Panan-awon ug Balanse

Ni Elder Gary E. Stevenson sa Korum sa Napulog Duha ka Apostoles ug Sister Lesa Stevenson

Tibuok Kalibotan nga Debosyonal alang sa mga Young Adult • Mayo 2, 2021 • Pioneer Center

Elder Gary Stevenson: Minahal kong batan-ong kaigsoonan, si Lesa ug ako malipayon kaayo nga moabi-abi kaninyo niining tibuok kalibotan nga debosyonal alang sa mga young adult. Sa atong pagsugod, ipaabot namo kaninyo ang sinsero, mainiton nga pangumusta ni Presidente Russell M. Nelson ug sa Unang Kapangulohan. Sila nahigugma kaninyo, ug kami nahigugma kaninyo, ug kitang tanan nagtahod ug nagpaluyo kanila.

SisterLesa Stevenson: Karon, kami moapil kaninyo gikan sa usa ka talagsaon kaayo ug espesyal nga dapit sa atong kasaysayan isip mga Santos sa Ulahing mga Adlaw. Ug ang gipasabot nako mao ang “dapit.”

Elder Stevenson: Ania kita sa bag-ong gipahinungod nga Pioneer Center tupad sa monumento sa This Is the Place Heritage Park sa tiilan sa bungtod ibabaw sa Siyudad sa Salt Lake, Utah—ang dapit nga nagsaulog nianang layong maabtan nga pamahayag ni Presidente Brigham Young, “This is the place,”¹ human sa ilang malisod nga panaw sa unang grupo sa pioneer dul-an na sa 175 ka tuig ang nakalabay.

Sister Stevenson: Pisikal ug mental nga gikapoy pag-ayo, kining unang mga Santos sa Ulahing mga Adlaw milayas gikan sa mabangis nga pagpanggukod aron manimuyo niining walog nga kamingawan. Hunahunaa ang hitsura sa Walog sa Salt Lake nga naghulat kanila. Ang halapad nga mga luna sa desyerto nga adunay daghang tag-as nga kasagbotan naghatag og ebidensya nga ang pagpuyo dinhi dili sayon.

Elder Stevenson: Hinoon, sila gipanalanginan og dili matugkad nga langitnong panan-awon, nga gisuportahan sa panagna ni Isaias sa Daang tugon nga ang Ginoo “mahatag siyag usa ka ilhanan alang sa usa ka layong nasod.”² Kining matinud-anong mga Santos sa makausa pa makatagamtam og kalinaw ug katuyoan, uban sa mas taas nga panan-awon sa ebanghelyo nga mas taas pa kay sa tumoy sa mga bukid nga ilang gikatkat aron moabot sa Walog sa Salt Lake.

Sister Stevenson: Kini nga mga pioneer ug kadtong misunod makaestablisar sa kasaysayan niining dapita sa desyerto. Ang Dios mipanalangin kanila samtang nagsugod ang pagpundok sa Israel.

Elder Stevenson: Bisan karon, kanang maong kinaiya ug panan-awon sa mga pioneer makita diha sa mga Santos sa Ulahing mga Adlaw bisan asa sa kalibotan.

Pipila ka semana lang ang milabay, si M. Russell Ballard, Akting nga Presidente sa Korum sa Napulog Duha ka Apostoles, mipahinungod niining bag-ong Pioneer Center.

Dinhi, ang mga tawo ug mga pamilya makaanhi ug makahibalo sa dakong kalamposan sa unang mga Santos sa Ulahing mga Adlaw atubangan sa grabe nga mga kalisod. Ang kalagmitan sa ilang kalamposan gamay kaayo. Ang mga pioneer mitawag sa Ginoo adlaw ug gabii samtang sila nakahimo og kalamboan sa pagpananom; sa pagpangita og tubig gikan sa mga walog sa bukid; nagtukod og mga panimalay ug mga kapuy-an, mga tulunghaan ug mga balay-tigumanan, ug gani usa ka templo.

Sister Stevenson: Lisod kaayo hunahunaon unsay ilang nahimo. Ang balaan nga panan-awon—nga gitudlo sa Ginoo sa buhi nga mga propeta—nanalangin sa mga kinabuhi sa Iyang pinili nga mga anak sa pagpahinabo sa Iyang katuyoan.

Elder Stevenson: Sa inyong makita, pipila lang ka pye gikan sa akong gitindogan dinhi sa Pioneer Center mao ang dako nga bildo nga nag-umbaw sa monumento sa This Is the Place. Ug sa ubos niana, makita nato ang masanagon nga talan-awon sa usa ka siyudad nga ilang gisugdan sa pagtukod sa dugay nang panahon nga milabay. Ug unahan niini, kamo adunay usa ka halapad nga talan-awon—usa ka panan-awon, kon inyong tan-awon—nga nagpunting sa kasadpan ug sa kapunaw-punawan sa nagsalop nga adlaw. Kining nag-umbaw nga talan-awon, inubanan sa atong pagsabot sa nangagi, mipadako ug mipahibalo sa atong panglantaw sa panan-awon sa mga pioneer. Mahimo usab kining sambingay aron sa pagtabang sa pagpalawom sa atong personal nga panan-awon sa ebanghelyo ug mogiya nato samtang mag-atubang kita sa mga desisyon ug mga hagit sa atong mga kinabuhi. Mga adlaw lang ang milabay human sa pamahayag sa propeta, nga “This is the place [Kini mao ang dapit],”³ ang panan-awon sa usa ka templo, ang punoang buhatan sa Simbahan, ug usa ka dapit nga mahimong bandila ngadto sa mga nasod nagsugod sa inisyal nga lakang aron mahimong tinuod.

Mao nga karong gabhiona, gamiton nato ang nangagi, ang panan-awon sa atong pioneer nga mga katigulangan, aron sa pagtabang kanato nga makaklaro sa panan-awon alang sa atong umaabot. Ang makadasig nga mga pulong ni Winston Churchill ingon og importante kaayo sa atong panag-istoryahanay karong gabhiona: Ang pagsabot sa nangagi, makatabang nato sa paghulma sa atong umaabot.⁴

Sister Stevenson: Dili ikapangutana nga kita mag-atubang og kawalay kasiguroan dinhi sa kalibotan. Human sa dul-an sa usa ka tuig ug tunga sa pandemya nga wala sukad mahitabo, unsay anaa sa umaabot? Ang matag usa nato nagkinahanglan og samang balaan nga panan-awon ug langitnong giya nga nasinati niadtong unang mga Santos samtang kita molantaw sa atong umaabot.

Elder Stevenson: Tingali mobati kamo nga dili sigurado kon unsa nga direksyon ang subayon. Tingali naghunahuna mo pag-ayo sa dako nga mga tinguha nga moserbisyo og misyon, sa pag-eskwela, sa pagsugod og trabaho. O tingali naghunahuna mo nga mahigugma, magminyo ug magbaton og pamilya, ug makakita sa panalangin sa templo nga moabot kaninyo ug sa inyong mga minahal. O tingali nagsugod na kamo sa inyong mahangtorong pamilya ug karon nakasinati na sa mga hagit sa pagpadako sa gagmayng mga bata.

Ang atong labing dako nga tumong pareha: nga mouswag subay sa dalan sa pakigsaad, matinud-anong mag-andam alang sa kahimayaan. Ang usa ka panglantaw sa ebanghelyo naghatag og panan-awon alang kaninyo ug kanako aron klarong makakita niana nga dalan.

Sister Stevenson: Kon maghisgot mahitungod sa pagpabilin diha sa dalan sa pakigsaad, si Presidente Nelson miingon: “Ang yawe mao ang paghimo ug pagtuman sa sagrado nga mga pakigsaad. Kita mopili sa pagsunod ug mouswag sa dalan sa pakigsaad sa Ginoo ug magpabilin diha niini. Dili kini komplikado nga dalan. Mao kini ang paagi ngadto sa tinuod nga kalipay niini nga kinabuhi ug kinabuhing dayon didto.”⁵

Elder Stevenson: Ug mao nga ang among panghinaot mao ang pagpaambit kaninyo sa pipila sa among kaugalingong personal nga mga kasinatian nga makatanyag og giya samtang kamo moagi sa tanang mga hagit sa inyong kinabuhi aron sa pagtabang kaninyo sa pagpadayon uban ang panan-awon ug balanse.

Mga Santos Dali Na [“Come, Come, Ye Saints]”—gipasundayag ni Bonner Family:

Manga Santos, dali ug lihok na;
Paglakaw, magmaya.
Bisan mag-ant[o]s niining panaw,
Grasya matag adlaw.

Maayong maninguha ta
Katap[o]lan biyaan na;
Buhata ni malipay ka—
Maayo! Rang tanan!

Nganong kita magmagul-anon man?
Maayo rang tanan.
Nganong dakong ganti paab[o]ton
Kon buhat gihunong?

Sa kais[o]g bak[o]s hugton.
Sa Dios dili ta pasagdan;
Kita may ikaistorya—
Maayo! Rang tanan!

Dapit giandam atong makit-an,
Sa layong kasadpan,
Walay moduol nga kahadlokan;
Santos mabulahan.

Kahanginan pun-og kanta,
Pagdayeg sa Amahan ta;
Manganta nga mag-ambahan—
Maayo! Rang tanan!

Ug kon mamatay tas atong panaw,

Malipayong adlaw! Maayo!

Elder Stevenson: “Malipayong Adlaw! Maayo rang tanan!”⁶ mao, sa tinuod, usa ka talagsaong pamahayag sa panan-awon gikan sa unang mga pioneer. Ang ilang panan-awon nga “maayo rang tanan” taliwala sa mga hagit ug mga kasakit nahimong posible tungod sa ilang panglantaw sa ebanghelyo.

Makagahin kita og usa ka oras nga maghisgot mahitungod sa panan-awon, nga giisip sa uban nga “ang kahanas sa pagkakita sa mga butang nga dili makita sa uban.”⁷ Kana mosangpot ngadto sa usa ka pangutana nga ipangutana ninyong tanan sa inyong kaugalingon sa usa ka panahon o sa lain: “Unsa ang akong nakita karon sa akong kaugalingon sa katuigan nga moabot? Diin ba ako kaniadto? Ug asa ako padulong?”

Sister Stevenson: Usahay kinahanglan kitang makahibalo nga ang panglantaw sa ebanghelyo ug ang gasa sa Espiritu Santo, kita adunay mas dakong panan-awon sa unsay posible. Kana mao ang sitwasyon samtang maningkamot kamo pag-ayo sa inyong edukasyon karon o propesyonal nga mga tinguha, bisan og kamo sa gihapon nagpadayon sa pagtimbang-timbang unsay inyong buhaton.

Elder Stevenson: Nakita usab nako ang akong kaugalingon niini nga sitwasyon sa akong unang propesyonal nga panarbaho. Nagsugod ko sa akong propesyonal nga kinabuhi uban sa usa ka higala sa pagkabata nga isip mga estudyante sa unibersidad nagsugod og negosyo, namalit og butang pang regalo gikan sa Asia. Sa misunod nga 30 ka tuig, ang among negosyo nausab sa hingpit ug midako pag-ayo. Usa sa kanunay nga gipangutana kanamo mao ang “Sa dihang nagsugod mo sa inyong negosyo, anaa ba kini sa inyong panan-awon?” Aw, ang mubo nga tubag mao nga “wala gayod sa hingpit.”

Ang panan-awon kinahanglan nga usbon pirme ug sa kanunay. Ang pagsugod isip usa ka gamay nga tigpasulod [importer] og mga produkto nga tumbaga nga pangregalo ug dayon midako sa pagkahimong tigsangkap og mga produkto sa pagpahimsog sa panglawas nagkinahanglan og daghang swerte ug kausaban sa among panan-awon sa taliwala niini. Ang pagbiya ug paghimo og bag-ong plano, pag-imbento og usab, ug pagpahiuyon usa ka kalig-on, dili kahuyang.

Sister Stevenson: Hinoon, dinhi namo gihatagan og punto ang mahinungdanong bintaha nga atong giambitan sa pagpangita sa atong panan-awon. Tungod kay kamo adunay kahibalo sa ebanghelyo, sama sa mga pioneer, napanalanginan kamo og panglantaw sa ebanghelyo. Ang inyong bintaha mao ang pagkakita sa inyong mortal nga panaw uban sa panan-awon nga sa tinuod langitnon.

Elder Stevenson: Ang usa ka mahangtoron o panglantaw sa ebanghelyo naghatag og makatabang nga katin-aw nga wala matagamtami sa uban—bisan sa temporal nga mga butang sa edukasyon ug propesyon. Sulayan namo sa pagpakita niini uban sa mga imahe kay sa mga pulong.

Mohangyo mi ninyo sa pagtan-aw niini nga litrato. Karon, unsay inyong nakita? Nasayod ba kamo unsay gihulagway niini nga imahe?

Karon, kini bang bag-ong panglantaw makatabang sa paghatag kaninyo og katin-awan? Mao ra ba kana ang tanan nga makita? Unsay inyong hunahuna? Atong tan-awon ang pagkahan-ay inig abli niini, mao nga bantayi pag-ayo.

Elder Stevenson: Karon, pinaagi niining yanong kalihokan, makita ninyo—sa pagkatinuod—lapas sa unsay anaa gayod sa inyong atubangan niining gutloa. Ang inyong panan-awon mapalambo pa og dugang sa inyong pagpadayon.

Usa ka maalamon ug pamilyar nga sanglitanan diha sa Mga Panultihon nagpahayag, “Diin walay pagpropesiya, ang katawhan nagsalikway sa pagpugong.”⁸

Kining tinuod nga baroganan dugang nga gihulagway sa atong panahon ni Presidente M. Russell Ballard sa dihang siya miingon, “Kadtong makakab-ot og labing daghan niining kalib[o]tana mao kadtong dunay panglantaw sa ilang kinabuhi.”⁹ Pagkatinuod gyod niana!

Ang atong espirituhanong panan-awon, nga nagagikan sa atong panglantaw sa ebanghelyo naghatag og panabot sa tanang mga prayoridad sa kinabuhi. Kini nagtugot kanato sa pagsubay niadto nga mga prayoridad ug sa paghimo niini nga balanse. Mao nga makita nato ang duol kaayo nga koneksiyon tali sa panan-awon ug balanse.

Gusto nakong ipaambit ninyo ang baroganan sa pagbalanse pinaagi sa pag-asoy og personal nga kasinatian.

Usa ka higala nako, bantogan sa iyang propesyon, usa usab ka hanas ug sinati nga piloto sa helikopter. Sa usa ka mainit nga panahon sa tinglarag, siya mitawag ug misulti namo nga siya moadto sa Siyudad sa Salt Lake ug nangutana kon ang akong kasosyo sa negosyo ug ako gusto bang magpahapit sa gipanag-iya nga yuta sa bukid pagpadulong didto.

Ang pag-adto didto sakay og trak moabot og sobra sa duha ka oras. Kon sa helikopter, moabot lang og 15 minutos. Mao nga mihukom mi nga moadto.

Usa kadto ka nindot nga adlaw nga mosakay og helikopter. Makita namo ang mga kolor sa mga dahon sa tinglarag sa among pagsugod sa pagtugpa. Wala na kaabot og usa ka minuto nga makatugpa nga sa dihang ang palabad sa luyo sa helikopter nadaot. Maong dili na makontrolar ang pagtuyok-tuyok sa helikopter. Kini usa ka malisod nga mga kahimtang.

Maayo gani, ang abilidad sa piloto sa pang-emerhensiya nga pagtugpa usa ka natural nga bahin kaniya. Siya nasayod nga kon kami motugpa nga mag-una ang dulong, o ang ilawom sa helikopter, kami dili mabuhi inig tugpa.

Taliwala sa wala makontrolar nga pagtuyok-tuyok, iyang gipatakilid ang helikopter, ug kami nahagsa sa yuta.

Miagas ang gasolina ug may kalayo nga naggikan sa makina. Napalong niya ang makina, ug nakagawas kami sa helikopter nga wala makabuto. Tungod sa mga aksyon sa piloto ug sa tabang sa Ginoo, napanalanginan kami nga maluwas sa pagkahagsa sa helikopter.

Daghan ko og nakat-onan mahitungod sa mga helikopter sukad nianang adlawa. Ang among kasinatian sa pagkahagsa sa helikopter mao ang sangpotanan sa pagkaguba sa palabad sa luyo nga nakaingon nga wala mabalanse ang kritikal nga mga elemento nga maoy makapalupad sa helikopter. Kon ang balanse makab-ot tali sa gikusgon sa dakong palabad, sa palabad sa luyo, ug sa anggulo, ang paglupad sa helikopter mahimong maanindot. Kon dili, kini makahahadlok! Personal akong makapamatuod niana.

Mogahin kita og gamayng panahon sa mas detalyado nga paghisgot niining importante nga mga elemento.

Ang una mao ang dakong palabad. Ang mga rebolusyon ug ang palabad maoy makapaalsa ug makapatuyok. Hinoon, ang pagtuyok nga nahimo sa dakong palabad kinahanglang mabalanse, o ang helikopter dili na makontrolar.

Sister Stevenson: Mao nga ang usa ka helikopter adunay palabad sa luyo. Nakahimo kini og pag-alkontra batok sa pagtuyok nga nahimo sa ibabaw nga mga palabad. Dayon ang gikusgon sa dakong palabad gikontrolar sa piloto pinaagi sa kontrol gamit ang kamot. Ang gikusgon sa palabad sa luyo gikontrolar gamit ang tiil. Ang kanunay nga pag-usab sa gikusgon niining duha ka palabad importante gayod kaayo.

Kon dili, sa makausa pa, ang sangpotanan dili maayo.

Elder Stevenson: Sunod mao ang stick. Ang stick nagkontrolar sa anggulo sa helikopter, nga maoy nagkontrolar sa direksyon sa helikopter, sa abilidad sa pagliko, ug sa permanenting paglupad, ug dungan nga pag-andar sa dakong palabad ug sa palabad sa luyo. Ang piloto momaneho sa stick sa iyang tuo nga kamot.

Sa kataposan, ang gibug-aton sa karga ug ang anggulo sa helikopter nagtino sa gikusgon ug sa kakusog nga gikinahanglan sa dakong palabad ug sa palabad sa luyo.

Sister Stevenson: Kon kining tanan nga mga elemento nagkahiusa, ang balanse maanindot kaayo. Ang dakong palabad, ang palabad sa luyo, ang stick, gibug-aton, ug ang anggulo—kini misukwahi gayod sa gravity.

Unsaon ninyo sa pagtandi sa maanindot apan komplikado nga paglupad sa usa ka helikopter ngadto sa pagbaton og balanse sa atong kinabuhi?

Elder Stevenson: Tugoti ko nga mohatag og pipila ka hunahuna nga nadasig sa usa ka mensahe nga gihatag ni Presidente Gordon B. Hinckley sa usa ka komperensiya sa pagpangulo nga akong natambongan makausa daghang tuig na ang nakalabay. Tingali makahimo kini og koneksyon alang ninyo.

Siya mihulagway nga “matag usa kanato adunay upat ka matang sa responsibilidad. Una, kita adunay responsibilidad sa atong mga pamilya. Ikaduha, kita adunay responsibilidad sa atong mga amo. Ikatulo, kita adunay responsibilidad sa buhat sa Ginoo. Ikaupat, kita adunay responsibilidad sa atong kaugalingon.”¹⁰

Gamit ang samang analohiya sa pagbalanse sa importante nga mga elemento nga nag-agad sa usag usa sa usa ka helikopter, atong tan-awon ang upat ka responsibilidad sa samang paagi.

Sister Stevenson: Sugdan nato sa panimalay ug pamilya, ang importante nga mga elemento sa matag usa sa inyong kinabuhi. Importante nga dili ninyo ibaliwala ang pamilya nga kamo nahisakop. “Wala kamoy lain nga mas bililhon. … Ang relasyon sa pamilya maoy [inyong] madala … sa sunod nga kinabuhi.”¹¹ Daghan ang nahimo sa bag-ohay lang nga mga tuig sa mga lider sa Simbahan sa paghatag og gibug-aton sa kaimportante sa panimalay ug sa mga pamilya.

Ang bag-ong giya bahin sa bag-ong pagbalanse tali sa panudlo sa ebanghelyo diha sa panimalay ug sa Simbahan ug sa giusab nga eskedyul sa miting mao ang dakong timailhan nga ang pamilya kinahanglang ikonsiderar nga mao ang dakong palabad sa atong mga kinabuhi.

Si Presidente Nelson mihagit kanato nga “makugihon nga molihok aron sa pagbag-o sa [atong] [mga] panimalay ngadto sa usa ka sentro sa pagkat-on sa ebanghelyo.” Kon buhaton nato, siya misaad nga sa “hinayhinay ang inyong mga adlaw nga Igpapahulay mahimong ikahimuot. Ang inyong mga anak madasig sa pagkat-on ug pagsunod sa mga panudlo sa Manluluwas, ug ang impluwensya sa kaaway sa inyong kinabuhi ug sa inyong panimalay makuhaan. Ang mga kausaban sa inyong pamilya dako ug magpadayon.”¹²

Elder Stevenson: Sunod, atong ikonsiderar ang inyong trabaho o propesyonal nga kinabuhi—inyong trabaho, o kon kamo usa ka estudyante, ang edukasyon nga inyong gipangita nga mogiya sa inyong full-time nga propesyon o panarbaho. Ang edukasyon, dayag lang, makapadugang sa inyong kahigayonan sa panarbaho. Ang pagtrabaho makapahimo ninyo sa pag-atiman sa inyong kaugalingon, sa inyong pamilya, ug sa uban. Ang panarbaho mosangpot ngadto sa pagbarog pinaagi sa kinaugalingong paningkamot, sa temporal ug sa espiritwal. Sa inyong trabahoan kamo adunay obligasyon sa inyong amo nga magmatinuoron ug magmaunongon, sa paghatag sa gipaabot nga resulta diin kamo gibayaran. Kamo maningkamot sa inyong labing maayo sa inyong trabaho o propesyon.

Alang sa atong paghulagway, ikonsiderar ang panarbaho isip ang palabad sa luyo sa helikopter.

Sister Stevenson: Aron mahimong labing maayo alang ninyo ug sa inyong pamilya, makatabang nga mahimong labing maayo sa inyong trabaho. Ang duha magkasumpay gayod, ug ang pagbalanse tali sa duha importante kaayo. Nagkadaghan nga mga amo sa trabaho, mga sociologist, ug mga tigtambag sa negosyo nakahibalo sa mga benepisyo sa pagbalanse sa trabaho ug kinabuhi.

Elder Stevenson: Ang ikatulo nga importante kaayo nga elemento sa pagbalanse sa kinabuhi mao ang ngadto sa Ginoo ug sa Iyang buhat. Mao kini ang usa sa importanting mga katuyoan ngano nga ang matag usa kanato mianhi sa yuta. Ania kita dinhi aron mohigugma, motahod, mosunod, ug moserbisyo Kaniya ug sa mga anak sa atong Langitnong Amahan, ang atong mga igsoon sa tibuok kalibotan. Ang Ginoo nagkinahanglan sa atong mga paningkamot ug mga talento sa pagtukod sa Iyang gingharian.

“Paggahin og panahon aron makaatiman sa inyong mga responsibilidad sa Simbahan.”¹³ Akong nakita nga ang pulong paggahin mapahimangnoon. Nagkinahanglan kini og kanunay nga pagpili alang kanato sa “paggahin og panahon” alang sa pagserbisyo sa Ginoo ug sa Iyang Simbahan ug sa pagdumala niana nga panahon.

Sister Stevenson: Ang pagpangulo ug pagserbisyo nga boluntaryo mao ang usa sa mga elemento nga ilhanan sa gipahiuli nga Simbahan ni Jesukristo. Ang matag usa kaninyo hangyoon sa pagtampo ngadto sa gingharian sa lain-laing mga paagi. Ang mga tawag nga moabot ninyo ug sa uban sa inyong pamilya moabot sa mga panahon nga dili sayon. Bisan pa, “kon kamo adunay tinguha sa pag-alagad sa Dios kamo gitawag ngadto sa buhat.”¹⁴

Dugang pa, ang atong minahal nga propeta, si Presidente Russell M. Nelson, mitudlo kanato nga ang atong kalibotan nagkausab, sama sa atong pagserbisyo sa Simbahan. Siya miawhag kanato sa pagdawat sa “usa ka bag-o nga normal.” Siya mihagit kanato sa “[pag]pangalagad ngadto sa uban. Pagbaton og mahangt[o]ron nga panglantaw. [Ug] [mo]buhat sa [atong] mga calling.”¹⁵

Elder Stevenson: Kini nga awhag naghatag sa matag usa kanato og panan-awon sa pagbuhat unsay gisugo nga atong buhaton apan usab nagtambag nato sa pagbaton og mahangtorong panglantaw, o sa laing pagkasulti sa pagbalanse niini uban sa atong laing mahagiton nga mga responsibilidad. Akong gihunahuna ang pagserbisyo sa Simbahan isip mao ang stick sa helikopter, nga nagpalig-on ug naggiya kanato.

Sister Stevenson: Ang kataposan nga elemento sa pagsiguro sa pagkabalanse mao ang usa ka obligasyon sa atong kaugalingon.

Ang kinabuhi mahimong hilabihan ka nagkapuliki. Importante nga kita mohinay-hinay usahay aron maulian ug masusi ang atong kaugalingong personal nga mga panginahanglan, sama sa pagpahulay, pag-ehersisyo, paglingaw-lingaw, ug personal nga espirituhanong kalamboan. Ang mga lider sa Simbahan bag-o lang mihatag og bililhon ug praktikal nga mga sugyot sa pagtabang nato sa pagbuhat niini.

Elder Stevenson: Oo mihatag sila, Lesa. Karong bago si Presidente Ballard misugyot kon unsa ka importante ang pagpangita og hilom nga higayon. Miingon Siya:

“Samtang ang teknolohiya sa kasagaran usa ka panalangin sa akong kinabuhi, kini usab usa ka butang nga makapalinga nga nagbutang og babag tali kanato ug sa atong abilidad sa pagpaminaw sa tingog sa Ginoo. Akong gisultihan ang akong mga apo nga kinahanglan mogahin sila og mahilom nga higayon matag adlaw sa paghunahuna mahitungod sa ilang mga kinabuhi ug mamalandong unsay gusto sa Ginoo nga ilang buhaton. …

“… Dili ko makakonektar sa langit kon daghan kaayo ang gihunahuna. … Kon ako [naghilom] ug naningkamot nga magkalma, niana ako makadawat og mga pagbati.”¹⁶

Si Elder Holland naghisgot bahin sa matinguhaon nga pag-ampo. Siya miingon niini: “Adunay talagsaon nga leksiyon mahitungod niana nga … dinalian, matinguhaon nga pag-ampo nga magpadayon sa pagpanglimbasog … [sa] pagbatok sa kaaway, [sa] mga kabalaka sa matag adlaw, o [sa] mga makabalda sa atong hunahuna.”¹⁷

Sister Stevenson: Si Sister Jean Bingham, Kinatibuk-ang Presidente sa Relief Society, mihulagway og tulo ka elemento sa pagtabang sa atong kaugalingon nga ang matag usa bililhon kaayo.

Una, siya midapit sa Espiritu pinaagi sa mga kasulatan. Miingon siya: “Usa sa unang mga butang nga akong buhaton sa buntag aron makabaton sa Espiritu mao ang pagbasa sa mga kasulatan. Makatabang kini nako nga makabaton og sakto nga panglantaw aron nga ako makadawat og pagpadayag.”

Ang iyang ikaduha nga elemento mao ang pagsimba sa templo. “Laing talagsaong paagi aron mas klaro nga makadungog sa tingog sa Manluluwas mao ang pagtambong sa templo. Usahay kon ako maglingkod diha sa templo, ako makadawat og tubag sa usa ka pag-ampo o dunay moabot sa hunahuna samtang ako naminaw pag-ayo sa Espiritu.”

Ikatulo, miingon siya: “Ang musika … makatabang nako nga makadungog sa tingog sa Manluluwas. Gusto ko nga maminaw sa mga himno, bisan og ako maminaw lamang sa gitugtog sa instrumento nga musika nga walay mga pulong. Ako nasayod niadto nga mga pulong tungod kay ako dugay nang mikanta niini, mao nga kini moabot sa akong hunahuna.”¹⁸

Elder Stevenson: Ingon og ang paggahin og panahon alang sa atong mga kaugalingon sa kasagaran mao ang labing lisod, ug pero importante kaayo. Nakadungog ko nga kini gihulagway nga ang paghunong og taas-taas nga higayon taliwala sa nagkapuliki nga trabaho sa paggabas aron sa pagbaid sa gabas.

Sister Stevenson: Ang paghinumdom nga kita adunay responsibilidad sa atong kaugalingon ug sa pag-apil niana sa hinay-hinay sa atong mga kinabuhi usa ka panalangin. Akong nabantayan nga samtang akong palamboon ang akong kaugalingon sa pisikal, emosyonal, ug sa espiritwal, dili lang kini personal nga makahatag nako og benepisyo, apan kini makapahimo nako sa pag-amuma sa akong pamilya ug mga higala.

Tan-awa kon unsa ka hapsay maglihok kining upat ka bahin sa atong kinabuhi kon himoon uban sa panan-awon ug pagbalanse! Nagkahiusa kini pag-ayo, dili ba?

Elder Stevenson: Oo nagkahiusa kini. Karon bisan og kita maghisgot og pagbalanse niining upat ka aspeto sa atong kinabuhi, kinahanglan nga atong ibutang kini sa saktong panglantaw.

Si Elder David A. Bednar mi-summarize niini sa praktikal nga paagi sa usa ka bag-ong post sa social media. Miingon siya: “Usahay kita mamalandong sa atong tanang mga responsibilidad sa panimalay, eskwelahan, trabaho, ug sa simbahan ug maghunahuna unsaon nga atong makab-ot ang pagbalanse sa daghang nagkakompetensya nga mga hagit sa atong panahon. Imbis sa pagpugos sa atong kaugalingon nga maningkamot sa pagbuhat sa tanan sa samang higayon, kinahanglan nga atong ilhon ang pipila ka importanting mga butang nga mao ang atong labing taas nga mga prayoridad. Dayon kita makapaningkamot sa paghatag sa matag usa niini sa pagtagad nga gikinahanglan niini—tagsa-tagsa sa matag higayon.”¹⁹

Lesa, nagpahinumdom kini nako sa usa ka halandomon kaayo nga kasinatian uban sa akong amahan. Usa ako ka batan-ong amahan, usa ka bag-ong natawag nga bishop nga nagkapuliki, sa nagtubo nga negosyo. Usa ka gabii miabot ko nga ulahi sa kasaulogan sa adlawng natawhan. Ang among mga anak ug ang ilang mga ig-agaw anaa sa tibuok dapit. Apan ako misulod sa balay nga wala magtagad ug milingkod sa daplin sa kwarto, nabalaka sa mga kalihokan nianang adlawa sa akong negosyo ug unsay nahitabo sa ward.

Miduol ang akong amahan ug sa dili kasagaran nga maisogon nga tono miingon, “Gary, unsay imong gibuhat?” Sa dihang gisultihan nako siya sa akong mga kabalaka sa tanan nakong responsibilidad sa simbahan ug sa trabaho, nahimo siya sa akong tan-aw nga masimpatiyahon kaayo. Apan, dili diay. Gani, milingkod siya tupad nako ug misulti nako nga siya nabalaka kanako ug nga ako kinahanglan nga mohimo og pipila ka kausaban aron nga ako dili kanunay malahi sa akong pamilya kon ako anaa uban kanila. Nahinumdom ka ani, Lesa?

Sister Stevenson: Nahinumdom kaayo.

Elder Stevenson: Siya miingon: “Kon ikaw anaa sa panimalay, himoa ang panimalay nga prayoridad, dili ang simbahan ug trabaho. Kon ikaw anaa sa trabaho, pilia nga ang trabaho mao ang prayoridad, dili ang panimalay ug simbahan. Kon ikaw anaa sa simbahan,pilia kana nga prayoridad, dili ang trabaho ug panimalay.”

Karon, kini nga tambag lisod nga sundon, ug gani karon ako layo ra nga mahingpit, apan kini nakatabang kanako. Nakapawala kini sa akong gisagubang, ug nakahatag kini og daghang panalangin sa akong kinabuhi. Nagdapit ako sa matag usa kaninyo sa paghunahuna niini ug sulayi sa pagbuhat sa inyong kaugalingon.

Makapaikag, kini hapit gayod maensakto sa unsay gitambag ni Elder Bednar sa bag-ong gi-post sa social media nga atong gigamit. Siya mipaambit, “morag yano ra paminawon, apan kinahanglan nga dili kita mapungot ug mag-usik sa paningkamot ug panahon sa pagsulay sa pagkab-ot og hingpit nga pagkabalanse sa tanang importante nga mga butang nga kinahanglan nga atong buhaton. Kon sinsero kitang mag-ampo alang sa tabang sa Dios sa pag-ila unsay labing importante, Siya mogiya ug motabang nato sa pagtutok sa atong mga paningkamot matag adlaw.”²⁰

Sister Stevenson: Karon, ako adunay gamay nga dili maayong balita nga ipaambit. Kon kamo mosunod niini nga tambag ug mopadayon uban ang balanse ug panan-awon, aduna gihapon kamoy posible nga pipila ka mga kapakyasan. Kamo makasugat og pipila ka hagit ug mabug-atan.

Tingali adunay mga panahon nga ang inyong panan-awon ingon og dili klaro tungod sa gabon sa dalan, o kamo mahimong nawad-an sa inyong pagbalanse. Apan ania ang maayong balita: Kamo mga anak nga lalaki ug mga anak nga babaye sa usa ka mahigugmaong Langitnong Amahan.

Ang kasulatan nagtudlo kanato, “Kay kita wala sa Dios hatagig espiritu sa katalaw; kondili sa espiritu sa gahum, … ug sa pagpugong sa kaugalingon.”²¹ Ug ayaw kalimot niining importante nga tambag gikan sa Ginoo Mismo: “Paglipay, ug ayaw kahadlok, kay Ako ang Ginoo anaa uban kaninyo, ug mobar[o]g diha kaninyo.”²² Ug mao nga, kamo kanunay adunay, balaan nga tinubdan sa kalig-on diha sa atong minahal nga Manluluwas—gani si Jesukristo.

Elder Stevenson: Karon paminaw sa makadasig nga awhag alang sa matag usa kaninyo dinhi karon gikan ni Presidente Nelson. Siya miingon: “Ang Dios nasayod … nga ang dalan sa pakigsaad dili sayon pangitaon o magpabilin diha niini. Mao nga Siya mipadala sa Iyang Bugtong Anak aron sa pag-ula alang kanato ug sa pagpakita kanato sa dalan. Ang diosnong gahom anaa alang sa tanan kinsa mohigugma ug mosunod ni Jesukristo mao ang gahom sa pag-ayo kanato, paglig-on kanato, paglimpyo kanato gikan sa sala, ug mopalambo kanato sa pagbuhat sa mga butang nga dili gayod nato mahimo sa atong kaugalingon.”²³

Sister Stevenson: Himoa nga ang kahibalo kon kinsa kamo ug kinsa ang anaa sa inyong kiliran motabang ninyo sa pagpuyo sa inyong kinabuhi uban ang klaro nga panan-awon ug makanunayon nga pagbalanse. Ang Ginoo “modugang sa inyong mga oportunidad, mopalapad sa inyong panan-awon, ug molig-on kaninyo.”²⁴

Elder Stevenson: Sa tinuod, pagkanindot nga gikauban kamo karong gabhiona. Ug taposon namo karon pinaagi sa pagpadayag sa among pasalamat ug pagtanyag og imbitasyon sa matag usa kaninyo ug paghalad sa among mga pagpamatuod. Ako modapit kaninyo nga ikonsiderar pag-una kon sa unsang paagi ang inyong panan-awon sa ebanghelyo nagsiguro ug nagmatuod sa inyong pagkatawo isip mga anak nga babaye sa Dios o usa ka anak nga lalaki sa Dios.

Ikaduha, ikonsiderar unsaon ninyo sa pagtuman sa inyong upat ka responsibilidad sa panimalay ug pamilya, sa edukasyon ug panarbaho, sa Simbahan, ug sa inyong kaugalingon.

Ikatulo, ako modapit kaninyo sa pagpangita og hilom nga dapit ug isulat ang mga impresyon nga inyong gibati niini nga debosyonal. Hinumdomi, nga isip mga miyembro sa Ang Simbahan ni Jesukristo sa mga Santos sa Ulahing mga Adlaw, ang matag usa kaninyo adunay katungod sa pakig-uban sa Espiritu Santo.

Sister Stevenson: Kon buhaton ninyo ang mga pagdapit gikan ni Elder Stevenson, ayaw kalimot mahitungod sa mga pioneer nga nag-una nato—kadtong kinsa atong gihisgotan nga nanimuyo niini nga walog ingon man usab niadtong matag usa sa inyong mga pamilya ug mga nasod nga inyong gigikanan. Ang ilang espiritu ug ehemplo sa pagka pioneer sa paghimo sa lisod nga mga butang makahatag ninyo usab og pagsalig sa pagbuhat sa lisod nga mga butang.

Elder Stevenson: Sama sa unang mga Santos sa Ulahing mga Adlaw, kita molantaw. Kita mohangad. Ug kita motan-aw sa kaugalingon alang sa panan-awon ug pagbalanse sa ebanghelyo.

Sister Stevenson: Ako mohalad sa akong pagpamatuod nga kamo makabaton nianang “hingpit nga kahayag sa pagla[o]m.”²⁵ Nga ang Langitnong Amahan nakaila sa inyong tagsa-tagsa nga ngalan ug nga Siya nahigugma kanato. Ako mohalad sa akong pagsaksi bahin ni Jesukristo isip ang Bugtong Anak sa buhi nga Dios, ug gibuhat nako sa ngalan ni Jesukristo, amen.

Elder Stevenson: Amen. Salamat, Lesa. Ako mohalad sa akong pagpamatuod ug saksi ingon man usab nganha kaninyo, among batan-on, matahom nga mga kaigsoonan. Ako mopamatuod nga kita mga anak sa mahigugmaong langitnong mga ginikanan, nga ang Langitnong Amahan nahigugma kaninyo, ug ang doktrina sa Amahan mao nga Siya nagtinguha nga ang Iyang tanang mga anak mobalik ngadto Kaniya.

Karon, kini nga doktrina gihimo sa Iyang Anak, ang atong mahigugmaong Manluluwas, nga si Jesukristo. Pinaagi sa Iyang Pag-ula nga kita makabalik ngadto sa presensya sa atong mahigugmaong Langitnong Amahan. Ako mohalad niana nga pagsaksi nganha kaninyo. Ako mohalad sa akong pagpamatuod ni Jesukristo ug sa Iyang sagrado nga tahas isip atong Manluluwas ug atong Manunubos. Ug ako mobuhat niana pinaagi sa Iyang ngalan, nga si Jesukristo, amen.