35:48

O Mea e Pei Ona I Ai Lava 2.0

Faigalotu i le Lalolagi Atoa mo Talavou Matutua

Elder David A. Bednar

Aso Sa, 03 Novema, 2024

Ma te faafetai ma Susan mo lenei avanoa tatou te tapuai ai ma aoao faatasi ma outou. Ma te alolofa ia te outou! I le lalolagi atoa po o fea lava tou te i ai, matou te alolofa ia te outou!

Ma te tatalo faatauanau foi ia faamanuiaina e le Agaga Paia i tatou taitoatasi e faalogo i mea e manaomia ona tatou faalogo ai ma vaai i mea e manaomia ona tatou vaai i ai, ina ia mafai ona tatou fetuleni atu i luma ma le faatuatua i le Faaola ma se naunautaiga faateleina e mulimuli ma auauna ia te Ia.

O Le Tisipenisione o le Atoaga o Taimi

Ua faamanuiaina i tatou e ola i se vaitau ofoofogia i le tisipenisione faaiu o le talalelei, le tisipenisione o le atoaga o taimi. Ua fesoasoani tusitusiga paia ma saunoaga faaperofeta tatou te aoao ai e atili talisapaia atoatoa nei aso iloga o tatou ola ai.

Na saunoa le Perofeta o Iosefa Samita: “O le fausiaina o Siona o se galuega ua naunau i ai le nuu o le Atua i vaitausaga uma; o se autu sa nopia’i ai perofeta, faitaulaga ma tupu ma le fiafia tulaga ese; sa o latou sagisagi atu ma le naunauga fiafia i le aso tatou te ola ai; ma faasasao atu ai ma naunauga faalelagi ma le olioli sa latou pepese ai ma tusia ma valoia o tatou aso; peitai sa latou maliliu e aunoa ma le vaai i ai; … ua tuua mo i tatou e vaai i ai, auai i le faatinoga ma fesoasoani e faataavale i luma le mamalu o Aso e Gata Ai.”

I se isi taimi, na faaalia mai ai e le Perofeta e faapea “o [i latou e umia] le Perisitua i le lagi o le a faatasia ma le perisitua o i le lalolagi, e faataunuuina ai na mafuaaga maoae; … o se galuega na manatunatu loloto i ai le Atua ma agelu ma le fiafia mo tupulaga ua mavae; na uunaia agaga o peteriaka ma perofeta anamua; o se galuega ua faamoemoe e aumaia le faaumatiaina o mana o le pouliuli, le faafouina o le lalolagi, le mamalu o le Atua, ma le faaolataga o le auaiga o tagata soifua.”

Na avea lava le taua faaleagaga o aso e gata ai ma tulimataiga o le gauai faaperofeta mo seneturi. Ma o le vaitau faapitoa tatou te ola ai o le taimi nei, ma o le a faaauau pea ona faatumulia i atina’ega faaleagaga ma mea e tutupu.

O Le Matafaioi a Tekinolosi i Lenei Vaitau Faapitoa o le Lalolagi

O se vaaiga taua o le atoaga o loo avanoa mo i tatou i lenei vaitau, o se alualu i luma faavavega o faama’ite ma mea fou ia ua mafai ai ona televave le galuega o le faaolataga ma le faaeaga a le Atua: mai nofoaafi i uaealesi i leitio i taavale i vaalele i telefoni i eletonika i televise i komepiuta i faasalalauga faasatelite i le initoneti i le atamai faafoliga—ma se lisi toetoe a le i’u o tekinolosi ma meafaigaluega ua faamanuiaina ai o tatou olaga. O nei atinae o ni vaega a le Alii o le faanatinatia o Lana galuega i aso e gata ai.

I le 1862 na saunoa mai Polika Iaga: “O mea uma na iloa i suesuega faasaienisi ma faatufugaga, e moni lava ma aoga i le tagata, na tuuina mai i faaaliga tuusa’o mai le Atua, e ui ina toaitiiti e faailoaina mai. Na tuuina mai faatasi ma se vaaiga e saunia le ala mo le manumalo a’ia’i o le upumoni, ma le togiolaina o le lalolagi mai le mana o le agasala ma Satani. E ao ona tatou faaaoga lelei nei meafou sili ua maua, le poto ua autausagā ona faaputuputu, ma tuuina atu i a tatou fanau faamanuiaga o vaega uma o le poto aoga, e saunia ai i latou e laa atu i luma ma faia a latou vaega ma le atoatoa i le galuega sili.”

I le 1966, sa valoia ai e Peresitene Tavita O. MaKei mea fou e maua faasaienitisi lea e “maofa ai le tagata” o le a mafai ai ona talai atu le talalelei i ituaiga uma, gagana, ma tagata. Ma le isi: “O mea fou ua maua ua loa ona natia o i ai se mana malosi tele, a le mo le faamanuiaina po o le faatafunaga o tagata soifua, ma ua avea ai le tiutetauave o le tagata i le faafoeina o ia mea o se [tiutetauave] sili ona maoae, ua taulimaina e tagata. … Ua tumu lenei vaitau i mea matautia e leai se tuaoi, faapea foi mea e mafai ona fai e le’i ta’ua mai.”

O Mea E Pei Ona I Ai Lava

Sefululima tausaga talu ai, i se faigalotu i le lalolagi atoa mo talavou matutua, sa ou talanoaina ai le fuafuaga sili o le fiafia a lo tatou Tama Faalelagi mo Ana fanau. Sa ou faamamafaina le taua o o tatou tino faaletino i le fuafuaga a le Tama, le ala o loo faatosinaina ai e Lusifelo i tatou e faaitiitia, ma faaaoga sese o tatou tino faaletino, ma si’i a’e ai se leo o le lapataiga e uiga i aafiaga faataumaoi e ono mafai ona tulai mai i masini faatekinolosi i o tatou agaga ma a tatou mafutaga ma isi tagata.

Sa ou faamamafaina ai e leai ni faama’ite faatekinolosi po o le suiga vave ia i latou lava e lelei pe leaga. Ae, sa ou lapata’i atu e faapea, o le lu’itau moni lava o le malamalama i faama’ite ma suiga i totonu o le matalalaga o le fuafuaga e faavavau o le fiafia. Ou te tuuina atu foi “ni fesili se lua mo le mafaufau loloto ma le suesueina ma le agaga tatalo” e uiga i le faaaogaina lelei o nei tekinolosi.

“Pe o le faaaogaina o tekinolosi eseese po o auala o faasalalauga e valaaulia ai pe taofia ai le mafutaga faifai pea a le Agaga Paia i lou olaga?
Pe o le taimi e te faaaluina i le faaaogaina o tekinolosi eseese ma auala o faasalalauga e faalautele pe faatapulaa ai lou mafai ona ola, ona alofa, ma auauna atu i auala tauaogaina?”

O le autu o la’u savali i le 2009 o le “O Mea E Pei Ona I Ai Lava.” Sa moni lena mea i lena taimi.

O le autu o la’u savali i le asō o le “O Mea E Pei Ona I Ai Lava 2.0.” O le taimi lenei.

Ia Atamai

O le faapogai o la’u savali i le asō o loo maua lea i le faaiuga o se lauga i se faigalotu sa ou tuuina atu i le Iunivesite a Polika Iaga ia Ianuari o le tausaga nei.

“A o outou tauivi e aoao le talalelei a Iesu Keriso ma faatino le galuega e tatau ona outou faia, ou te apoapoai patino atu ia te outou ia atamamai i lo outou faaaogaina o meafaigaluega faatekinolosi faaneionapo. O faama’ite e pei o le atamai faafoliga [e mafai] ona (1) fesoasoani ia te oe i le mauaina o faamanuiaga maoae ma le (2) faaitiitia ai ma titina lou faitalia e filifili tatau ai. Faamolemole aua nei faatagaina le faapea e sa’o lelei, saoasaoa, ma le faigofie o tekinolosi faaonaponei e faatosinaina oe e taumamao ai pe aloese mai le galuega amiotonu lea e valaaulia ai i lou olaga ia faamanuiaga o le a e moomia. Ou uso e ma tuafafine pele, e leai ni auala alo faaleagaga po o ni faaleleiga vave.”

O le a ou tulimatai atu nei i mataupu e tolu ia na ou faamamafaina i le faamatalaga talu ai: o le atamai faafoliga, faitalia e filifili tatau ai, ma le galuega amiotonu.

Atamai Faafoliga

O le atamai faafoliga, e tele ina faasino i ai o le AF, o le tekinolosi lea e mafai ai e komepiuta ma masini ona faaosofia le atamai o le tagata soifua ma gafatia e foia ai faafitauli. I tausaga talu ai nei, o le atina’ega ma le faaaogaaga o tekinolosi AF, ua agai i luma i se saoasaoa e matua tulagaese, ma ua aafia ai toetoe o vaega uma o taumafaiga a le tagata—vailaau, saienisi, a’oga, tusiatafale ma le fauga, fesootaiga, tamaoaiga, fefaatauaiga, gaosiga o mea, ma le tele, ma tele o isi. Ma a o matuai faateleina le salalau o le faaaogaina o le AF, o faafanoga ua leai se tuaoi ma mea e mafai ona fai e le o ta’ua na valoia e Peresitene MaKei ua atili ona aliali a’e.

O lenei tekinolosi ofoofogia o loo aumaia ai le tulaga gafatia o le faalauteleina o le iloa, faaleleia atili ai le uiga auaumama o le olaga, faatautaiga o talanoaga ma fesootaiga, faalauteleina ai le aoaoina patino ma le tuputupu a’e, ma le faatupuina o fatufatuga ma le faama’ite.

Ua i ai foi i le AF le gafatia e faapuaoa ai lo tatou faasinomaga moni o ni atalii ma afafine o se Tama Faalelagi alofa, faasalaveia i tatou mai upumoni e faavavau ma galuega amiotonu e tatau ai mo le tuputupu a’e faaleagaga, faafanau mai ai le faamaualuga ma se faalauiloaga tuuitiitia o lo tatou faalagolago i le Atua, ma femilosa’i ai pe suitulaga ai le fegalegaleaiga ‘anoa faaletagata soifua.

“Pe a aoaoina i latou ua latou manatu ua popoto i latou, ma latou lē faalogologo ai i le fautuaga a le Atua, ona ua latou tuueseina, i le manatu ua latou iloa mo i latou lava, o le mea lea, o lo latou poto o le valea lea, ma o le a lē aoga ia te i latou. Ma o le a fano i latou.

“Peitai e lelei le aoaoina pe afai latou te faalogologo i fautuaga a le Atua.”

Mafaufau i le faafanoga lea e ono o’o i ai. O se mafutaga e amatalia i le AF, o se uo teine po o se uo tama, “e mafai ona mamanuina ma le faaeteete e [ofo atu ai] ni aafiaga maua’i ma avea ma vaisu, ma tosina ai i se tulaga lautele o manaoga faalelagona ma faaleagafesootai.”

“O lea faatagata patinoina e fatuina ai se lagona o sootaga ma le malamalama, e matua maualuga ai le faatosinaina o fegalegaleaiga ma nei paaga i tekinolosi. E atili ai ona faatupulaia le tosinaga i le avanoa ai i le 24/7 ma le leai o tulaga lavelave e tele ina maua i sootaga [moni] faaletagata soifua. Mai le manatuaina o aso taua e tali atu ai i se uiga faifai pea o le malamalama, ua faapolokalamaina ai nei [paaga] a le AF e faataunuu ai matafaioi atoatoa faapaaga, ma [faapitoa] ai ona avea ma vaisu,” ma femilosa’i ai vaaiga i “mea e pei ona i ai lava” i sootaga faaletagata soifua.

E le gata i lea, sa mamanuina patino paaga i tekinolosi e tofaatosina ai i, ma agai ai i luma ma manaoga faalelagona o se tagata, e ono afua ai se faataumaoiga i sootaga na saogalemu muamua. E pei o le kasa oona o le kaponi monosaite, o na ituaiga o sootaga i tekinolosi e ono avea ma “fasiotitagata lē tinoa” o sootaga mao’i. O le felata’itele faalelagona taufaa’ole’ole e ono suia ai le felata’i faalelagona moni o le olaga—le moni e noatia faatasi ai tagata e toalua. E ono maua e se tagata le mafanafana ma le toomaga i se paaga i tekinolosi i se ala e faatama’ia mālie ai le tutoatasi masani i le va o le tane ma le avā. Ma o nisi foi tagata e ono pauu i lea mailei e aunoa ma le iloaina o se faatamaiaga o le tautinoga faapitoa i se toalua ona o se paaga i tekinolosi e le “mo’i” ma e le faitaulia o se isi tagata.

Ia manatua i taimi uma o se paaga AF, ua na o se faiga faavae faafuainumera. E le manao ia te oe. E le popole ia te oe. Na te le iloa moni pe o e iai pe leai. E toe fai atu, o se seti o faatusatusaga faakomepiuta o le a faia ai oe o se meafaitino e faagaoioia, pe a e faatagaina. Faamolemole, aua nei faatagaina lenei tekinolosi e faatosinaina oe ia avea o se meafaitino.

O lenei faataitaiga ua na o se tasi mai le faitaumiliona o faafanoga e ono tulai mai i le atamai faafoliga.

O lo’u faamoemoega e le ina ia fautuaina ai faapea o le atamai faafoliga e matuai leaga; e leai. Ou te le o fai atu foi e le tatau ona tatou faaaogaina ona mau gafatia i auala tatau e aoao ai, fesootai ai, siitia ai ma faamanuiaina ai olaga, ma fausia ai ma faamalosi le Ekalesia; ioe e tatau ona tatou faaaogaina. E le tatau ona tatou fefefe pe taumafai e lalafi mai le AF. Ae o mea amiotonu e mafai ona tutupu i lenei meafaigaluega ofoofogia faatekinolosi, e mafai ona faataunuuina pe afai e tau ina tatou iloa ma puipuia mai ona faafanoga.

Ina ia faatautaia le faauilavea faigata o le faaleagaga ma tekinolosi, e ao i le Au Paia o Aso e Gata Ai ma faailoa ma le agaga tatalo (1) mataupu o le talalelei e mafai ona taiala ai lo latou faaaogaina o le atamai faafoliga ma le (2) tauivi ma le faamaoni mo le faapaaga a le Agaga Paia ma le meaalofa faaleagaga o faaaliga.

Ou te valaaulia outou ina ia toeiloilo ma suesue mataupu faavae taiala o le AF na atia’e ma tufatufa atu e le Ekalesia i le amataga o lenei tausaga. O nei mataupu faavae o loo faailoa atu ai le faaaogaina e le Ekalesia o le atamai faafoliga ma tuuina atu ai se faavae malosi i luga e mafai ona e fauina ai le puipuiga patino mai faafanoga o le faaaogaina ma le lē talafeagai o tekinolosi.

I lana uluai saunoaga i le konafesi aoao i le avea ai ma Peresitene O Le Ekalesia a Iesu Keriso o le Au Paia o Aso e Gata Ai, sa faamamafa mai ai e Peresitene Russell M. Nelson le taua o faaaliga patino i o tatou olaga. Na Ia saunoa: “O lo tatou Faaola ma le Togiola, o Iesu Keriso, o le a faatinoina ni isi o Ana galuega aupito mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga. Ae i aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”

Matou te faafetai atu i Lau Afio, le Atua e, mo se perofeta, ma o le po nei matou te faafetai atu ai mo lapataiga a Peresitene Tavita O. MaKei ma Peresitene Russell M. Nelson.

Faitalia e Filifili Tatau Ai

Sa ou ta’ua muamua e faapea o le atamai faafoliga e i ai le gafatia e faaitiitia ai ma titina lo tatou faitalia e filifili tatau ai. O le a le uiga o lena faaupuga, ma e mafai faapefea ona tulai mai se na aafiaga?

O faamoemoega aupito taua o le fuafuaga sili o le fiafia a le Tama, o le saunia lea o avanoa mo Ana fanau agaga e maua ai se tino faitino, e iloa ai le “lelei mai le leaga” e ala i aafiaga o le olaga nei, e tuputupu a’e ai faaleagaga, ma agaigai i luma e faavavau. Ma o le faitalia e filifili tatau ai o se elemene tutotonu lea i le fuafuaga a le Atua e aumaia le tino ola pea ma le ola e faavavau o Ona atalii ma afafine.

O le faaupuga faitalia e filifili tatau ai e ‘anoa. O upu uigatutusa mo le upu tatau e mafai ona aofia ai le “lelei,” “faamaoni,” “amiolelei,” ma le “mamalu.” O upu uigatutusa mo le upu faitalia e mafai ona aofia ai le “faatinoga,” “gaoioiga,” ma le “galue.” O lea, o le faitalia e filifili tatau ai, e mafai ona malamalama i ai o le tomai ma le avanoa e filifili ai ma faatino mo i tatou lava i ala e lelei, faamaoni, amiolelei, ma mamalu.

O le foafoaga a le Atua e aofia ai “mea e gaoioi ma mea e faagaoioi.” Ma le mea taua, o le faitalia e filifili tatau o le “mana [ua mamanuina faalelagi] o faatinoga tutoatasi” ia e faamamanaina ai i tatou o fanau a le Atua ia avea ma sui e gaoioi ae le na o ni meafaitino e taufaagaoioia.

Na faatonu Enoka e le Alii e uiga i lenei mataupu o le mataupu faavae.

“Faauta ia i latou nei o ou uso; o i latou o galuega a o’u lava lima, ma sa Ou tuu atu ia te i latou lo latou malamalama, i le aso na Ou foafoa ai i latou; ma sa Ou tuu atu i le tagata i le Faatoaga o Etena, lona faitalia;

“Ma sa Ou fai atu i ou uso, ma tuu atu foi le poloaiga, e tatau ona latou alolofa o le tasi i le isi, ma e tatau ona latou filifili aʼu, lo latou Tamā.”

Faamolemole ia matau, o faamoemoega autu mo le faaaogaina o le faitalia o le alofa lea o le tasi i le isi ma ia filifili le Atua. Mafaufau faapea ua poloaiina i tatou—e le na o le apoapoa’ia, uuna’i, po o le fautuaina—ae ua poloaiina e faaaoga lo tatou faitalia e liliu i fafo atu, ia fealofani, ma ia filifili le Atua.

O se viiga masani e faaigoaina “Filifili le Mea Tonu” mo se mafuaaga. E lei faamanuiaina i tatou i le faitalia e filifili tatau ai e fai soo se mea tatou te mananao ai i soo se taimi. Ae, e tusa ai ma le fuafuaga a le Tama, ua tatou maua le faitalia e filifili tatau ai e saili ma gaoioi e tusa ai ma upumoni e faavavau. I le avea ai “o ni pule ia i [tatou lava],” e “ao ona tatou auai ma le naunautai i faamoemoega lelei, “ma fai mea e tele i lo [tatou] lava loto malie, ma aumai le amiotonu tele.”

O le taua tupito o le faitalia e filifili tatau ai o loo faamamafa mai i le tala faatusipaia o le fono i le muai olaga. Sa fouvale Lusifelo i le fuafuaga a le Tama ma, na iloa lelei, o lona tetee na taulai tonu i le mataupu faavae o le faitalia e filifili tatau ai.

“O le mea lea, ona o le fouvale o Satani ia te au, ma lona saili e faaumatia le saolotoga o le tagata, … na ou faia ai ia lafoina o ia i lalo.”

O le fuafuaga manatu faapito a le fili o le aveesea lea mai atalii ma afafine o le Atua o le meaalofa ia “avea ma pule ia i latou lava” o e e mafai ona gaoioi i le amiotonu. O lona faamoemoe o le avea o fanau uma a le Tama Faalelagi ma meafaitino e na ona mafai ona faagaoioia.

Sa foafoaina le lalolagi e avea o se nofoaga lea e mafai ai e fanau a le Tama Faalelagi ona tofotofoina e vaai pe latou te faia “mea uma o soo se mea e poloaiina ai i latou e le Alii lo latou Atua.” O le faamoemoega tonu lava o le Foafoaga ma lo tatou i ai i le tino, o le vaai lea pe o le a e filifilia ma ou filifilia ma gaoioi ia avea ma e ua valaaulia i tatou e le Alii ia avea ai. E pei ona tautino mai e Peresitene Nelson: “ E finagalo le Atua, lo tatou Tama Faalelagi ia outou filifili e toefoi atu i le aiga ia te Ia. O Lana fuafuaga o le alualu i luma e faavavau e lē lavelave, ma na te faamamaluina lau faitalia.”

O lo tatou faamoemoe ma le faanaunautaiga o le mamalu selesitila faatasi ma o tatou aiga i le afioaga o le Tama Faalelagi ma Lona Alo Pele, o le Alii o Iesu Keriso. Mo lenei ma le tele o isi mafuaaga, sa valaaulia ai e Peresitene Nelson i tatou e “mafaufau faaselesitila.”

Ia faaeteete nei. O le faigofie ona faaaoga, iloa o le sa’o lelei, ma le taimi e tali vave atu ai lea ua faauigaina ai le atamai faafoliga, e mafai ona fatuina ai se tosinaga taufaaosooso, fai ma vaisu, ma titinaina ai le faaaogaina o lo tatou faitalia e filifili tatau ai. Ona o le AF ua natia i le faatuatuaina ma folafolaga o le agaigai i luma faasaienitisi, e ono mafai ona faavaleaina ma le le iloa i tatou e faamatuu atu lo tatou faitalia e filifili tatau ai i se tekinolosi e mafai ona na o le mafaufau faatelesitila. O le faia o lena mea, e mafai ai ona faifaimalie ona tatou faaliliu atu mai le avea ma pule e mafai ona gaoioi i meafaitino ia e na ona taufaagaoioia. Ma atonu tatou te fesoasoani ai ma le le iloa ia Lusifelo ia ausia i le olaga nei, mea sa le mafai ona ia ausia i le muai olaga.

O le upumoni o se malamalama lea i mea e pei ona i ai. O le atamai faafoliga e le mafai ona faatagā faapei, faata’ita’i, pe suia ai foi le tosinaga a le Agaga Paia i o tatou olaga. Po o le a lava le lelei ma le matagofie e ono o’o i ai le AF tekinolosi, e le mafai lava ona tuuina mai se molimau i le Tama ma le Alo, faaalia le moni o mea uma, pe faapaiaina i latou o e salamo ma ua papatisoina.

O le upumoni o se malamalama i mea e pei ona o le a i ai. Ona ua tatou popoto, faasao ma faaaoga lo tatou faitalia e filifili tatau ai e alolofa i le Atua ma auauna atu i o tatou uso ma tuafafine, ma ia avea le Agaga Paia ma o tatou taiala, e mafai ona tatou aloese mai le taufaasese ma manuia faaleagaga i taimi faigata ma faamanuiaina ua tatou ola ai.

Galuega Amiotonu

O se malamalama i le fuafuaga a le Tama Faalelagi o le fiafia, e fesoasoani lea e iloa ai o galuega amiotonu e tatau ai mo le alualu i luma faaleagaga.

I le avea ai ma atalii ma afafine o le Atua, “ua tofu [i tatou] ma se natura paia ma se taunuuga” ma ua maua gafatia faaleagaga mai ia te Ia. O lo tatou Tama Faalelagi ma Lona Alo Pele o ni foafoa, ma ua La faamatuu mai ia i tatou i le olaga nei ni vaega o o La’ua mana foafoa. O lo tatou tomai faapitoa e galulue ai ma foafoa, e taua tele faaleagaga ona e totonugalemu i le fuafuaga a le Tama ma e aofia ai se tasi o faailoaga taualuga o lo tatou gafatia faalelagi.

Sa faamalamalama mai e Peresitene Thomas S. Monson: “Na tuu e le Atua le lalolagi e le uma mo [alii ma tamaitai] e galueaiina [o latou] tomai. Sa Ia tuua le eletise i ao, o le suauu i le eleele. Sa Ia tuua vaitafe e le’i sosooa ma le vaomatua e le’i tatuuina ma aai e le’i fauina. Ua tuuina mai e le Atua ia i [tatou] le luitau o mea mai le natura, ae le o le faigofie o mea ua uma ona fai. Ua Ia tuua ata e lei valiina, ma musika e lei usuina, ma faafitauli e lei foiaina, ina ia mafai ai ona [tatou] iloa olioliga ma mamalu o le foafoaga.”

O le faitalia e filifili tatau ai, avea o se pule, ma galuega amiotonu, e fesootai ma e noatia faatasi i ni auala e matua’i mamana lava. Mafaufau, mo se faataitaiga, o le uiga o le faatuatua i le Alii o Iesu Keriso e pei ona tuuina mai i Lectures on Faith:

“O le faatuatua [ia Keriso o le] uluai mataupu faavae lea i le tapuaiga ua faaali mai, … o le faavae o le amiotonu uma … ma o le mataupu faavae o le faatinoga i tagata atamamai uma.”

O le meaalofa faaleagaga o le faatuatua ia Keriso e aofia ai le faaaogaina o la tatou faitalia e gaoioi ai ma mulimuli ia te Ia, ola i Ana aoaoga, tausi Ana poloaiga, noatia i tatou lava ia te Ia e ala i feagaiga, faalagolago i Ana folafolaga, ma talia ma le agamalu Lona finagalo ma Lona taimi i o tatou olaga. O le gaoioi e tusa ai ma le mataupu autu ma mataupu faavae sa’o, na folafola mai e le Togiola, e tatau ai ona “e mate lava le faatuatua pe a leai ni galuega.”

Ua tatou aoaoina foi i Lectures on Faith e faapea “o le faatuatua ua le na o le mataupu faavae o galuega, ae faapea foi i le mana, … pe o i le lagi po o i le lalolagi.” O le faatuatua ia Keriso e taitai atu ai i taimi uma i faatinoga amiotonu, lea e faateleina ai lo tatou gafatia faaleagaga ma le mana.

O le mea lea, o soo faamaoni o Keriso o tagata faigaluega e nopia’i ma le naunautai ona “o le mana ua ia i latou, lea ua avea ai i latou ma pule ia i latou lava.” O soo tuuto e gaoioi e le aunoa ma le matuai faaeteete, e tusa ai ma o latou gafatia ma tulaga taitoatasi, o ni pule e faia pe faia se mea i itu faaletino ma faaleagaga o o latou olaga i la latou auaunaga i isi.

O le malamalama faapea o le faatuatua i le Faaola o se mataupu faavae o le faatinoga ma le mana ua fautuaina mai ai se mamanu faifaipea o galuega amiotonu lea ua avea o se faailoaga faavae o le faalagolago ma le talitonuina o Ia ma o se faapogai foi o le aoaoina ma le tuputupu a’e. Mo nei mafuaaga taua, o le galue e tatau ai mo lo tatou alualu i luma faaleagaga.

Na aoao mai e Peresitene Ezra Taft Benson: “O la tatou, o se talalelei o le galue—e tumu i le faamoemoe, e le manatu faapito ma e tuuina atu i le agaga o le alofa moni o Keriso. Ona o lea o le a mafai ai ona tatou tuputupu a’e i uiga faaleatua. Ona o lea o le a mafai ai ona avea i tatou o ni meafaigaluega agavaa i aao o le Alii.”

O se tasi o o’u popolega tele o le, soona faalagolago i le AF tekinolosi o le a afua ai ona tatou faatamala ma papa’u faaleagaga—maumau ai faamanuiaga ua mafai ona maua e ala i galuega amiotonu.

Ou te le iloa pe fia savali o sauniga faamanatuga ma le Aoga Sa, lesona a le au perisitua ma le Aualofa i le Aso Sa a sau o le a fatuina mai le AF. O se faatonuga faigofie e ta’u atu i le masini eletonika, faatalitali mo ni nai sekone po o minute, ona e maua lea o le mea e te moomia. Ae ua e maua moni le mea ua e moomia?

Ia, ou te talitonu o le AF e mafai ona fesoasoani lelei i le aoina mai o faamatalaga, faitioina o tatou mafaufauga, iloiloina ituaiga o a tatou tusitusiga, ma faatelevave se faagasologa o se faiga e aoao ai “lea fuaiupu ma lea fuaiupu [ma] lea mataupu i lea mataupu.” Ae o gafatia faalelagi e fatu ma galue e patino tonu ia i tatou taitoatasi o ni atalii ma afafine o le Atua. E le taumateina le mafai ona tatou fatuina ma gaosia anotusi mo se lauga o se sauniga faamanatuga i le AF. Ae o le faamoemoega e le na o le fatuina po o le tuuina atu o se anotusi faagaeetia; ae, o le galue ma le avea ma mea ua faamoemoe ma faananau i ai le Atua mo i tatou ia avea ai.

O a’u lava ia ou te le faaaogaina lenei tekinolosi e fatuina ai pe faa’auivi ai a’u lauga, tusiga, po o anotusi o isi galuega faatino. Atonu o la’u taumafaiga maelega lea, o la’u galuega fatufatu, ma, o le mea e sili ona taua, o lo’u sailiga ia tatala atu i musumusuga mai le Agaga Paia.

Ou te faaaogaina lenei tekinolosi e iloiloina ai la’u galuega. Mo se faataitaiga, ina ua uma ona ou tusiaina la’u lauga lea ou te tuuina atu ia te outou i le taimi nei lava, sa ou fesili i se polokalama o le AF e faavasega ma faamatala mai le leo o le lauga mo se aofia i le lalolagi atoa o talavou matutua o tagata o Le Ekalesia a Iesu Keriso o le Au Paia o Aso e Gata Ai. O manatu faaalia nei sa ou mauaina.

“O le leo o lenei lauga e paia ma ‘anoa, ona o loo utuvai le tusitala i maufaasino faatusipaia, ma aafiaga patino e aoao atu ai e uiga i le taua o le iloatino o mea moni faaleagaga mai mea taufaasese o le lalolagi. E tumu foi le lauga i le faamoemoe ma e faamalosiau, o loo valaaulia e le tusitala ia talavou matutua e saili faaaliga ma mulimuli i le faataitaiga a le Faaola i o latou olaga i aso taitasi. Ua faamoemoe le lauga e musuia le faatuatua ma gaoioiga i lana aofia ma ia lapata’ia i latou i tulaga lamatia o le faaseseina i pepelo a Satani.”

E faavae i luga o lenei iloiloga, na ou faia ai ni suiga ua ou faamoemoe na faaleleia atili ai le savali i lona aotelega.

Faamolemole ia manatua e le aunoa—e le tatau lava ona tatou faatauina atu lo tatou tofi ulumatua o le “iloaina o olioliga ma mamalu o le foafoaga” mo se “meaai” faatekinolosi.”

“Aua nei faaseseina outou; e le ulagia le Atua: aua o le mea e luluina e le tagata, o le mea lava lea e seleseleina mai ai e ia.

“O se lulu i la lona tino, e selesele mai ai e ia i la le tino le mea e pala; a o se lulu i la le Agaga, e selesele mai ai e ia i la le Agaga le ola faavavau.”

O le tulafono o le seleselega e moni—ananafi, nei, ma le faavavau.

O le liua faifaipea i le Alii e moomia ai le tulimatai, lagolagoina, ma galuega amiotonu. E tatau ona tatou tauivi ia avea ma pule e faaaogaina le faatuatua i le Faaola ma gaoioi e lafoai le avea ma meafaitino e na ona taufaagaoioia.

Ia manatua e le aunoa o le avea ai ma soo tuuto e manaomia ai le tulimata’i lagolagoina, ma galuega amiotonu. E tatau ona tatou tauivi ia avea ma pule e faaaogaina le faatuatua i le Faaola ma gaoioi e lafoai le avea ma meafaitino e na ona taufaagaoioia.

O faaaliga patino e moomia ai le tulimata’i, lagolagoina, ma galuega amiotonu. E tatau ona tatou tauivi ia avea ma pule e faaaogaina le faatuatua i le Faaola ma gaoioi e lafoai le avea ma meafaitino e na ona taufaagaoioia.

O le sailia talafeagai mo meaalofa a le Agaga e moomia ai le tulimatai, lagolagoina, ma galuega amiotonu. E tatau ona tatou tauivi ia avea ma pule e faaaogaina le faatuatua i le Faaola ma gaoioi e lafoai le avea ma meafaitino e na ona taufaagaoioia.

Ina ia manino, tatou te le mauaina pe agavaa foi mo faamanuiaga a le Atua i le na o a tatou galuega taitasi. O le finagalo ma le taimi a le Atua e filima’otia ai pe faapefea ae o afea foi tatou te maua ai Lona alofamutimutivale. Ae o oe ma a’u ua i ai le matafaioi faaleagaga e galulue, fatufatu, ma aoao mo i tatou lava.

Folafolaga ma le Molimau

O le leo o le lapataiga na ou tautala i ai i le 2009 sa maua’i, malosi, ma faanatinati ona o le faafanoga faatekinolosi ma avanoa o loo tatou talanoaina sa faatoa alia’e mai. Sa moni lena mea i lena taimi.

O le leo o le lapataiga ua ou tautala i ai i le aso ua sili atu ona maua’i, sili ona malosi, ma sili ona faanatinati ona o le faafanoga faatekinolosi ma avanoa o loo tatou talanoaina ua i ai i mea uma i taimi uma. O le taimi lenei.

E molimauina e le Agaga Paia le mea moni. Ua ia te oe ma a’u se tiutetauave e faamautinoa ai e mafai e le Agaga Paia i taimi uma ona faamautuina le moni ma le faamaoni o mea uma tatou te tautala ai ma faasoa, e le gata i lo tatou ituaiga ma le anotusi. O le folafolaga mo i tatou taitoatasi o le, e mafai ona tatou aoao e faaaoga talafeagai lenei tekinolosi faatasi ma le taitaiga, puipuiga, ma lapataiga e maua mai le mana o le Agaga Paia.

Ou te folafola atu a tatou “vaavaai atu i [le Faaola] i mafaufauga uma” ma saili mo le mafutaga ma le Agaga Paia, o le a faamanuiaina i tatou e savavali i le agamalu o le agaga o le Alii ma maua le filemu ia te Ia. Ma o le a tatou “le masalosalo lava, le fefefe foi,”ma iloatino le moni o mea uma,e oo foi i “mea e pei ona i ai.”

Ou te molimau atu o loo soifua lo tatou Tama Faalelagi ma o Ia o le Matai’sau o le ata sili o le fiafia. Ou te molimau atu o Iesu Keriso le Atalii e Toatasi na Fanaua e le Tama, ma o le Alo Pele. Ma ou te molimau atu ua toetu o Ia. O loo soifua o Ia. O Ia o lo tatou Togiola ma lo tatou Faaola. Ma ou te molimau atu ua faamanuiaina i tatou e ola i se vaitau ofoofogia o le tisipenisione o le atoaga o taimi. Ou te molimau atu ai i nei upumoni i le suafa paia o Iesu Keriso, amene.