បងប្អូនស្រី រ៉ូលលីន បានជួយថែរក្សាទុក !

ព្រះយេស៊ូវគ្រីស្ទបានមានបន្ទូលប្រាប់ព្យាការី យ៉ូសែប ស្ម៊ីធ នូវរឿងរ៉ាវសំខាន់ជាច្រើនដើម្បីជួយដល់យើង ។ សាសនាចក្របានបង្កើតរោងពុម្ពមួយដើម្បីបោះពុម្ពព្រះបន្ទូលរបស់ព្រះ ។ ដើម្បីឲ្យ មនុស្សអាចអានព្រះបន្ទូលទាំងនោះបាន ។

នៅថ្ងៃមួយ មានបុរសមួយក្រុមដែលខឹងសម្បារបានមក ។ ពួកគេបានបំផ្លិចបំផ្លាញរោងពុម្ព ។ ពួកគេបានបោះសន្លឹកព្រះគម្ពីរចោលទៅលើផ្លូវ ។

បងប្អូនស្រីពីរនាក់ មានឈ្មោះថា ម៉ារី អេលីហ្សាបិត និង ខារូឡាញ រ៉ូលលីន បានឃើញពីអ្វីដែលបានកើតឡើង ។ ពួកគេបានរត់ទៅប្រមូលសន្លឹកព្រះគម្ពីរឱបទុកក្នុងដៃរបស់ពួកគេ ។

ក្មេងស្រីទាំងពីរនាក់បានពួននៅក្នុងគុម្ពពោត ចាំរហូតទាល់តែពួកបុរសទាំងនោះបានចាកចេញ ។ ពួកគេបានជួយថែរក្សាទុកព្រះគម្ពីរ ! ព្រះគម្ពីរទាំងនោះបានក្លាយជាផ្នែកនៃព្រះគម្ពីរគោលលទ្ធិ និងសេចក្ដីសញ្ញា នៅពេលក្រោយមកទៀត ។

ខ្ញុំអាចអានព្រះគម្ពីរ ។ ខ្ញុំអាចមានចិត្តក្លាហាន ហើយក្រោកឈរឡើងសម្រាប់អ្វីដែលខ្ញុំជឿ ។