Lototele, Faatamalii, ma le Tutoatasi
Faigalotu i le Lalolagi Atoa mo Talavou Matutua • 11 Setema, 2022 • Tapeneko i le Aai o Sate Leki
Elder Dale-G. Renlund: Faafetai. Ua tatou potopoto i le Tapeneko faasolopito o Sate Leki, ae o la tatou aofia o le lalolagi atoa. I tusitusiga paia atoa lava o loo fetalai mai ai le Alii ia i tatou ia manatua. O le manatuaina o la tatou talatuu faifaatasi o le faatuatua, tuuto, ma le tutumau ua tuuina mai ai ia i tatou le malamalama ma le malosi ao tatou feagai ai ma luitau o o tatou aso.
O le manao ina ia “manatua le alofa mutimutivale tele o le Alii i le fanauga a tagata”1 na afua ai le faasologa o voluma e fa o le Au Paia: O Le Tala o le Ekalesia a Iesu Keriso i Aso e Gata Ai . E tolu voluma ua uma ona lomia ma faasalalauina atu. O lenei faamatalaga o talafaasolopito e aofia ai ni tala o ni Au Paia o Aso e Gata Ai faamaoni i le taimi ua tuanai. E aumaia ia i tatou ni faataitaiga moni o le olaga o tagata na fiafia i le talalelei a Iesu Keriso, osia ni feagaiga, ma agai i luma o le ala o feagaiga ina ia iloa lo tatou Faaola, o Iesu Keriso.
Sister Ruth L. Renlund: Matou te fiafia e taulai atu i aafiaga moni o le olaga ua mafai nei ona e faitauina i le Au Paia: Lototele, Faatamalii, ma le Tutoatasi, le voluma lona tolu o le faasologa. O lenei voluma ua tusia ai le talafaasolopito o le Ekalesia i le va o le faapaiaga o le Malumalu o Sate Leki i le 1893 ma le faapaiaga o le Malumalu o Bern Suitiselani i le 1955. I le taimi lea, o loo faaalia mai ai faaaliga faifai pea i le Ekalesia e ala mai i perofeta a le Alii ma i tagata taitoatasi. O le Voluma 3 o le Au Paia e fesoasoani tatou te malamalama ai i lo tatou lava talafaasolopito, tagata sa feola ai, ma lo tatou Faaola.
Elder Renlund: I lea vaitaimi, na auai ai vaega uma e lua o ou matua matutua i le Ekalesia. Sa malaga ese atu o’u matua i le Aai o Sate Leki ona sa la faia se folafolaga e faaipoipo i se malumalu. I le 1950 sa leai se malumalu i Europa. Sa la mauaina taitoatasi o la faaeega paia i le Malumalu o Sate Leki, ma faalogo i faatonuga i le gagana Peretania, i sina malamalama itiiti lava. Sa la faaipoipo ma faamauina ma faitaulia i laua ua faamanuiaina e faavavau. O le la filifiliga e faia soo se mea e tatau ona faamauina ai i le malumalu ua i ai foi sona aafiaga e faavavau i lo’u olaga.
O le Au Paia voluma 3, o lo matou tupuaga lenei, pe tatou te o mai mai uluai paionia, e pei o Sister Renlund, pe mai paionia mulimuli ane, e pei o a’u, pe o nisi o outou o ni paionia i le faatuatuaga. O outou o se vaega taua o le faaauauina o le talafaasolopito o lenei Ekalesia. Matou te faafetai atu ia te outou mo mea uma o loo outou faia e fausia ai i luga o le faavae o le faatuatua na faataatia e o outou ma o outou augatuaa. “Matou te tatalo o le a faateleina e lenei voluma [o le Au Paia] lo outou malamalama i le tuanai, faamalosia lo outou faatuatua, ma fesoasoani ia te outou ia osia ma tausia feagaiga na e taitai atu ai i le faaeaga ma le ola e faavavau.”2
Sister Renlund: Ua ou fiafia lava e faasoa atu tala mai le voluma 3 o le Au Paia. Tatou amata!
Elder Renlund: Tatou amata i se faataitaiga o le Toefuataiga faifai pea o le Ekalesia. Ua aoao soo mai Peresitene Russell M. Nelson e faapea o le Toefuataiga “o se faagasologa, e le o se mea e tupu, ma o le a faaauau pea seia toe afio mai le Alii.”3 O se faataitaiga mai le faaiuga o le soifuaga o Peresitene Iosefa F. Samita o se ata sili lea.
Iosefa F. Samita ma Julina Lambson Samita
I le 1918, sa le lelei le soifua maloloina o Peresitene Samita, ma atonu sa ia silafia e le o toe umi lona soifua. Sa foliga mai na siomia o ia e le oti. Muamua, o lona atalii matua, o Ailama, na ma’i ma maliu i le pitogaau. Sa sasaa atu e Peresitene Samita lona faavauvau i lana apitalaaga, “Ua saeluaina lo’u agaga. … E! Le Atua e, fesoasoani mai ia te a’u!”4 Lua, na faateteleina le faanoanoa o Peresitene Samita ina ua maliu Ida, le toalua o Ailama, i le faaletonu o le fatu i se taimi e lei leva mulimuli ane.
Tolu, sa ia faitau i lipoti matautia e uiga i le taua a le lalolagi lea na sasaofaaafi. I le taimi o le taua, e 20 miliona fitafita ma tagata na maliliu. Fa, o se faama’i matautia o le fulū na fasiotia ai tagata i le lalolagi atoa. O le aofai o tagata maliliu i le lalolagi atoa sa le itiiti ifo ma le 50 miliona. O nei tagata maliliu na aumaia ai le faanoanoa tele ma le lototiga i aiga. Sa faanoanoa Peresitene Samita i le maliliu o tagata. E le gata i lea, sa faataotolia o ia mo le lima masina. E talafeagai le faapea atu sa i ai le oti i le mafaufau o le perofeta.
E i ai ii ia te a’u se Tusi Paia na umia e Peresitene Samita. Atonu na ia faaaogaina [le tusi lenei] po o se isi e uunaia ai se faaaliga autu.
Sister Renlund: I le aso 3 o Oketopa, 1918, sa nofo ai o ia i lona potu i le Fale Ofagapi, e tasi le poloka mai iinei, “ma tomanatu i le Togiola a Iesu Keriso ma le togiolaina o le lalolagi. Sa ia susu’e … i le 1 Peteru ma faitau e uiga i le Faaola o loo talai atu i agaga i le lalolagi o agaga. … Sa afio ae le Agaga i luga o [Peresitene Samita], ma tatala [mata] o [lona] malamalamaaga.” Sa ia vaai atu i le lalolagi o agaga lea sa faatalitali ai ma le olioli le motu o tagata o “tamaitai ma alii amiotonu o e na maliliu a o le’i oo i le galuega a le Faaola i le olaga nei, mo Lona afio mai iina e folafola atu lo latou faasaolotoina mai noataga o le oti.
“Sa faaali atu le Faaola … , ma sa olioli agaga amiotonu … . Sa latou tootutuli i Ona luma, ma faailoa atu o Ia o lo latou Faaola ma le Laveai mai le oti ma filifili o seoli. …
“… Sa malamalama [foi Peresitene Samita] e le’i afio patino le Faaola i agaga lē usiusitai. Ae, sa ia faatulagaina agaga amiotonu … e avatu le savali o le talalelei i agaga i le pogisa. I lenei auala, o tagata uma o e na maliliu i le solitulafono pe aunoa ma se malamalama i le upumoni e mafai ona aoao e uiga i le faatuatua i le Atua, salamo, papatisoga sui mo le faamagaloina o agasala, le meaalofa o le Agaga Paia, ma isi mataupu faavae taua uma o le talalelei. …
Elder Renlund: “Ona iloa ai lea e le perofeta o le [Au Paia] faamaoni i lenei tisipenisione o le a faaauau pea a latou galuega i le olaga a sau e ala i le talai atu o le talalelei i agaga o e sa i ai i le pouliuli ma i lalo o le nofo pologa i le agasala. [Na ia matauina,] ‘O e ua oti ua salamo o le a togiolaina, e ala i le usiusitai i sauniga o le maota o le Atua, … ma a uma ona latou totogi o le sala o a latou solitulafono, ma faamamaina, o le a maua se taui e tusa ma a latou galuega, ona o i latou o suli o le olataga.’
Sister Renlund: “… O le taeao na sosoo ai, [sa ofo nisi e vaai sa auai o ia] i le sauniga muamua o le konafesi aoao ia Oketopa e ui i le le lelei o lona soifua maloloina. I le naunau ai e talanoa atu i le potopotoga, sa ia tu atu ai ma le le malosi i le pulelaa [i lenei fale], ma sa tetete lona tino telē mai le taumafaiga. … O le leai o se malosiaga e tautala ai e uiga i lana faaaliga e aunoa ma le faatoilaloina e lagona, sa na ona ia pa’i atu lava i ai. ‘Ou te le’i nofo na o a’u i nei masina e lima,” na ia ta’u atu ai i le faapotopotoga. ‘Sa ou mafuta i le agaga o le tatalo, o aioiga, o le faatuatua ma le naunautaiga; ma sa faia ni a’u fesootaiga faifai pea ma le Agaga o le Alii. O se sauniga fiafia i lenei taeao mo a’u,’ o lana tala lea. ‘Ia faamanuia outou e le Atua.’”5
Sa faalau mai e Peresitene Samita le faaaliga i lona atalii o Iosefa Filitia Samita ina ua maea le konafesi aoao. O se tasi lenei o kopi na ia sainia ma auina atu i le Au Peresitene Sili ma le Korama a Aposetolo e Toasefululua. Sa latou faitau i le faaaliga ma faamaonia atoatoa,6 ma ua faapaiaina o le vaega 138 o le Mataupu Faavae ma Feagaiga. Ua tatou malamalama nei e popole le Atua ia i latou o loo i le isi itu o le veli o le olaga faaletino. E popole o Ia i lo latou togiolaina. O “tagata maliliu” e le o maliliu moni. O le Toefuataiga faifai pea na aumaia ai lenei malamalama ia i tatou ma aumaia le mafanafana ma le faamaninoga e uiga i le isi lalolagi.
Elder Renlund: I le tele o itu, o faaaliga patino e manaomia ai lea faagasologa e tasi. Mo a’u, e tatau ona ou taulai atu i se faafitauli. E tatau ona ou suesue i ai ma mafaufau i ai. E tatau ona ou fatuina ni vaifofo eseese. E foliga mai e na o le pau lena o le taimi e mafai ai ona oo mai faaaliga patino. E tele taimi e oo mai ai faaaliga ia te a’u i ni faatonuga pupuu ma taua, e pei o le “Alu,” “Fai,” po o le “Fai mai!”
Sister Renlund: E moni foi lena mea mo a’u. A uma ona ou mafaufau loloto, suesue, ma tatalo, e masani ona i ai ni o’u mafaufauga po o ni manatu e oo mai i lo’u mafaufau ou te iloa e le o a’u e anaina. E faamalosiau mai ai pea a’u o loo silafia a’u e le Atua ma uunaia a’u e ala i le Agaga Paia e fai mea lelei.
Elder Renlund: E tele ina oo mai faaaliga ona e i ai se manaoga faapitoa. Sa tupu se faataitaiga ofoofogia i le konafesi aoao ia Aperila 1894. Sa faasilasila e Peresitene Uilifoti Uitilafi i ona fesoasoani ma le Korama a Aposetolo e Toasefululua e faapea, sa ia mauaina se faaaliga e faatatau i faamauga o le malumalu. Fai mai a ia, “Ua ta’u mai e le Alii ia te a’u e sa’o mo fanau le faamauina i o latou matua, ma i o latou matua i le mamao e mafai ai ona matou maua faamaumauga.”7 O lenei faaaliga na oo mai i le silia ma le 50 tausaga talu ona toefuatai mai e Elia le pule mo faamauga i le Malumalu o Katelani.
Sister Renlund: I le Aso Sa, i le konafesi aoao i le 1894, sa tautino mai ai e Peresitene Uitilafi, “‘Tatou te lei mauaina se faaaliga. … E le’i mae’a foi le tatou tiute i le galuega a le Atua.’ Sa ia saunoa i le ala na tauaveina ai e Polika Iaga le galuega a Iosefa Samita o le fausiaina o malumalu ma le faatulagaina o sauniga o le malumalu. ‘Ae na te lei mauaina faaaliga uma e patino i lenei galuega,’ na faamanatu atu ai e Peresitene Uitilafi i le faapotopotoga. ‘Sa lei faia foi e Peresitene Teila, po o Uilifoti Uitilafi. O le a leai se mutaaga o lenei galuega seia faaatoatoaina.’”8
Talu mai tausaga o Navu, sa faia e tagata o le ekalesia papatisoga mo e ua maliliu mo tagata o aiga ua maliliu. Peitai e le’i faaalia lava le taua o le faamauina i se tuaa o se tagata lava ia. Na faamatala mai e Peresitene Uitilafi, “Matou te mananao i le Au Paia o Aso e Gata Ai ia saili o latou gafa i le mamao e mafai ona oo i ai, ma ia faamauina i o latou tama ma tina. … Ia faamauina fanau i o latou matua, ma faasolo lo latou fesootaiga ia oo atu i le mamao e mafai ona oo i ai.”9
Sa “faamanatu atu [e Peresitene Uitilafi] i le Au Paia le faaaliga a Iosefa Samita e uiga i lona uso o Alavini i le Malumalu o Katelani. “O i latou uma o e na maliliu e aunoa ma se malamalama e uiga i lenei talalelei, o e semanū latou te taliaina pe a na faatagaina i latou e ola, o le a avea ma suli o le malo selesitila.’
“‘E faapena foi i o outou tamā,’ na saunoa ai Peresitene Uitilafi e uiga ia i latou i le lalolagi o agaga. ‘O le a toalaiti lava, pe afai e i ai, o le a le taliaina le talalelei.’
“A o lei faaiuina lana lauga, sa ia uunaia le Au Paia ia … saili o latou aiga ua maliliu. ‘Uso e ma tuafafine,’ na ia saunoa ai, ‘ia tatou o pea ma a tatou talafaamaumau, faatumuina ma le amiotonu i luma o le Alii, ma faatino lenei mataupu faavae, ma o le a i ai faamanuiaga a le Atua ia i tatou, ma o i latou o e togiolaina o le a faamanuiaina i tatou i aso a sau.’”10 O lenei faaaliga na tuuina atu ai le mafuaaga mo tagata e toe foi soo ai i le malumalu e faatino faaeaga ma sauniga sui mo o latou tuaa ua maliliu. Sa amata ona tausia ma le faaeteete e aiga ia faamaumauga o a latou sauniga ma le galuega na latou faia e faamaea ai i latou i tusi e pei o le tusi lenei lea e faaalia ai le galuega na faia mo tagata o le aiga o Jens Peter ma Marie Dame.
Elder Renlund: O aso nei, o le aoaoga faavae o le faamauga i augatupulaga e foliga mai o se mea masani ia i tatou, ae na manaomia ai se faaaliga mai le Alii e faatulaga sa’o ai le faamauga o aiga. O lenei faaaliga sa i ai se aafiaga tuusao i lo’u aiga i le motu mamao o Larsmo, e mamao ese mai le talafatai i sisifo o Finelani. E le o i ai lenei tala i le Au Paia, voluma 3, ae e teupeleina i lo’u aiga. I le 1912, sa faalogologo ai ou matua matutua faaletamā, o Lena Sofia ma Matts Leander Renlund, i faifeautalai mai Suetena o talai atu le talalelei toefuataiina. Sa papatisoina Lena Sofia ma Leander i le aso na sosoo ai. Sa la maua le olioli i lo la faatuatuaga fou ma i le avea ai ma se vaega o se paranesi laitiiti, o le muamua lea i Finelani. Ae paga lea, na suia le tulaga o le olaga ma taia i se faalavelave.
I le 1917, na maliu ai Leander i le mamapala, ma tuua ai Lena Sofia o se fafine ua oti lana tane ma ua maitaga i lana tamaitiiti lona sefulu. O lena tamaitiiti, o lo’u tama, na fanau i le 2 masina talu ona maliu Leander. E toatele tagata o le aiga na maliliu i le mamapala. Na iu ina tanuina e Lena le toa 7 o lana fanau e toa 10, e faaopoopo atu ia Leander. Sa o se tauiviga faigata tele mo ia, se tamaitai mativa ma le le taualoa, le tau faamaopoopoga o vaega na totoe o lona aiga.
Na toeitiiti lava atoa le luasefulu tausaga e le’i maua sana moe lelei i le po. Sa galue malosi o ia i soo se galuega i le aso ia lava ai se tupe mo meaai e aai ai. A oo i le po, na te tausia tagata o lona aiga na lata ina maliliu. E faigata le mafaufau i le tulaga na feagai ma Lena Sofia.
Sa ou feiloai ia Lena Sofia i se tasi taimi ia Tesema 1963. Sa 11 ou tausaga ae 87 o ia. Sa faano’uno’u o ia ona o le galue malosi i lona soifuaga atoa. O le pa’u o ona foliga ma ona lima sa matuai mafiafia ma manumi, na pei le malo ma foliga mai o se pa’u na loa ona faaaoga. A o ma feiloai, sa tu o ia ma tusi atu i se ata o Leander ma fai mai ia te a’u, i le FaaSuetena, “Det här är min gubbe.” “O lo’u toalua lea.”
Sa ou manatu sa sese lona faaaogaina o le tulaga o le veape i le taimi nei. Talu ai na maliu Leander mo le 46 tausaga, sa ou faasino atu lenei mea sese manino i lo’u tina. Sa na ona faapea mai lo’u tina ia te a’u, “E te le malamalama.” Ou te le malamalama. Na silafia e Lena Sofia, o lana tane ua loa ona maliu sa, ma o le a tumau pea ona avea ma ana tane i le faavavau atoa. E ala i le aoaoga faavae o aiga e faavavau, na tumau ai ona i ai Leander i lona olaga, ma se vaega o lona faamoemoega sili mo le lumanai.
Lena Sofia Renlund, le tina matua i le itu o le tama o Dale G. Renlund.
Dale G. Renlund talavou
A o lei faapaiaina le Malumalu o Helsinki Finelani i le 2006, sa siaki e lo’u uso po o a galuega o sauniga sa manaomia mo le laina a lo matou tama. O le mea na ia maua o se faamautinoaga mausali o le faatuatua o Lena Sofia i le pule o faamauga. Na auina atu e Lena Sofia faamaumauga faaleaiga mo lana fanau ua maliliu, o e ua silia ma le valu tausaga le matutua ina ua latou maliliu, ina ia faatinoina galuega o le malumalu i le 1938. O nisi nei o uluai sauniga na auina atu i se malumalu mai Finelani.
Na onosaia e Lena e ala i le manatuaina pea o le aoaoga faavae o le faaolataga. Sa ia mafaufau i ai o se tasi o alofa mutimutivale tele o le Atua na ia iloa ai e faavavau aiga a o lei oo mai nei mala ia te ia. O se faailoga mo lona liua loloto i le talalelei toefuataiina a Iesu Keriso o lana galuega i le talafaasolopito o aiga, o le galuega na faaalia e ala mai ia Iosefa Samita, Uilifoti Uitilafi, ma Iosefa F. Samita. Sa pei o ia o i latou o e na “oti … o faatuatua, e lei maua mea na folafolaina, a ua iloa ai e i latou a e mamao, na mautinoa foi, ma latou talia ma le fiafia.”11
Sister Renlund: Talu ai o le toefuataiga o se faagasologa faifai pea, e tatau ona tatou tulimatai atu i ai, a ea? E itiiti ifo ma le tausaga talu ai, na saunoa ai Peresitene Nelson, “O fetuunaiga o i ai nei i faiga faavae o le malumalu, ma isi o le a mulimuli mai, o ni faamaoniga faifai pea ia o loo taitaia tonu e le Alii Lana Ekalesia. O loo Ia saunia avanoa mo i tatou taitoatasi e faamalolosia ai ma le mataalia atili o tatou faavae faaleagaga e ala i le faatutotonuina o o tatou olaga ia te Ia ma i sauniga ma feagaiga o Lona malumalu.”12 Sa faamalamalama mai e Peresitene Nelson e faapea o nei fetuunaiga e faia “I lalo o le taitaiga a le Alii ma i se tali mai i a matou tatalo” aua e finagalo le Alii ia tatou “malamalama ma le manino tele i le mea tonu ua [tatou] osia feagaiga e fai. … Ina ia malamalama i [o tatou] avanoa, folafolaga, ma tiutetauave … [ma] ia maua ni malamalamaaga ma ni fagua faaleagaga.”13
O nisi taimi e oo mai faaaliga i lena taimi. Sa tupu lenei mea i se isi faataitaiga o le Toefuataiga faifai pea a o Peresitene o le Ekalesia Lorenzo Snow. I le 1898, sa i ai le Ekalesia i se tulaga faigata tautupe. I le maualuga o ana faatosinaga e tetee i autaunonofo, sa faatagaina ai e le Konekeresi a le Iunaite Setete le faoa o meatotino a le Ekalesia. I le popole ai o le a faoa e le malo a latou foai, o le toatele o le Au Paia na le toe totogiina le sefuluai, ma faaitiitia ai le punavai autu o mea tautupe a le Ekalesia. Sa nonō mai e le Ekalesia se tupe ina ia lava ai tupe e uunai ai i luma le galuega a le Alii. Sa faia foi e le Ekalesia ni nonogatupe e totogi ai le tau o le faamaeaina o le Malumalu o Sate Leki. Sa mamafatu i le mafaufau o le perofeta e 85 tausaga lenei tulaga tautupe.14
“I se tasi taeao po ia Me, sa nofo ai Peresitene Snow i le moega ae sau lona atalii o LeRoi i totonu o le potu. … Sa faafeiloai o ia e le perofeta ma faasilasila atu, ‘O le a ou alu i St. George.’
“Sa faateia LeRoi. O St. George e … tolu selau maila le mamao.” Ina ia taunuu iina, sa tatau ona latou o i le nofoaafi i le silia ma le 200 maila i saute i Milford ona malaga lea i le isi 105 maila i le taavale solofanua. O se malaga faigata lenei mo se toeaina matua. Ae ui i lea, sa latou faia le malaga umi ma le faigata. “Ina ua latou taunuu … , pefua ma vaivai, … sa fesili [se] peresitene o le siteki pe aisea ua latou o atu ai. ‘Ia,’ na saunoa ai Peresitene Snow, ‘Ou te le iloa po o le a le mea ua matou o mai ai i St. George, ae na o le Agaga na ta’u mai ia i matou e o mai.’
“O le aso na sosoo ai, 17 o Me, na feiloai ai le perofeta ma tagata o le ekalesia i le Tapeneko o St. George, o se fale maa oneone mumu e i matusisifo o le malumalu.” Ina ua tulai Peresitene Snow e lauga atu i le Au Paia, sa ia saunoa, “E tau le mafai ona tatou faailoa atu le mafuaaga na matou o mai ai, ae ou te manatu o le a fetalai mai le Alii ia i tatou.”
Elder Renlund: “I le taimi o le lauga, sa faafuasei ona taofi Peresitene Snow, ma sa filemu lava le potu. Sa susulu ona mata, faapea ma ona foliga. Ina ua ia tatalaina lona gutu, sa malosi atu lona leo. Sa foliga mai na faatumulia le potu i musumusuga a le Atua. Ona ia saunoa lea e uiga i le sefuluai. … Sa ia faanoanoa ona o le toatele … o le Au Paia sa mumusu e totogi atoa le sefuluai. … ‘O se sauniuniga taua lenei mo Siona,’ na ia saunoa ai.
“O le aoauli na sosoo ai, na [aoao atu ai] Peresitene Snow, ‘Ua oo mai nei le taimi mo Au Paia o Aso e Gata Ai uma, e fuafua ia saunia mo le lumanai ma tu mau ma le malosi ona vae i luga ae o se faavae talafeagai, e faia le finagalo o le Alii ma totogi atoa lana sefuluai. O le afioga lena a le Alii ia te outou, ma o le afioga lena a le Alii i nuu uma i le laueleele atoa o Siona.’”
Na aoao mulimuli ane Peresitene Snow, “‘Ua tatou i ai i se tulaga fefefe, ma ona o lena mea ua nofopologa ai le Ekalesia. Na pau le toomaga e mo le Au Paia ia tausia lenei tulafono.’ Sa ia luiina [tagata o le ekalesia] ia usitai atoatoa i le tulafono ma folafola atu o le a faamanuiaina i latou e le Alii mo a latou taumafaiga. Sa ia tautino mai foi o le totogiina o sefuluai o le a avea nei ma se tulaga manaomia mausali mo le auai atu i le malumalu.”15
Sister Renlund: Talu mai lena taimi, e toatele e mafai ona molimau atu e faapea, e liligi mai e le Alii Ana faamanuiaga silisili i luga o i latou o e naunau e usitai i lenei tulafono faigofie. Sa auauna atu Brother Alois Cziep o se peresitene o le Paranesi a Vienna Austria. Sa ia tausia le sefuluai ma isi faamaumauga a le paranesi i lenei pusa malosi tauagafau. I le taimi o le fuavaalele o le Taua Lona II a le Lalolagi, o le aitema muamua lenei na malupuipuia e Peresitene Cziep ma lona aiga nai lo a latou lava meatotino patino.
Ua molimau mai foi nisi e uiga i le luitau i le taliaina o le tulafono ma le mauaina o faamanuiaga ofoofogia o se taunuuga.
O le aafiaga o le aiga o Yanagida i Iapani o se faataitaiga faapena. I le 1948, sa toe auina atu ai foi e le Au Peresitene Sili ia faifeautalai i Iapani. Ina ua fesili atu Toshiko Yanagida i lona tama e uiga i mea tau lotu, sa ia uunaia o ia e auai i se auaunaga a le Au Paia o Aso e Gata Ai. Sa ou auai i le Ekalesia i le 1915.
Sa feiloai Sister Yanagida ma faifeautalai, na liua, ma sa papatisoina ia Aokuso o le 1949 ma sa auai lona tama. Sa sailia mulimuli ane e lona toalua ia faifeautalai ma sa papatisoina e le faifeautalai lava e tasi lea sa aoaoina Sister Yanagida.16
Toshiko Yanagida.
Elder Renlund: Sa tauivi Brother ma Sister Yanagida i le totogiina o le sefuluai. “E lei tele ni [la] tupe na maua, ma o nisi taimi sa la tau mafaufau ai pe na lava se la tupe e totogi ai le meaai o le aoga a le la tama. Sa la faamoemoe foi e faatau se fale. Ina ua maea se tasi o sauniga a le Ekalesia, sa fesili [Sister Yanagida] i se faifeautalai e uiga i le sefuluai. ‘Ua matua matitiva tagata Iapani i le taimi nei ina ua mavae le taua,’ o lana tala lea. ‘E faigata tele le sefuluai mo i matou. E tatau ona ma totogia?’
“Sa tali atu le faifeautalai na poloaiina e le Atua tagata uma e totogi le sefuluai, ma sa ia saunoa e uiga i faamanuiaga o le usiusitai i le mataupu faavae. Sa masalosalo [Sister Yanagida]—ma sa ita teisi. ‘O mafaufauga faaAmerika lenei,’ sa ia fai ifo ai ia te ia lava.
“… Sa folafola atu e se tasi tamaitai faifeautalai ia [Sister Yanagida] o le totogiina o le sefuluai e mafai ona fesoasoani i lona aiga e ausia ai la latou sini o le umia o so latou lava fale. I le mananao ai ia usiusitai, sa tonu ai ia [Brother ma Sister Yanagida] e totogi a la sefuluai ma talitonu o le a oo mai faamanuiaga. …
“Sa amata ona [la] vaai i [na] faamanuiaga … . Sa la faatauina se fanua taugofie i le aai ma tusia ai ni mamanu mo se fale. Ona la talosaga lea mo se nonogatupe mo se fale e ala i se polokalama fou a le malo, ma o le taimi lava na latou maua ai le faamaoniga e fausia, sa amata loa ona latou galulue i luga o se faavae.
“Sa sologa lelei le faagasologa seia oo ina iloa e se asiasi fale e le mafai ona oo mai fuimu i lo latou fanua. ‘O lenei laueleele e le o se fanua e talafeagai mo le fausiaina o se fale,’ na ia tau atu ai ia i la’ua. ‘E le mafai ona toe faaauau i le fausiaina.’
“I le le mautinoa ai po o le a le mea e fai, sa talanoa atu ai [Brother ma Sister Yanagida] i faifeautalai. ‘O le a tatalo ma anapopogi i matou e toaono mo oulua,” na tau atu ai e se alii faifeautalai ia i la’ua. ‘Ia oulua faia foi lea mea e tasi.’ Mo aso e lua na sosoo ai, sa anapopogi ma tatalo ai le au Yanagida faatasi ma faifeautalai. Ona sau lea o le asiasi fale e toeiloilo lo latou fanua. … I le taimi muamua, sa ia tuuina atu i le au Yanagida sina faamoemoe itiiti e pasia le asiasiga. Ae a o ia tilotilo atu i le fanua, sa ia matauina ai se fofo. I se faalavelave faafuasei, e mafai ona oo atu le matagaluega tineimu i le fanua i le na o le aveeseina o se pa sa lata ane. E mafai e le au Yanagidas ona fauina lo latou fale.
‘“Ou te matea atonu na lua faia se mea e tulaga ese le lelei i le taimi ua tuanai,” na fai atu ai le asiasi fale ia i la’ua. ‘I o‘u tausaga uma ou te le’i vaai muamua i se mea faamalieloto.’ Sa matuai fiafia lava [Brother ma Sister Yanagida]. Sa laua anapopogi ma tatalo ma totogi a la sefuluai. Ma e pei lava ona folafola atu e [lena] tamaitai faifeautalai [ofoofogia], o le a i ai so latou lava fale.17
Sa i ai foi i le Au Paia i le salafa o le lalolagi ni aafiaga faapena ina ua latou totogiina le sefuluai. E faamanuiaina e le Alii Lona nuu o e faamaoni ma usiusitai. Ma o le totogi faamaoni o le sefuluai ua mafai ai ona fausia malumalu i le lalolagi atoa.
Sister Renlund: Ou te iloa ua faamanuiaina o tatou olaga i ni auala maaleale ma taua e ala i le ola ai i le tulafono o le sefuluai. O nisi taimi o faamanuiaga e le o mea ia tatou te faamoemoeina ma e faigofie ona le amana’iaina. Peitai e mo’i lava. Ua tatou oo i ai.18
O se tasi o tala ou te fiafia lava i ai o loo ta’ua i le Au Paia o le auala na valaauina ai tamaitai muamua e auauna atu o ni faifeautalai faamisiona. I Egelani i le faaiuga o le vaitau o le 1890, sa feaveai ai tala faapea o tamaitai o le Au Paia o Aso e Gata Ai o ni tagata e talitonu gofie e le mafai ona mafaufau na o i latou. Ona o mai lea o se Au Paia o Aso e Gata Ai mai le Aai o Sate Leki, o Elizabeth McCune, ma lana tama teine i Lonetona mo se asiasiga faaumiumi.
Ina ua la auai i se konafesi a le Ekalesia i Lonetona, sa faateia Elisapeta ina ua oo, “i le taimi o le sauniga o le taeao, sa fai ai e Iosefa McMurrin, o se fesoasoani i le au peresitene o le misiona … ni faamatalaga e le logoleleia e uiga i tamaitai o le Au Paia o Aso e Gata Ai [ma faasilasila atu,] ‘Ua tatou faatasi nei ma se tamaitai mai Iuta … . O le a tatou talosagaina Sister McCune e saunoa i lenei afiafi ma faamatala atu ia te outou lona aafiaga i Iuta.’ Ona ia uunaia lea o tagata uma i le konafesi e aumai a latou uo e faalogo i lana lauga.”
“A o latalata mai le itula o le sauniga, sa faatumulia le potu e tagata. Sa faia e Elisapeta se tatalo le leoa ma tu i luga.” Sa ia talanoa atu i le aofia e uiga i lana faatuatuaga ma lona aiga, ma molimau atu ma le lototoa i le moni o le talalelei. Sa ia fai atu foi, “Ua aoaoina i tatou e la tatou tapuaiga o le avā e tu soosoo tauau ma le tane.” Ina ua uma le sauniga, sa lulu e tagata ese le lima o Elisapeta. ‘Afai e toatele a outou tamaitai o le a o mai iinei,’ na fai mai ai se tasi, ‘o le a tele se lelei o le a oo i ai.’”
“Ina ua uma ona vaaia le aafiaga o Elisapeta i le aofia, sa tusi atu [Peresitene McMurrin i le Peresitene o le Ekalesia:] ‘Afai e toatele ni tamaitai atamai ma popoto na valaauina i misiona i Egelani, … o le a sili atu ona lelei taunuuga.’” “O le faaiuga e valaau tamaitai o ni faifeautalai faamisiona o se vaega o se taunuuga o le talaiga a Elizabeth McCune.”19
Elizabeth McCune.
I le aso 22 Aperila, 1898, sa tuvaa ai Inez Knight ma Jennie Brimhall i le uafu o Livapulu, Egelani. O i la’ua ia na muai vaetofia o ni “faifeautalai tamaitai” mo le Ekalesia.
La te malaga faatasi ma Peresitene McMurrin ma isi faifeautalai i se taulaga i sasae o Livapulu. I le afiafi, sa auai atu ai se motu o tagata toatele i se fonotaga i le auala ma faifeautalai. Sa faasilasila mai e Peresitene McMurrin o le a faia se fonotaga faapitoa i le aso e sosoo ai, ma sa ia valaaulia tagata uma e o mai ma faalogo i le talaiga mai “tamaitai Mamona moni.’”20 O le api talaaga faafaifeautalai lenei a Inez Knight. Sa ia tusia, “I le afiafi sa ou lauga atu ai e ui i le fefe ma le gatete ae na faateia au lava ia.”21 Sa ia iloaina le fesoasoani faalelagi sa ia mauaina ina ua ia tusia, “Sa ou lauga i le afiafi i se faapotopotoga toatele, ae sa faamanuiaina i tatalo a isi faifeautalai.”22 O nei “tamaitai Mamona moni” na latou faia ma le lelei a latou galuega, i le o atu i lea faitotoa ma lea faitotoa ma molimau soo atu i fonotaga i magaala. E lei umi ae faatasi atu i ai isi faifeautalai tamaitai o e sa galulue i Egelani atoa.
Elder Renlund: O Sister Knight ma Sister Brimhall o le amataga lea. I lenei tisipenisione e faitau selau afe tamaitai faifeautalai na auauna atu.23 O se tasi o mea na ou ofo ai e uiga i faifeautalai tamaitai o le, e mafai ona latou mataalia e ala i le avea ma o latou tagata moni. O i latou o ni tamaitai moni o le Au Paia o Aso e Gata Ai. E pei o Sister Knight ma Sister Brimhall, la te talanoa i tagata pe o ai i la’ua ma le mafuaaga la te talitonu ai i mea la te talitonu ai.
O le aafiaga o tamaitai faifeautalai i le faapotopotoina o Isaraelu ua tulaga ese lava. Sa fesili mai se tasi o alii faifeautalai talavou ia te au talu ai nei i se sauniga o fesili ma tali pe aisea e fiafia ai uarota i lana misiona i faifeautalai tamaitai. O la’u tali na faigofie lava, “Ona e tuuina atu e tuafafine o latou loto ma agaga i le galuega. E fiafia tagata o le ekalesia i faifeautalai uma o e faapea, e le toe taofiofia se mea.”
O le tali atu a tamaitai faifeautalai i valaauga faafaifeautalai sa avea ma o loo faaauau pea ona avea ma se vaega tele o le faasalalauina atu o le talalelei. Na saunoa Peresitene Nelson i le konafesi aoao ia Aperila, “Matou te alolofa i faifeautalai tamaitai ma talisapaia i latou ma le loto atoa. O le mea ua outou saofagā ai i lenei galuega e maoae!”24
Sister Renlund: Ua faagaeetia foi a’u i le lelei lea na sau mai ia Sister McCune o le sa lei valaauina ma vaetofia o se faifeautalai. Ae o lenei uso pele na tutupu ni mea ona o lona faatuatua.24
O lenei mea e aumaia ai i tatou i se isi tala ofoofogia o le Au Paia, voluma 3. Tatou te maua faataitaiga o le Au Paia o e na faaalia lo latou avea ma soo i lalo o tulaga e sili ona faigata. Sa faatoilaloina e fili sa i ai muamua le ita ma sa lotogatasi a o latou faalagolago ia Iesu Keriso.
Ina ua mavae le Taua Lona II a le Lalolagi, “sa i ai Netalani [Netherlands] i se tulaga ta’ufaatauvaaina ina ua mavae le lima tausaga o le puleaina [e le faigamalo a Siamani o le Nazi]. E silia ma le luaselau afe tagata Take na maliliu i le taimi o le taua, ma e faitau selau afe fale na faaleagaina pe na faatamaiaina. E toatele le Au Paia i … Netalani sa le fiafia i le au Siamani” ma faapea foi i le tasi ma le isi ona o isi sa tetee atu a o isi sa galulue faatasi ma ē na puleaina i latou. Na iloa lelei le feeseeseaiga.
Elder Renlund: “Sa uunaia e le peresitene o le misiona, o Cornelius Zappey, ia lala o le Ekalesia e faaopoopo a latou sapalai o meaai e ala i le amataina o se galuega faatino o le totoina o pateta e faaaoga ai fatu pateta mai le malo o Take.” Faatasi ai ma lenei faamalosiauga, “sa amataina ai e paranesi i Netalani … ni togā pateta i soo se mea e maua ai se nofoaga, totoina ia pateta i tuāfale, togalaau fugalaau, fanua avanoa, ma ogatotonu o auala.
“E latalata i le seleselega, sa faia ai e [Peresitene Zappey] se konafesi a le misiona i le aai o Rotterdam.” Sa ia iloa mai talanoaga ma le peresitene o le Misiona a Siamani Sasae “e toatele le Au Paia i Siamani na mafatia mai le le lava o meaai. Sa manao [Peresitene Zappey] e fai se mea e fesoasoani ai, o lea sa ia fesili atu ai i taitai i le lotoifale pe latou te mananao e tuuina atu se vaega o la latou seleselega pateta i le Au Paia i Siamani.
“‘O nisi o fili sili ona leaga ua outou fetaiai ona o lenei taua o tagata Siamani,’ na ia faailoa atu ai. ‘Ae o na tagata ua sili atu ona aafia nai lo outou.’
“I le taimi muamua, sa teena e nisi o le Au Paia Take le fuafuaga. Aisea e tatau ai ona latou faasoa atu a latou pateta i tagata Siamani? [O nisi ua leai ni fale] i pomu Siamani pe na [matamata] i ē pele ua matelaina i le oti ona sa ave e ē nonofo i Siamani a latou meaai.”
Sa talosagaina e Peresitene Zappey ia Pieter Vlam, o se uluai pagota o le taua ma le taitai o le paranesi a le Ekalesia i Amsterdam, “e asiasi i paranesi i Netalani atoa ma uunaia i latou e lagolago le fuafuaga,” ma faia se eseesega i le va o faigamalo a Nazi ma tagata Siamani. “O Pieter o se taitai o le Ekalesia ua lava lona tomai ma sa lauiloa le faafalepuipuiina lē tonu o ia i le tolauapiga a Siamani. Afai na i ai se tasi e alolofa ma faatuatuaina e le Au Paia Take i le misiona, o Pieter Vlam.”
A feiloai Pieter ma itu, “sa ia ta’ua ona faigata i le falepuipui. ‘Sa ou oo i lenei mea,’ o lana tala lea. ‘Ua tou iloa na ou oo i ai.’ Sa ia uunaia i latou ia faamagalo atu i tagata Siamani. ‘Ou te iloa le faigata o le alofa ia i latou,’ o lana tala lea. ‘Afai o o tatou uso ma tuafafine i latou, ona tatau lea ona tatou taulimaina i latou o ni o tatou uso ma tuafafine.’
Sister Renlund: “O ana upu ma upu a isi peresitene o paranesi na uunaia ai le Au Paia, ma sa mou ese atu le toasa o le toatele a o latou seleseleina pateta mo o latou [uso ma tuafafine] Siamani.” E le gata i lena, ae o feeseeseaiga ma le le talitonu na i ai i tagata o le ekalesia i totonu o paranesi na amata foi ona mouese atu. Sa “iloa e tagata o le ekalesia e mafai ona latou galulue faatasi e agai i luma.
“O le taimi lea, sa galue ai [Peresitene Zappey], ina ia maua se faatagaga e ave ai pateta i Siamani. … Ina ua taumafai nisi o taitai e taofi fuafuaga o le lafoina atu, sa ta’u atu e [Peresitene Zappey] ia i latou, ‘O nei pateta e a le Alii ia, ma afai o Lona finagalo lea, o le a silasila le Alii i se auala e aumai ai i Siamani.’
O Cornelius Zappey, faifeautalai Take, ma le Au Paia Take o loo utaina pateta mo le la’uina atu.
“Mulimuli ane, ia Novema 1947, na feiloai ai le Au Paia i Take ma faifeautalai i le The Hague e uta … le silia ma le fitusefulu tone o pateta. I se taimi puupuu mulimuli ane, na taunuu ai pateta i Siamani mo le tufatufaina atu i le Au Paia. …
“Na aave atu tala o le galuega faatino o pateta i le Au Peresitene Sili. I le maofa, na saunoa ai Peresitene Tavita O. MaKei, ‘O se tasi lenei o faatinoga silisili o amioga moni faaKerisiano ua oo mai i lo’u mafaufau.’”26
Elder Renlund: O le tausaga na sosoo ai, na toe auina atu ai e tagata Take se uta tele o pateta i le au Siamani. Ma sa latou faaopoopo i ai ‘ia eleni, e faamanaia atili ai le meaalofa. I ni nai tausaga mulimuli ane, i le 1953, sa pa le Sami i Matu, ma sa lolovaia ai le tele o vaega o Netalani, ma tuua ai tagata Take ua le tagolima. O le taimi lea, na auina atu ai e le Au Paia Siamani fesoasoani i Netalani e fesoasoani ia i latou i le taimi o lo latou le tagolima. O galuega alofa a le Au Paia i Take o loo tatagi mai pea mo le tele o tausaga ma tuuina atu ai se molimau tumau o le alofa ma le alofa mama lea e mafai, e oo lava i le va o fili, pe a alolofa muamua tagata masani i le Atua ma o latou tuaoi e pei o i latou lava.
O le naunautaiga e faamagalo atu na aumaia ai le faamalologa i tagata Take. Ua ou iloa e moni foi lena mea mo a’u. Afai ou te le fiafia, e faanoanoa le agaga. Afai ou te ita, ou te faaitiitia le agalelei ma le faaKeriso i a’u amioga i isi. O lenei upumoni ua matagofie ona ta’ua e se tagata i le tusi a Alan Paton i le 1953, Too Late the Phalarope, na faatuina i Apartheid Aferika i Saute, “O loo i ai se tulafono faigata … pe a oo mai se manu’a loloto ia i tatou, tatou te le toe manuia lava seia tatou faamagalo atu.”27
Sister Renlund: E tele naua isi tala musuia mai le talafaasolopito o le Ekalesia i le vaitaimi lea o loo faamatalaina i le Au Paia, voluma 3, tala mai soo se vaega o le lalolagi. Atonu e te fia iloa se mea e uiga ia Viliamu Daniels, o le sa auauna faamaoni mo le tele o tausaga i Cape Town, Aferika i Saute. E ui e lei faauuina o ia i se tofi o le perisitua, ae sa i ai sana molimau faatauanau. 28
Elder Renlund: Po o Rafael Monroy ma Vicente Morales i Mekisiko, o e na faamaturo ona o lo la faatuatuaga. Ma o le tina o Rafael, o Jesusita, ma le faletua, o Guadalupe, o e na taitaia ma le lototoa lo la aiga ma le nuu e ui i taufaamata’u faifai pea.29
Jesusita Monroy.
Sister Renlund: Po o Alema Richards, o le uluai Au Paia o Aso e Gata Ai na manumalo i se pine o le Olimipeka, i se vaega ona sa ia filifili e ola i le Upu o le Poto.30
Elder Renlund: Po o Hirini Whaanga, o le, sa lagolagoina e lona faletua faamaoni, o Mere, na toe foi atu i lona nuu moni i Niu Sila o se faifeautalai e talai atu ma ao mai igoa mo galuega o le malumalu.31
Sister Renlund: Po o Helga Meiszus, o le sa faatuatua pea o se tamaitai talavou o le Au Paia o Aso e Gata Ai i Nazi Siamani e ui i le sauaina e uo, faiaoga, ma taitai o le aoga na i ai.32
Elder Renlund: Po o Evelyn Hodges, o le sa galue o se tagata faigaluega faaagafesootai na faafaigaluegaina e le Aualofa e fesoasoani i aiga ia toe tulai mai i se tulaga lelei i le taimi o le Pa’ū Tele o le Tamaoaiga.33
Sister Renlund: Ia, ua leai so tatou taimi e toe faalauiloa atu ai nisi, ae ou te iloa o le a outou mananao uma e faitau le voluma lona tolu lenei o le Au Paia mo outou lava.
Elder Renlund: Mo a’u lava ia, o le vii sili lava mo lenei vaitau i le talafaasolopito o le Ekalesia o le “Faalogo, Nuu Uma!”34 lea o le a lagiina e le aufaipese e tapunia ai la tatou sauniga. Sa tusia le “Faalogo, Nuu Uma!” e Louis F. Mönch, o se tagatanuu o Siamani lea na auai i le Ekalesia a o faimalaga e ui atu i le Aai o Sate Leki. Sa ia auauna atu mulimuli ane o se faifeautalai mo le Ekalesia i Suitiselani ma Siamani. A o i ai i lenei misiona, sa ia lolomiina le tele o anomea i le faaSiamani, e aofia ai le “Faalogo Nuu Uma!” Na avea ma se tasi o viiga e sili ona fiafia i ai le Au Paia o Aso e Gata Ai e faaSiamani. Sa muai lolomiina i Siamani i lenei tusipese i le 1890. Sa faaliliuina i isi gagana ma lolomiina o se vaega o le tusipese o loo tatou faaaogaina i le taimi nei. O lena lomiga sa le’i i ai lona fuaiupu lona tolu lea o le a lagiina foi e le aufaipese.
O le fuaiupu lona tolu lenei o loo faamatala ai mea na tatou talanoaina e uiga i le Au Paia i lenei vaitau. Latou te “faamamalu[ina] le Atua soifua moni e toatasi. [O mai] ma [na] papatisoina; [taofi] i le ai uamea. [Tuu atu] ia te Ia [o o latou] loto, ma faatuatua i Lona Alo—o Iesu, le Paia e Toatasi.”
Ou te valaaulia outou e faitau le Au Paia e aoao ai ma malamalama i le talafaasolopito o le Ekalesia ma aoao mai faataitaiga a ona tagata. Na matua’i ofoofogia le sailiilia ma faatuatuaina le Au Paia. O se molimau i le Toefuataiga faifai pea o le Ekalesia a Iesu Keriso. E musuia lo tatou talafaasolopito. O le talafaasolopito lenei o lo tatou talatuu fefaasoaai, pe tatou te tupuga mai paionia anamua, paionia na mulimuli mai, pe o i tatou o ni paionia i le faatuatuaga.
Aisea e tupu ai lea mea? Aisea tatou te faaaluina le tele o taimi e faamatala ai nei tala? Ona o nei tala e aumaia ia i tatou ni faataitaiga moni o le olaga i le mana o le iloaina o lo tatou Faaola. Ou te iloa o loo soifua Iesu Keriso ma o loo taitaia lenei Ekalesia ma leoleo i Lona nuu o le feagaiga, o e ua faaauupegaina i le mana o le Atua i le mamalu tele. Ou te tuuina atu se faamanuiaga ia te outou o le a outou lagonaina le alofa o le Faaola i lou olaga a o e faalatalata atu ia te Ia ma Lana Ekalesia, i le suafa o Iesu Keriso, amene.