Te Rongorongo n Aia Bootaki n Taromauri Kairake n Ikawai
Taromauri n te Aonaaba ae Taabangaki ibukiia Kairake n Ikawai
Tabati, Nobembwa 3, 2024
Ai bon kakukureira manga okiran riki BYU–Idaho, te tabo ae ti rangi n ataia ao n rangi n tangiria. Ngke e mwakuri Unimwaane Bednar bwa te beretitenti i BYU–Idaho, oin natira bon kairake n ikawai. N te tairiki aei, ti mena ikai irarikiia tiibura aika kairake n ikawai! I tataro bwa te Tamnei ae Raoiroi e na raonai ma ngkami ngkai I tibwai tabeua iango ao namakin ake a roko n au iango ao inanou.
Tabeua te ririki n nako, Ngai ma Unimwaane Bednar ti kaea te bootaki n taromauri ae boboto iaon te titiraki ao kaekaana ma kurubu ni kairake ni ikawai aika a rangi ni mwaiti. N aki maan n nako I wareki bubua titirake ake a kanakoaki n te tai arei ao I rootaki n taian titiraki aika moan te mwaiti are a boboto iaon te maaku, karakon oin onimakinam ao te kakoaua, ao teutana te nanououa. I baireia bwa N na kabotoa au marooro n te tairiki aei iaon tabeua mai buakon titiraki aikai ao n tibwai nakoimi atatai man koroboki aika tabu ao baika a onoti ake I a tia n rinanona ake n Au kantaninga bwa e uaana n tain mwanangami n te maiu—ngkai ao n taai aika a na roko.
Tao ko kona ni kairekerekea ngkai ko ongoraa n taian titiraki aikai:
-
N na kanga ni oneamwiin te maaku n ana tangira ao ana onimaki Kristo?
-
N na kanga n teimatoa ni korakora ngkai I namakina te mamaara?
-
N na kanga n reiakinna n onimakina te Atua?
I ataia bwa ti bane n titiraki titiraki aikai.
Te boki ae tabu ae I tangiria ni kabongana are bon aan au marooro n te tairiki aei e kuneaki n Itaia 41:10:
“Tai maku ba I memena i rarikim: tai barannano; Ngai ae Atuam: N na kakorakorako; eng, N na buokiko Ngai; eng, ba N na taua ataim n au raoiroi.”
Te kaantaninga, ngkai ti kamatebwaia te boki ae tabu aei ni bootaki inanon tabeua te miniti, kam na karekei namakin ake a na buokingkami n oneamwiin te maaku ma ana tangira ao ana onimaki Kristo, kateimatoa te onimaki ae korakora bwa kam kona n teimatoa ni korakora ngkana kam namakina te mamaara; ao ni karekea onimakinami i bon iroum ngkai kam reiakingkami n onimakina te Atua.
Ngkai N nang waaki, ti na iangoa moan mwakoron Itaia 41:10:
“Tai maku; ba I memena i rarikim: tai barannano.”
Ni kauringa te rongorongo ni booki aika tabu n Ruka 24 n te bong are e a Mangauti iai Iesu, uoman taan iriiria a nakonako mai Ierutarem nakon te kaawa ae Emauti.
Inanon kawaia, temanna tei ianena ae aki kinna are e raoniia ao n titiraki bukin tera ngkai a nanokawaki. A mimii iroun te mwaane aei ngkai ai bon akea ana atatai n te bwai ae riki i Ierutarem ao n tuangnga baika a riki inanon teniua te bong n nako. A tibwa aron bukinan Iesu n te aro ae bure ao ni kabuakakaaki nakon te mate, e tauraki n te kaibangaki, ao imwiina e a manga uti n te aro ae rangi ni kamiimi. A aki ataia mwaane aikai ni karokoa are a roko n tokin mwanangaia ae itiua te maaire are a tia n nakonako ma te Uea are e a tia n uti.
Bukin tera e rangi ni kakawaki te rongorongo aei? Ibukina I kakoaua bwa e teimatoa n riki Iesu bwa raomi ao ngai inanon mwamwanangara ni maiura aei nakon ae ti ataia. E memena irarikira. Ti na kanga n oneamwiin te maaku n ana tangira ao ana onimaki Kristo? Uringa te kibuntaeka aei man Itaia:
“Tai maku; ba I memena i rarikim: tai barannano.”
Ngkai ti na rinanoa te kauoua ni mwakoro n te kibu aei:
“Ngai ae Atuam: N na kakorakorako; eng, N na buokiko.”
Ngke ti maeka ikai i Rexburg n ririki aika a nako, I buti nako Salt Lake bwa N na raona ai tariu n te bong are imwiin are e karaoaki te korokoro iaonburoon kainnabana. Bon te tai ae rangi ni kamamaara, ao imwiin noorakin buuna I ataa bukin tabeaiangana. E taraa n tuai n rangi ni marurung raoi. ao a baireia ana taokita bwa ekainnanoa te raara ao e riai ni karinaki raraana.
I bon tuai man nonoora karinan te raara mai imwaaina ao ni bon miimi ngkai e tabe n timtim te raaraa teutana imwiin teutana, rikaaki rinanon te bwaibu ae irariki nakon iana. Ngke I tabe ni mamataku, I iangoa ara Tia Kamaiu ao ni miimi bwa mwaitira te timtim n raaraa are E kawaanakoa ibukira. N te aoa naba anne, I kakoaua te maiu ae boou, te konamaki, ao te korakoran ae reke man te rara are e karinaki.
Ma, n te waaki are I bon tuai mataata raoi iai ke n oota iaona, ana karea ni kamaiu Iesu Kristo e anganiira te korakora ao ni buokiira ni karaoi bwaai aika a kanganga karaoaia. Ti kakabwaiaaki bwa ti kona ni karaoi bwaai ake ti taku bwa ti aki kona nikaraoi. Ti na kanga n teimatoa ni korakora ngkai ti namakinna bwa ti rangi ni mamaara? Uringa te kibuntaeka aei man Itaia:
“Ngai ae Atuam: N na kakorakorako; eng, N na buokiko.”
N na tibwai tabeua iango ibukin te kabanea ni kibuntaeka man Itaia 41:10:
“N na taua ataim n au raoiroi.”
Te bai ae te angatai e aki toki n taekinaki bwa te bai n te berita ae tabu. Ibukin ara berita aika tabu n reitaki ma Kristo, iai ara onimaki bwa te Tia Kamaiu e na kawakiniira, kateimatoaira, ao ni boutokaira.
Aio e kauringai te karaki are e kuneaki n Mataio 14 ike ana reirei Iesu a mena iaon te kaibuke inuukan te nama ao e reimauruate ang ao te nao. Betero e noora Iesu n nakonako iaon te ran ao e butiia Iesu bwa e na tuangnga bwa e na Nakoina. E karinea te bubuti Iesu, ao Betero e moana nakonakona iaon te ran n Nakoina. Bon akea ana kanganga ngkai e kabotoa ana iango iaon Iesu. Ma ngke e nooria Betero bwa e rangi ni babaiti te ang, e a moanna n iinako ao n tang n takarua nakon Iesu bwa e na kamaiua. Ao Iesu E arora naba baina, n taua.” Ao I kakoaua raoi bwa e na bon tauira ao n tikoniira naba.
Ti na kanga n reiakinna n onimakina te Atua? Uringa te kibuntaeka aei man Itaia:
“N na taua ataim n au raoiroi.”
I kakoaua bwa Tamara are i Karawa e ataira ao e tangiriira. I kakoaua bwa Iesu Kristo bon ara Tia Kamaiu ao ara Tia Kabooira. E nakonako ma ngaira, E kakorakoraira, E buokiira. Ao ti kona n onimakinna bwa E na kawakiniira, kateimatoaira, ao ni boutokaira ngkai ti uring ara berita aika tabu n reitaki ma Ngaia. I ataia bwa te Tamnei ae Raoiroi bon te tia kaotioti ao e uoti iango nakon ara iango ao namakin nako nanora. I ataia bwa e a tia ni weteaki Unimwaane Bednar iroun te Atua, man te taetae ni burabeti, ao man katokaan bai iaon te atuu.” Bon ana abotoro te Uea, ae Iesu Kristo.
N aran Iesu Kristo, amen.