“Impakita ni Jesus Kadatayo ti Dalan,” Friend, Agosto 2023, 4–5.
Binulan a Mensahe iti Friend , Agosto 2023
Impakita ni Jesus Kadatayo ti Dalan
Dagiti Panangiladawan ni Dan Burr
Ni Jesucristo ti Anak ti Nailangitan nga Ama. Immay iti daga a mangipakita kadatayo no kasano a makapagsublitayo iti Nailangitan nga Ama. Nabuniagan ni Jesus. Insurona a nasken a mabuniagantayo met.
Impakita ni Jesus kadatayo no kasano ti agbiag. Inayat ken tinulonganna ti tunggal maysa. Kayatnatayo a sumurot Kenkuana.
Narikna ni Jesus ti amin a saem ken nagsagaba para iti basbasoltayo. Kalpasanna natay Isuna para kadatayo. Maawagan daytoy iti Pannubbot ni Jesucristo. Nagungar Isuna. Kayatna a sawen a sibibiag Isuna iti agdama! Gapu ken ni Jesucristo, mabalintayto pay ti agbiag manen kalpasan ti ipapataytayo.
Inaramid ni Jesus amin dagitoy a banag para kadatayo gapu ta ay-ayatennatayo. Gapu Kenkuana, makadennatayo ti Amatayo iti Langit ken dagiti pamiliatayo iti maysa nga aldaw.
Masurottayo ni Jesus babaen ti panagpabuniag. Masurottayo pay Isuna iti inaldaw no ayaten ken tulongantayo dagiti dadduma ken tungpalentayo dagiti bilinna.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Friend Message, August 2023. Language. 19046 864