O Filifiliga mo le Faavavau
Faigalotu i le Lalolagi Atoa mo Talavou Matutua faatasi ma Peresitene Nelson
Aso Sa, 15 Me, 2022
O’u uso e ma tuafafine pele, sa ma’ua tulimatai mai lava ma Sister Nelson i lenei afiafi mo le tele o masina. O lo’u toalua o, Wendy, o se tamaitai o le faatuatua tele ma le atamai. Ou te viia ana aoaoga ia te outou.
E ma’eu le feiloai ma outou i le faamanatuina o le Toefuata’iga o le Perisitua Arona. E pei ona outou silafia, i le aso 15 o Me, 1829, sa tootutuli ai le Perofeta o Iosefa Samita ma Oliva Kaotui i se vaega paganoa i le togavao e latalata i le fale o Iosefa ma Ema i Heremoni, Penisilevania. Ua ma oo i ai ma Sister Nelson i lena togavao o laau suka mapo (sugar maples).
Na oo ina paia lenei togavao ina ua faaee atu e Ioane le Papatiso le Perisitua Arona i luga o Iosefa Samita ma Oliva Kaotui.
Mulimuli ane, na toefuatai mai e Peteru, Iakopo, ma Ioane le Perisitua Mekisateko i lena lava vaega lautele e tasi.
Ia Setema 2015, sa ou faapaiaina ai lena Nofoaga o le Toefuata’iga o le Perisitua. Mai tofiga uma na muamua atu sa ou mauaina i lena taimi, o le tofiga lena sa sili ona iloga ia te a’u. O lena nofoaga ua faamanatuina ai le toefuata’iga o le pule ma ki o le perisitua i le tagata i luga o le fogaeleele. O na ki ma isi ki sa manaomia e taitai ai le Ekalesia toefuataiina a Iesu Keriso ma mafai ai mo i tatou ona faatinoina ma maua sauniga taua, e aofia ai le faamauina faatasi o aiga mo le faavavau. O lena aso o le faapaiaga o se taimi ofoofogia lea i lo’u olaga!
O le taimi nei, o se taimi ofoofogia lea i o outou olaga. E le toe i ai se isi taimi faapea. O loo outou faavaeina ni mea faamuamua ma ni mamanu o le a matua aafia ai outou e le gata i o outou olaga faaletino ae faapena foi o outou olaga e faavavau.
Ia se’i tatou talanoa e uiga i le olaga. O se mea lena e i ai sina ou aafiaga itiiti. Sa ou ola a’e i le taimi o le Pa’ū Tele o le Tamaoaiga. Sa avea a’u ma se talavou i le taimi o le Taua Lona Lua o le Lalolagi. Sa i ai ni taimi na toeitiiti ou oti ai. Ua ou oo i konetineta e ono i le tele o taimi ma ou te lei feiloai lava i se nuu po o se aganuu ou te lei mauaina le musuiaina.
Ua ou oo foi i le tiga matuitui. Na ou vaavaai atu i ou afafine faapelepele e toalua i le tigaina ma le telegese ona maliliu atu i le kanesa. Ma sa ou falelauasiina se āvā ofoofogia, o Dantzel, le tina o le ma fanau e toa 10. I le iloaina ai e le lelei mo le tane ona nofotoatasi,1 sa ou filifili ai e toe faaipoipo. Sa ou faaipoipo atu i se isi tamaitai ofoofogia, la’u pele o Wendy.
Ua ou vaai i uo ma tagata o aiga o faia ni filifiliga totoa ma ola i ni olaga o faataitaiga lelei. Ma ua ou vaai foi i isi o faia ni faaiuga matautia ua le ausia ai lo latou gafatia.
I se faapuupuuga, ua ou ola i se olaga umi, ma i lenei taimi, ua ou le toe faatauina ai ni fa’i mata! Ma ua ou le toe faaaluina foi se taimi i mea e leai se taua. Ae e taua outou ia te a’u! Ma o o outou lumanai e matua taua tele ia te a’u! Ua matua faageetia lava a’u ona ua toatele naua outou ua o mai i le po nei. Ma ou te faafetai i le au musika o e na amataina i tatou i se leo matagofie.
O le po nei, ou te fia talanoa atu ai ia te outou e uiga i o outou lumanai. Talu ai nei sa ma auai ai ma Sister Nelson i le faatautoina o se peresitene o se iunivesite. I le taimi o lena sauniga matagofie, sa ou mafaufau ai i faiaoga le mafaitaulia i le lalolagi atoa o loo tuuto atu i le aoaoina o alii ma tamaitai o le tou tupulaga. E taua tele le a’oga. Ou te mafaufau i ai o se tiutetauave faalelotu. O le mamalu o le Atua o le atamai lea.2
Peitai, e i ai se eseesega tele i le va o tiutetauave a faiaoga o le poto salalau ma lo’u tiutetauave o le Aposetolo sinia i le lalolagi. O le latou galuega o le a’otauina ma le sauniaina o outou mo lo outou aafiaga faaletino —o lona uiga, o le auala e manuia ai i lau galuega o le olaga nei. O lo’u tiutetauave o le a’otauina ma le sauniaina foi o outou mo lo outou aafiaga faaletino-ola-pea —o lona uiga, o le auala e maua ai le ola e faavavau.
O aoaoga a faalapotopotoga sili ona lelei o aoaoga maualuluga e i ai lava ni tapulaa, ona o aoaoga faalepoto salalau e masani lava ona le amanaiaina ni upumoni tetele se tolu ia e seasea talanoaina:
-
Muamua, o i tatou taitoatasi o le a oti.3
-
Lua, ona o Iesu Keriso, o le a toetutu ai i tatou taitoatasi ma avea ma tagata tino ola pea.4
-
Ma le tolu, o le Aso Faamasino o loo loma mo i tatou taitoatasi.5
O nei upumoni a’ia’i e tolu e tatau ona fauina ai le faavae o lou a’otauina faaleagaga.
Ona o le Toefuataiga o le talalelei a Iesu Keriso i lona atoaga, ua tatou iloa ai le tele o mea e uiga i o tatou avanoa pe a mavae le olaga faaletino. Ua tatou iloa i le afioaga o lo tatou Tama ua i ai le tele o maota.6 Ua tatou iloa o le alofa tele o le Atua i Lana fanau, e pei ona aoao mai e Peresitene Dallin H.Oaks e faapea, “o fanau uma a le Atua”—faatasi ma ni nai faamoemoega laiti—o le a “iu ina ea ae i se malo o le mamalu.”7 Mafaufau i ai! Na foafoaina e lo tatou Tama ni malo o le mamalu—telesitila, teresitila, ma le selesitila—e maua ai se nofoaga mamalu mo Ana fanau.
O lo’u faamoemoega i le po nei o le faamautinoa lea ua lautele lau vaai i le upumoni e faapea, o lenei olaga e moni lava o le taimi lea e te filifili ai po o le a le ituaiga o olaga e te manao e ola ai e faavavau. O le taimi nei o lou taimi lea “e saunia ai e feiloai ma le Atua.”8
O le olaga faaletino e matua puupuu lava e faatusatusa i le ola e faavavau. Ae, o’u uso e ma tuafafine pele, o se taimi puupuu taua tele. I lenei olaga tatou te filifili ai po o a tulafono ua tatou loto e usita’ia—po o tulafono o le malo selesitila, po o le teresitila, po o le telesitila9—ma, o le mea lea, o le fea malo o le mamalu o le a tatou ola ai e faavavau.
O filifiliga amiotonu uma e te faia iinei o le a e matua manuia ai i le taimi nei. Ae o filifiliga amiotonu i le olaga nei o le a matua manuia ai e faavavau i mea e lei mafaufauina. Afai e te filifili e osia ni feagaiga ma le Atua ma faamaoni i na feagaiga, e te maua le folafolaga o “[mamalu] o le a faaopoopo i luga o [o outou ulu] e faavavau ma faavavau lava.”10
O nei upumoni e ao ona uunaia ou lagona sili o le FNMSM—fefe nei misi se mea. Ua ia te outou le gafatia e oo ai i le malo selesitila. O le FNMSM silisili lava, o le misia lea o le malo selesitila, ae maua se malo maualalo ifo ona o iinei i le lalolagi na e filifili ai e ola i tulafono o se malo maualalo ifo.
Ioe, o le fili e le manao ia e mafaufau mo a taeao, faapena foi le ola e faavavau. Ae faamolemole, aua nei le iloa pe faatalale foi i avanoa ma luitau o le olaga nei. I lena agaga, e manaomia ona e malamalama i upumoni faavae e tolu o le a fesoasoani ia te oe ia saunia ai lou ala i le lumanai:
-
Muamua, ia iloa le upumoni po o ai oe.
-
Lua, ia iloa le upumoni e uiga i mea ua ofoina atu e le Tama Faalelagi ma Lona Alo ia te oe.
-
Ma le tolu, ia iloa le upumoni e fesootai ma lou liuaina.
O le a ou talanoa atu i nei manatu taitasi e tolu.
Muamua: ia iloa le upumoni po o ai oe. Ou te talitonu ana faapea o loo fetalai tuusao atu le Alii ia te oe i le po nei, o le mea muamua lava Na te faamautinoa ua e malamalama i ai o lou faasinomaga moni.11 A’u uo pele, o outou moni lava o fanau agaga a le Atua. Sa outou pepese lava i lenei upumoni talu ina outou iloa upu o le “O A’u o se Atalii o le Atua.”12 Ae pe ua tusia ea lena upumoni e faavavau i lou loto? Pe na laveaiina ea oe e lenei upumoni ina ua oulua fetaiai ma se faaosoosoga?13
Ou te popole lava i lo outou faafofoga soo i lenei upumoni ua foliga mai ua na o se faaupuga nai lo o se upumoni paia. Ae, o le auala e te mafaufau ai po o ai moni oe e aafia ai toetoe o faaiuga uma e te faia.
I le 2006, ina ua ou faaipoipo atu ia Wendy, sa fai si tele o ni nai mea na faateia ai—o le tele o na mea sa fai si ofoofogia. O se tasi o na mea na faateia ai o le aofaiga o lavalava na ia umia sa i ai se tagavai—mai iunivesite sa ia faauu mai ai, o nofoaga sa ia faimalaga i ai, ma isi mea faapena. Soo se taimi lava na te ofuina ai se tasi o na lavalava, ou te taufaalili ai ia te ia i le fai atu, “O ai o loo e faalauiloaina i lenei aso?” Sa ia valaaulia a’u e auai i lea uiga mālie!
O faailoga e mafai ona mālie ma faailoa ai lou lagolago mo le tele o soo se mea lelei. O le tele o faailoga o le a suia mo oe i le gasologa o taimi. Ma e le o faailoga uma e tutusa le taua. Ae afai e i ai soo se faailoga na te suitulagaina mea e sili ona taua e iloa ai oe, o taunuuga la e ono lamatia faaleagaga.
Mo se faataitaiga, afai ou te faatulagaina le faasologa o le taua o igoa faasino e mafai ona faatatau ia te au, ou te faapea atu: Muamua, o au o se atalii/afafine o le Atua—o se atalii o le Atua—ona sosoo ai lea ma se atalii o le feagaiga, ona sosoo ai lea ma se soo o Iesu Keriso ma se sui tuuto o Lana Ekalesia toefuataiina.
Ona sosoo ai lea ma o’u faalagiga faamamaluina o se tane ma se tamā, ia ma se Aposetolo a le Alii o Iesu Keriso.
O isi uma igoa e faatatau ia te au—e pei o se fomai, fomai tipitipi, tagata suesue, polōfesa, lutena, kapeteni, PhD, o se Amerika, ma isi—o le a i lalo i se mea o le lisi.
Ia, se’i liliu atu la le fesili ia te outou. O ai oe?
O le mea muamua lava ma le sili, o oe o se atalii ma se afafine o le Atua.
Lua, i le avea ai ma se tagata o le Ekalesia, o oe o se tama o le feagaiga. Ma le tolu, o oe o se so’o o Iesu Keriso.
O le po nei, ou te augani atu ia te outou e ’aua ne’i suitulagaina nei faailoga silisili ma lē masuia i soo se mea lava, ona o le faia o lena mea o le a taofia ai lou alualu i luma pe tuu ai oe i se tulaga lē talafeagai e ono taofia ai lou alualu i luma e faavavau.
Mo se faataitaiga, afai ua iloa tele oe o se tagata Amerika, o i latou e le o ni tagata Amerika e ono manatu, “Ua ou iloaina mea uma e ao ona iloa e uiga ia te oe” ma maua ai ni talitonuga le moni e uiga ia te oe.
Afai e te faailoa oe lava e ala i au fegalegaleaiga faaupufai, o le a vave lava ona faavasegaina oe i ni talitonuga patino—e ui ou te le iloa se tasi e talitonu i mea uma e taliaina i le taimi nei e lana vaega faaupufai.
E mafai ona tatou talanoa pea, ma toe iloilo ni tapulaa o igoa eseese ua tatou tuuina i o tatou lava luga pe tuu foi e isi tagata i o tatou luga.
E ono faailoga au e nisi o se “toeaina matua.” Ae ou te laitiiti mamao lava ia Atamu—ma Noa foi.14 O le faaituau, faailogalanu, faailoga tagata, faailoga itupa, ma le anoanoai o isi “faailoga” faapena e tapulaa i le lalolagi atoa.
E matautia tele pe a talitonu se tasi i le igoa valaau (label) e avatu e se isi tagata ia i latou. Mafaufau i le lototiga o se tamaitiiti ua ta’u i ai, “O oe e te valea.” O faailoga ma igoa valaau e malolosi tele!
E fiafia le fili i igoa valaau ona latou te vaeluaina i tatou ma tapulaa le auala tatou te mafaufau ai e uiga ia i tatou lava ia ma i le tasi ma le isi. E faanoanoa tele pe a tatou faamamaluina igoa valaau e sili atu i lo tatou faamamaluina o le tasi ma le isi.
O igoa valaau e mafai ona taitai atu i le faamasino atu ma le ita. Soo se sauaga po o le faailogalanu i se isi tagata ona o le tagatanuu, ituaiga, tulaga faaleitupa, itupa, faailoga faaleaoaoga, aganuu, po o isi mea taua ua faailoga ai, e tausuai lea i lo tatou Māta’isau. O se uiga pa’a’ā faapena e mafua ai ona tatou ola i lalo ifo o lo tatou tulaga o ni Ona atalii ma afafine o le feagaiga!
O le mea moni, o loo i ai ni igoa valaau eseese atonu e taua tele ia te outou. Faamolemole aua ne’i malamalama sese mai ia te au. Ou te le o fai atu o isi faailoga ma igoa e iloa ai e le taua. E faigofie lava lau tala e leai se faailoga e tatau ona aveesea, suitulaga, pe faamuamua foi i lo nei faailoga tumau e tolu: “atalii/afafine o le Atua,” “tama o le feagaiga,” ma le “soo o Iesu Keriso.”
Soo se igoa e iloa ai outou e le ogatusa ma nei faailoga autu e tolu o le a iu lava ina latou faatoilaloina outou. O isi igoa valaau o le a tou le fiafia ai i se taimi ona e le o ia i latou le mana e taitai atu ai outou e agai atu i le ola e faavavau i le malo selesitila o le Atua.
O igoa faalelalolagi e iloa ai outou o le a le taitai avatua ia te outou se vaaiga mamao o tagata e mafai ona avea ai outou mulimuli ane. O le a le mafai ona latou faamautu atu lou kenera paia (DNA) po o lou gafatia paia e le muta.
Ona o loo i ai se fuafuaga silisili o le faaolataga na faia e le Tama Faalelagi, pe le o manino mai ai ea o loo i ai foi sou taunuuga paia?15
Aua ne’i e sasi ai: O lou gafatia e paia. Faatasi ai ma lau sailiga filiga, o le a avatu e le Atua ia te oe nai vaaiga o le tagata e mafai ona e avea ai.
O ai ea la oe? O le mea muamua lava ma le sili, o oe o se atalii ma se afafine o le Atua, o se tama o le feagaiga, ma se soo o Iesu Keriso. A o e opomauina nei upumoni, o le a fesoasoani atu le Tama Faalelagi ia te oe ia ausia lau sini silisili o le ola e faavavau i Lona afioaga paia.
Lua: Ia iloa le upumoni e uiga i mea ua ofoina atu e le Atua le Tama ma Lona Alo o Iesu Keriso ia te oe.
I se faapuupuuga, ua La ofoina atu ia te oe mea uma!
O le fuafuaga a le Tama Faalelagi mo Ana fanau ua faatagaina ai i tatou ia ola i le nofoaga ma le auala o loo Ia soifua ai ma ia avea atili e faapei o Ia. O Lana Fuafuaga ua mafai moni ai ona avanoa faamanuiaga aupito silisili o le faavavau atoa mo i tatou, e aofia ai le gafatia mo i tatou e avea ai ma “suli faatasi ma Keriso.”16
Ua silafia e le Atua mea uma ma silasila i mea uma. I le faavavau atoa, e leai se tasi o le a sili atu ona iloaina oe pe popole ia te oe nai lo Ia. E leai se tasi o le a sili ona latalata ia te oe i lo Ia. E mafai ona sasaa atu lou loto ia te Ia ma faatuatuaina o Ia e auina mai le Agaga Paia ma agelu e tausi oe. Na ia faaalia Lona alofa silisili ina ua Ia auina mai Lona Alo e Toatasi na Fanaua e maliu mo oe—e avea ma ou Faaola ma Togiola!
E ala i Lana Togiola, na manumalo ai le Alii o Iesu Keriso i le Lalolagi.17 O le mea lea, o Ia o lē ua “malosi e … faamama [outou] mai i amioletonu uma.”185 O le a Ia laveaiina outou mai i o outou tulaga sili ona pagatia i Lana lava ala ma le taimi.19 Pe a outou o mai ia te Ia i le faatuatua, o le a Ia taiala, faasaoina, ma puipuia outou. O le a Ia faamalolo lou loto nutimomoia ma faamafanafana oe i ou faanoanoaga.20 O le a Ia tuu atu ia te oe le avanoa e maua ai Lona mana. Ma o le a Ia faia mea faigata i lou olaga e avea ma mea faigofie.
E naʻo Iesu Keriso lava le puna tumau o le faamoemoe, filemu, ma olioli mo oe. E le mafai e Satani ona faaluaina soo se mea o nei mea. Ma e le tāitāi fesoasoani atu Satani ia te oe.
I le isi itu, o le galuega a le Atua ma Lona mamalu o le aumaia lea o le “tino ola pea ma le ola faavavau o le tagata.”21 O le a faia e le Atua mea uma Na te mafaia, vagana ai le aiāina o lou faitalia, e fesoasoani ia te oe ia le misia faamanuiaga aupito silisili o le faavavau atoa.
Ua i ai i le Atua se alofa faapitoa mo tagata taitoatasi e osia se feagaiga ma Ia i vai o le papatisoga.22 Ma o lena alofa paia e faalolotoina a o osia isi feagaiga faaopoopo ma tausia ma le faamaoni. Ona oo lea i le iuga o le olaga faaletino, e maeu le toefaatasia o fanau taitasi o le feagaiga ma lo tatou Tama Faalelagi.23
E popole tele foi o Ia ia maua e Ana fanau uma se avanoa e faalogo ai i tala fiafia o le talalelei toefuataiina. Ua auina mai e le Tama Faalelagi Ana fanau i le lalolagi mo le silia ma le ono afe tausaga. O le toatele o nei tagata e lei mauaina lava sauniga e agavaa ai i latou mo le ola e faavavau. O le mea lena e taua tele ai malumalu. O le mafuaaga lena ua avea ai le faapotopotoina o Isaraelu i itu uma e lua o le veli, o le galuega aupito maoae i le lalolagi i aso nei. O outou, au uo pele i lenei galuega paia, ua i ai se matafaioi taua i lenei faapotopotoina, ma ou te faafetai atu ia te outou mo lena mea.
I lea tulaga ua ta’ita’i atu ai nei a’u i lo’u manatu lona tolu.
Ia iloa le upumoni e fesootai ma lou liuaina. O le mea moni e tatau ona e umia e oe lava ia lou liuaina. E leai se isi e mafai ona ia faia mo oe.
Ia, e mafai ona ou valaaulia outou ia mafaufau i ni nai fesili? E te fia manao e lagona le filemu e uiga i popolega ua lofituina ai oe i le taimi nei? E te fia manao ia iloa atili Iesu Keriso? E te fia manao e aoao i le auala e mafai ai e Lona mana paia ona faamalolo ou manua ma vaivaiga? E te fia manao e lagona le mana matagofie ma mālū o le Togiola a Iesu Keriso o galue i lou olaga?
O le saili e tali nei fesili o le a manaomia ai se taumafaiga—se taumafaiga tele. Ou te augani atu ia te outou ia pulea lau molimau. Galue i ai. Umia. Tausi i ai. Faafailele ina ia tuputupu ae. Fafaga i upumoni. ’Aua ne’i faaleagaina i filosofia sese o alii ma tamaitai le talitonu ona e tuufesili lea pe aisea ua vaivai ai lau molimau.
Punouai i tatalo faatauanau ma lotomaualalo i aso taitasi. Tausia lelei oe lava ia i afioga a perofeta anamua ma aso nei. Ole atu i le Alii e aoao oe i le auala e faalogo lelei ai ia te Ia. Faaalu atili se taimi i totonu o le malumalu ma i galuega o talafaasolopito o aiga.
A o e faia lau molimau ma au faamuamua sili ona maualuga, vaavaai mo ni vavega e tutupu i lou olaga.
Afai e i ai ni au fesili—ma ou te faamoemoe e i ai—saili ni tali faatasi ma manaoga faatauanau ia talitonu. Aoao mea uma e te mafaia e uiga i le talalelei ma ia mautinoa e te liliu atu i puna e faatumulia i upumoni mo le taitaiga. Ua tatou ola i le tisipenisione lea e “leai ai se mea o le a taofia.”24 O lea, o le a i ai le taimi o le a tali mai ai e le Alii a tatou fesili uma.
I le taimi nei, faatofu oe lava ia i le faatanoavai faamanuiaina o faaaliga ua tatou maua i o tatou tamatamailima. Ou te folafola atu o le faia o lena mea ole a faamalosia ai lau molimau, e tusa lava pe lei taliina nisi o au fesili. O au fesili faamaoni, e fesiligia i le faatuatua, o le a taitai atu ai e le aunoa i le faatuatua sili atu ma le iloa sili atu.
Afai e oo ina o ese ni uo ma aiga mai le Ekalesia, faaauau pea ona alolofa ia i latou. E le mo oe le faamasino atu i filifiliga a se isi e pei lava foi ona le tatau ai ona faitioina oe mo le tumau ai faamaoni.
Ia, faamolemole faafofoga mai pe a ou fai atu: Aua nei taitaieseina outou e i latou e i ai ni masalosaloga ua faateteleina e ni mea e le o mafai ona e vaaia i o latou olaga. O le mea sili o mea uma, tuu atu i au uo masalosalo ia vaaia le tele o lou alofa i le Alii ma Lana talalelei. Ia faaofo o latou loto masalosalo i lou loto talitonu!
A o e puleaina lau molimau ma faatupulaia, o le a avea oe ma se meafaigaluega sili ona malosi i aao o le Alii. O le a “musuia oe e se galuega sili atu”25—o le galuega a Iesu Keriso!
E leai se mea o tupu i lenei lalolagi e sili atu ona taua nai lo le faapotopotoina o Isaraelu mo Ia. Faailoa atu i lou Tama Faalelagi e te manao e fesoasoani. Ole atu ia te Ia e faagalue oe i lenei galuega mamalu. Ona e me’i lea i tua ma maofa i mea e tutupu pe a e faamuamuaina le Atua i lou olaga.
A‘u uo talavou pele, ou te alofa ia te outou! Ou te faafetai atu ia te outou. Ou te talitonu ia te outou. I le avea ai ma perofeta a le Alii, ou te faamanuia ia te outou ia iloa le upumoni po o ai oe ma ia faataua le upumoni e uiga i lou gafatia moni mamalu o i ai. Ou te faamanuia ia te outou ia pulea a outou molimau. Ma ou te faamanuia ia te outou ia i ai le manao ma le malosi e tausi ai a outou feagaiga.
A outou faia, ou te folafola atu o le a outou lagonaina le tuputupu ae faaleagaga, saolotoga mai le fefe, ma se talitonuga maumaututu e seasea e mafaufauina i le taimi nei. O le a outou maua le malosi e maua ai se tosinaga lelei e sili atu i lou malosiaga faalenatura. Ma ou te folafola atu o le a matua sili ona faafiafiaina o outou lumanai nai lo se mea e mafai ona outou talitonu i ai i le taimi nei.
Ou te faamanuia atu ai ia te outou, ma toe faailoa atu lo’u lotofaafetai ma le alofa mo outou i le suafa paia o Iesu Keriso, amene.