Ti Pammati nga Agdawat ken Kalpasanna Agtignay

Dagiti Adaw

Presidente Henry B. Eyring

Maikadua a Mammagbaga iti Umuna a Panguluen

Ladawan

lalaki nga agkarkararag

Di nagbalbaliw ti wagas nga umawat iti paltiing iti Dios manipud iti aldaw da Adan ken Eva. Daytoy pay laeng para iti amin a naawagan a katulongan ti Apo manipud idi punganay agingga ita. Daytoy pay laeng para kadatayo. Kanayon a naaramid daytoy babaen ti panangaramat iti pammati. …

… Adda dagiti saludsodmo a maidawatam iti sungbat. Umdas ti pammatim a mangnamnama nga umawatkanto iti sungbat manipud iti Apo babaen kadagiti katulonganna. Awanto ti gundawaymo a dumawat iti napigsa iti sungbat dagiti agsarita, ngem makapagdawatka ken Amam iti kararag.

Ammok manipud iti padas nga umayto ti sungbat a mangpunno iti kasapulam ken ti naespirituan a panagsaganam. …

No ti pammatim ken Jesucristo ti nangiturong iti puso a napalukneng babaen ti epekto ti Pannubbotna, ad-adda a mariknamto dagiti arasaas ti Espiritu kas sungbat ti karkararagmo. …

Kas iturongnatayo ti pammatitayo ken Jesucristo a dumawat iti Ama iti sungbat, daytanto met a pammati ti mangyeg iti nalamuyot nga apros ti Mangisalakan kadatayo tapno denggen ti pannarabayna ken determinado ken aggagar nga agtulnog. …

Paneknekak a ti bato a pagtaktakderantayo ket isu ti pammaneknektayo a ni Jesus ti Cristo; a daytoy ti Simbaanna nga idauluanna a mismo; ken ni Presidente Russell M. Nelson ti sibibiag a propetana ita. …

Ikararagko a maaddaankayo koma iti kasta met la a pammaneknek.