layo pa kaayo nga mahimong perpektong kapilian?
Panagpundok kini sa mga young adult. Ug para sa kadaghanan ninyo, ang gihataga’g gibug-aton ang mga hingkod. Kamo nagtinguha og responsibilidad sa pagkahingkod, mga kalampusan sa pagkahingkod, ug mga kontribusyon sa pagkahingkod, sukwahi sa paglangay nga mahingkod ug tinguha sa padayong lingaw-lingaw. Napulo ka tuig ang milabay, ang tagsulat ug eskolar nga si Charles Murray namulong mahitungod sa kahulugan sa “maayong kinabuhi.” Miingon siya, “Naghisgot ako bahin sa mga butang nga atong handumon kon matigulang na ta ug atong ikapasigarbo kon si kinsa kita kaniadto ug kon unsay atong nabuhat.”3
Nahinumdom si Murray nga namulong sa Zurich bahin sa dakong katagbawan sa kinabuhi gumikan sa maayong kinabuhi. Miingon siya, “Human sa pakigpulong, pipila sa bayente kapin og edad nga naminaw miduol ug yanong miingon nga ‘ang maayong kinabuhi’ walay kahulugan kanila. Maayo kaayo ang ilang kinabuhi uban sa ilang sex partner ug sa bag-ong BMW ug sa balay bakasyonan sa Majorca, ug walay nakitang haw-ang sa ilang kinabuhi nga kinahanglang hulipan. Makalingaw kini,” miingon si Murray, “dihang nadungog kini, apan dili ikatingala. Kana nga mentalidad susama niini: Ang mga tawhanong binuhat mga koleksyon sa mga kemikal nga makapaaktibo, pagkahuman, wala na. Ang tuyo sa kinabuhi mao ang pagpalabay sa panahon sa makahimuot nga paagi kutob sa mahimo.”4
Pagkahuman sa iyang pagpamulong, gisulti ni Murray kining salabutong pamahayag: “Ang maalamong konsepto nga nahibaloan dugay na mao nga ang maayong kinabuhi nagkinahanglan og inter-aksyon sa atong palibut.”5 Ang tinuod nga hingkod makasabut niini. Nahibalo sila nga ang personal nga kalipay dili gayud mao ang focus sa kinabuhi ug dili igo isip katuyoan sa kinabuhi. Kini nga kamatuoran nagsuporta sa duha ka dagkong sugo: ang paghigugma sa Dios sa tibuok kasingkasing, ug kalag, ug sa salabutan ug sa silingan sama sa kaugalingon.6 Sa giingon ni Jesus, “Niining duha ka sugo nagasukad ang tibuok nga kasugoan ug ang mga propeta.”7 Ang pakigsaad sa ebanghelyo,8 uban sa saad nga kinabuhing dayon, nag-agad niining duha ka dagkong sugo sumala sa prayoridad nga gihatag: sa una ug ikaduha. Ang pagkamatinud-anon ngadto niining duha ka dagkong sugo nagpasabut sa maayong kinabuhi ug unsay ipasabut sa pagkahingkod.
Sa katapusan, walay neutral, walay subayunong dalan nga wala ang pasalig, basta butang kini nga may mahangturong sangputanan. Gipasabut kini ni Alma dihang mitudlo siya nga si Kristo, ang Maayong Magbalantay, nagtawag kanato sa pagsunod Kaniya sa dalan sa pagkadisipulo ug kalipay:
“Tan-awa, ako moingon kaninyo, nga ang maayo nga magbalantay nagtawag kaninyo; oo, ug diha sa iyang kaugalingon nga ngalan siya nagtawag kaninyo, nga mao ang ngalan ni Kristo; ug kon kamo wala mopatalinghug sa tingog sa maayong magbalantay, sa ngalan diin kamo gitawag, tan-awa, kamo dili karnero sa maayong magbalantay.
“Ug karon kon kamo dili karnero sa maayong magbalantay, sa unsa nga panon kamo? “Tan-awa, ako moingon nganha kaninyo nga ang yawa mao ang inyong magbalantay, ug kamo anaa sa iyang pundok; ug karon, kinsa ang makalimud niini?”9
Gitudlo ni Alma ang reyalidad nga adunay duha lang ka opsyon, ug nga si Kristo lamang ang maayong kapilian. Kon wala nimo pilia si Kristo, awtomatik nga mini nga dios ang imong gisunod, sayop nga dalan nga kapadulngan ug gani sa walay katapusang kasagmuyo. Gawas kon sundon nimo ang Manluluwas, ikaw misalikway Kaniya.10
Kay nasayud niini, dili kita magpanuko sa pagpasalig sa Ginoo ug sa pagtinguhang mahiusa uban Kaniya. Sama sa Iyang giampo sa Katapusang Panihapon alang sa Iyang mga apostoles ug sa tanang motuo sa iyang mga pulong, “Aron silang tanan mausa; maingon nga ikaw, Amahan, ania kanako, ug ako anaa kanimo, aron sila usab maania kanato.”11 Dili ba mao kana ang atong gusto? Nganong magpanuko man sa pagkahimong hingpit ug walay pagduha-duhang pasalig? Nganong pugngan man ang pagtaod sa Iyang yugo ngari nato, kay nasayud nga “masayon ang iyang yugo, ug magaan ang iyang luwan”?12
Kahadlok nga Mapakyas
Sa pagtubag sa ako mismong pangutana, akong nakita nga bisan pa sa pagpangatarungan ug sa mga pangamuyo sa Espiritu kay naningkamot kining makig-uban kanato, dunay mga rason nganong magpanuko gihapon ang usa ka tawo. Ang usa mahitungod sa atong katakus sa pagtuman nianang lisud kab-uton nga pasalig. Makahimo ba ta, ug mas maayo ba kaha nga dili na lang ta mopasalig kon kita mapakyas man?
Salabuton kini nga problema, apan agig tubag mopahinumdom ko nga ang labing importante, natabok na ninyo kana nga tulay. Kay sa premortal nga kalibutan gipili ninyo ang pagdawat sa plano sa kaluwasan ug kahimayaan, nga giandam sa Amahan ug gipaluyohan sa Anak, gipili ninyo si Kristo. Ang inyong pisikal nga pagkatawo maoy panghimatuod nga kamo nakapasalig na. Napamatud-an ninyo ang “unang kinabuhi,”13 ug karon ang pangutana barugan ba ninyo ang pasalig “niining kinabuhia: ug “adunay himaya nga idugang diha sa [inyong] mga ulo hangtud sa kahangturan.”?14Dili kita angay mahadlok sa pagpamatuod sa atong premortal nga pasalig, labi na kon magkonsiderar kita sa kangil-ad sa atong pilianan.
Ug dili angay nga mahadlok kita sa kapakyasan. Wala kita mag-inusara. Wala kita pasagdahi. Bisan kinsa nga tinuorayng mopasalig kang Kristo, sa hingpit nga pagkadisipulo, dili mapakyas. Kon kita nabugkos Kaniya kinsa nagpaubos sa tanang butang, kinsa midaug sa tanang butang, ug karon aduna sa tanang gahum, dili kita mapakyas.15 Ang atong Langitnong Amahan ug ang Manluluwas mga interesadong tigpaniid kon ang tanang butang makatabang ba kanato o dili. Mahunahuna ba ninyo sila nga nagsud-ong kanato gikan sa langit nga nag-ingon, “Tan-awa si Frank. Naglisud siya sa una sa pagsulbad og problema sama niini, ug sigurado buhaton na usab niya kini,” o “Oi, tan-awa. Ang mga higala ni Adeline milisud-lisud kaniya. Makainteres ang pagtan-aw unsaon niya sa paglingkawas niini.” Siyempre, binuang kana. Padayon silang anaa nga motabang kanato, mohatag og giya, kapanguhaan, ug tingali modugang pa kon kita modawat.
Niingon ko ganina nga kon tahuron nato ang mga pakigsaad nga nagbugkos nato kang Kristo ug sa Iyang gahum, dili kita mapakyas. Tinuod kana, apan motuo ko nga usahay, tanan kita makasinati og mga kapakyasan—sa kaugalingon natong mga sayop ug mga sala, ug sa epekto sa mga sayop ug mga sala sa uban ngari kanato. Apan tungod sa mga gasa sa paghinulsol ug pagpasaylo, tanan kini nga kapakyasan ug kasaypanan temporaryo lamang. Dili kini makahikaw kanato sa kinabuhing dayon kon dili kita mohunong. Ngano man? Kay kon buhaton nato kutob sa atong mahimo nga makabangon, maangkon nato ang grasya ni Kristo sa pagsulbad ug pag-ayo sa dili nato mahimo. Hinumdumi, ang maulaong gahum o grasya ni Kristo dili lang mowagtang sa pagbati nga sad-an ug nasayop, apan mobalaan kini kanato, aron makapuyo sa presensya sa Dios.16
Wala ko moingon nga kining tanan sayon. Nasayud gyud kita nga ang kinabuhi puno sa panglimbasug ang uban lisud kaayo, gani mga trahedya. Ug ang pagmatinud-anong disipulo ni Jesukristo mas sayon isulti kay sa buhaton. Dili sayon kang Jesus nga mahimong disipulo sa Iyang Amahan ug ang pag-inom sa Iyang “pait nga kopa.”17 Apan Iyang gihimo, ug nasayud Siya unsaon kita sa pagtabang nga molampus pagsubay sa dalan sa pagkadisipulo. Agig dugang, ang Manluluwas adunay gahum ug kaandam nga motabang. Mouban siya kanato uban sa daghang tabang kon kita nagkinahanglan. Miingon Siya, “Ingon sa kanunay nga ang akong katawhan maghinulsol Ako mopasaylo kanila sa ilang mga kalapasan batok kanako.”18 Ang kahadlok nga mapakyas dili rason sa dili paghimo og hingpit ug kompletong pasalig kang Kristo. Padayon lang sa paghinulsol ug sa pagbinuotan—kana igo na.
Sakripisyo
Akong mahunahuna ang usa ka rason nganong ang tawo magpanuko sa pagtubag sa tawag sa Maayong Magbalantay ug motipon sa Iyang panon: kay mahadlok sa sakripisyong gikinahanglan. Kahinumdom mo sa batan-on nga nangutana ni Jesus, uban sa kasinsero, “Unsa pa may akong kulang?” aron maangkon ang kinabuhing dayon.19 Gisultihan kita ni Marcos nga “Si Jesus, sa nagsud-ong siya kaniya, nahigugma kaniya”, [tingali mahinungdanon kadto], “ug miingon kaniya, Kulang kag usa ka butang: ibaligya ang imong katigayunan, ug ang halin ihatag ngadto sa mga kabus, ug makabaton kag bahandi didto sa langit: ug unya umanhi ka, ug sumunod ka kanako.”20 Kahinumdom kamo sa tubag: “Ug sa pagkadungog niini sa batan-ong lalaki, siya mipahawa nga masulub-on: kay daghan man gud siyag katigayunan.”21
Hinaut nga diha sa pagpamalandong, kining datu nga batan-on may kausaban sa kasingkasing ug midawat ra sa pagdapit sa Manluluwas. Sa bisan unsang sitwasyon, atong ilhon nga ang pagpasalig kang Kristo maglakip og sakripisyo. Ang usa nga isakripisyo mao ang “kahadlok nga mawagtangan” kay nasayud kita nga mawagtangan gyud kita og daghang butang. Daghan kaayong opsyon sa kinabuhi dili haum sa pagkadisipulo, ug gani daghang maayo ang masarado tungod sa panginahanglan sa pagkadisipulo diha sa atong panahon ug kapanguhaan para sa mga butang nga mas maayo o pinakamaayo.
Ang matinguhaong batan-on nga hamtong nga nangutana sa Manluluwas og, “Unsa pa may akong kulang?” patay na. Unsa man ang iyang mga katigayunan wala na, ug wala na kini kaniya, ug dili na niya kini mapuslan. Kay dako man ang sakripisyo para kaniya niadtong higayuna, duna ba siyay mas maayong opsyon kay sa dawaton ang pagdapit sa Agalon? Ang tanan ba nga anaa kaniya o naangkon tungod sa iyang katigayunan ikakumpara sa gitanyag kaniya sa Ginoo? Nasayud kita nga tanang gihangyo sa Manluluwas kanato, lakip ang atong kinabuhi mismo, gamay ra kumpara sa kahimayaan. Gani dili nato mahunahuna, “Wala makita sa mata, ni madungog sa dalunggan, ni mosantop sa kasingkasing sa tawo, ang gikatagana sa Dios alang kanila nga nahigugma kaniya.”22
Imbis mahadlok sa mga sakripisyo sa pagkadisipulo, atong hangupon ang oportunidad sa paglambo sa espiritwal nga gahum, sa pagsinati og mas dakong kalipay, ug makita, sa matag usa kanato, ang tinuod nga kahulugan sa atong kinabuhi. Ang sakripisyo, labi na ang pagsakripisyo alang kang Kristo, nagpasabut og katinuoray—nga kita sa tinuod magatuman sa duha ka dakong sugo sa paghigugma sa Dios ug sa silingan. Ang sakripisyo nagpasabut nga kita mobuhat gyud og mga maayo sa kalibutan.
Ang paghigugma sa atong Langitnong Amahan ug sa Iyang Pinalanggang Anak sa kinasingkasing, gahum, hunahuna, ug kusog nagmatuod sa atong mga kalag kon unsa ug kinsa kita. Naghatag kana kanato og seguridad aron mahunong kita sa pag-focus lamang sa atong kaugalingon ug motabang sa uban, aron masabtan gayud ang uban—ang ilang panginahanglan ug unsa gayud ang ilang sitwasyon, uban sa tinguhang makasabut ug makatabang kanila. Sa sambingay sa Maayong Samarianhon, ang pari ug ang Levita nakakita sa samarang biyahedor sa daplin sa dalan, apan sila wala gayud makasabut kaniya. Ang Samarianhon lamang ang tinuorayng nakasabut sa samarang estranghero, ug ang resulta “siya giabut og kaluoy, ug miduol kaniya, ug iyang gibugkosan ang iyang mga samad.”23 Daghan kaayo ang padayong mibati nga nag-inusara. Sa tinuod ang atong mga sakripisyo makahimo og kalainan.
Pasalig
Ang kinatibuk-ang pasalig nga makahatag og kamaya dinhi ug human dinhi mao ang pasalig nato sa Dios nga atong Mahangturong Amahan ug sa Iyang Anak, nga si Ginoong Jesukristo. Diha sa Omni atong makita kining batid nga pagpangamuyo:
“Ako manghinaut nga kamo moduol ngadto kang Kristo, kinsa mao ang Usa nga Balaan sa Israel, ug moambit sa iyang kaluwasan, ug gahum sa iyang katubsanan. Oo, duol ngadto kaniya, ug ihalad ang inyong tibuok nga mga kalag ingon nga usa ka paghalad ngadto kaniya, ug pagpadayon diha sa pagpuasa ug pag-ampo, ug paglahutay hangtud sa katapusan; ug ingon nga ang Ginoo buhi kamo maluwas.”24
Ang istorya gisugilon bahin sa usa ka amahan kinsa mipahimutang sa iyang anak sa higdaanan, ug dihang mibiya siya sa kwarto nakadungog og lagubo. Sa pagbalik, nakita niya sa salog ang iyang anak ug gipangutana nganong natagak siya. Mitubag ang bata, “Wala kaayo ko matarung pagpahimutang.” Siguroa nga ang inyong pasalig sa Dios matarung sa pagpahimutang.
Kabahin kamo sa lawas ni Kristo.25 Nahisakop kamo. Hingpita ang inyong pasalig, mohatag ug modawat sa maayong kabubut-on. Tinud-anay nga makakita niadtong naglibut kaninyo ug kamo usab makita aron nga ang inyong kinabuhi dinhi sa yuta maayo nga pagkapuyo, usa ka kinabuhi sa pagpangalagad, panalangin, ug katagbawan. Usa ka kinabuhi nga gipanalanginan ug gibalaan sa Manluluwas kinsa nakabuntog sa tanan nga mga butang ug pinaagi sa kansang grasya kamo usab makabuntog sa tanan nga mga butang.
Sa miaging summer nga Pioneer Day concert sa Tabernacle Choir and Orchestra at Temple Square mipasundayag ang talentado kaayong Norwegian singer nga si Sissel. Ang nanan-aw, lakip kanako, natandog kaayo sa iyang talahurong rendisyon sa kanta nga “Slow Down” nga nagpahinumdom sa kasulatan gikan sa Mga Salmo, “Humilum kamo, ug ilhon ninyo nga ako mao ang Dios.”26
Akong ipasalida ang video recording ni Sissel nga nagkanta niana nga okasyon, ug samtang maminaw mo, mohangyo ko nga pamalandungan ninyo ang mensahe nga makabaton kita og hingpit nga pagsalig sa Dios ug sa Iyang talagsaong gugma ug kaandam nga mopanalangin ug motabang kanato magkinaunsa man. Ug pamalandungi ang pagkasagrado sa pagpasalig sa inyong kinabuhi ug sa inyong kaugalingon ngadto Kaniya magkinaunsa man.
Taliwala sa akong kalibug
Sa panahon sa dakong panginahanglan
Kon ang akong panghunahuna dili kaayo klaro
Usa ka malumo nga tingog ang mopataliwala
Paghinay-hinay, paghinay-hinay, pagmalinawon
Pagmalinawon ug paghulat, sa Espiritu sa Ginoo
Paghinay-hinay ug paminaw sa Iyang tingog
Ug hibaloi nga Siya ang Dios
Sa panahon sa kalisdanan
Kon mobati ko nga dili gayud sigurado
Kon mobati ko og kabalaka
Moabut ang usa ka malumo nga tingog nga malinawon kaayo, putli kaayo
Paghinay-hinay, paghinay-hinay, pagmalinawon, akong anak
Pagmalinawon ug paghulat, sa Espiritu sa Ginoo
Paghinay-hinay ug paminaw sa Iyang tingog
Ug hibaloi nga Siya ang Dios
Ug hibaloi nga Siya ang Dios27
Hinay lang. Desisyuni sa inyong huna-huna ug hukmi kini diha sa inyong kasingkasing nga kamo mopili sa Dios. Pangitaa ang hilom nga panahon diin kamo makaluhod sa pribadong dapit ug moingon sa inyong Langitnong Amahan, sa ngalan ni Jesukristo nga kamo Iyaha, nga kamo nakapasalig na, sa lawas ug kalag, ngadto Kaniya, ang Iyang Anak, ug sa dalan sa ebanghelyo. Dayon sunda kon asa man Siya, karon ug sa tibuok ninyong kinabuhi. Ayaw na pagpanuko o pagsibug apan padayon sa inyong katuyoan ug misyon sa kinabuhi. Mubo ra kaayo ang mortalidad. Himoag mapuslanon kini nga panahon aron ang kahangturan mahimo nga kalipay, dili pagmahay. Wala ba ninyo batia ang Espiritu nga nagsulti kaninyo nga eksakto kini? Unya magpadayon nga kamasaligon.
Mosaad ako nga ang ganti sa Ginoo sa paghatag ninyo sa tanan mao ang tanan nga Iyang ihatag nga, “takus nga pinaugdo, dinasok, ug tinantan, ug magaawas.”28 Ang katinuod sa Iyang pagkabanhaw maoy pruweba nga Siya ang gamhanan sa tanan, nga Siya mohatag sa Iyang gisaad, ug Siya gayud mohatag. Siya ang kinabuhi, ug mianhi Siya aron kita makabaton og kinabuhi ug “sa pagkabaton niini sa madagayaon gayud”.29 Sultihan ko kamo sanglit ako nasayud nga si Jesukristo ang nabanhaw nga Manunubos. Kana nga kamatuoran naghimo sa tanang kalainan sa kalibutan ug sa kahangturan. Akong itanyag kaninyo ang Iyang panalangin ug ang akong pagsaksi sa ngalan ni Jesukristo, amen.