Usa ka Pangutana Nga Makapausab sa Inyong Kinabuhi

Tibuok Kalibotan nga Debosyonal alang sa mga Young Adult uban ni Presidente Nelson

Wendy W. Nelson

Dominggo, Mayo 15, 2022

Minahal namong mga kaigsoonan, gimahal kaayo mo namo! Nangandoy mi nga ang matag usa ninyo among madala uban namo sa among panimalay. Ang mas importante, kami nag-ampo nga ang itudlo sa Espiritu Santo kaninyo karong gabhiona makatabang ninyo nga mahimong mas makaandam nga mapauli sa Panimalay—Panimalay nga dunay dakong letra nga P.

Karong gabhiona, gusto ko nga makigsulti kaninyo mahitungod sa usa ka pangutana—usa ka pangutana nga makapausab sa inyong kinabuhi! Kining usa ka pangutana makapadugang sa inyong pagsalig, makapakunhod sa inyong kabalaka, makapadasig ninyo, makapabayaw sa inyong buot ug sa inyong mga panglantaw, makapadugang sa inyong kamabungahon, makapadugang sa inyong pagpokus ug sa kaklaro sa panghunahuna, makatabang ninyo sa pagbatok sa tintasyon, makatabang ninyo nga makamatikod sa pagpanglimbong, makapadugang sa inyong pagpasalamat, makapagaan sa kabug-at sa inyong kinabuhi, makapadugang sa inyong kapasidad sa paghigugma, ug makatabang ninyo nga makahimo og mas maayo nga mga desisyon. Kining usa ka pangutana makahatag ninyo og hingpit nga kalipay, kahupayan, gugma, ug kalinaw!

Unsaon nako sa pagseguro?

Tungod kay mao gayod kana ang gitudlo kanako sa 30 nga inyong kaedad. Ug ako mituo kanila!

Kadtong mga young adult mitudlo nako nga kon inyong pangutan-on ang inyong kaugalingon niining piho nga pangutana, makatabang kini kaninyo sa pagpadayon unsay importante gayod sa kinabuhi, makatabang ninyo sa paghimo og mga kausaban sa inyong kinabuhi nga gusto ninyong himoon, ug gani makatabang ninyo nga tinud-anay nga maghinulsol.

Sumala sa inyong mga higala, kini nga pangutana makahatag kaninyo og mga mata nga makakita—ingon nga wala sukad ninyo masinati kaniadto—sa kamot sa Ginoo sa inyong kinabuhi, sa katahom sa kalibotan, ug sa kamaayo sa uban. Sa laktod, tungod kay kini nga pangutana makahatag ninyo og higayon nga mobati sa Espiritu sa Ginoo ug uban sa balaan nga DNA sa inyong espiritu, kining usa ka pangutana makahatag ninyo og dugang kahayag ug kamatuoran!

Ang inyong kaedad mitudlo usab nako nga kini nga pangutana moepekto bisan unsa pa ka bise kaayo o ka puol ang inyong kasamtangan nga kinabuhi. Dili usab igsapayan unsay inyong gibati: malipayon, masulub-on, nag-inusara, nabug-atan, nagsubo, naawhag, nabalaka, nadasig, gimingaw, biniyaan, gisanapan, nataligam-an, hilabihan sa kalipay. Dili igsapayan. Kining usa ka pangutana makatabang kaninyo.

Gusto ba kamo nga makahibalo sa pangutana?

Maayo!

Gamay lang nga kaagi: si Jesukristo, ang atong Manluluwas, ang atong Manunubos, ug ang pangulo niini, nga Iyang Simbahan, miklaro pag-ayo nga Siya gusto nga kamo ug ako madugangan ang pagkabalaan. Siya misugo gani nato sa pagbuhat sa ingon, nag-ingon, “Kamo kinahanglan nga mopalambo og pagkabalaan diha sa akong atubangan.”¹ Ug Siya dili lang mobiya nga ingon niana! Siya midugang sa pulong kanunay.

Karon, mora ba kini og hataas ra kaayo—ug imposible lang—sa pagpalambo og pagkabalaan kanunay? Hingpit akong makasabot kon kamo naghunahuna, “Sister Nelson, wala gyod na nako.” Ipaneguro nako ninyo ngano nga ako nasayod nga kamo anaa niana.

Sa wala pa ang among kaminyoon, ako usa ka psychologist, usa ka therapist sa kaminyoon ug pamilya, ug usa ka propesor sa BYU. Atol niadtong 30 ka tuig sa akong propesyonal nga kinabuhi, akong nakat-onan ang mahitungod sa gahom sa mga pangutana. Ang pipila ka pangutana makatabang nato sa paghunahuna sa mga butang sa bag-ong paagi, ang pagbukas sa atong mga kasingkasing ug mga hunahuna ngadto sa tanang matang sa mga posibilidad nga wala gayod tingali nato hunahunaa. Mao nga, duha ka bulan ang milabay, samtang ako naghunahuna mahitungod sa gahom sa mga pangutana, gidapit nako ang 30 sa atong mga higala nga young adult—pareha sa inyong edad, minyo ug dili minyo—sa pag-eksperimento niining usa ka pangutana sulod sa tulo ka adlaw. Gihangyo nako sila sa pagbuhat sa mosunod: “Sa usa lang ka sitwasyon sa usa ka adlaw sulod sa matag usa sa tulo ka adlaw, pangutan-a ang inyong kaugalingon, ‘Unsa may buhaton sa usa ka balaan nga young adult?’”

Mao na. Mao kana ang pangutana: “Unsa may buhaton sa usa ka balaan nga young adult?”

Pananglitan:²

• Unsaon man sa usa ka balaan nga young adult pagsugod sa iyang adlaw?

• Unsa man ang anaa sa iyang lista sa “buhatonon”?

• Sa unsa nga paagi man siya makigsulti sa usa ka higala? o mamalit, o magdula, o mag-ampo, o manglaba, o magbasa ngadto sa usa ka bata?

• Unsa man ang paminawon o isulti? isulat o basahon? tan-awon o sul-obon? sa usa ka balaan nga young adult?

• Kon ang usa ka balaan nga young adult bakak nga giakusahan, gibudhian, o wala masabti, unsa may iyang buhaton?

• Unsa man ang iyang buhaton sa usa ka malisod kaayo nga sitwasyon diin ang iyang mga hiyas o mga moral gitestingan?

• Unsaon man niya sa pag-andam sa pag-ambit sa sakramento matag Domingo?

• Unsaon man sa usa ka balaan nga young single adult paggamit sa iyang panahon sa pagpangandam kay sa maghulat alang sa kaminyoon?

• Unsaon man sa balaan nga mga young adult kinsa minyo sa pagpalig-on sa ilang kaminyoon?

Ug unsay nahitabo? Sa pipila ka estado sa USA ug sa duha ka siyudad sa Canada, 30 ka mga young adult mihimo niini, nangutana sa ilang kaugalingon, “Unsa may buhaton sa usa ka balaan nga young adult?”

Ang sunod-sunod nga normal nga inadlaw nga mga kalihokan nagsugod—ang buluhaton sa matag adlaw gihimo basi sa unsay buhaton sa usa ka balaan nga young adult. Human lamang sa pipila ka adlaw, mga report nagsugod sa pagpangabot.

Sultihan ko kamo sa pipila ka butang nga gihimo sa inyong mga higala:³

• Mga carrot alang sa paniudto gikaon uban ang pasalamat.

• Kasagaran nga musika ug mga podcast gipulihan og mga pakigpulong sa kinatibuk-ang komprensiya ug sa Dali, Sunod Kanako nga mga podcast.

• Ang kalas og panahon nga mga app sa social media gipang-delete.

• Hugaw og pinulongan nga mga salida gipalong.

• “Sobra nga kadaghan sa mga lista nga buhatonon”giusab ang prayoridad.

• Mga pag-ampo gihalad sa wala pa mosulay sa paghimo sa malisod nga mga buluhaton nga homework, nagdapit sa Espiritu Santo nga mahimong magtutudlo.

• Ang mga kasulatan gibasa sa lain-laing mga panahon—lakip sa wala pa magsugod ang eksam, nga nakahatag og milagroso nga mga resulta.

• Mga kinaiya nga makapalig-on sa espiritu nga nawala sukad pag-uli gikan sa mission nahibalik.

• Mga pagpamatuod gipaambit ngadto sa mga kauban sa klase.

• Ang kasina sa mga higala kinsa nag-date ug nagminyo gipulihan og gugma ug hingpit nga kalipay alang kanila.

• Ang oras sa pagdrayb nahimong mahilom nga panahon sa pagpamalandong.

• Ang kanunay nga negatibo nga mga hunahuna gipulihan pinaagi sa pag-ihap sa ginagmay nga mga kadaogan ug daghang panalangin.

• Ang pagpikpik ug pag-scroll gipulihan og mga tawag sa telepono ug personal nga mga pagbisita.

• Ang panahon diha sa templo nadugangan—ingon man usab sa buluhaton sa balay nga gihimo sa mga bana!

• Ug ang gugma sa Langitnong Amahan ug ni Jesukristo buhong nga nasinati!

Unsa pay nahitabo?

Usa ka young adult nakadiskobre “sa gahom sa akong kabubut-on!” Siya mipadayon “Samtang ako mipili sa pagtan-aw sa kinatibuk-ang komperensiya isip usa ka balaan nga young adult, wala ko magtan-aw aron mahimuot si bisan kinsa o sa pagkontrol sa paagi nga ang mga tawo nagtan-aw kanako. Nagtan-aw ko tungod kay ako nasayod nga kini nga Simbahan tinuod. Ang ebanghelyo tinuod. Ang mga lalaki ug mga babaye nga namulong nadasig ug gigiyahan sa Ginoo, ug ako gusto nga makat-on.”

Ang “balik-balik nga tigpahimuot sa ubang mga tawo” mireport nga ang iyang kakapoy sa trabaho nakunhoran. Siya misulat: “Ang pagpanguta sa akong kaugalingon niana nga pangutana nakapausab sa hingpit sa akong panglantaw. Aduna koy bag-ong nakaplagan nga pagsalig tungod kay akong gihinumdoman ang kaimportante sa mas mahinungdanon nga mga butang. Akong nakat-onan nga kon mahimo kang mas balaan, dili na kaayo ka mabalaka mahitungod sa pagbuhat unsay gusto sa tanan ug daghan mahitungod sa unsay gusto sa Dios.”

damba sa Templo sa Salt Lake

Karon, minahal kong mga kaigsoonan, karong higayona ang Templo sa Salt Lake usa ka katingalahan nga arkitektura, apan kini nga templo sa Ginoo wala magamit sa pagkakaron. Samtang ang dili ordinaryo nga estraktura nag-agi og malukpanon nga pang-ayo ug makaluwas sa kinabuhi nga pag-estabilasar, ang Templo sa Salt Lake gisirad-an isip usa ka templo. Kon ang usa ka templo gikuhaan og sagradong katungod (gi-decommision), kana nga sagrado—kalabot sa mga ordinansa ug instruksiyon—gikuha. Subo lang, pareha ang mahitabo sa mga tawo.

Pinaagi sa pang-ataki ni Satanas, sa dili maayo nga mga pagpili, ug sa mahangtorong pagpanghulga sa kinabuhi nga gihimo niadtong anaa sa dako ug lapad nga gambalay, subo lang, gikuha gikan sa daghan nga mga young adult ang kasagrado. Kini nga mga young adult gikuhaan—ingnon ta—gi-decomission sama sa “[mga] templo sa Dios.”⁴

Karon, kon kini nahitabo kaninyo o wala, ako modapit kaninyo sa pag-angkon—o sa pagdugang—sa kasagrado sa inyong kinabuhi pinaagi sa paghimo gayod unsay gisugo sa Ginoo, nga mao nga “mopalambo … og pagkabalaan … kanunay.” Mahimo ninyong sugdan kini nga proseso pinaagi sa pagbuhat unsay gibuhat sa inyong mga kaedad: pangutan-a ang inyong kaugalingon—sa usa ka sitwasyon sulod sa tulo ka adlaw—“Unsa man ang buhaton sa usa ka balaan nga young adult?” Ug dayon sundan uban sa tubag.

Samtang kamo magpakabuhi sa hinay-hinay nga paglambo,⁵ maningkamot nga mahimong mas balaan og gamay matag adlaw ug maghinulsol dayon kon makahimo og sayop, kamo makakaplag og hingpit nga kalipay niini nga kinabuhi ug kinabuhing dayon sa kalibotan nga moabot. Ug kamo magsugod sa pagsinati, sa labing makahulaganon ug dili makalimtan nga paagi, eksakto gayod sa unsay gisaad sa atong Manluluwas nga si Jesukristo sa dihang Siya miingon, “Ako adunay katakos sa paghimo kaninyo nga balaan.”⁶

Minahal kong kaigsoonan, si Presidente Nelson mamulong kaninyo karon. Ako mopamatuod kaninyo—ug ako makapamatuod sa bisan unsa nga korte sa bisan unsa nga nasod sa yuta—nga si Presidente Russell M. Nelson mao ang propeta sa Ginoo sa yuta karon, Iyang pinili ug gihatagan og instruksiyon. Sa ngalan ni Jesukristo, amen.

Mubo nga mga Sulat

1. Doktrina ug mga Pakigsaad 46:33.

2. Ubang mga pangutana nga ikonsiderar: Unsaon sa usa ka balaan nga young adult pag-atubang ang usa ka malisod nga buluhaton? Unsaon sa usa ka balaan nga young adult paggamit ang iyang panahon ug kalagsik ug kwarta?

3. Unsa ang gireport sa ubang mga young adult:

   Ang mga kasingkasing gituyo sa pagpahumok ug giablihan aron modawat og instruksiyon gikan sa Ginoo.

   Ang mga pag-ampo gihalad sa makusog, uban sa mas kinasingkasing ug wala kaayoy pagkabalda.

   Ang mga pag-ampo gihalad sa dili pa mosulay sa malisod nga mga buluhaton sama sa pag-analisar sa usa ka Swedish nga balak ug usab sa dili pa sugdan ang homework sa Soil Science.

   Ang pagsulat sa mubo nga mga sulat sa kinatibuk-ang komperensiya, ingon man usab sa pagsulat sa journal.

   Ang paghunahuna sa mga panginahanglan sa uban, lakip niadtong sa mga igsoon, ug dayon ang pagtabang kanila midaghan.

   “Sa anam-anam, akong gidugang ang uban pang makapabayaw nga espirituhanong mga kalihokan o mga hunahuna ngadto sa akong adlaw.”

   Bag-ong mga koneksiyon tali sa mga ideya gihimo.

   Ang paglangay-langay mikunhod, sama sa dili pagparehistro sa unibersidad sa tinglarag.

   Kabataan mas gipaminaw pag-ayo.

   Ang mga katigulangan nahimong mas tinuod.

   Ang mga kasulatan miabot nga makapadasig ug mihatag sa ubang mga kamatuoran ngadto sa kinabuhi: “Nagbasa ko sa Alma 11 sa hilom kaayo nga librarya sa eskwelahan. Ang bersikulo 44 mipahinumdom nako kon unsa ko ka mahal sa akong Langitnong Amahan ug sa Manluluwas ug unsa ka daghan ang Ilang gibuhat alang kanako. Bag-ong natugahan, ako naghunahuna mahitungod sa plano sa kaluwasan ug sa Adlaw sa Paghukom sa usa ka bag-ong paagi.”

   Sama sa usa ka lalaki “nakatutok sa [iyang] pagkamatinud-anon sa mga pakigsaad ug pagdugang sa [iyang] abilidad sa pagpaminaw sa tingog sa Ginoo,” ang kanhi kasina sa mga higala kinsa nag-date ug nagminyo gipulihan sa gugma ug hingpit nga kalipay alang kanila.

   Adunay lain nga miingon, “Sa pagsusi sa akong kahimtang uban sa Ginoo,” ang panahon sa pagdrayb nahimong mahilom nga panahon sa pagpamalandong.

   “Nindot kaayo nga ang mga pagpili nga imong himoon maoy makatino kon unsay dagan sa imong adlaw. Ako nasayod nga ako makapili nga mahimong mas balaan ug nga ako mas malipayon tungod kay ang Espiritu magauban kanako.”

   Adunay lain nga nakat-on sa koneksiyon tali sa pagkabalaan ug sakripisyo. Siya misulat, “Dili sulagma nga ‘sa karaang mga adlaw, ang sakripisyo nagpasabot sa paghimo sa butang o tawo nga balaan’ (Ang Giya ngadto sa mga Kasulatan, “Sakripisyo,” scriptures.ChurchofJesusChrist.org).” Siya mitapos nga siya gusto nga sa kanunay “magpadayon sa ideya nga balaan diha sa akong hunahuna ug sa pagpangita bisan sa gagmay nga mga paagi matag adlaw sa pagsakripisyo og dugang pa ngadto sa Ginoo aron sa paghimo sa akong kaugalingon nga mas balaan.”

   “Ako mopili og kasulatan nga hinumdoman sa tibuok adlaw.”

   “Ako mopili og Kristohanon nga hiyas nga gusto nakong palamboon ug paningkamotan nga matutokan sa pagpalambo kana nga hiyas sa tibuok adlaw.”

   “Hingpit nakong putlon ang social media sa semana nga padulong sa kinatibuk-ang komperensiya aron sa paghatag og kalinaw sa akong kinabuhi ug makatutok sa positibo, makabayaw nga mga impluwensya sa akong kinabuhi—imbis sa mga tig-impluwensya nga anaa sa tibuok internet.”

   “Ang Espiritu mipahinumdom nako sa usa ka dili maayong kinaiya nga kinahanglan nakong korehian.”

   Ang mga tubag nakita diha sa mga kasulatan.

   Kon ang musika ilisan “og mas maayong musika, akong namatikdan ang akong kaugalingon nga mas mabungahon, mas positibo, ug mas nahiangay uban sa Espiritu. Ang akong buot nausab, ug ang akong mga inter-aksiyon sa uban mas maanindot ug puno sa gugma.”

   “Matag higayon nga pilion nako ang pag-una sa espirituhanon nga mga higayon, ang tanan sa akong adlaw maayo ra.”

   “Ang akong panahon mas midaghan kon ako mobasa sa mga kasulatan sa dili pa mohimo sa akong homework.”

   “Pinaagi sa pagsulay sa paghimo og smoothie isip usa ka balaan nga batan-ong babaye, mas andam ako sa pagtubag sa mga panginahanglan sa usa ka tawo nga akong gimahal.”

   “Imbis maminaw sa musika samtang magpadulong sa klase, nakigsulti ko sa laing young adult samtang kami naghulat diha sa labanganan. Nakakita ko og bag-ong higala samtang ako naminaw kon unsa ka subo ang iyang gibati ug samtang ako mipamatuod ngadto kaniya nga ang Ginoo adunay plano alang kaniya ug nga ang sitwayon mamaayo ra.”

   “Kon ako modrayb sa akong sakyanan isip usa ka balaan nga young adult, diha-diha mibati ko og dili na kaayo mabalak-on ug mas mapailubon.”

   “Sulod sa tulo ka adlaw, giusab nako ang akong kinaiya sa pagtan-aw sa akong telepono og una sa buntag ug kataposan sa gabii ngadto sa pag-abli sa akong mga kasulatan. Ang akong kasinatian nindot kaayo matag higayon. Ako nag-ampo alang sa misyonaryo nga mga kasinatian, mangita og tawo nga akong kahatagan sa akong kamabination (sama sa buhaton ni Kristo).” Ang sangputanan? “Nakahimamat ko og bag-o nga mga tawo kinsa mga bisi usab nga mga estudyante. Kami dunay nindot nga panagsultihanay mahitungod sa Dios ug relihiyon, ug sila karon gusto na nga makigkita sa mga misyonaryo.”

   “Nag-atubang ko og butang nga nakapahadlok nako nga tingali dili unta nako buhaton kon ako aktibo pang naningkamot nga mahimong mas balaan. Sa kataposan, ang pag-atubang sa kahadlok nakatabang nako nga mobati og mas masaligon niana nga partikular nga bahin—butang nga akong giampoan karong bag-o.”

   “Naningkamot ko nga mas mahimong balaan samtang akong giatiman ang akong duha ka manghod nga ig-agaw. Sa tibuok gabii naningkamot ko nga mas mahimong sama ni Kristo—mosulti unsay Iyang isulti ug mobuhat sama sa Iyang buhaton. Wala sukad ako makaangkon og mas nindot nga panahon uban kanila. Labaw kong naghunahuna kanila ug minos sa akong kaugalingon.”

4. Tan-awa sa 1 Mga Taga-Corinto 3:16–17.

5. Ang komentaryo ni B. H. Roberts mahitungod kon giunsa ni Joseph Smith pagpuyo ang iyang kinabuhi; tan-awa sa B. H. Roberts, pasiuna ngadto sa The History of the Church of Jesus Christ of Latter-day Saints, 2nd ed. (Salt Lake City: Deseret Book, 1980), 6:xlii.

6. Doktrina ug mga Pakigsaad 60:7.