Binulan a Mensahe ti Liahona , Nobiembre 2022
Parmekenyo ti Lubong ket Sarakenyo ti Panaginana
Sarakenyo ti panaginana manipud iti kinapalaus, kinaawan ti kasiguraduan, ken panagleddaang daytoy a lubong babaen ti panangparmek iti lubong babaen kadagiti katulaganyo iti Dios.
Patpatgek a kakabsatko, agyamanak a kumablaaw kadakayo iti daytoy nagloriaan nga agsapa ti Sabbath. Kanayonkayo a malaglagip. Masdaawak iti alisto a panagtignayyo tunggal makitayo dagiti dadduma nga agkasapulan. Agtaktakderak a masmasdaaw iti pammati ken pammaneknek a maulit-ulit nga ipakpakitayo. Agsangsangitak gapu kadagiti sakit ti nakem, pannakaupay, ken pagdandanaganyo. Ay-ayatenkayo. Ipasiguradok kadakayo nga ay-ayatennakayo ti Nailangitan nga Amatayo ken ti Patpatgenna nga Anakna, ni Jesucristo. Ammoda a naimbag dagiti kasasaadyo, dagiti kinaimbagyo, dagiti kasapulanyo, ken dagiti kararagyo nga agpatulong. Ulit-ulitek nga ikararagankayo tapno mariknayo ti ayatda kadakayo.
Napateg ti panangpadas iti ayatda, ta kasla inaldaw a masakupantayo ti panangraut dagiti makapaupay a damdamag. Mabalin nga adda dagiti aldaw a tarigagayanyo a makaisuotkayo iti pagturogyo, agbaluktot, ken kiddawenyo iti maysa a tao a mangriing kadakayo inton malpas ti riribuk.
Ngem, patpatgek a kakabsatko, nakaad-adu dagiti napipintas a banag nga agur-uray a mapasamak. Kadagiti umay nga aldaw, makitatayto dagiti kadakkelan a pannakaiparangarang ti bileg ti Mangisalakan a naimatanganen ti lubong. Manipud ita ken agingga iti oras a panagsublina “ nga addaan iti pannakabalin ken naindaklan a dayag,”1 itednanto dagiti saan a mabilang a pribilehio, bendision, ken milagro kadagiti napudno.
Nupay kasta, agdama nga agbibiagtayo iti kariribukan a panawen iti pakasaritaan ti lubong. Dagiti kinarikut ken karit ti mangiparikna iti adu a tattao iti pannakaupay ken pannakabannog. Nupay kasta, panunotenyo ti nabiit pay a kapadasan a mabalin a mangted iti lawag no kasano a makasaraktayo iti panaginana.
Bayat ti nabiit pay nga open house ti Washington D.C. Temple, nasaksian ti maysa a miembro ti open house committee ti nauneg a saritaan idi kaduaenna ti sumagmamano a nalatak a periodista a manglibot iti templo. Saan a naigagara a kimmadua ti maysa a pamilia iti daytoy a media tour. Nagtultuloy ti panagdamag ti maysa a reporter maipapan iti “panagdaliasat” ti maysa a temple patron bayat ti pananglibotna iti templo. Kayatna a maammuan no ti panagdaliasat iti templo ket simbolo dagiti karit iti panagdaliasat ti maysa a tao iti biag.
Nangngeg ti maysa nga ubing a lalaki iti pamilia ti saritaan. Idi simrek ti naglibot a grupo iti maysa a siled ti endowment, intudo ti ubing a lalaki ti altar, a pagparintumengan dagiti tao tapno makitulag iti Dios, ket kinunana, “O, nagmayaten dayta. Adtoy ti lugar tapno makapaginana dagiti tao iti panagdaliasatda iti templo.”
Agduaduaak no ammo ti ubing no kasano ti kauneg ti insawangna. Nalabit nga awan ti ammona maipapan iti direkta a koneksion ti pannakitulag iti Dios iti templo ken ti nakaskasdaaw a kari ti Mangisalakan:
“Umaykayo kaniak, dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; … ket makasarakkayto iti inana a maipaay iti kararuayo.
“Ta ti sangolko nalaka ken nalag-an ti awitko.”2
Patpatgek a kakabsat, maladingitanak kadagiti pumanaw iti Simbaan gapu ta mariknada a nakaad-adu dagiti ipaaramid kadakuada kas miembro. Saanda pay a natakuatan a ti panangaramid ken panangtungpal kadagiti katulagan ti talaga a makaaramid a nalaklaka ti panagbiag! Tunggal tao nga agaramid kadagiti katulagan kadagiti puente a pagbuniagan ken kadagiti templo—ken mangtungpal kadagitoy —ket ad-adda a makagun-od iti bileg ni Jesucristo. Utobenyo koma dayta nakaskasdaaw a kinapudno!
Ti gunggona iti panangtungpal kadagiti katulagan iti Dios ket bileg a naggapu iti langit—pannakabalin a mangpapigsa kadatayo tapno kabaelan a mangsaranget kadagiti pannubok, sulisog, ken leddaangtayo. Daytoy a bileg ti mangpalaka iti panagbiagtayo. Dagidiay agbibiag kadagiti nangatngato a linteg ni Jesucristo ket makagun-od iti nangatngato a bilegna. Gapuna, dagiti agtungpal iti katulagan ket maikari iti naisangsangayan a kita ti panaginana a dumteng kadakuada babaen ti naitulag a relasionda iti Dios.
Sakbay nga inpasakup ti Mangisalakan ti Bagina iti panagsagaba ti Getsemani ken Calvario, impakdaarna kadagiti Apostolna, “Ditoy lubong addanto rigatyo: ngem mananginanamakayo; siak pinarmekko ti lubong.”3 Kalpasanna, nagpakaasi ni Jesus iti tunggal maysa kadatayo nga aramidentayo met ti kasta idi kinunana, “Siak pagayatak a nasken a parmekenyo ti lubong.”4
Patpatgek a kakabsat, ti mensahek kadakayo ita nga aldaw ket gapu ta pinarmek ni Jesucristo daytoy managbasol a lubong, ken gapu ta sinubbotna ti tunggal maysa kadatayo, mabalinyo met a parmeken daytoy a managbasol, managimbubukod, ken masansan a makabannog a lubong.
Gapu ta ti Mangisalakan, babaen ti awan patinggana a Pannubbotna, sinubbotna ti tunggal maysa kadatayo manipud iti kinakapuy, biddut, ken basol, ken gapu ta napadasanna ti tunggal saem, danag, ken dagensen a napadasanyo,5 ket bayat ti sipupudno a panagbabawiyo ken panagkiddawyo iti tulongna, maparmekyo daytoy agdama a saan a natalged a lubong.
Mabalinyo a parmeken dagiti makabannog iti naespirituan ken emosional a saplit ti lubong, agraman ti kinapalangguad, kinatangsit, pungtot, imoralidad, gura, kinaagum, apal, ken buteng. Iti laksid dagiti pakasingaan ken pannakaballikug nga adda iti aglawlawtayo, masarakanyo ti pudno nga inana—kayatna a sawen ti gin-awa ken talna—uray iti baet dagiti makaparurod unay a problema.
Daytoy napateg a kinapudno ti pagsulbodan ti tallo a kangrunaan a saludsod:
Umuna, ania ti kaipapanan ti mangparmek iti lubong?
Maikadua, kasano nga aramidentayo daytoy?
Ken maikatlo, kasano a bendisionan ti biagtayo ti panangparmek iti lubong?
Ania ti kaipapanan ti mangparmek iti lubong? Kayatna a sawen ti panangparmek iti sulisog nga ad-adda a mangipateg kadagiti banag daytoy a lubong ngem kadagiti banag ti Dios. Kayatna a sawen ti panangtalek iti doktrina ni Cristo nga ad-adda ngem kadagiti pilosopia dagiti tao. Kayatna a sawen ti panagragsak iti kinapudno, panangkondena iti panangallilaw, ken panagbalin a “napakumbaba a pasurot ni Cristo.”6 Kayatna a sawen ti panangpili nga agkedked iti ania man a mangpapanaw iti Espiritu. Kaipapananna ti situtulok a “panangtallikud” uray dagiti paggugustotayo a basol.7
Ita, ti panangparmek iti lubong sigurado a saanna a kayat a sawen ti panagbalin a perpekto iti daytoy a biag, ken saanna pay a kayat a sawen a dagus a mapukaw lattan dagiti parikutmo—ta saanto a mapasamak dayta. Ken saanna a kayat a sawen a saankanton nga agbiddut pay. Ngem ti panangparmek iti lubong kayatna a sawen nga ad-addanto ti panangsarangetmo iti basol. Lumuknengto ti pusom bayat ti panangpapigsam iti pammatim ken ni Jesucristo.8 Ti panangparmek iti lubong kayatna a sawen ti panagayat iti Dios ken iti Ay-ayatenna nga Anak nga ad-adda pay ngem ti panagayatmo iti asino man wenno ania man a banag.
Kasano, ngarud, a parmekentayo ti lubong? Sinuruannatayo ni Ari Benjamin no kasano. Kinunana a “kabusor ti Dios ti nailubongan a tao” ken agtalinaed a kasta iti agnanayon “malaksid no sumuko kadagiti panangallukoy ti Nasantuan nga Espiritu, ken ikkatenna ti nailubongan a tao ket agbalin a santo babaen ti pannubbot ni Cristo nga Apo.”9 Tunggal sapulem ken surotem dagiti parikna ti Espiritu, tunggal aramidem ti ania man a naimbag—bambanag a saan koma nga aramiden ti “nailubongan a tao” —parparmekem ti lubong.
Ti panangparmek iti lubong ket saan a pasamak a mapasamak iti maysa wenno dua nga aldaw. Mapasamak daytoy iti unos ti panagbiag bayat ti maulit-ulit a panangarakuptayo iti doktrina ni Cristo. Patanorentayo ti pammati ken ni Jesucristo babaen ti panagbabawi iti inaldaw ken panagtungpal kadagiti katulagan a mangted kadatayo iti bileg. Agtalinaedtayo iti dana ti katulagan ket mabendisionantayo iti naespirituan a pigsa, personal a paltiing, pumigpigsa a pammati, ken ti panagserserbi dagiti anghel. Ti panagbiag iti doktrina ni Cristo ket mabalin a mangpataud iti kabilgan a siklo ti kinasaguday, a mangparparnuay iti naespirituan a pigsa iti biagtayo.10
Bayat ti panangikagumaantayo nga agbiag kadagiti nangatngato a linteg ni Jesucristo, mangrugin nga agbaliw dagiti pusotayo ken dagiti mismo a kinataotayo. Ti Mangisalakan tulongannatayo a mangparmek iti impluensia daytoy managbasol a lubong babaen ti panangparaburna kadatayo iti dakdakkel a kinamanangngaasi, kinapakumbaba, kinamanagparabur, kinaimbag, disiplina iti bagi, talna, ken panaginana.
Ita, mabalin a pampanunotem nga ad-adda a kasla napinget a naespirituan a trabaho daytoy ngem iti panaginana. Ngem adtoy ti dakkel a kinapudno: nupay ipapilit ti lubong a ti bileg, sanikua, kinalatak, ken ragragsak ti lasag ket mangyeg iti ragsak, saan a pudno dayta! Saanda a kabaelan dayta! Ti talaga a pataudenda ket awan sabali no di maysa a giwang a kasukat ti “ bendision ken naragsak a kasasaad [dagiti] agtungtungpal kadagiti bilin ti Dios.”11
Ti kinapudnona ket ad-adda a makabannog ti agsapul iti kinaragsak iti lugar a saanyo iti kaano man masarakan daytoy! Nupay kasta, no isangolmo ti bagim ken ni Jesucristo ken aramidem ti naespirituan a trabaho a kasapulan tapno maparmek ti lubong, Isu, ken Isu laeng, ti addaan iti bileg a mangguyod kenka a mangyadayo iti daytoy a lubong.
Ita, kasano a mangbendision iti biagtayo ti panangparmek iti lubong? Nalawag ti sungbat: ti iseserrek iti relasion ti katulagan iti Dios ket mangibegkes kadatayo Kenkuana iti wagas a mangpalaka iti amin a banag maipapan iti biag. Saankayo koma nga agbiddut ti pannakaawatyo kaniak: Diak ibaga a ti panangaramid kadagiti katulagan ket mangpadarasiti biag. Kinapudnona, namnamaen ti panagsupadi, gapu ta saan a kayat ti kabusor a matakuatanyo ti bileg ni Jesucristo. Ngem ti panangisangolyo iti bagiyo iti Mangisalakan kaipapananna a maaramatyo ti pigsa ken pangsubbot a bilegna.
Pasingkedak manen ti nauneg a pannursuro ni Presidente Ezra Taft Benson: “Matakuatanto dagiti lallaki ken babbai a mangisuko iti biagda iti Dios nga ad-adu ti maaramidna iti biagda ngem iti kabaelanda nga aramiden. Paunegennanto ti ragsakda, palawaennanto ti panniriganda, paregtaen ti panunotda, . … itag-ayda ti espirituda, paaduenda dagiti bendisionda, paaduenda dagiti gundawayda, liwliwaen dagiti kararuada, mangtedda iti gagayyem, ken ibukbokda ti talna.”12
Dagitoy nga awan kaaspingna a pribilehio ket sumurot kadagidiay agsapsapul iti suporta ti langit tapno matulongan ida a mangparmek iti daytoy a lubong. Iti daytoy a panggep, idanonko kadagiti miembro ti intero a Simbaan ti isu met laeng a bilin nga intedko kadagiti young adult-tayo idi napalabas a Mayo. Ginuyugoyko ida idi—ket ita agpakaasiak kadakayo—nga aywananyo ti bukodyo a pammaneknek ken ni Jesucristo ken iti ebangheliona. Itrabahoyo daytoy. Taripatuenyo daytoy tapno dumakkelto. Bussogen daytoy iti kinapudno. Diyo rugitan daytoy kadagiti ulbod a pilosopia dagiti saan a mamati a lallaki ken babbai. Bayat ti panangaramidyo a kangatuan a prioridadyo ti agtultuloy a panangpapigsa iti pammaneknekyo ken ni Jesucristo, urayenyo a mapasamak dagiti milagro iti biagyo.13
Ipakaasik kadakayo ita a bigat a sarakenyo ti panaginana manipud iti kinapalaus, kinaawan ti kasiguraduan, ken panagleddaang daytoy a lubong babaen ti panangparmek iti lubong babaen kadagiti katulaganyo iti Dios. Ipakaammoyo Kenkuana babaen kadagiti kararagyo ken aramidyo a seriosokayo maipapan iti panangparmek iti lubong. Kiddawenyo Kenkuana a manglawlawag iti panunotyo ken mangipatulod iti tulong a kasapulanyo. Iti tunggal aldaw, isuratyo dagiti kapanunotan a mapanunotyo bayat ti panagkararagyo; kalpasanna surotenyo a sipapasnek. Bubosenyo ti ad-adu nga oras iti templo, ket kalikagumanyo a maawatan no kasano nga isuronakayo ti templo a mangparmek iti daytoy nadangkes a lubong.14
Kas naibagakon idi, ti panaguummong ti Israel ti kapatgan a trabaho a mapaspasamak ditoy daga iti agdama. Maysa a napateg nga elemento daytoy a panaguummong ket ti panangisagana kadagiti tao a makabael, nakasagana, ken maikari nga umawat iti Apo inton umay manen, tattao a nangpili ken ni Jesucristo iti daytoy nadangkes a lubong, tattao nga agrag-o iti nawaya a panagpilida nga agbiag kadagiti nangatngato, nasansantuan a linteg ni Jesucristo.
Awagankayo, patpatgek a kakabsatko, nga agbalinkayo a kastoy a nalinteg a tattao. Ipateg ken dayawenyo dagiti katulaganyo a nangnangruna ngem iti amin a dadduma pay a panagkumit. Bayat ti panangipalubosyo nga agballigi ti Dios iti biagmo, ikarik kadakayo ti dakdakkel a talna, panagtalek, rag-o, ken wen, panaginana.
Babaen ti bileg ti nasantuan nga apostol a naited kaniak, bendisionankayo iti panagsapsapulyo a mangparmek iti daytoy a lubong. Bendisionankayo a mangpapigsa iti pammatiyo ken ni Jesucristo ken ad-adda a masursuroyo no kasano ti manggun-od iti pannakabalinna. Bendisionankayo a makailasin iti kinapudno manipud iti biddut. Bendisionankayo nga ad-adda a maseknan kadagiti bambanag ti Dios ngem dagiti banag iti daytoy a lubong. Bendisionankayo a mangkita kadagiti kasapulan dagiti adda iti aglawlawyo ken mangpapigsa kadagiti ay-ayatenyo. Gapu ta pinarmek ni Jesucristo daytoy a lubong, kabaelanyo met a parmeken. Paneknekak iti sagrado a nagan ni Jesucristo, amen.