’Ua fa’a’ite mai Iesu ia tātou i te ’ē’a

E tamaiti Iesu Mesia nā te Metua i te ao ra. ’Ua haere mai ’oia i te fenua nei nō te fa’a’ite ia tātou, e nāhea tātou e ho’i ai i te Metua i te ao ra, ’ia tae i te hō’ē mahana. ’Ua bāpetizohia Iesu. ’Ua ha’api’i ’oia ē, ’ia bāpetizo-ato’a-hia tātou e ti’a ai.

’Ua fa’a’ite mai Iesu ia tātou e nāhea ’ia ora. ’Ua here ’e ’ua tauturu ’oia i te mau ta’ata ato’a. Tē hina’aro nei ’oia ia tātou ’ia pe’e iāna.

’Ua ’ite Iesu i tō tātou mau pe’ape’a ato’a ’e ’ua māuiui ’oia nō tā tātou mau hara. I muri iho, ’ua pohe ’oia nō tātou. E parauhia te reira te tāra’ehara a Iesu Mesia. ’Ua ti’afa’ahou ’oia. Te aura’a ra, tē ora nei ’oia i teie mahana ! Maoti Iesu Mesia, e ora fa’ahou mai tātou i muri a’e i tō tātou pohera’a.

’Ua rave Iesu i teie mau mea ato’a nō tātou, nō te mea ’ua here ’oia ia tātou. Maoti ’oia, e nehenehe tātou e ora i pīha’i iho i tō tātou Metua i te ao ra ’e i tō tātou mau ’utuāfare, ’ia tae i te hō’ē mahana.

E nehenehe tātou e pe’e ia Iesu nā roto i te bāpetizora’a. E nehenehe ato’a tātou e pe’e iāna i te mau mahana ato’a, ’ia here ’e ’ia tauturu ana’e tātou ia vetahi ’ē ’e ’ia ha’apa’o ana’e i tāna mau fa’auera’a.

© 2023 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Friend Message, August 2023. Language. 19046 895