Binulan a Mensahe ti Liahona , Mayo 2023
Ti Kanayon a Kaduatayo
Dagiti naadaw a sao
Kasapulanmi, ken kasapulanyonto, ti kanayon a panangkadua kadakayo ti Espiritu Santo. Ita, tarigagayantayo daytoy, ngem ammotayo manipud iti padas a saan a nalaka a gun-oden daytoy. Tunggal maysa kadatayo ket agpanunot, agsao ken agaramid kadagiti banag iti inaldaw a panagbiagtayo a mabalin a makapasakit iti Espiritu.
No mapasamak dayta, kas iti mapasamakto, mabalin a mariknatayo ti saan a pananganamong manipud iti Apo. Ket mabalin a masulisogtayo a makarikna nga agmaymaysatayo. …
No makitayo ti bagiyo a marigatan a makarikna iti Espiritu Santo, mabalinyo nga utoben no adda ania man a mabalinyo a pagbabawyan ken pangawatan iti pannakapakawan. Mabalinyo ti agkararag nga addaan pammati tapno maammuanyo no ania ti aramidenyo tapno madalusan ket iti kasta ad-adda a maikarikayo para iti dayta a kanayon a pannakikadkadua ti Espiritu Santo.
No kayatyo nga awaten ti pannakikadkadua ti Espiritu Santo, nasken a tarigagayanyo daytoy para kadagiti umno a gapu. Nasken a panggep ti Apo dagiti panggepmo. No managimbubukod unay dagiti gandatmo, marigatankanto a mangawat ken mangrikna kadagiti pannignay ti Espiritu.
Ti tulbek para kaniak ken para kadakayo ket mangtarigagay iti no ania ti tarigagayan ti Mangisalakan. Masapul a maiturong dagiti gandattayo babaen ti natarnaw nga ayat ni Cristo. …
… Maibaon ti Espiritu Santo kadagiti napudno a miembro ti katulagan ti Simbaan ni Jesucristo. Ita, maidumdumanto dagiti padasyo, ket mangiwanwanto ti Espiritu iti wagas a kasayaatan a maibagay iti pammati ken kabaelanyo nga umawat iti paltiing para kadakayo ken para kadagiti ay-ayaten ken pagserserbianyo. Ikararagko iti amin a pusok a dumakkelto ti panagtalekyo.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, November 2023. Language. 19050 864