Bulanan nga Mensahe sa Para sa Kusog sang mga Lamharon, Pebrero 2021

Paano ko mahibal-an nga nabatian ko ang tingug sang Ginuo sa akon kabuhi?

Gin-agda kita ni Pangulong Russell M. Nelson nga “hunahunaon sing madalom kag pirme” kon paano naton ginapamatian si Jesucristo kag “maghimo sang mga tikang para mas mapamatian Sia sing maayo kag mas pirme” (“‘How Do You #HearHim?’ A Special Invitation,” Peb. 26, 2020, blog.ChurchofJesusChrist.org).

Mabatian naton Sia paagi sa balaan nga mga kasulatan kag sa mga pulong sang mga propeta. Pero indi lang ang pagpamati ukon pagbasa sinang mga pulong ang importante. Paagi sa Propeta nga si Joseph Smith, ginpaathag sang Ginuo:

“Kay akon tingug ang nagahambal [sining mga pulong] sa inyo; kay ini ginahatag sang akon Espiritu sa inyo … ;

“Gani, makapamatuod kamo nga nabatian ninyo ang akon tingug” (Doktrina kag mga Kasugtanan 18:35–36).

Dugang pa, ang paghandum nga pamatian Sia wala naton ginahimo nga paabot-abot lang. Si Pangulong Nelson nagsiling, “Nagakinahanglan ini sang hungod kag sige-sige nga pagtinguha” (“Hear Him,” Abr. 2020 pangkabilogan nga komperensya [Ensign ukon Liahona, Mayo 2020, 89]).

Samtang ikaw nagatuon, nagapangamuyo, nagaserbisyo, kag nagatuman sang mga kasuguan sang Ginuo, bugayan ka Niya sang Iya Espiritu kag, paagi sa Pagbayad-Sala ni Jesucristo, pagabag-uhon ka. Sa sina mo mahibal-an nga nabatian mo ang Iya tingug.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, February 2021. Hiligaynon. 17464 861