Men ko Āinwōt Aer Lukkun Alikkar 2.0
Nokon an Rūm̧m̧an Ded ro Ipeļaakin Laļ In
Jabōt, Nobōm̧ba 3, 2024
Susan im n̄a kōmij m̧ōņōņō kōn iien in em̧m̧an n̄an kabun̄jar im katak ippāmi. Kōmij iakwe kom̧! Ilo aolepen peļaakin laļin ijoko komij pād ie, kōmij iakwe eok!
Im kōmij kijejeto ilo jar bwe Jetōb Kwojarjar enaaj kōjeraam̧m̧an kōj kajjojo n̄an ron̄ ta eo jej aikuj in ron̄ im n̄an lo ta eo jej aikuj in lo bwe jen maron̄ bun̄ m̧aanļok kōn tōmak ilo Rilo̧mo̧o̧r im juon ļapļok in ikdeelel n̄an ļoor im jerbal n̄an E.
Juon Tōre eo kōn Tarlep in Iien ko
Jej jeraam̧m̧an n̄an mour ilo juon iien ekabwilōlōn̄ ilo juon tōre in tarlep in iien an gospel in āliktata, aaet juon tōre eo kōn tarlep in iien ko. Jeje ko rekwojarjar im ennaan in kanaan ko rej jipan̄ kōj katak kake n̄an kam̧m̧oolol eļapļo̧k kōn tōre ko rejenolo̧k rem̧ool me jej mour ie.
Rikanaan Josep Smith eaar ba: “Ekkal eo an Zaion ej juon jerbal eo me ekar kaitok limoin armej ro an Anij ilo aolepān tōre ko; ej juon unin tōl eo me rikanaan ro, pris ro im kiin̄ ro rekar pād im mour ie ilo lan̄lōn̄; rekar erreim̧aanļo̧k kōn lan̄lōn̄ eo rekar kōtmāne raan eo me jenaaj mour ie; im obrak kōn kōtmāne ko jān lan̄ im rekam̧ōņōņō me rekar al im je im kanaan kake ilo raan kein; ak rekar mej ilo aer jab loi; … repād wōt n̄an kōj bwe jen loi, bōk koņaad im jipan̄ iuun m̧aanļo̧k aiboojoj eo an Raan Ko Āliktata.”
Ilo bar juon iien, Rikanaan eo eaar kwaļok bwe “[rikabwijer Priesthood jān] reenaaj kobaik ippān rilaļ, n̄an boktok un ko reļļap; … juon jerbal me Anij im enjeļ rekar erreim̧aanļo̧k kake kōn lan̄lōn̄ kōn epepen ko m̧oktaļo̧k; me ekar kobrak jetōb ko an petriak ro etto im rikanaan ro; juon jerbal me kar ļōme n̄an kakkure kajoor ko an marok, kōkāāl an laļ in, aiboojoj an Anij, im lo̧mo̧o̧r eo an aolep baam̧le.”
Aorōk in jetōb eo an raan ko āliktata eļakkar jibadbad eo an wujepļo̧k in kanaan eo ium̧win buki iiō ko. Im tōre eo jab jeļā kake me jej mour ie ej kiiō im enaaj wōnm̧aanļo̧k wōt n̄an obrak kōn eddōkļo̧k in jetōb ko rekabwilōn̄lōn̄ im rej waļo̧k.
Jerbal eo an Techonology ilo Jijen in Ejenolo̧k ilo Laļin Rainin
Ej men eo eoarōk ilo tarlep in ippād rainin ej juon eddōkļok ekabwilōn̄lōn̄ an mennin oktak ko im elolo ko me em̧ōj kōmaron̄ im kōm̧ōkajļo̧k jerbal in lo̧mo̧o̧r im mour ijo eutiej tata an Anij: jān train ko n̄an telegraph ko n̄an radio ko n̄an waan ettōr ko im baļuun ko n̄an teleboon ko n̄an transistor ko n̄an tipi ko n̄an computer ko n̄an satellite transmission ko n̄an internet n̄an kein jeļāļokjeņ ko kōm̧m̧ani—im n̄an juon laajrak enan̄in ejjeļo̧k jem̧ļo̧kin an techlology ko im tool ko me rej kōjeraam̧m̧an mour ko ad. Aolepān wōnm̧aaņļo̧k kein rej m̧ōttan an Irooj kōm̧ōkajļo̧k jerbal eo An ilo raan ko āliktata.
Ilo 1862 eo Brigham Young ekar kwaļo̧k: “Aolep elolo ko ilo science im art, ko im rej lukkun m̧ool im wōr tokjier n̄an armej, kar letok ilo revelesōn kajju tok jān Anij, ijoke ewōr jet wōt rej kile men in. Kar letok kōn juon jibadbad n̄an kōpooj iaļ n̄an anjo̧ eo āliktata an m̧ool, im pinmuur eo an laļ jān kajoor an jerawiwi im Setan. Jej aikuij koor tokjen aolep wōnm̧aanļo̧k kein reļļap, jon̄an jeļāļo̧kijeņ eo kar bōk ilo iiō ko, im leļo̧k n̄an ajiri ro nejid aolep ra ko im renaaj aurōk n̄an aer kōjerbali, n̄an kepooj er n̄an wōnm̧anļo̧k im maron̄ kōm̧m̧ane ijo koņaer ilo jerbal in eļap.”
Ilo 1996, Būreejtōn David O. McKay ekkar kanaan kake elolo ko kijien science im “rej kabwilōn̄lōn̄ n̄an kōļmenļo̧kjeņ” renaaj kōm̧m̧an bwe en maron̄ pidodo kwaļo̧k kōn gospel eo n̄an aolep bwij, lo, im armej. Im barāinwōt “Jerbal in ekkōņ ko an armej renaaj itok ilo lukkun kajoor in, emaron̄ n̄an kōjeram̧m̧an ak n̄an kakkure armej, im emaron̄ kōm̧m̧an bwe en juon eddo eo eļap n̄an aolep armej n̄an kōjerbal kajoor in. … Raan kein eobrak kōn kauwōtata ko reļļap, barāinwōt men ko rem̧m̧an me remaron̄ bōk jikier.”
Men ko āinwōt rej Lukkuun Alikkar
Jon̄oul ļalem iiō ko remootļo̧k, ilo juon nokon n̄an rūm̧m̧an ded ro ipeļaakin laļ in, iaar kōnono kōn karōk in m̧ōņoōņō eo eļap an Jemedwōj Ilan̄ n̄anro Nejin. Ikar kwaļo̧k aorōk eo an ānbwinid ilo karōk eo an Jemād, ekōjkan an Lucifer m̧oņe kōj n̄an kajejtokjān im kabōd kōjerbale ānbwinid, im kar kakkōļ kōn juon ainikien kōn an naaj technology ko raan kein naaj kakkure kōj im jemdo̧o̧n eo an ippān armej ro jet.
Ikar kwaļo̧k bwe digital kein em̧ōkaj aer oktak im wāween aer jerbal ilo em̧m̧an im nana Ijoke, iaar kakkōļ bwe apan̄ eo em̧ool ej n̄an jeļā jim̧or jerbal ko im oktak ko ilowaan karōk in m̧ōņōņō eo indeeo. Iaar bar likūti “ruo kajjitōk ko n̄an ļōmņaki ilo am̧ make kōļmenļo̧kjeņ kaki im lukkuun ekkatak jeni” kōn wāween kōjerbal technology kein ilo jim̧we.
-
“Kōjerbal elōn̄ kain technology ko im media ko rej ke karuwaineneik ak karum̧wijļo̧k jemjerā eo an Jetōb Kwojarjar ilo mour eo aō?
-
Iien eo kwoj joļo̧k n̄an kōjerbal elōn̄ kain technology ko im media ko rej ke kōļapļo̧k ak kapen maron̄ eo aō n̄an mour, n̄an iakwe, im n̄an jerbal ilo wāween ko ewōr tokjeer?”
Taitōl in enaan eo aō ilo kar 2009 eo ej “Men ko Āinwōt Aer Lukkuun Alikkar.” Men eo kar ilo iien eo.
Taitōl in ennaan eo aō rainin ej “Men ko Āinwōt Aer Lukkuun Alikkar 2.0.” Menin ej kiiō.
Kwon Māletlet
Jibadbad in ennaan eo aō rainin ej pād ilo jem̧ļo̧kin juon konono an juon nokon iaar kwaļo̧k ilo kar Brigham Young University kar Jānode in iiō in.
“Ilo ami kajjieon̄ in ekkatak gospel eo an Jisōs Kraist im kōm̧m̧ane jerbal ko kom̧ aikuj in kōm̧m̧ani, ij lukkuun rōjan̄ bwe kom̧in māletlet ilo ami kōjerbali kein jipan̄ kein remenin aikuij kōn technology. Jerbal ko āinwōt jerbal jeļāļo̧kjeņ ko kōm̧m̧ani [remaron̄] jim̧or (1) jipan̄ eok bōk eļap jeraam̧m̧an ko im (2) joļo̧k im kakkure anemkwoj in kāālet eo am̧ Jouj im jab kōtļo̧k bwe jetjet eo kōtmāne, m̧ōkaj eo, im pidodo eo an technology ko rainin n̄an m̧oņe eok n̄an kowaan ak pukot kilen jerbal jim̧we me ej karuwaineneik n̄an mour eo am̧ kōjeraam̧m̧an ko kwonaaj aikuji. Ro jeiū im jatū rejitenbōro, ejjeļo̧k jetōbin kōm̧ōkajkaj ak kōm̧ōkaj jerbal.”
Inaaj kiiō pedped ioon jilu unin kōnono ko me ikar kwaļo̧ki ilo ennaan eo m̧oktaļo̧k: jerbal in jeļāļo̧kjeņ, anemkwoj in kāālet, im jerbal jim̧we.
Jerbal in Jeļāļo̧kjeņ
Jerbal in Jeļāļo̧kjeņ, ekkā ņa etan AI, ej juon technology me ej kōtļo̧k an computer ko im machine ko n̄an ari jeļāļo̧kjeņ an armej im maron̄ ko n̄an ņa mejļan jorrāān ko. Ilo iiō ko kiiō, jerbal in ejake im kōjerbal AI technology ko rekar wōnm̧aaļo̧k ilo juon kōtaan eo em̧ōkaj im kar jelet aolep kōttōpar ko an armej—uno, science, jeļāļo̧kjen, ejaak im ekkal em̧ ko, iaļen leto-letak meļeļe, jeraam̧m̧an, wia kake, ejaak in m̧weiuk ko, im elōn̄, men ko jet. Im ilo an ļapļo̧k an ajeedeed kōjerbal AI, jorrāān ko im men ko remaron̄ waļo̧k im jaje kaki im kar kanaan kaki jān Būreejtōn McKay eļapļo̧k aer alikkar.
Technology in ekabwilōn̄lōn̄ ej letok maron̄ n̄an kaļapļo̧k kapeel, kōkm̧anm̧an jokkin mour, kapidodoļo̧k iaļ in leto-letak meļeļe n̄an tōpar doon, jipan̄ kōkm̧anm̧an an kajjojo katak im eddōkļo̧k, im letok eļap kapeel im jerbal.
AI ebarāinwōt wōr an maron̄ n̄an ņooj wōn kōj ilo m̧ool āinwōt ļaddik im leddik ro nejin Jemedwōj Ilan̄ eo ej iakwe, kōmad kōj jān m̧ool ko an indeeo im jerbal erreeo im jim̧we ko remenin aikuij n̄an eddōkļo̧k an jetōb, utiej bōroim kalikjab kōj jān ad kile bwe jej atartar ioon Anij, im ukot ak bōk jikin ekkeijel ko raorōk ikōtaan armej.
“N̄e rejeļā rej ļōmņak rejeļāļo̧kjeņ, im rejjab eo̧ron̄ tōl an Anij, bwe rej joļo̧k e, ilo aer ļōmņak ke rejeļā, kōn menin, jeļāļo̧kjeņ eo aer e bwebwe im ejjab e waan n̄an er. Im renaaj jako.
“Ak n̄an jeļā em̧m̧an eļan̄n̄e rej eo̧ron̄ tōl an Anij.”
Ļōmņak kōn kauwōtata kein remaron̄ waļok. Juon AI-eo ejaake n̄an an m̧ōttam̧, juon jeran ļeddiik ak ļaddik, emaron̄ “tiljek ilo ejaake n̄an lukkuun [lewaj] iien ko rekalimomo im ļap ad lelo̧k ad n̄ani, ko im rem̧m̧an n̄an elōn̄ iaan aikuj ko ilo en̄jake im ippān doon.”
“Menin ej letok juon [en̄jake] in ekkeijel im meļeļe, kōm̧m̧an bwe ippen doon kein ippen rein m̧ōttad im rej pād online ren ko im relukuun kaitoklimo. Kein kareel in ej ļapļo̧k wōt ilo aer pād 24/7 im dikļo̧k tarpok ko im ekkā aer waļok ilo kōtaan jemjerā ko an armej. Jān keememej [raorōkin] iien ko n̄an uwaak ilo juon jekjek eo ekkā an meļļak im meļeļe, AI kein [m̧ōttad] rej ejaaki n̄an [kōttōpraki] eddo ko an juon jemjerā eo jej kōņaan, kōm̧m̧an bwe ren [lukkuun] kareleel,” im ukot nemāme in ad kalimjek “men ko āinwōt aer lukkuun alikkar” ilo jemjerā ko an armej im rej lukkuun m̧ool.
Eļapļo̧k, jemjerā ko rej kōm̧m̧an online im kar ejaaki n̄an kareel im oktakļo̧k pedped ioon aikuj ko ilo en̄jake an juon armej remaron̄ kōm̧m̧an poktak ko ilo juon jemjerā eo im ekar ainōm̧m̧an m̧oktaļo̧k. Āinwōt carbon monoxide, jemjerā rot kein remaron̄ erom̧ juon “kein kakure eo ettino” an jemjerā ko rej lukkuun m̧ool. En̄jake ko rej epaak im rejjab m̧ool remaron̄ bōk jikin en̄jake ko repaak im rem̧ool rej bōk jikier—eo im ej dāpij ruo armej ippān doon. Juon armej emaron̄ lo aenōm̧m̧an im kajoor ilo juon jemjerā eo ej pād online ilo juon wāween eo im ej kadikļo̧k an ļeo im lio pālele pedped ioon doon. Im jet armej remaron̄ po ilo aujiid in ilo aer jab jeļā bwe ej juon jorāān eo ņae kallim̧ur eo eļap n̄an juon karejeran kōnke juon jemjenā eo ej kōm̧m̧an online ejjab “m̧ool” im ejjab kile āinwōt bar juon armej.
Aolep iien keememej bwe juon jemjerā eo ippān juon AI m̧ōttā ej wōt juon mathematical algorithm. Ejjab āinwōt kwe. Ejjab kea kake eok. Ejjab lukkuun jeļā eļan̄n̄e kwoj pād ak jaab. N̄an āliji, ej juon laajrak in computer equation ko im renaaj kalimjek eok āinwōt juon men eo n̄an jerbale, eļan̄n̄e kwonaaj kōtļo̧k. Jouj, jab kōtļo̧k an technology in m̧oņe eok n̄an erom juon men bajjōk.
Waanjon̄ak in ej juon jān millien jorrāān ko remaron̄ waļok kōn kapeel in jeļāļo̧kjeņ in.
Kōttōpar in aō ejjab n̄an ba bwe kapeel in jeļāļo̧kjeņ enana ilo ejaak in, jaab. Im ijjab ba bwe jen kabōjrak ad kōjerbal jerbal ko relōn̄ an AI ilo wāwein ko rejejōt n̄an ekkatak, n̄an kōnono, n̄an kotak im kemeram mour ko, im n̄an kalōk im kōkajoorļo̧k Kabun̄ in; aaet jej aikuij. Jejjab aikuj mijake ak kajjieon̄ in kitileek jān AI. Bōtaab jim̧we eo maron̄ waļo̧k an kein jerbal in technology ekabwilōn̄lōn̄ maron̄ kile wōt eļan̄n̄e jej ekkōl kake im bōbrae n̄an kauwōtata ko an.
N̄an dipuk iaļ ko reppen an jetōb im technology, Armej ro Rekwojarjar ilo Raan ko Āliktata rej aikuj ilo ettā im jar n̄an (1) pukot pedped ko an gospel eo im remaron̄ tōl er ilo kōjerbal artificial intelligence eo im (2) kajjieon̄ ilo niknik n̄an jemjerā eo an Jetōb Kwojarjar im menin letok eo an jetōb kōn revelesōn.
Ij karuwaineneik tok eok n̄an etale im ekkatak kōn pedped in tōl ko an AI kar ejaaki im lito litak jān Kabun̄ ilo kar jinoin iiō in. Kabun̄ in ej kōjerbal kapeel in jeļāļo̧kjeņ in ekkar n̄an pedped kein im letok juon pedped eo epen eo im komaron̄ kalōk kein kōjparok ko am̧ make ņae jorrāān ko jān bwōd in kōjerbal technology.
Ilo ennaan eo an jinointata ilo kweilo̧k eo eļap āinwōt Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata, Būreejtōn Russell M. Nelson ekar kwaļo̧k aōrōkin revelesōn ko ad make ilo mour ko ad. Ekkar ba: “Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok. Jenaaj lo kakōlkōl ko rekabwilōn̄lōn̄ me Anij Jemed im Nejin, Jisōs Kraist, ej tōl Kabun̄ in ilo wōj im aeboojoj. Ak ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”
Jej kam̧m̧oolol Eok, O Anij, kōn juon rikanaan, im joteenin jej leļo̧k ad kam̧m̧oolol kōn kakkōļ ko an Būreejtōn David O. McKay im Būreejtōn Russell M. Nelson
Anemkwōj In Kāālet
Iaar kalikar m̧oktaļo̧k bwe kapeel in jeļāļo̧kjeņ in emaron̄ joļo̧k im kakkure aenemkwōj in kāālet eo ad n̄an mour jim̧we. Ta meļelein naan in, im ewi wāween an juon men eo ej bōk jikin tokālik waļok?
Jibadbad ko raorōk ilo karōk in m̧ōņōņō eo eļap an Jemād rej n̄an letok n̄an ajri in jetōb ro Nejin iien n̄an bōk juon ānbwin, n̄an ekkatak” em̧m̧an jān nana” ilo aer mour in wabanban, n̄an eddōkļo̧k ilo jetōb, im n̄an wōnm̧anļo̧k n̄an indeeo.s Im anekwōj in kāālet ej juon m̧ōttan aorōk ilo karōk eo an Anij n̄an kakūrm̧ool mour jab wabanban im mour indeeo an ļaddik ro im leddik Nejin.
Naan eo anemkwōj in kāālet ewōr tokjen. Naan ko jet meļeļeier wōt naan in jim̧we rōkitbuuj “jim̧we,” “m̧ool,” “erreo,” im “utiej.” Naan ko jet meļeļeier wōt naan in anemkwoj remaron̄ koba “em̧akūtkūt,” “m̧akūtkūt,” im “jerbal.” Kōn menin, anemkwōj in kāālet emaron̄ meļeļein maron̄ im kōjeraam̧m̧an eo n̄an kāālet im jerbal n̄an kōj make ilo wāween ko rejim̧we, rem̧ool, reerreo, im reutiej.
Kōm̧anm̧an ko an Anij rekoba aolep “men ko n̄an kōm̧m̧an im men ko rej kipel n̄an kōm̧m̧an jim̧or.” Im aorōk eo, jerbal jim̧we ej kōm̧anm̧an eo ekwojarjar “kōn kajoor in bun̄ten jenolo̧k” eo ej kōmaron̄ kōj āinwōt ro nejin Anij n̄an erom̧ ro im rej em̧m̧akūt im jab men ko rej kōm̧m̧akūt ioer.
Irooj eaar katakin Enoch kōn meļeļe in katak in.
“Kwōn lo rein jeiūm̧ im jatūm; er rej eļtan pā ko Peiū make, im Iaar leļo̧k n̄an er jeļāļo̧kjeņ eo aer, ilo raan eo Iaar kōm̧anm̧an er; im ilo Jikin Kallib in Iden, Iaar leļo̧k n̄an armej an anemkwōj in kāālet;
“Im n̄an ro jeiūm̧ im jatūm Iaar ba, im barāinwōt leļo̧k kien eo, bwe ren iakwe doon, im bwe er ren kāālet Eō, eo Jemāer.”
Jouj im keememej, pedped in kōttōpar ko n̄an kōjerbal anemkwoj in kāālet rej n̄an iakwe doon im n̄an kāālet Anij. Ļōmņak bwe jej kakien—im jab kakkōl, rōjan̄, ak kapilōk—ak kakien n̄an kōjerbal anemkwoj in kāālet eo ad n̄an oktakļo̧k, n̄an iakwe doon, im n̄an kāālet Anij.
Juon al in jar eo jej jeļā kake ej taitōļ “Kāālet Jim̧we eo” n̄an juon un. Jejan̄in kar bōk kōjeraam̧m̧an kōn anemkwōj in kāālet an kanniōk eo n̄an kōm̧m̧an jabdewōt jekōņan iien ko otemjeļo̧k jenaaj. Ijoke, ekkar n̄an karōk eo an Jemād, jekkar bōk anemkwōj in kāālet an kanniōk n̄an pukot im kōm̧m̧an ekkar n̄an m̧ool indreo. Āinwōt “armej ro rej kāālet [n̄an kōj make],” jej aikuj in bōk koņaad ilo jerbal ko rem̧m̧an, “kōm̧m̧an elōn̄ men kōn [ad] make kāālet im kakūrm̧ool eļap em̧m̧an ko.”
Men eo eaorōktata kōn anemkwōj in kāālet an kanniōk ej lukkuun kalikkar kōn mour eo m̧okta ilo bwebwenatoin jeje ko rekwojarjar. Lucifer ekar jum̧ae karōk eo an Jemād, im, aorōk in, jab pokake eo an ekar kalimjōk wōt ioon pedped in katak eo an anemkwōj in kāālet an kanniōk.
“Kōn menin, kōnke men in Setan eaar jum̧ae Eō, im kappukot n̄an ko̧kkure anemkwōj in kāālet eo an armej,Iaar kōm̧m̧ane bwe ren jolaļļo̧k e.”
Pepe eo an rikapo eo n̄an kar e make eaar n̄an bōk jān ļaddik im leddik ro nejin Anij menin letok eo n̄an erom̧ “ro rej kāālet n̄an er make” ro remaron̄ kōm̧m̧an kāālet ilo jim̧we. Kōttōpar eo an ej bwe aolep ro nejin Jemedwōj Ilan̄ ren jet ro ren maron̄ kipel er.
Laļ in kar kōm̧anm̧an āinwōt ijo im ajri ro nejin Jemedwōj Ilan̄ remaron̄ kam̧ool n̄an lale ke remaron̄ kōm̧m̧ane “aolep men ko jabdewōt men Irooj aer Anij enaaj kakien er.” Unleplep in Kōm̧anm̧an eo im ad mour in wabanban ej n̄an lale eļan̄n̄e kwe im n̄a naaj kāālet im kōm̧m̧an n̄an erom̧ ta eo Irooj ej karuwaineneik kōj n̄an erom̧. Āinwōt an Būreejtōn Nelson kar ba: “Anij, Jemedwōj Ilan̄, ekōņaan bwe kwon kāālet n̄an itok n̄an m̧weeo Ippān. Karōk eo An kōn eddōkļo̧k eo ejjeļo̧k jem̧ļo̧kin ejjab kaipokpok, im ej kautiej anemkwoj eo am̧.”
Ad kōjatdikdik im kōttōpar ej aiboojoj eo an selestial ippān baam̧le ko ad im̧aan mejen Jemedwōj Ilan̄ im Nejin Ejitenbōro, Irooj Jisōs Kraist. N̄an un in im ko jet, Būreejtōn Russell M. Nelson eaar karuwaineneik kōj n̄an “ļo̧m̧ņak kōn selestial.”
Kiiō komin ekkōl. Epidodo kōjerbale, jejjōt im jim̧we in, kab m̧akaj in an jerbal men kein rej kōjenolo̧k kapeel in jeļāļo̧kjeņ remaron̄ ejaake juon ikdeeleel, an̄ūrlep, im juon apan̄ eo n̄an ad maron̄ kōjerbal anemkwōj in kāālet an kanniōk eo ad. Kōnke AI ej kepooļ kōn lōke im kallim̧ur ko an wōnm̧aanļo̧k ko an science, jemaron̄ m̧ōkaj ad reel n̄an leļo̧k anemkwōj in kāālet an kanniōk eo ad n̄an juon technology eo im emaron̄ wōt ļōmņak kōn telestial. Ilo ad kōm̧m̧an menin, jemaron̄ in jidik jidik oktak jān ro rej kōm̧m̧an make kāālet n̄an ro rej peek ioer. Im jemaron̄ ilo ad jab jeļā jipan̄ Lucifer n̄an kōtōprak ilo mour in wabanban ta eo ejjab kar maron̄ kōttōpraki ilo mour eo m̧okta.
M̧ool ej jeļāļo̧kjeņ in men ko āinwōt aer lukkuun alikar. Kapeel in jeļāļo̧kjeņ ejjab maron̄ anōk an kōm̧m̧an, kajjieon̄ kōm̧m̧ane, ak bōk jikin im̧we an Jetōb Kwojarjar ilo mour ko ad. Jekdo̧o̧n ewi jon̄an kapeel im kapaļpaļ juon AI technology emaron̄ erom̧, ejjab maron̄ kwaļok kam̧ool kōn Jemān im Nejin, kwaļok m̧ool eo kōn men otemjej, ak kareeo ro im em̧ōj aer ukweļo̧k im kar peptaij.
M̧ool ej jeļāļo̧kjeņ in men ko āinwōt aer lukkuun naaj allikar. Ilo ad māletlet, tiljek im kōjerbal anemkwōj in kāālet an kanniōk eo ad n̄an iakwe Anij im jerbal n̄an ro jeid im jatūd, im bōk Jetōb Kwojarjar eo n̄an ad juon kein tōl, jemaron̄ eļļo̧k jān riab ko im jeraam̧m̧an ilo jetōb ilo iien mālijon̄ im kōjeraam̧m̧an ko im jej mour ie.
Jerbal Jim̧we
Juon jeļāļo̧kijeņ eo kōn karōk in m̧ōņōņō eo an Jemedwōj Ilan̄ ej jipan̄ kōj kile bwe jerbal jim̧we ej juon menin aikuij n̄an eddōkļo̧k an jetōb.
Āinwōt ro nejin Anij, “kajjojo [iaadwōj] ewōr ad juon mour eo ekwojarjar im juon jem̧ļo̧k” im kar jolete maron̄ ko an jetōb jān E. Jemedwōj Ilan̄ im Eo Nejin Ejitenbōro rej rikōm̧anm̧an ro im raar letok n̄an kōj kajjojo mōttan ļo̧k kajoor in kōm̧anm̧an eo Aer. Juon iaan maron̄ ko ad n̄an jerbal im kōm̧anm̧an ej lukkun aorōk ilo jetōb kōnke ej lukkun aorōk n̄an karōk eo an Jemād im ej kitbuuj juon iaan kōkkaļe ko reutiejtata an maron ko ad rekwojarjar.
Būreejtōn Thomas S. Monson ekkar kōmeļeļeiki: “Anij ear door laļ in ilo an jab dedeļo̧k bwe [m̧aan im kōrā ro] ren kōjerbal [aer] kapeel n̄an kadedeikļo̧k. E ekar likūt jarōm ilo kōdo ko, oil ilo laļ. E ekar jab kijooni rebba ko, im jōk wōjke ko, im jab kallōk jikin kweilo̧k ko. Anij ej letok [n̄an kōj] juon jerbal epen n̄an jino juon pedped, ejjab tupidodo in men ko rej dedeļo̧k. E ej door pija eo ilo an jab uno im kōjan̄jan̄ eo jab al im apan̄ ko jab ņa mejļaer, bwe [jen] maron jeļā m̧ōņōņō im aiboojoj ko an kōm̧anm̧an.”
Mour ilo jim̧we, erom̧ juon eo ej jutak ilo etan, im jerbal jim̧we rej ekkeijel im ippān doon ilo wāwein ko rej lukkun kajoor. Ļōmņak kake, n̄an waanjon̄ak, meļeļein tōmak ilo Irooj Jisōs Kraist āinwōt kar kwaļok ilo Lectures on Faith:
“Tōmak [ilo Kraist ej] pedped eo m̧oktata ilo kabun̄ in, … pedped eo an jim̧we otemjeļo̧k, … im ej pedped in jerbal eo an aolep armej otemjeļo̧k.”
Menin letok eo an tōmak ilo Kraist ej aikuj bwe en jerbal anemkwoj eo n̄an jerbal im ļoor E, mour kōn katak ko An, kōjparok kien ko An, ekkeijelļo̧k kōj make ilo bujen ko an, lōke ilo kallim̧ur ko An, im ilo ettā bōk Ankilaan im iien eo an ilo mour ko ad. Jerbal ekkar n̄an katak im pedped ko rejim̧we Rilo̧mo̧o̧r eaar kean̄ ej aōrōk kōnke “ke ejjeḷọk jerbal, ejjeḷọk tokjān.”
Jej barāinwōt katak ilo Lectures on Faith bwe “tōmak ejjab wōt pedped eo n̄an jerbal, ak n̄an kajoor barāinwōt, … men̄e ej ilo lan̄ ak laļ.” Tōmak ilo Kraist aolep iien ej tōl n̄an jerbal jim̧we, eo im ej kōļapļo̧k ad maron̄ ilo jetōb im kajoor.
Kōn menin, rikaļoor ro an Kraist im rej tōmak rej rijerbal ro im rej ikdeelel in bōk koņaer kōnke “kajoor eo ej pād ilo er, eo kōn e rej ripinej jenkwaer make.” Rikaļoor ro rem̧ool rej wujlepļo̧k aolepen aer ilo emmakijkij im aolep aer maron̄, ekkar n̄an maron̄ im jekjek ko aer make rej pād ie n̄an jerbal āinwōt jet ro rej jutak ilo etan n̄an kōm̧m̧ane ak ejaake juon men ilo aolep men ko an kanniōk im jetōb ilo mour ko aer im ilo jerbal ko aer n̄an ro jet.
Meļeļe bwe tōmak ilo Rilomo̧o̧r ej juon pedped in jerbal im kajoor ej kareilo̧k juon jenkwan jerbal jim̧we eo ej wōnm̧aanļo̧k eo im ej juon wāween eo ej lukkuun allikar n̄an kwaļok bwe jej pedped ioon im lōke E im ej juon wāween n̄an ekkatak im eddōkļo̧k. Kon un kein raorōk, jerbal ej aorōk n̄an ad eddōkļo̧k ilo jetōb.
Būreejtōn Ezra Taft Benson eaar katakin: “Eo ad ej juon gospel in jerbal—ej wōr unin, ejjeļo̧k ejjab aineļap im kōm̧m̧an ilo jitibōn m̧ool in iakwe eo an Kraist. Ilo wōt menin im jemaron̄ eddōkļo̧k ilo piktokin Anij. Ilo wōt menin im jemaron̄ erom̧ rijerbal ro rereo ilo pā ko pein Irooj.”
Juon iaan inepata ko aō reļļap is bwe ad pedped eļap ioon AI technology enaaj kōm̧m̧an bwe jen jowan im ettoon ilo jetōb—im n̄an kabōjrak kōjeraam̧m̧an ko kar kakūrm̧ool ilo jerbal jim̧we.
Ij ļōmņake jete enaan ko an kweilo̧k in kwojkwoj im Jabōt Jikuuļ, priesthood, im katak ko an Douluul eo an Kōrā ro renaaj kar kōm̧m̧an jān juon AI. Juon wōt kajjitōk ļo̧k n̄an digital device eo am̧, kōttar jejjo second ak minute, im etōbrak aikuj eo am̧. Ak ear ke lukkuun tōprak aikuj eo am̧?
Kiiō, ij tōmak AI emaron̄ jipan̄ aiin meļeļe ko, etale wāween ad kōļmenļo̧kjeņ, kajim̧we kilen ad jeje, im kam̧ōkajļo̧k juon iien ekkatak eo im ej bōk iien “ļain im bar ļain [im] naan in kain̄i im bar naan in kain̄.” Ak maron̄ ko rekwojarjar n̄an ejaake im jerbal rej kejenoloki n̄an kōj wōj kajjojo āinwōt ro nejin Anij. Ilo ejjeļo̧k pere jemaron̄ kwaļo̧k im kōm̧m̧ane meļeļe ko kobban kenono ko an kweilo̧k in kwojkwoj eo im relukun em̧m̧an ippen AI. Bōtaab kōttōpar eo ejjab wōt n̄an kōm̧m̧an ak kwaļo̧k meļeļe ko relukkuun em̧m̧an; ak, ej jerbal im erom̧ ta eo Anij ej kōņaan im ikdeelel n̄an ad erom̧.
N̄a make ijjab kōjerbal technology in n̄an kōm̧m̧ani ak je kōnono ko aō, naan ko, ak kobban meļeļe ko an jerbal ko jet. Menin ej kijejeto in jerbal ko ao, kōm̧anm̧an in jerbal ko aō, im, eo aorōktata, aō pukot n̄an bōk im̧we jān Jetōb Kwojarjar.
Ij kōjerbal technology in n̄an etale jerbal ko aō. N̄an waanjon̄ak, ālkin aō naaj kadedeļo̧k katak in ij kwaļo̧k n̄an kom̧ kiiō, iaar kajjitōk ippān AI app eo n̄an etale im kōmeļeļeik peļļokin kōnono eo n̄an juon jarlepju in rūm̧m̧an ded ro ipeļaakin laļ in ro im rej uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. En̄in ej kakkobaba ko iaar bōke.
“Piktokin kōnono in ej juon eo eļap aorōkin im ej katakin, ilo an rijeje eo kōnono jān jeje ko rekwojarjar im men ko eaar iooni n̄an katakin kake aorōkin kōjenolo̧k m̧ool ko an jetōb jān poktak ko an laļ in. Kōnono eo ej barāinwōt letok kōjatdikdik im rōjan̄, ilo an rijeje eo karuwaineneik rūm̧m̧an ded ro n̄an pukot revelesōn im ļoor waanjon̄ak eo an Rilo̧mo̧o̧r ilo mour ko aer. Kōnono eo ej iiok ļo̧k n̄an kōļapļo̧k tōmak im jerbal ibwiljin ro rej ron̄jake im n̄an kakkōl er kōn jorrāān ko rej waļo̧k jān riab ko an Setan.”
Pedped ioon etali in, iaar kōm̧m̧ane jet oktak ko im ij kōjatdikdik bwe rekkar kōkm̧anm̧anļo̧k aolepen enaan in.
Jouj im keememej aolep iien—jejjab aikuij ajjeļo̧k jetōbin jimwe eo ad n̄an “[jeļā] m̧ōņōņō im aiboojoj eo an kam̧anm̧an eo” kōn juon technology in “pottage.”
“Kom̧win jab bōd; Anij e jab likūt bwe ren kajjirere kake E: bwe jabdewōt eo armej ej kalbwin e, men in enaaj barāinwōt m̧adm̧ōd e.
“Bwe eo ej kallib n̄an kanniōkin, jān kanniōkin enaaj m̧adm̧ōd wabanban; e eo ej kallib n̄an Jetōb, jān Jetōb enaaj m̧adm̧ōd mour indeeo.”
Kien eo kōn m̧admōd ej m̧ool—inne, rainin, im indeeo.
Oktakļo̧k wōt n̄an Irooj ej bōk mijeļo̧k, kapene, im jerbal jim̧we. Jej aikuj kajjieon̄ n̄an erom̧ ro rej jutak ilo etan ro rej kōjerbal tōmak ilo Rilo̧mo̧o̧r im jerbal im bōbrae jān ad erom̧ ro rej kipel er.
Keememej aolep iien bwe n̄an erom̧ juon rikaļoor eo eniknik ej bōk mijeļo̧k, kapene, im jerbal jim̧we. Jej aikuj kajjieon̄ n̄an erom̧ ro rej jutak ilo etan ro rej kōjerbal tōmak ilo Rilo̧mo̧o̧r im jerbal im bōbrae jān ad erom̧ ro rej kipel er.
Revelesōn an juon make ej aikuji kalimjōk wōt eo, rie, im jerbal jim̧we. Jej aikuij kajjieon̄ n̄an erom̧ ro rej jutak ilo etan ro rej kōjerbal tōmak ilo Rilo̧mo̧o̧r im jerbal im bōbrae jān ad erom̧ ro rej kipel er.
Kappukōt ilo jejjōt n̄an menin letok ko an Jetōb im rej bōk mijeļo̧k, kapene, im jerbal jim̧we. Jej aikuj kajjieon̄ n̄an erom̧ ro rej jutak ilo etan ro rej kōjerbal tōmak ilo Rilo̧mo̧o̧r im jerbal im bōbrae jān ad erom̧ ro rej kipel er.
N̄an kalikkare, jejjab bōk wōnāāņ ak karbōb n̄an kōjeram̧m̧an ko an Anij kōn wōt ak ilo jerbal ko ad kajojo. Ankillaan Anij im iien ej kalikkar wāwein im n̄aat eo jemaron̄ bōk jouj eo emeanwōd An. Ak kwe im n̄a ewōr ad eddo eo ilo jetōb n̄an jerbal, kōm̧m̧an, im ekkatak n̄an kōj make.
Kallim̧ur im Naan in Kam̧ool
Ainikien kakkōl eo ikar ļōn̄aje ilo 2009 eo eo ekar kije, dim, im menin ekairir kōnke kōn kauwōtata ko an technology im men ko jej ekōnono kaki rej kab tōn kar waļo̧ktok. Men eo kar ilo iien eo.
Ainikien kakkōl eo ij ļōn̄aje rainin eļapļo̧k an kije, dim, im em̧ool ļapļo̧k an menin ekairir kōnke kōn kauwōtata ko an technology im men ko jej ekōnono kaki rej aolep jikin aolep iien. Menin ej kiiō.
Jetōb Kwojarjar ej kam̧ool kōn m̧ool in. Kwe im n̄a ewōr juon eddo n̄an lukkuun lale n̄e Jetōb Kwojarjar emaron̄ iien otemjej kwaļo̧k m̧ool im jeļā eo ilo men otemjeļo̧k jej ba im kwaļo̧k, jim̧or ilo lowa im lik. Kallim̧ur eo n̄an kōj kajjojo ej bwe jen maron̄ kōjerbal techonolgy in ilo jim̧we kōn tōl, kōjparok, im kakkōļ ko me rej itok jen kajoor eo an Jetōb Kwojarjar.
Ij kallim̧ur bwe ilo ad “reilo̧k n̄an [Rilo̧mo̧o̧r eo] ilo aolep ļōmņak ko” im pukot jemjerā eo an Jetōb Kwojarjar, jenaaj bōk kōjeraam̧m̧an n̄an etetal ilo kijejeto eo an jetōb eo an Irooj im bōk anōm̧m̧an eo An. Im jenaaj “ejjeļo̧k ad pere, ejjeļo̧k ad mijak,” im kile m̧ool eo ilo aolep men, barāinwōt “men ko ilo aer lukkuun alikkar.”
Ij kwaļo̧k kam̧ool bwe Jemedwōj Ilan̄ emour im ej rikōm̧anm̧an eo an karōk in m̧ōņōņō eo eļap. Ij kam̧ool bwe Jisōs Kraist ej Nejin Emake Wōt Kar Keotak im Jitōnbōro Nejin Anij. Im ij kam̧ool Eaar jerkakpeje. Ej mour. Ej ad Ripinmuur im ad Rilo̧mo̧o̧r. Im ij kam̧ool bwe jej jeram̧m̧an n̄an mour ilo juon iien eo im ej itok tarlep in iien ko. Ij m̧ōņōņō ilo aō kwaļo̧k kam̧ool kōn m̧ool kein ilo āt eo kwojarjar etan Jisōs Kraist, amen.