Mensahe ti Binulan a Liahona , Mayo 2022
Ti Bileg ti Naespirituan a Momentum
Kayatko nga isingasing ti lima a naipangruna nga aramid a mabalintayo nga aramiden tapno matulongantayo a mangtaginayon iti positibo a naespirituan a momentum.
Patpatgek a kakabsatko, ay-ayatenkayo. Ipategko daytoy a gundaway a makisarita kadakayo ita nga aldaw. Inaldaw nga ikararagko a masalaknibankayto kadagiti narungsot a panangraut ti kabusor ken maaddaankayo iti pigsa nga agtultuloy iti baet dagiti aniaman a karit a pakaipasanguanyo.
Adda dagiti pannubok a nauneg ken nalimed a dadagsen nga awan ti asino man a makakita. Adda dagiti mayak-akem iti sangalubongan nga entablado. Ti armado a panagdadangadang iti akindaya nga Europa ti maysa kadagitoy. Napanakon idiay Ukraine ken Russia iti adu a gundaway. Ay-ayatek dagita a daga, dagiti tao, ken dagiti pagsasaoda. Agsangitak ken ikararagak dagiti amin a naapektuan iti daytoy a panagsusupiat. Kas maysa a simbaan ar-aramidenmi amin a kabaelanmi tapno matulongan dagidiay nga agsagsagaba ken marigatan nga agbiag. Awisenmi ti tunggal maysa nga agtultuloy nga agayuno ken agkararag para iti amin a tattao a madangdangran iti daytoy a didigra. Ania man a gubat ket nakabutbuteng a panaglabsing iti amin a banag nga itakderan ken isursuro ni Apo Jesucristo.
Awan kadatayo ti makakontrol kadagiti nasion wenno dagiti aramid ti sabsabali wenno uray dagiti kameng ti bukodtayo a pamilia. Ngem makontroltayo ti bagbagitayo. Ti awagko ita nga aldaw, patpatgek a kakabsat, ket tapno pagpatinggaen dagiti panagsusupiat nga agrurod iti pusoyo, pagtaenganyo, ken biagyo. Ikaliyo ti ania man ken amin a pagduyosan a mangdangran kadagiti dadduma—dagita man a pagduyosan ket maysa a panagpungtot, maysa a natadem a dila, wenno maysa a panaggura iti maysa a tao a nangdangran kadakayo. Binilinnatayo ti Mangisalakan nga isarangtayo ti sabali pay a pingping,1 ayatentayo dagiti kabusortayo, ken ikararagantayo dagiti mangidadanes kadatayo.2
Mabalin a nasaem a narigat a pengdan ti panagpungtot no marikna a nainkalintegan unay. Mabalin a kasla imposible a pakawanen dagidiay a dagiti makadadael nga aramidda ti nangdangran iti awan basolna. Ngem, binalakadannatayo ti Mangisalakan a “pakawanentayo ti amin a tattao.”3
Datayo dagiti pasurot ti Prinsipe ti Kappia. Ita nangnangruna pay ngem idi, kasapulantayo ti talna nga Isu laeng ti makaisangbay. Kasano a manamnamatayo nga adda ti talna ditoy lubong idinto ta saantayo nga agsapsapul kas indibidual a maaddaan iti kappia ken panagtutunos? Kakabsat, ammok a saan a nalaka no ania ti isingsingasingko. Ngem nasken nga ipakita dagiti pasurot ni Jesucristo ti pagwadan a suroten ti amin iti lubong. Ipakpakaasik kadakayo nga aramidenyo ti amin a kabaelanyo tapno agpatingga dagiti personal a panagsusupiat nga agdama a sumsumged iti puspusoyo ken iti biagyo.
Ipaganetgetko man daytoy nga awag iti panagtignay babaen ti panangilawlawagko iti maysa a konsepto a naipalagip kaniak itay nabiit bayat ti panagbuyak iti ay-ayam ti basketbol.
Iti dayta nga ay-ayam, ti umuna a kagudua ket seesaw a laban, nga agsublisubli. Kalpasanna, bayat ti maudi a lima a segundo ti umuna a kagudua, maysa a guardia iti maysa a team ti nakaaramid iti napintas a three-point shot. Iti maysa laeng a segundo a nabati, tinakaw ti kaduana ti inbound pass ket nangaramid iti sabali pay a basket iti buzzer! Isu a simrek dayta a team iti locker room iti uppat a puntos nga immun-una nga addaan iti palpable surge ti momentum. Nabaelanda nga indanon dayta a momentum iti maikadua a kagudua ket nangabakda iti ay-ayam.
Ti momentum ket maysa a nabileg a konsepto. Napasarantayo amin dayta iti maysa wenno sabali a porma —kas pagarigan, iti lugan a mangpapartak wenno addaan iti saan a panagtutunos a kellaat nga agbalin a panagsusupiat.
Isu a saludsodek, ania ti mabalin a mangsindi ti naespirituan a momentum? Nakitatayon dagiti pagarigan ti agpadpada a positibo ken negatibo a momentum. Ammotayo dagiti pasurot ni Jesucristo a nagbalin a converted ken pimmigsa iti pammatida. Ngem ammotayo met dagiti naminsan a nagkumit a mamati a natnag. Mabalin nga ag-swing ti momentum iti uray ania a direksion.
Ditayo kaano man kinasapulan ti positibo a naespirituan a momentum nga ad-adda ngem iti ar-aramidentayo ita, tapno makontra ti kapartak a kumarkaro ti kinadakes ken dagiti nasipsipnget a pagilasinan ti panawen. Ti positibo a naespirituan a momentum ti mangpatalinaed kadatayo nga agtultuloy iti baet ti panagbuteng ken panagduadua a patauden dagiti pandemia, tsunami, panagbettak ti bulkan, ken armado a panagbubusor. Ti naespirituan a momentum ti makatulong kadatayo a mangsarked kadagiti saan nga agsarday, dakes a panangraut ti kabusor ken manglapped kadagiti panagreggetna a mangdadael iti personal a naespirituan a pundasiontayo.
Adu nga aramid ti mabalin a mangpasindi iti positibo a naespirituan a momentum. Ti panagtulnog, ayat, kinapakumbaba, panagserbi, ken panagyaman4 ti sumagmamano laeng kadagitoy.
Kayatko nga isingasing ti lima a naipangruna nga aramid a mabalintayo nga aramiden tapno matulongantayo a mangtaginayon iti positibo a naespirituan a momentum.
Umuna: magnakayo iti dana ti katulagan ket agtalinaedkayo sadiay.
Di pay nabayag, adda nalawag a tagtagainepko a nakaam-ammuak iti dakkel a grupo dagiti tao. Adu dagiti saludsodda kaniak, a ti masansan unay ket maipapan iti dana ti katulagan ken no apay a napateg unay daytoy.
Iti tagtagainepko, inlawlawagko a sumrektayo iti dana ti katulagan babaen ti pannakabuniag ken panangaramid iti umuna a katulagantayo iti Dios.5 Tunggal makiranudtayo iti sakramento, ikaritayo manen nga awatentayo ti nagan ti Mangilasakan, kanayon a laglagipentayo Isuna, ken tungpalentayo dagiti bilinna.6 Kas supapak, ipasigurado ti Dios kadatayo a mabalintayo a kanayon nga adda ti Espiritu ti Apo a kadkaduatayo.
Iti agangay agaramidtayo kadagiti nayon a katulagan iti templo, a sadiay nga umawattayo kadagiti dakdakkel pay a kari. Dagiti ordinansa ken katulagan ti mangted kadatayo iti pannakagun-od iti nadiosan a pannakabalin. Ti dana ti katulagan ti kakaisuna a dana nga agturong iti pannakaitan-ok ken agnanayon a biag.
Iti tagtagainepko, nagsaludsod ngarud ti maysa a babai no kasano a makasubli iti dayta a dana ti maysa a tao a nanglabsing kadagiti katulaganna. Ti sungbatko iti saludsodna ti mangiturong iti maikadua a singasingko:
Takuatenyo ti rag-o ti inaldaw a panagbabawi.
Kasano ti kapateg ti panagbabawi? Insuro ni Alma a nasken nga “awan ti ikasabatayo malaksid ti panagbabawi ken pammati iti Apo.”7 Naidawat a kasapulan ti panagbabawi ti tunggal agsungbat a tao nga agtarigagay iti agnanayon a gloria.8 Awan dagiti panangilaksid (exceptions). Iti maysa a paltiing ken ni Propeta Joseph Smith, dinusa ti Apo dagiti immuna a lider ti Simbaan gapu iti dida panangisuro iti ebanghelio kadagiti annakda.9 Ti panagbabawi ti tulbek ti panagrang-ay. Ti natarnaw a pammati ti mangpatalinaed kadatayo nga agtultuloy iti dana ti katulagan.
Saankayo koma nga agbuteng wenno mangitantan iti panagbabawi. Agragsak ni Satanas iti rigatyo. Putden daytoy. Ikkatenyo ti impluensia ni Satanas iti biagyo! Mangrugikayo ita nga aldaw a mangpadas iti rag-o ti panangikkat iti nailubongan a tao.10 Kanayon nga ay-ayatennatayo ti Mangisalakan ngem nangnangruna pay no agbabawitayo. Inkarina a nupay “dagiti bambantay makapanawda, ken dagiti turturod maalisda… ti kinamanagayatko saanto a pumanaw kenka.”11
No mariknam nga adayo unay wenno napaut unay ti yaadayom iti dalan ti katulagan ket awan ti wagas tapno makapagsubli, saan a pudno dayta.12 Kontakem koma iti bishop wenno branch presidentmo. Isu ti ahente ti Apo ket tulongannakanto a mangpadas iti rag-o ken gin-awa iti panagbabawi.
Ita, maysa a pakdaar: Ti panagsubli iti dana ti katulagan saanna a kayat a sawen a nalakanto ti biag. Naiget daytoy a dana ken no dadduma marikna a kasla narangkis a panagpangato.13 Daytoy a panagpangato, nupay kasta, nairanta a mangsubok ken mangisuro kadatayo, mangpapintas iti kinataotayo, ken tumulong kadatayo nga agbalin a sasanto. Daytoy ti kakaisuna a dana nga agturong iti pannakaitan-ok ken agnanayon a biag. Inladawan ti maysa a propeta14 ti “naparaburan ken naragsak a kasasaad dagiti agtungtungpal kadagiti bilin ti Dios. Ta adtoy, naparaburanda iti amin a banag, a nainlasagan ken naespirituan; ket no agtalinaedda a situtulnog agingga iti kamaudianan maawatdanto idiay langit … [ket] makipagtaengdanto iti Dios iti kasasaad nga awan ti gibusna a kinaragsak.”5
Ti pannagna iti dana ti katulagan, agraman ti inaldaw a panagbabawi, ket mangpabara iti positibo a naespirituan a momentum.
Uruguay
Ti maikatlo a singasingko: Sursuruen maipapan iti Dios ken no kasano nga agtrabaho Isuna.
Maysa kadagiti kadakkelan a karittayo ita ti panangilasin kadagiti kinapudno ti Dios ken dagiti kinapalso ni Satanas. Dayta ti gapu no apay a binallaagannatayo ti Apo nga “agkararag a kanayon, … tapno maparmek[tayo] ni Satanas,ken … tapno malibasam dagiti ima dagiti katulongan ni Satanas a mangitandudo iti aramidna.”16
Nangipaay ni Moises iti pagarigan no kasano a mailasin ti Dios ken ni Satanas. Idi immay ni Satanas a mangsulisog ken ni Moises, nadlawna ti panangallilaw gapu ta kalkalpasna a nakilangen iti rupanrupa iti Dios. Dagus a nabigbig ni Moises no siasino ni Satanas ket binilinna a pumanaw.17 Idi nagpilit ni Satanas, ammo ni Moises ti umawag iti Dios para iti ad-adu pay a tulong. Nakaawat ni Moises iti nadiosan a pigsa ket binabalawna manen,ti dakes, a kunkunana, “Umadayoka kaniak, Satanas, ta daytoy maymaysa a Dios laeng ti pagdaydayawak.”18
Nasken a surotentayo dayta a pagwadan. Ikkatenyo ti impluensia ni Satanas iti biagyo! Saankayo koma a sumurot kenkuana agingga iti kukuana a “taaw ni ladingit ken awan inggana a kinaay-ay-ay.”19
Babaen iti nakabutbuteng a kapartak, ti maysa a pammaneknek a saan a mataraonan iti inaldaw “babaen iti nasayaat a balikas ti Dios”20 mabalin a kumapuy. Gapuna, nalawag ti panglapped iti panggep ni Satanas: kasapulantayo dagiti inaldaw a padas iti panagdayaw iti Apo ken panagadal iti ebangheliona. Ipakpakaasik kadakayo a bay-anyo nga agballigi ti Dios iti biagyo. Itdem Kenkuana iti nasayaat a bingay iti panawenyo. No aramidenyo, paliiwenyo no ania ti mapasamak iti positibo a naespirituan a momentumyo.
Maika-4 a singasing: Agsapul ken mangnamnama kadagiti milagro.
Impanamnama ni Moroni kadatayo a “saan a nagsardeng ti Dios nga agbalin a Dios dagiti milagro.”21 Tunggal libro ti nasantuan a kasuratan ipakitana no kasano ti kinatulok ti Apo a bumallaet iti biag dagiti mamati Kenkuana.22 Biningayna ti Nalabaga a Baybay para ken Moises, tinulonganna ni Nephi a nangala kadagiti pinanid a gambang, ken insublina ti Simbaanna babaen ken ni Propeta Joseph Smith. Tunggal maysa kadagitoy a milagro ket nangala iti panawen ken mabalin a saan nga eksakto a kiniddaw dagidiay nga indibidual iti damo manipud iti Apo.
Iti isu met la a wagas, ti Apo ti mangbendisionto kadakayo kadagiti milagro no mamatikayo Kenkuana, “nga awanan iti panagduadua.”23 Aramidenyo ti naespirituan a trabaho nga agsapul kadagiti milagro. Nainkararagan nga agpatulongkayo iti Dios a mangaramat iti dayta a kita ti pammati. Ikarik a mabalinyo a padasen para iti bagiyo a ni Jesucristo “mangpapigsa iti nakapuy, ken iti daydiay awan ti kabaelanna pawadwadenna ti pigsa.”24 Manmano a banag ti mangpapartak iti naespirituan a pigsayo nga ad-adda ngem ti panangbigbigmo a tultulongannaka ti Apo a mangyakar iti maysa a bantay iti biagmo.
Taiwan
Maika-5 a singasing: Gibusanyo ti panagsusupiat iti bukodyo a biag.
Ulitek ti awagko a gibusanyo dagiti panangsusupiat iti bukod a biagyo. Aramatenyo ti kinapakumbaba, kinatured, ken kinapigsa a kasapulan iti agpadpada a mamakawan ken agkalikagum iti pammakawan. Inkari ti Mangisalakan a “no pakawanen[tayo] dagiti tao kadagiti basolda, pakawanennatayonto met ti Nailangitan nga Ama[tayo].”25
Dua a lawas manipud ita rambakantayo ti Paskua iti Panagungar. Iti nagbaetan ita ken kalpasanna, awisenkayo a manggibus ti personal a panagsusupiat a nangpadagsen kadakayo. Mabalin kadi nga ad-adda pay a maitutop nga aramid ti panagyaman ken ni Jesucristo gapu iti Pannubbotna? No kasla imposible ti pammakawan iti agdama agpakaasikayo iti pannakabalin babaen ti panangsubbot a dara ni Jesucristo a mangtulong kadakayo. No aramidenyo daytoy, ikarik ti personal a kappia ken ti kellaat a panagdakkel ti naespirituan a momentum.
Idi sinubbot ti Mangisalakan ti amin a sangkataw-an, linuktanna ti maysa a wagas tapno dagiti sumursurot Kenkuana ket makagun-od iti bileg a mangagas, mangpapigsa, ken mangsubbot. Sidadaan a magun-od dagitoy a naespirituan a pribilehio ti amin nga agkalikagum a dumngeg Kenkuana ken sumurot Kenkuana.
Patpatgek a kakabsatko, babaen iti amin a panagpakaasi ti pusok, gutugotenkayo a sumrekkayo iti dana ti katulagan ket agtalinaedkayo sadiay. Padasenyo ti rag-o ti panagbabawi iti inaldaw. Sursuruen maipapan iti Dios ken no kasano nga agtrabaho Isuna. Agsapul ken mangnamnama kadagiti milagro. Ikarigatan a gibusanyo dagiti panangsusupiat iti biagyo.
Bayat ti panagtignayyo kadagitoy a pananggun-od, ikarik kadakayo ti kabaelan nga agtultuloy iti dana ti katulagan nga addaan iti ad-adu a momentum, iti laksid ti ania man a lapped a sangsanguenyo. Ket ikarik kadakayo ti dakdakkel a pigsa a mangkedked iti sulisog, ad-adu a talna iti panunot, pannakawayawaya manipud iti buteng, ken dakdakkel a panagkaykaysa kadagiti pamiliayo.
Sibibiag ti Dios! Ni Jesus ti Cristo! Sibibiag! Ay-ayatennatayo ken tulongannatayto. Paneknekak daytoy iti sagrado a nagan ti Mannubbottayo, ni Jesucristo, amen.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, May 2022. Ilokano. 18351 864