Bulanan nga Mensahe sa Liahona, Mayo 2022
Ang Gahum sang Espirituhanon nga Buylo
Gusto ko magpanugyan sang lima ka partikular nga mga aksyon nga pwede naton himuon agud mabuligan kita nga mamentinar ang positibo nga espirituhanon nga buylo.
Pinalangga kong kauturan, palangga ko kamo. Malahalon para sa akon ining oportunidad nga makahambal sa inyo karon. Nagapangamuyo ako adlaw-adlaw nga maamligan kamo sa mapintas nga mga pagpang-atake sang kaaway kag makaangkon sang kusog nga mag-abante sa tunga sang tanan nga mga hangkat nga inyo ginaatubang.
Ang iban nga mga pagtilaw tama ka pribado nga mga palas-anon nga indi makita sang iban. Ang iban nagakatabo nga hayag sa panulukan sang kalibutan. Ang inaway sa este sang Europa isa sini. Madamo nga beses na ako nakakadto sa Ukraine kag Russia. Palangga ko ina nga mga lugar, ang mga katawhan, kag ang ila mga lenggwahe. Nagahibi ako kag nagapangamuyo para sa tanan nga apektado sining inaway. Bilang simbahan ginahimo naton ang tanan naton nga masarangan agud buligan ang mga nagaantos kag nagatinguha nga makatibawas. Ginaagda naton ang tanan nga magpadayon sa pagpuasa kag pagpangamuyo para sa tanan nga tawo nga nahalitan sining kalamidad. Ang bisan ano nga giyera isa ka makahaladlok nga paglapas sang tanan nga ginatindugan kag ginatudlo sang Ginuong Jesucristo.
Wala sing bisan isa sa aton nga makakontrol sang mga nasyon ukon sang mga aksyon sang iban ukon bisan gani mga miyembro sang aton kaugalingon nga mga pamilya. Pero makontrol naton ang aton mga kaugalingon. Ang akon panawagan sini nga adlaw, pinalangga ko nga kauturan, amo nga untati na ang mga inaway nga nagadabadaba sa inyo tagipusuon, sa inyo puluy-an, kag sa inyo kabuhi. Ilubong ang bisan ano kag ang tanan nga hilig nga magpanakit sang iban—bisan ang huyog nga mangin masingki, masakit maghambal, ukon ang pagdumot sa tawo nga nakasakit sa inyo. Ang Manluluwas nagsugo sa aton nga itaya ang pihak nga guya,1 nga palanggaon ang aton mga kaaway, kag magpangamuyo para sa mga nagahingabot sa aton.2
Mahimo nga masakit kag mabudlay buy-an ang kaakig nga daw ara sa rason. Mahimo nga imposible patawaron atong mga makahalalit nga binuhatan nga nakahalit sa mga inosente. Pero sa pihak sini, ang Manluluwas naglaygay sa aton nga “patawaron ang tanan nga katawhan.”3
Mga sumulunod kita sang Prinsipe sang Paghidaet. Mas labi na gid karon, kinahanglan naton ang paghidaet nga Sia lamang ang makahatag. Paano kita makapaabot sang paghidaet nga magluntad sa kalibutan kon kita bilang mga indibidwal wala nagahandum sang paghidaet kag paghinangpanay? Mga kauturan, nakahibalo ako nga ang akon ginapanugyan indi mahapos. Pero ang mga sumulunod ni Jesucristo dapat nga magpahamtang sang ehemplo nga sulundon sang tanan nga kalibutan. Nagapangabay ako sa inyo nga himoa ang tanan ninyo nga masarangan para untaton na ang personal nga mga kagamo nga nagadabadaba sa inyo mga tagipusuon kag sa inyo mga kabuhi.
Gusto ko tutokan ining panawagan paagi sa paghambal parte sa konsepto nga ginpadumdom sa akon samtang nagatan-aw sang hampang nga basketbol.
Sa sina nga hampang, sa una nga bahin nagabalos-balos lang ang puntos, nagalagsanay. Dayon, sa nabilin nga lima ka segundo sang una nga bahin sang hampang, ang guard sang isa ka grupo nakapasulod sang isa ka matahum nga tatlo ka puntos. May isa na lang ka segundo nga nabilin, ang iya upod sa grupo nakaagaw sang bola kag nakapasulod liwat kag maghuni ang buzzer! Gani ina nga grupo nagkadto sa locker room nga may abanse nga apat ka puntos nga mabatyagan ang pagbuylo sang enerhiya. Napadayon nila ina nga buylo sa ikaduha nga bahin sang hampang kag nagdaog.
Ang buylo isa kag mabaskog nga konsepto. Naagyan na naton ini tanan sa isa ukon sa iban nga porma—halimbawa, sa salakyan nga nagaamat dasig ang dalagan ukon sa indi pag-intiendihanay nga gulpi lang nahulog sa pagbinaisay.
Gani mamangkot ako, ano ang mahimo magpukaw sang espirituhanon nga pagbuylo? Nakakita na kita sang mga halimbawa sang pareho positibo kag negatibo nga buylo. May mga kilala kita nga mga sumulunod ni Jesucristo nga nahaylo kag nagtubo sa ila pagtuo. Pero may kilala man kita nga sadto-dedikado nga mga tumuluo nga nagpalayo na. Ang buylo mahimo nga maghabyog sa pihak kag pihak.
Wala na sang tion nga mas kinahanglan naton ang positibo nga espirituhanon nga buylo sangsa karon, agud pakigbatuan ang kadasigon sang pagbaskog sang kalainan kag madulom nga signos sang panahon. Ang positibo nga espirituhanon nga buylo padayon nga magatulod sa aton paabante sa tunga sang kahadlok kag kawala-kasegurohan nga gintuga sang mga pandemya, mga tsunami, paglinupok sang bulkan, kag giyera. Ang espirituhanon nga buylo makabulig sa aton nga madaog ang wala untat, malain nga pagpang-atake sang kaaway kag mapunggan ang iya pagpaninguha nga pahuyangon ang aton personal nga espirituhanon nga pundasyon.
Madamo nga mga aksyon ang makapukaw sang positibo nga espirituhanon nga buylo. Ang pagtuman, pagpalangga, pagpaubos, pagserbisyo, kag kapasalamatan4 pila lang sini.
Gusto ko karon magpanugyan sang lima ka partikular nga mga aksyon nga pwede naton himuon para mabuligan kita nga mamentinar ang positibo nga espirituhanon nga buylo.
Una: Magtungtong sa dalan sang kasugtanan kag magtiner dira.
Sang nagligad lang, may maathag ako nga damgo nga nakasugata ako sang isa ka dako nga grupo sang tawo. Madamo sila sang ginpamangkot sa akon, ang kalabanan parte sa dalan sang kasugtanan kag ngaa importante ini kaayo.
Sa damgo ko, ginpaathag ko nga nagasugod kita sa dalan sang kasugtanan paagi sa bunyag kag paghimo sang aton una nga kasugtanan upod sa Dios.5 Tagsa nga nagaambit kita sang sakramento, nagapromisa kita liwat nga dalhon sa aton mga kaugalingon ang ngalan ni Jesucristo, dumdumon Sia pirme, kag tumanon ang Iya mga kasuguan.6 Kabaylo sini, ginapasalig kita sang Dios nga mahimo naton nga makaupod pirme ang Espiritu sang Ginuo.
Sa kadugayan nagahimo kita sang dugang pa nga mga kasugtanan sa templo, kon sa diin nagabaton kita sang mas dalagko pa gid nga mga promisa. Ang mga ordinansa kag mga kasugtanan nagatugot sa aton nga mag-angot sa diosnon nga gahum. Ang dalan sang kasugtanan amo ang solo nga dalan nga nagapadulong sa pangkahitaasan kag kabuhi nga wala katapusan.
Sa akon damgo, isa ka babayi ang namangkot kon paano ang tawo nga naglapas sa iya mga kasugtanan makabalik sa sinang dalan. Ang akon sabat sa iya pamangkot nagatudlo sang akon ikaduha nga panugyan:
Diskubreha ang kalipay sang adlaw-adlaw nga paghinulsol.
Ano kaimportante ang paghinulsol? Si Alma nagtudlo nga dapat “wala sila sing iwali luwas nga ini mga paghinulsol kag pagtuo sa Ginuo.”7 Ang paghinulsol ginapangayo sa tagsa ka may-salabton nga tawo nga nagahandum sang wala katapusan nga himaya.8 Wala ini sing pili. Sa rebelasyon kay Propetang Joseph Smith, ginsaway sang Ginuo ang una nga mga lider sang Simbahan tungod wala nila ginatudlo ang ebanghelyo sa ila mga kabataan.9 Ang paghinulsol yabi padulong sa progreso. Ang puro nga pagtuo nagatulod sa aton nga padayon sa pag-abante sa dalan sang kasugtanan.
Palihog indi pagkahadluki ukon pagpadugayi ang paghinulsol. Nalipay gid si Satanas sa inyo kalisod. Utda ini. Tabuga ang iya impluwensya sa inyo kabuhi! Sugdi sini nga adlaw nga tilawan ang kalipay sang pagkakas sang kinaugali nga tawo.10 Ang Manluluwas padayon nga nagapalangga sa aton pero mas labi na gid kon maghinulsol kita. Nagpromisa Sia nga bisan pa “ang mga bukid madula kag ang mga pukatod halinon … ang akon kaluoy sa imo magapadayon.”11
Kon pamatyagan ninyo kalayo na ukon kadugay na sa inyo nga nahilayo sa dalan sang kasugtanan kag wala na tsansa nga makabalik, indi ina matuod.12 Palihog kontaka ang inyo bishop ukon branch president. Sia ang tiglawas sang Ginuo kag buligan niya kamo nga matilawan ang kalipay kag kaumpawan sang paghinulsol.
Karon, isa ka paandam: Ang pagbalik sa dalan sang kasugtanan wala nagakahulugan nga mangin mahapos ang kabuhi. Ang ini nga dalan makapoy kag kon kaisa daw taklaron nga hagdan.13 Ugaling, ang ining pagpasaka gindisenyo para tilawan kag tudloan kita, papinuhon ang aton mga kinaugali, kag buligan kita nga mangin mga santos. Amo lamang ini ang solo nga dalan nga nagapadulong sa pangkahitaasan. Isa ka propeta14 ang naglaragway sang “bulahan kag malipayon nga kahimtangan sadtong mga nagatuman sang mga kasuguan sang Dios. Kay yari karon, ginapakamaayo sila sa tanan nga mga butang, alangay nga umalagi kag espirituhanon; kag kon sila magapabilin nga mainunungon tubtob sa katapusan pagabatunon sila sa langit … [kag] magpuyo upod sa Dios sa isa ka kahimtangan sang di-matapos nga kalipayan.”15
Ang paglakat sa dalan sang kasugtanan, nga ginaupdan sang adlaw-adlaw nga paghinulsol nagapatigayon sang positibo nga espirituhanon nga buylo.
Uruguay
Ang akon ikatatlo nga panugyan: Magtuon parte sa Dios kag hibal-a kon paano Sia nagahikot.
Isa sang aton pinakadako nga mga hangkat sa karon amo ang kon paano kilalahon ang mga kamatuoran sang Dios kag ang mga gin-ilog ni Satanas. Amo nga ginpaandaman kita sang Ginuo nga “magpangamuyo pirme, … agud madaug [naton] si Satanas, kag … makapalagyo sa mga kamot sang mga alagad ni Satanas nga nagasakdag sang iya buluhaton.”16
Si Moises nagpahamtang sang ehemplo kon paano mahibal-an ang iya sang Dios kag iya ni Satanas. Sang gintentar ni Satanas si Moises, nasat-uman niya ang pagpang-into tungod bag-o lang gid sila naghambalanay sang Dios nga atubangay. Nakilala gilayon ni Moises kon sin-o si Satanas kag ginsugo sia nga magpalayo.17 Sang mag-insister si Satanas, nahibal-an ni Moises kon paano magpanawag sa Dios para sa dugang nga bulig. Nakabaton si Moises sang diosnon nga kusog kag ginsaway liwat ang yawa, nga nagasiling, “Palayo ka sa akon, Satanas, kay ining nagaisahanon nga Dios lang ang akon simbahon.”18
Dapat naton sundon ina nga ehemplo. Tabuga ang impluwensya ni Satanas sa inyo kabuhi! Palihog indi sia pagsunda padulong sa iya “kadadalman sang kapiutan kag nagapadayon nga kasubo.”19
Sa makalaladlok nga kadasigon, ang testimonya nga wala ginasagod adlaw-adlaw sang “maayo nga pulong sang Dios”20 matumba. Gani, ang pangontra sa taktika ni Satanas maathag: kinahanglan naton sang adlaw-adlaw nga mga eksperiyensya sang pagsimba sa Ginuo kag pagtuon sang Iya ebanghelyo. Ginapangabay ko sa inyo nga tugoti ang Dios nga magpangibabaw sa inyo kabuhi. Hatagi Sia sang nagakaigo nga parte sang inyo tiyempo. Samtang ginahimo ninyo ini, pat-ini kon anong matabo sa inyo positibo nga espirituhanon nga buylo.
Panugyan numero 4: Magpangayo kag magpaabot sang mga milagro.
Si Moroni nagapasalig sa aton nga “ang Dios wala mag-untat nga mangin isa ka Dios sang mga milagro.”21 Ang tagsa ka libro sang balaan nga kasulatan nagapakita kon daw ano kahanda ang Ginuo nga magpatunga sa mga kabuhi sang mga nagatuo sa Iya.22 Gintunga Niya ang Dagat nga Pula para kay Moises, ginbuligan si Nefi nga mabawi ang saway nga mga lamina kag ginpanumbalik ang Iya Simbahan paagi sa Propeta nga si Joseph Smith. Ang tagsa sining mga milagro nagkinahanglan sang tiyempo kag mahimo nga indi ini ang mismo nga ginpangayo sinang mga indibidwal sa Ginuo.
Sa amo man nga paagi, bugayan kamo sang Ginuo sang mga milagro kon magtuo kamo sa Iya, “nga wala nagapangduhaduha.”23 Himoa ang espirituhanon nga buluhaton agud magpangita sang mga milagro. Mapinangamuyuon nga magpangayo sa Dios nga buligan kamo nga maggamit sinang klase sang pagtuo. Ginapromisa ko nga maeksperiyensyahan ninyo mismo nga si Jesucristo “nagahatag sing gahum sa ginapunaw,kag sa wala sing gahum nagadugang sia sing kusog.”24 Pila lang ka mga butang ang magapadasig sang inyo espirituhanon nga buylo nga masobra sangsa paghibalo nga ang Ginuo nagabulig sa inyo nga mag-isdog sang bukid sa inyo kabuhi.
Taiwan
Panugyan numero 5: Tapusa ang kagamo sa inyo personal nga kabuhi.
Ginaliwat ko ang akon panawagan nga untati na ang tanan nga kinagamo sa inyo kabuhi. Gamita ang pagkamapainubuson, kaisog, kag kusog nga kinahanglanon para magpatawad kag magpangayo sang kapatawaran. Ang Manluluwas nagpromisa nga “kon patawaron [naton] ang mga tawo sa ila mga paglapas, ang [aton] langitnon nga Amay magapatawad man sa [aton].”25
Duha ka semana na lang magaselebrar na kita sang Paskwa sang Pagkabanhaw. Sumugod karon tubtob sa sina nga adlaw, ginaagda ko kamo nga pangitaon ang katapusan sang personal nga konplikto nga nagapabug-at sa inyo. May mas nagakabagay pa bala nga buhat sang pagpalasalamat kay Jesucristo para sa Iya Pagbayad-Sala? Kon ang pagpatawad sa karon daw imposible, magpangayo sang gahum paagi sa nagabayad-sala nga dugo ni Jesucristo agud buligan kamo. Kon himuon ninyo ini, ginapromisa ko ang personal nga paghidaet kag gulpi nga espirituhanon nga pagbuylo.
Sang nagbayad-sala ang Manluluwas para sa tanan nga katawhan, ginbuksan Niya ang alagyan nga atong mga nagasunod sa Iya makabaton sang Iya pagpang-ayo, pagpabakod, kag nagapangtubos nga gahum. Ining espirituhanon nga mga pribelihiyo mabaton sang tanan nga nagahandum nga magpamati sa Iya kag magsunod sa Iya.
Pinalangga kong mga kauturan, upod ang tanan nga pagpangabay sang akon tagipusuon, ginapaisog ko kamo nga magtungtong sa dalan sang kasugtanan kag magtiner dira. Eksperiyensyahi ang kalipay sang adlaw-adlaw nga paghinulsol. Magtuon parte sa Dios kag kon paano Sia nagahikot. Magpangayo kag magpaabot sang mga milagro. Tinguhai nga untaton na ang kinagamo sa inyo kabuhi.
Kon aktuhan ninyo ining mga lalab-uton, ginapromisa ko sa inyo ang ikasarang nga mag-abante sa dalan sang kasugtanan nga may nagadako nga buylo, wala sapayan sang mga sablag nga inyo ginaatubang. Kag ginapromisa ko sa inyo ang mas dako nga kusog agud pakigbatuan ang tentasyon, mas dako nga kalinong sang pamensaron, kahilwayan sa kahadlok, kag mas dako nga paghiliusa sa inyo mga pamilya.
Buhi ang Dios! Si Jesus ang Cristo! Buhi Sia! Palangga Niya kita kag buligan Niya kita. Sa sini ako nagapamatuod sa sagrado nga ngalan sang aton Manunubos, nga si Jesucristo, amen.
© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, May 2022. Hiligaynon. 18351 861