Ngaahi Fili ki he Taʻengatá
Fakataha Lotu Fakaemāmani Lahi maʻá e Kakai Lalahi Kei Talavoú mo Palesiteni Nelson
Sāpate, 15 ʻo Mē 2022
Siʻoku ngaahi tokoua mo e tuofāfine, kuo lau māhina ʻeni ʻeku fakaʻānaua mai mo Sisitā Nalesoni ki he efiafí ni. Ko hoku uaifi ko Uenitií ko ha fefine tui mo ʻilo lahi ia. ʻOku ou poupou ki heʻene ngaahi akonaki atú.
Meʻa fakaʻofoʻofa moʻoni ʻema fakataha mo kimoutolu ʻi he ʻaho fakamanatu ʻo hono Fakafoki Mai ʻo e Lakanga Taulaʻeiki Faka-ʻĒloné. Hangē ko ia ʻoku mou meaʻí, naʻe tūʻulutui ʻa e Palōfita ko Siosefa Sāmitá mo ʻŌliva Kautele ʻi he ʻaho 15 ʻo Mē 1829, ʻi ha feituʻu lōngonoa ʻi he vaoʻakau ofi ki he ʻapi ʻo Siosefa mo ʻEma ʻi Hāmoni, Penisilivēniá. Kuó u ʻaʻahi mo Sisitā Nalesoni ki he vaoʻakau māpele melie ko iá.
Naʻe hoko ʻo toputapu ʻa e vaoʻakau ko ʻení ʻi he taimi ne foaki ai ʻe Sione Papitaiso e Lakanga Taulaʻeiki Faka-ʻĒloné kia Siosefa Sāmita mo ʻŌliva Kautelé.
Naʻe fakafoki mai kimui ange ʻe Pita, Sēmisi, mo Sione ʻa e Lakanga Taulaʻeiki Faka-Melekisētekí ʻi he feituʻu tatau pē.
ʻI Sepitema ʻo e 2015, naʻá ku fakatapui e Feituʻu ko ia ne Fakafoki Mai ai e Lakanga Fakataulaʻeikí. ʻI he kotoa ʻo e ngaahi ngāue ne vahe mai kiate au kimuʻa ange aí, ko e ngāue ʻeni ne makehe taha kiate aú. ʻOku fakamanatu ʻe he feituʻu ko iá ʻa hono fakafoki mai ʻo e mafai mo e ngaahi kī ʻo e lakanga fakataulaʻeikí ki he tangatá ʻi he māmaní. Naʻe fie maʻu e ngaahi kī ko iá mo ha ngaahi kī kehe ke tataki ʻaki e Siasi ʻo Sīsū Kalaisi kuo fakafoki maí mo malava ai ke tau fakahoko mo maʻu e ngaahi ouau mahuʻingá, kau ai hono silaʻi fakataha ʻo e ngaahi fāmilí ki he taʻengatá. Ko ha momeniti makehe ʻa e ʻaho fakatapui ko iá ʻi heʻeku moʻuí!
Pea ko ha taimi makehe ʻeni ʻi hoʻomou moʻuí. He ʻikai ha toe taimi ʻe tatau mo ia. ʻOku mou fokotuʻu ha ngaahi meʻa mahuʻinga mo ha ngaahi sīpinga he ʻikai ngata pē ʻi heʻene liliu lahi hoʻomou moʻui fakamatelié, ka ko hoʻomou moʻui taʻengatá foki.
Tau talanoa angé ki he moʻuí. Ko ha meʻa ia kuó u maʻu ai ha kiʻi taukei. Naʻá ku tupu hake ʻi he lotolotonga ʻo ha Tō Lalo Fakaʻekonōmika. Naʻá ku taʻu hongofulu tupu lolotonga e Tau Lahi Hono II ʻa Māmaní. Kuó u mātā ha ngaahi mate ʻe niʻihi. Kuo tuʻo lahi ʻeku ʻaʻahi ki ha konitinēniti ʻe ono pea kuo teʻeki ai ha kakai pe anga fakafonua kuó u fetaulaki mo ia te u taʻe ongoʻi fiefia ai.
Kuó u fuesia foki ʻa e mamahí. Kuó u mātā hono uesia māmālie, fakamamahi, mo fakalilifu ʻe he kanisaá haʻaku ʻofefine ʻe toko ua. Pea kuó u tanu ha uaifi fakaʻofoʻofa, ʻa Tenisolo, ko e faʻē ki heʻema fānau ʻe toko 10. ʻI heʻeku ʻiloʻi ʻoku ʻikai lelei ki he tangatá ke nofo toko tahá,1 ne u fili ai ke u toe mali. Ne u mali mo ha fefine fakaofo ʻe taha, ʻa e siʻi Uenitií.
Kuó u mātā ha ngaahi kaungāmeʻa mo ha kau mēmipa ʻo e fāmilí ʻoku nau fai ha ngaahi fili loto-toʻa pea nau hoko ko ha faʻifaʻitakiʻanga lelei ʻi he moʻuí. Pea kuó u mātā ha niʻihi kehe kuo nau fai ha ngaahi fili fakatuʻutāmaki ʻo taʻe-māʻusia ai honau ivi malavá.
Ko hono fakanounoú, kuó u moʻui fuoloa, pea ʻi he taimi ní, ʻoku ou fakatōtōlaʻā pē! Pea kuo ʻikai foki ke u toe fakamoleki ha taimi ki he ngaahi meʻa ʻoku ʻikai mahuʻingá. Ka ʻoku mou mahuʻinga kiate au! Pea ʻoku mahuʻinga fau homou kahaʻú kiate au! ʻOku ou lāngilangiʻia moʻoni ʻi homou omi tokolahi ʻi he pōní. Pea ʻoku ou fakamālō ki he kau hiva kuo nau ʻomi ha hiva fakaʻofoʻofa pehē ke tau kamata ʻakí.
ʻOku ou fie talanoa he pooni fekauʻaki mo homou kahaʻú. Kimuí ni maí naʻá ku ʻalu mo Sisitā Nalesoni ki he polokalama fakanofo ʻo ha palesiteni ʻo ha ʻunivēsiti. Lolotonga e polokalama fakaʻofoʻofa ko iá, naʻá ku fakakaukau ai ki he kau faiako fakaemāmani lahi ʻoku nau līʻoa ke akoʻi e kakai tangata mo fafine ʻi homou toʻú. ʻOku mahuʻinga ʻaupito ʻa e akó. ʻOku ou lau ia ko ha fatongia fakalotu. Ko e nāunau ʻo e ʻOtuá ko e ʻatamai potó.2
Ka neongo ia, ʻoku ʻi ai ha faikehekehe lahi ʻi he ngaahi fatongia ʻo e kau faiako fakaeʻatamaí pea mo hoku fatongia ko e ʻAposetolo pule ʻi he māmaní. Ko honau fatongiá ke akoʻi mo teuteuʻi koe ki hoʻo aʻusia fakamatelié—ko hono ʻuhingá ki he founga ke ke lavameʻa ai ʻi hoʻo ngāue ʻi he moʻuí. Ko hoku fatongiá ke akoʻi mo teuteuʻi foki kimoutolu ki hoʻomou aʻusia taʻe-faʻa-maté—ko hono ʻuhingá ki he founga ke maʻu ai ʻa e moʻui taʻengatá.
ʻOku fakangatangata pē e ngaahi akoʻi ʻo e ngaahi akoʻanga lelei taha ʻo e ako māʻolunga angé, koeʻuhí ʻoku ʻikai faʻa tali ʻe he ako fakaeʻatamaí ʻa e ngaahi moʻoni lalahi ʻe tolu ʻoku tātātaha ha talanoa ki aí:
-
ʻUluakí, te tau mate kotoa pē.3
-
Uá, koeʻuhí ko Sīsū Kalaisi, te tau toetuʻu kotoa pea hoko ʻo taʻe-faʻa-mate.4
-
Pea tolú, ʻoku toka mei muʻa ʻa e ʻAho Fakamāú kiate kitautolu takitaha.5
ʻOku totonu ke faʻu ʻe he ngaahi moʻoni tuʻuloa ʻe tolu ko ʻení ʻa e fakavaʻe ʻo hoʻo ako fakalaumālié.
Koeʻuhí ko hono Fakafoki kakato Mai ʻa e ongoongolelei ʻo Sīsū Kalaisí, ʻoku tau ʻilo lahi ai fekauʻaki mo hotau ngaahi faingamālie ʻi he hili ʻa e maté. ʻOku tau ʻilo ʻoku lahi ha ngaahi nofoʻanga ʻi he fale ʻo ʻetau Tamaí.6 ʻOku tau ʻilo ʻoku ʻofa lahi ʻa e ʻOtuá ki Heʻene fānaú, ʻo hangē ko ia ne akoʻi ʻe Palesiteni Tāleni H. ʻOakesí, “ʻe iku] e fānau kotoa pē ʻa e ʻOtuá”—mo ha ngaahi fakaʻatā makehe siʻisiʻi pē—“ki ha puleʻanga ʻo e nāunau.”7 Fakakaukau pē ki ai! Naʻe fakatupu ʻe heʻetau Tamaí e ngaahi puleʻanga ʻo e nāunaú—fakatilesitiale, fakatelesitiale, mo e fakasilesitiale—ke ʻomi ai ha feituʻu nāunauʻia maʻa ʻEne fānaú.
Ko ʻeku taumuʻa he pōní ke fakapapauʻi ʻoku mahino ki ho fakakaukaú ʻa e foʻi moʻoni ko e moʻuí ni ko e taimi moʻoni pē ia ke ke fili ai pe ko e faʻahinga moʻui fēfē ʻokú ke fie maʻu ki he taʻengatá. Ko homou taimi ʻeni “ke teuteu ai ke feʻiloaki mo e ʻOtuá.”8
Ko ha kiʻi vahaʻataimi nounou ʻaupito ʻa e moʻui fakamatelié ʻi hono fakahoa ki he taʻengatá. Ka, siʻoku kāinga ʻofeina, ko ha vahaʻataimi mahuʻinga moʻoni ia! ʻOku tau fili ʻi he moʻuí ni pe ko e ngaahi fono fē ʻoku tau loto-fiemālie ke talangofua ki aí—ko e ngaahi fono ʻo e puleʻanga fakasilesitialé, pe fakatelesitialé, pe ko e fakatilesitialé9—pea ko e puleʻanga fē ʻo e nāunaú te tau nofo ai ʻo taʻengatá.
ʻE hanga ʻe he fili māʻoniʻoni kotoa pē ʻokú ke fai hení ʻo ʻoatu ha ngaahi lelei lahi ʻi he moʻuí ni. Ka ʻe hanga ʻe he ngaahi fili māʻoniʻoni ʻi he moʻui fakamatelié ʻo ʻoatu ha ngaahi lelei taʻemafakatataua ʻi he taʻengatá. Kapau te ke fili ke fai ha ngaahi fuakava mo e ʻOtuá pea tauhi faivelenga ki he ngaahi fuakava ko iá, ʻokú ke maʻu ai ʻa e talaʻofa ʻo e “tānaki atu ʻa e nāunau ki [ho] ʻulú ʻo taʻengata pea taʻengatá.”10
ʻOku totonu ke ueʻi ʻe he ngaahi moʻoni ko ʻení hoʻo ongoʻi manavasiʻi telia naʻá ke tō he faingamālié. ʻOkú ke maʻu ʻa e ivi malava ke aʻusia e puleʻanga fakasilesitialé. Ko e meʻa taupotu taha ʻoku totonu ke ke manavasiʻi ki aí ko hoʻo tō mei he puleʻanga fakasilesitialé, ʻo iku nofo ʻi ha puleʻanga siʻisiʻi ange koeʻuhí he naʻá ke fili ʻi he māmaní ke moʻui ʻaki pē e ngaahi fono ʻo ha puleʻanga siʻisiʻi ange.
Ko e moʻoni, ʻoku ʻikai loto ʻa e filí ke ke fakakaukau ki ʻapongipongi, pe ko e moʻui taʻengatá. Kae kātaki muʻa ʻoua naʻá ke nofo taʻeʻilo pe taʻetokanga ki he ngaahi faingamālie mo e ngaahi pole ʻo e moʻui fakamatelié. ʻI he laumālie ko iá, ʻoku fie maʻu ke mahino kiate koe ha ngaahi moʻoni mahuʻinga ʻe tolu ʻe tokoni atu ke teuteuʻi ho hala ʻi he kahaʻú:
-
ʻUluakí, ʻiloʻi ʻa e moʻoni fekauʻaki mo koé.
-
Uá, ʻiloʻi ʻa e moʻoni fekauʻaki mo e meʻa kuo foaki atu ʻe he Tamai Hēvaní mo Hono ʻAló.
-
Pea tolú, ʻiloʻi ʻa e moʻoni ʻoku fekauʻaki mo hoʻo uluí.
Te u lea atu fekauʻaki mo e ngaahi meʻá ni takitaha.
ʻUluakí: ʻIloʻi ʻa e moʻoni fekauʻaki mo koé. ʻOku ou tui kapau naʻe folofola fakahangatonu atu e ʻEikí kiate koe he pooni, ko e ʻuluaki meʻa te Ne fakapapauʻi ʻoku mahino kiate koé ko ho tuʻunga totonú.11 Siʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá. Kuo mou hivaʻi e foʻi moʻoni ko ʻení talu mei hoʻomou ako e ngaahi lea ʻo e “Fānau Au ʻa e ʻOtua.”12 Ka ʻoku tohitongi nai e moʻoni taʻengata ko iá ʻi homou lotó? Kuo fakahaofi nai koe ʻe he foʻi moʻoni ko ʻení ʻi hoʻo fehangahangai mo e ʻahiʻahí?13
ʻOku ou manavasiʻi naʻa kuo mou fanongo ki he foʻi moʻoni ko ʻení ʻo tā tuʻo lahi pea hangē pē ia ha lea angamahení kae ʻikai ko ha foʻi moʻoni fakalangi. Ka ʻoku liliu ʻe he anga hoʻo fakakaukau ki hoʻo tuʻunga totonú, ʻa e meimei fili kotoa pē te ke fakahokó.
ʻI heʻeku mali mo Uenitī ʻi he 2006, naʻe lahi ha ngaahi meʻa fakaʻohovale ne u aʻusia—ko honau lahi tahá naʻe fakafiefia. Ko e taha ʻo e ngaahi meʻa fakaʻohovale ko iá ko e lahi ʻo e ʻū vala naʻá ne maʻu naʻe ʻasi ai ha fakaʻilonga—ko e ngaahi ʻunivēsiti naʻá ne ʻosi mei aí, ngaahi feituʻu kuó ne folau ki aí mo e alā meʻa pehē. Ko e taimi kotoa pē naʻá ne tui ai ha taha ʻo e ngaahi meʻa ko iá, naʻá ku fakamataliliʻi ia ʻaki ʻeku pehē ange, “Ko hai ʻokú ke tuʻuaki he ʻaho ní?” Naʻá ne fakaafeʻi au ke u kau ʻi he meʻa fakafiefia ko iá!
ʻE malava ke fakafiefia e ngaahi hingoá mo fakahaaʻi hoʻo poupoú ʻi ha faʻahinga meʻa lelei pē. ʻE lahi ha ngaahi hingoa ʻe liliu maʻau ʻi he taʻau ʻo taimí. Pea ʻoku ʻikai ke mahuʻinga tatau e ngaahi hingoa kotoa pē. Ka ʻo kapau ʻe fetongi ʻe ha faʻahinga hingoa ʻa e meʻa mahuʻinga taha ʻoku ʻiloʻi ʻaki koé, ʻe malava pē ke ke faingataʻaʻia fakalaumālie.
Hangē ko ʻení, kapau te u fakahokohoko fakatuʻunga e mahuʻinga ʻo e ngaahi meʻa ʻoku ʻiloʻi ʻaki aú, te u pehē: ʻUluakí, ko ha fānau au ʻa e ʻOtuá—ko ha foha ʻo e ʻOtuá—hoko leva ki aí ko ha foha ʻo e fuakavá, pea hoko ki aí ko ha ākonga ʻo Sīsū Kalaisi mo ha mēmipa mateaki ʻo Hono Siasi kuo fakafoki maí.
ʻE hoko mai ai hoku hingoa fakalāngilangi ko e husepāniti mo e tamaí, pea hoko mai leva ai e ʻAposetolo ʻo e ʻEiki ko Sīsū Kalaisí.
Ko e ngaahi hingoa kehe kotoa pē kuo ui ʻaki au—hangē ko ha toketā fakafaitoʻo, toketā faitafa, tokotaha fakatotolo, palōfesa, lafitani, ʻeikitau, PhD, tangata ʻAmelika, mo e alā meʻa pehē—ʻe toki hokohoko hifo ia he lisí ki lalo.
Sai, tau ʻomi angé e fehuʻí kiate koé. Ko hai koe?
ʻUluaki mo mahuʻinga tahá, ko ha fānau koe ʻa e ʻOtuá.
Uá, ʻi hoʻo hoko ko e mēmipa ʻo e Siasí, ko e fānau koe ʻo e fuakavá. Pea tolú, ko ha ākonga koe ʻo Sīsū Kalaisi.
ʻOku ou kole atu he pooni kiate kimoutolu ke ʻoua naʻa mou fetongi e meʻa mahuʻinga mo taʻefeliliuaki ʻe tolu ko ʻení ʻaki ha toe meʻa kehe, koeʻuhí he ʻe hoko ʻa hoʻomou fai iá ke fakafeʻātungiaʻi ai hoʻomou fakalakalaká pe fokotuʻu taʻetotonu ai kimoutolu ʻi ha faʻahinga fakakalakalasi te ne taʻofi hoʻomou fakalakalaka taʻengatá.
Hangē ko ʻení, kapau ʻoku ʻiloʻi koe ko ha tangataʻi fonua ʻAmelika, ʻe lava ke fakakaukau ʻa kinautolu ʻoku ʻikai ko e kau ʻAmeliká ʻo pehē, “ʻOku ou ʻiloʻi e meʻa kotoa pē ʻoku fie maʻu ke ʻilo fekauʻaki mo koé” pea fakahoko ha ngaahi fakakaukau taʻetotonu fekauʻaki mo koe.
Kapau ʻoku ʻilolahia koé ʻi hoʻo ngaahi fengāueʻaki fakapolitikalé, ʻe fakafaʻahinga leva koe ʻo pehē ʻokú ke maʻu ha ngaahi tui pau—neongo ʻoku ʻikai ke u ʻilo ha taha ʻoku tui ki he meʻa kotoa pē ʻoku tali ʻe heʻenau faʻahi fakapolitikalé.
ʻE lava ke tau hokohoko atu pē, ʻo talanoa ki he ngaahi fakangatangata ʻoku hoko ʻi he ngaahi hingoa kehekehe ʻoku tau ʻai kiate kitautolú pe ko ia ʻoku ʻai ʻe he kakaí kiate kitautolú.
Mahalo ʻe ui au ʻe ha niʻihi ko ha “motuʻa vaivai.” Ka ʻoku ou kei siʻi ange au ʻia ʻĀtama—pea mo Noa foki.14 ʻOku fakatupu ʻe he lau taʻú, lau lanú, lau puleʻangá, lau tangata pe fefiné mo ha ngaahi tūkunga kehe ʻo e “ngaahi meʻa ʻoku laú” ha tūkunga fakangatangata fakaemāmani lahi.
He toki meʻa fakamamahi moʻoni ʻa e taimi ʻoku tui ai ha taha ki he hingoa kuo hanga ʻe ha taha kehe ʻo fakahingoa ʻaki iá. Fakakaukauloto ki he loto-mamahi ʻa ha kiʻi tamasiʻi ʻoku talaange ki ai, “ʻOkú ke vale.” ʻOku mātuʻaki mālohi ʻa e ngaahi meʻa ʻoku ui pe fakahingoa ʻaki kitautolú!
ʻOku fiefia e filí ʻi he ngaahi fakahingohingoá he ʻoku nau vahevahe kitautolu mo fakangatangata e anga ʻetau fakakaukau kiate kitautolú mo e niʻihi kehé. He toki meʻa fakamamahi ʻa e taimi ʻoku tau fakaʻapaʻapaʻi ai e ngaahi hingoá ʻo lahi ange ia ʻi heʻetau fefakalāngilangiʻaki kitautolú.
ʻE lava ke iku e fakahingohingoá ki he loto-fakamāú mo e tāufehiʻá. ʻOku fakamamahi ki hotau Tupuʻangá ha faʻahinga ngaohikovia pē pe tāufehiʻa ki ha taha koeʻuhí ko e fonuá, matakalí, tuʻunga tangata pe fefiné, tuʻunga fakaakó, anga fakafonuá, pe ko ha ngaahi meʻa kehe pē ʻoku ʻiloʻi ʻaki kinautolu! ʻOku fakatupu ʻe he ngaohikovia peheé ke tau moʻui ʻo maʻulalo hifo ʻi hotau tuʻunga ko Hono ngaahi foha mo e ngaahi ʻofefine ʻo e fuakavá!
Ko e moʻoni ʻoku ʻi ai ha ngaahi hingoa kehekehe ʻoku matuʻaki mahuʻinga kiate koe. ʻOua muʻa naʻa mou maʻuhala ʻeku ʻuhingá. ʻOku ʻikai ko ʻeku ʻuhingá ʻoku ʻikai mahuʻinga e ngaahi tuʻunga mo e ngaahi meʻa kehe ʻoku ʻiloʻi ʻaki kimoutolú. Ko ʻeku ʻuhingá ʻoku ʻikai totonu ke hanga ʻe ha faʻahinga meʻa ʻoku ʻiloʻi ʻaki kimoutolu ʻo toʻo, fetongi, pe muʻomuʻa ia ʻi he tuʻunga tuʻuloa ʻe tolu ko ʻení: “fānau ʻa e ʻOtuá,” “fānau ʻo e fuakavá,” mo ha “ākonga ʻo Sīsū Kalaisi.”
Ka ʻi ai ha faʻahinga meʻa ʻoku ʻikai fenāpasi mo e ngaahi tefitoʻi meʻa ʻe tolu ko ʻení, ʻe iku siva ai ho ʻamanakí. ʻE iku pē ʻo fakamamahiʻi koe ʻe he ngaahi fakahingohingoa kehé koeʻuhí he ʻoku ʻikai ke nau maʻu e mālohi ke tataki koe ki he moʻui taʻengata ʻi he puleʻanga fakasilesitiale ʻo e ʻOtuá.
He ʻikai teitei ʻoatu ʻe he ngaahi meʻa fakamāmani ʻoku ʻilo ʻaki koé ha mahino ki he tuʻunga ʻe lava ke ke aʻusia he ngataʻangá. He ʻikai ke nau teitei fakapapauʻi atu ho TUʻUNGA fakalangí pe ko hoʻo ivi malava fakalangi taʻefakangangatangatá.
Koeʻuhí ʻoku ʻi ai ha palani lahi ʻo e fakamoʻuí naʻe faʻu ʻe he Tamai Hēvaní, ʻikai nai ʻoku ʻuhinga ia ʻokú ke maʻu foki ha ikuʻanga fakalangi?15
ʻOua naʻá ke maʻuhala ai: ʻOku faka-ʻOtua ho ivi malavá. ʻI hoʻo fekumi faivelengá, ʻe fakahoʻata atu ʻe he ʻOtuá e tuʻunga te ke ala aʻusiá.
Ko ia ai, ko hai koe? Ko e ʻuluaki mo e mahuʻinga tahá, ko e fānau koe ʻa e ʻOtuá, ko ha fānau ʻo e fuakavá, pea mo ha ākonga ʻo Sīsū Kalaisi. ʻI hoʻo tali e ngaahi moʻoni ko ʻení, ʻe tokoniʻi koe ʻe heʻetau Tamai Hēvaní ke ke aʻusia hoʻo taumuʻa taupotu taha ke moʻui taʻengata ʻi Hono ʻao māʻoniʻoní.
Uá: ʻIloʻi ʻa e moʻoni fekauʻaki mo e meʻa kuo foaki atu ʻe he ʻOtua ko e Tamaí mo Hono ʻAlo ko Sīsū Kalaisí.
Ko hono fakanounoú, kuó Na foaki atu ʻa e meʻa kotoa pē!
ʻOku fakaʻatā kitautolu ʻe he palani ʻa e Tamai Hēvaní maʻa ʻEne fānaú ke tau nofo ʻi he feituʻu mo e founga ʻokú Ne moʻui aí pea iku ʻo hoko ʻo hangē ko Iá. ʻOku ʻomi ʻe Heʻene Palaní ʻa e ngaahi tāpuaki maʻongoʻonga taha ʻo e taʻengatá kiate kitautolu, kau ai ʻa e malava ke tau hoko ko e “kaungā ʻea-hoko fakataha mo Kalaisí.”16
ʻOku ʻafioʻi mo tokaimaʻananga ʻe he ʻOtuá ʻa e meʻa kotoa pē. ʻI he kotoa ʻo e taʻengatá, he ʻikai ha taha ʻe toe lahi ange ʻene ʻilo mo e tokanga kiate koé ʻiate Ia. He ʻikai ha taha ʻe toe ofi ange kiate koe ʻiate Ia. Te ke lava ʻo tekaki ho lotó kiate Ia mo falala kiate Ia ke Ne fekau mai ʻa e Laumālie Māʻoniʻoní mo e kau ʻāngeló ke tokangaʻi koe. Naʻá Ne fakahaaʻi ʻEne ʻofa taupotu tahá ʻi Heʻene fekauʻi mai Hono ʻAlo pē Taha naʻe Fakatupú ke pekia maʻau—ke hoko ko ho Fakamoʻui mo e Huhuʻí!
Naʻe ikunaʻi ʻe he ʻEiki ko Sīsū Kalaisí ʻa e māmaní ʻo fakafou ʻi Heʻene Fakaleleí.17 Ko ia ai, ʻokú Ne “māfimafi ke … fakamaʻa [koe] mei he taʻe-māʻoniʻoni kotoa pē.”18 Te Ne fakahaofi koe mei ho ngaahi tūkunga fakamamahi tahá ʻi Heʻene founga mo e taimi pē ʻAʻana.19 ʻI hoʻo haʻu kiate Ia ʻi he tuí, te Ne tataki, tauhi, mo maluʻi koe. Te Ne fakamoʻui ho loto mafesifesí mo fakafiemālieʻi koe ʻi hoʻo faingataʻaʻiá.20 Te Ne ʻoatu ke ke maʻu Hono mālohí. Pea te Ne ʻai ke malava ʻa e meʻa ʻoku taʻemalava ʻi hoʻo moʻuí.
Ko Sīsū Kalaisi pē ʻa e maʻuʻanga ʻamanaki lelei, melino, mo e fiefia tuʻuloa kiate koé. He ʻikai teitei lava ʻe Sētane ʻo fakahoko ha taha ʻo e ngaahi meʻá ni. Pea he ʻikai teitei tokoniʻi koe ʻe Sētane.
ʻI he tafaʻaki ʻe tahá, ko e ngāue ʻa e ʻOtuá mo Hono nāunaú ke fakahoko ʻa e “moʻui taʻe-faʻa-mate mo e moʻui taʻengata ʻa e tangatá.”21 ʻE fakahoko ʻe he ʻOtuá ʻa e meʻa kotoa pē te Ne lavá, ʻo ʻikai maumauʻi hoʻo tauʻatāina ke filí, ke tokoniʻi koe ke ʻoua naʻá ke liʻaki ʻa e ngaahi tāpuaki maʻongoʻonga taha ʻi he kotoa ʻo e taʻengatá.
ʻOku maʻu ʻe he ʻOtuá ha ʻofa makehe ki he tokotaha kotoa pē ʻokú ne fai ha fuakava mo Ia ʻi he vai ʻo e papitaisó.22 Pea ʻoku toe loloto ange ʻa e ʻofa fakalangi ko iá ʻi he taimi ʻoku fakahoko mo tauhi faivelenga ai ha ngaahi fuakava ʻoku lahi angé. Pea ʻi he fakaʻosinga ʻo e moʻui fakamatelié, ʻoku mahuʻinga ʻa hono toe fakatahaʻi ʻo e fānau fuakava kotoa pē mo ʻetau Tamai Hēvaní.23
ʻOkú Ne mātuʻaki tokanga foki ke maʻu ʻe Heʻene fānaú kotoa pē ha faingamālie ke fanongo ki he ongoongo fakafiefia ʻo e ongoongolelei kuo fakafoki maí. Kuo ʻomi ʻe he Tamai Hēvaní ʻEne fānaú ki he māmaní ʻo laka hake ʻi ha milēniume ʻe ono. Ko e tokolahi taha ʻo e kakai ko ʻení kuo teʻeki ke nau maʻu e ngaahi ouau te ne fakafeʻungaʻi kinautolu ki he moʻui taʻengatá. Ko e ʻuhinga ia ʻoku fuʻu mahuʻinga ai e ngaahi temipalé. Ko hono ʻuhinga ia ʻoku hoko ai hono tānaki fakataha ʻo ʻIsileli ʻi he ongo tafaʻaki fakatouʻosi ʻo e veilí ko engāue maʻongoʻonga taha ʻi he māmaní he ʻaho ní. ʻE hoku kaungā-ngāue ʻi he ngāue māʻoniʻoní ni, ʻoku ʻi ai homou fatongia mahuʻinga ʻi he tānaki ko ʻení, pea ʻoku ou fakamālō atu ai.
Kuó u aʻu mai ai ki heʻeku fakakaukau fika tolú.
ʻIloʻi ʻa e moʻoni ʻoku fekauʻaki mo hoʻo uluí. Ko hono moʻoní kuo pau ke ke ului ʻiate koe pē. He ʻikai lava ke fakahoko ia ʻe ha taha kehe maʻau.
Sai, ʻe lava nai ke u fakaafeʻi kimoutolu ke mou fakakaukau ki ha ngaahi fehuʻi? ʻOku mou fie ongoʻi nonga nai fekauʻaki mo e ngaahi hohaʻa ʻokú ne lolotonga fakafeʻātungiaʻi kimoutolú? ʻOku mou fie ʻilo lahi ange nai kia Sīsū Kalaisi? ʻOku mou fie ako nai ki he founga ʻe lava ai ʻe Hono mālohi fakalangí ʻo fakamoʻui homou ngaahi kafó mo e vaivaí? ʻOku mou fie aʻusia nai ʻa e mālohi fakaʻofoʻofa mo pau ʻo e Fakalelei ʻa Sīsū Kalaisí ʻi hoʻomou moʻuí?
Ko e feinga ko ia ke tali e ngaahi fehuʻi ko ʻení, ʻe fie maʻu ki ai ha ngāue—ko ha ngāue lahi. ʻOku ou kōlenga atu ke mou fakatupulaki hoʻomou fakamoʻoní. Ngāueʻi ia. Maluʻi ia. Tokangaʻi ia. Tanumaki ia ke tupulaki. Fakatupulaki ia ʻaki e moʻoní. ʻOua naʻá ke ʻuliʻi ia ʻaki e ngaahi fakakaukau hala ʻa e tangata mo e fefine taʻetuí peá ke fifili leva pe ko e hā ʻoku hōloa ai hoʻo fakamoʻoní.
Fakahoko fakaʻaho hoʻo lotú ʻi he loto-fakamātoato mo e loto-fakatōkilalo. Fakaivia koe ʻaki e ngaahi lea ʻa e kau palōfita ʻo e kuonga muʻá mo onopōní. Kole ki he ʻEikí ke Ne akoʻi koe ʻi he founga ke fanongo lelei ange ai kiate Iá. Fakaʻaongaʻi ha taimi lahi ange ʻi he temipalé mo e ngāue hisitōlia fakafāmilí.
ʻI hoʻo fokotuʻu hoʻo fakamoʻoní ko e meʻa mahuʻinga taha kiate koé, fakatokangaʻi ha ngaahi mana ʻe hoko ʻi hoʻo moʻuí.
Kapau ʻoku ʻi ai haʻo ngaahi fehuʻi—pea ʻoku ou ʻamanaki pē ʻoku ʻi ai—fekumi ki he ngaahi talí ʻi he loto-holi fakamātoato ke tui. Ako ʻa e meʻa kotoa pē te ke lavá fekauʻaki mo e ongoongoleleí pea fakapapauʻi ke ke tafoki ki he ngaahi maʻuʻanga tokoni moʻoní ke maʻu mei ai ha fakahinohino. ʻOku tau moʻui ʻi he kuonga fakakosipeli he “ʻikai taʻofi ai ha meʻa.”21 Ko ia ai, ʻe tali ʻe he ʻEikí ʻetau ngaahi fehuʻí kotoa ʻi he taimi totonú.
Ka ʻi he taimi tatau, fakaʻutumauku ʻi he ngaahi fakahā te ke ala lava ke maʻú. ʻOku ou palōmesi atu ʻe fakamālohia hoʻo fakamoʻoní ʻi hoʻo fai iá, neongo kapau ʻoku teʻeki ke tali mai ha niʻihi ʻo hoʻo ngaahi fehuʻí. ʻE fakaiku maʻu pē hoʻo ngaahi fehuʻi fakamātoato, ʻoku fai ʻi he tuí, ki ha tui mo ha ʻilo lahi ange.
Ka mavahe ho ngaahi kaungāmeʻá mo e fāmilí mei he Siasí, hokohoko atu pē hoʻo ʻofa ʻiate kinautolú. ʻOku ʻikai ʻoʻou ke fakamāuʻi ha fili ʻa ha taha kehe ʻo ʻikai toe kehe ia mei hano fakaangaʻi koe ʻi hoʻo tui faivelengá.
Kātaki ʻo fanongo mai ʻi heʻeku pehē atu: ʻOua naʻa takihalaʻi kimoutolu ʻe he niʻihi ʻoku tafunaki ʻenau ngaahi veiveiuá ʻaki ha ngaahi meʻa ʻoku ʻikai ke mou lava ʻo mamata ki ai ʻi heʻenau moʻuí. Kae mahuʻinga tahá, tuku ke vakai ho ngaahi kaungāmeʻa taʻetuí ki he lahi hoʻo ʻofa ki he ʻEikí mo ʻEne ongoongoleleí. Fakaʻohovaleʻi honau loto-veiveiuá ʻaki ho loto-tuí!
ʻI hoʻo fakatupulekina hoʻo fakamoʻoní mo tanumaki ke tupulakí, te ke hoko ai ko ha meʻangāue mālohi ange ʻi he toʻukupu ʻo e ʻEikí. ʻE “ueʻi fakalaumālie koe ʻe ha ngāue lelei ange” 25ko e ngāue ʻa Sīsū Kalaisí!
ʻOku ʻikai ha meʻa ʻoku hoko ʻi he māmani ko ʻení ʻe toe mahuʻinga ange ka ko hono tānaki ʻo ʻIsileli Maʻaná. Tuku ke ʻiloʻi ʻe hoʻo Tamai Hēvaní ʻokú ke fie tokoni. Kole kiate Ia ke ke ngāue ʻi he ngāue nāunauʻiá ni. Peá ke tuʻu leva ʻo ofo ʻi he meʻa ʻoku hoko ʻi he taimi ʻokú ke tuku ai ke lāngilangiʻia e ʻOtuá ʻi hoʻo moʻuí.
Siʻoku ngaahi kaungāmeʻa kei talavou, ʻoku ou ʻofa atu. ʻOku ou fakamālō atu. ʻOku ou falala atu. ʻI heʻeku hoko ko e palōfita ʻa e ʻEikí, ʻoku ou tāpuakiʻi kimoutolu ke mou ʻiloʻi ʻa e moʻoni fekauʻaki mo kimoutolú pea mataʻikoloa ʻaki ʻa e moʻoni fekauʻaki mo e tuʻunga nāunauʻia te mou malava ke aʻusiá. ʻOku ou tāpuakiʻi kimoutolu ke fakatupulaki hoʻomou fakamoʻoní. Pea ʻoku ou tāpuakiʻi kimoutolu ke mou maʻu ʻa e holi mo e mālohi ke tauhi hoʻomou ngaahi fuakavá.
ʻI hoʻomou fai iá, ʻoku ou palōmesi atu te mou aʻusia ha tupulaki fakalaumālie, tauʻatāina mei he ilifiá, mo ha loto-falala ʻoku ʻikai ke mou faʻa mafakakaukaua he taimí ni. Te mou maʻu ʻa e mālohi ke maʻu ha ivi tākiekina lelei ʻoku mahulu atu ʻi homou tuʻunga malava fakanatulá. Pea ʻoku ou palōmesi atu ʻe fakafiefia ange homou kahaʻú ʻi ha toe meʻa te mou lava ʻo tui ki ai he taimí ni.
ʻOku pehē ʻeku tāpuakiʻi kimoutolu, mo toe fakahaaʻi atu ʻeku houngaʻia mo e ʻofa kiate kimoutolú, ʻi he huafa toputapu ʻo Sīsū Kalaisí ʻēmeni.