Dahme atahil Sounkomouro Wiahiongehr kitail?, ” Kakehlepen me Pwulopwul kan, Mehi 2021.
Tiepene en Priesthood
Dahme Atail Sounkomouro Ketin Wiahiongehr Kitail?
Iren padahk kan
Dahme Sises ketin wiahiongehr emenemen kitail? E ketin wiadahr mehkoaros me kesempwal ong atail seilok nan mour wet ong wasa me sansal nan pilahn en Samatail Nanleng. I pahn koasoia ire pahiou me sansal nan pilahno.
Iasadau kihong kitail kawehwe mwahu oh kehlail en powehdi kasongosong kan en nan mour wet me kitail oh irail me kitail kin poakoang kin sohpai. E kihong kitail mwomwen atail kin kilang soitar kan en paliwaratail, mwahlielitail, de atail madmadau kan me kitail kolokol sang ni atail ipwidi de alehda erein atail wie momour. E kihong kitail kehl pwehn powehdi pahtou kan, sopweida kan, oh lingeringer.
Iasadau pil kihong kitail kahrepe kehlail ehu pwehn kapwaiada kosonned akan en Koht nan erein atail mour kan. …
Atail Sounkomour oh Soundor powehdi kalokolok mwuledek pwehn wiahla ehu tohnmetei ong dipen aramas akan koaros me pahn koluhla. Tohnmetei en tomw wet ketkihda me keieu kaselel, sihmpwul me mwakelekel, ong me suwed me keieu kouwahlap, dihp akan en sampah pwon. …
… Sises padahkiong kitail pilan en komour. Pilahn wet iangahki Kepikipiko, kahrepen mour, uhpene en kak mie, oh kisakis en saledek en pilipil. E pil ketin padahkihong kitail kosonned akan oh inou kan me kitail anahne kapwaiada oh tiahk sarawi kan me kitail anahne ale pwehn pwurehng lel rehn atail pahpa/nohno kan en nanleng.
Atail Sounkomouro kehn oh mwahngi atail kasongosong kan, atail kahpwal kan, atail mongmedek kan, oh atail lokolok kan, pwe E ketin pein ale mepwukat koaros me wia kisehn Sapwellime Tomwo… Koaros me kin lokolongki songosongen kalokolok kan en mour wet anahne tamataman me atail Sounkomouro pil alehier soangen medeko, oh pwehki Sapwellime Tomwo E ketikihong emen emen kitail kehlail en ale mepwukat.