Kajjojo Allōn̄ N̄an Kōkajoorļo̧k Jodikdik ro Ennaan, Pāpode 2021

Elmen aō jeļā ke ij ron̄ ainikien Irooj ilo mour e aō?

Būreejtōn Russell M. Nelson ekar kajjitōk bwe “en m̧wūlaļ im emakijkij ad kōļmenļo̧kjeņ” kōn elmen ad ron̄ ainikien Jisōs Kraist im n̄an “bōk bun̄tōn ko bwe en em̧m̧anļo̧k im emakijkij ad ron̄ Ainikien” (“‘How Do You #HearHim?’ A Special Invitation,” Feb. 26, 2020, blog.ChurchofJesusChrist.org).

Jemaron̄ ron̄ Ainikien ilo jeje ko rekwojarjar im naan ko an rikanaan ro. Bōtaab ejjab ron̄jake ak riiti wōt naan ko me ej ki eo. Kōn Rikanaan Josep Smith, Irooj ekar kōm̧eleleik:

“Bwe ej Ainikiō eo ej kōnono [naan kein] n̄an kom̧, bwe rej liwōj jān Jetōb eo Aō n̄an kom̧ … ;

“Kōn menin, kom̧ maron̄ kam̧ool bwe kom̧ ar ron̄ Ainikiō, im jeļā naan ko Aō” (Katak im Bujen Ko 18:35–36).

N̄an kakkobaba, kappukot n̄an ron̄jake E ejjab juon men eo elukkuun m̧ōkaj kōm̧m̧ane. Būreejetōn Nelson ekar ba, “Ej bōk kijejeto eo ealikkar im emakijkij” (“Ron̄jake E,” Epr. 2020 kweiļo̧k eo eļap [Ensign ak Liaona, Māe 2020, 89]).

Ilo am̧ ekkatak, jar, kabun̄jar, jipan̄, im pokake kien ko an Irooj, Enaaj kōjeram̧m̧an kwe kōn Jetōb eo An im, kōn Pinmuur eo an Jisōs Kraist, enaaj ukōt eok. Innem kwomaron̄ jeļā ke kwar ron̄ Ainikien.

© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Monthly For the Strength of Youth Message, February 2021. Marshallese. 17464 874