“Akada Eyeneren kiet Ndinyanga Obio kiet,” Kabaŋa Nsɔŋɔnda Eke Iwaad, Apr. 2021, 10–11.
Etop ofuri Ofiong emi Kabaŋa Nsɔŋɔnda Eke Iwaad , Ofiong April 2021
Akada Eyeneren kiet Ndi yanga Obio kiet
Tom Fanene ekedi isua Duopeba kpot, edi kini idiok-udongo etibede ke obio Samoa esie, ema ekot enye ete edi-nam ikpo nkpo.
Ediduri-nwut otode James Madsen, ndise otode Getty Images
Nte ibuot-iko eke iwaad isua emi odohode ete, mbufo “esin itia-idak-isong eno akwa utom”(Doctrine and Covenants 64:33). Ke ofuri mbuk Ufok Abasi, mkpri owo esiwak ndinam akpan utom ke mkposong ini ke ndibop obio-ubong Abasi. Ese uwutnkpo kiet mi.
Idiok-udongo ke Isuo
Akande isua Ikie, ke mme isuo Samoa eke Pacific Ocean, akparawa kiet emi ekerede Tom Fanene ekedi akpan unwam kini ndaha mkpa-ye-uwem ono mbon Ufok Abasi Jesus Christ eke Ndisana Owo ke Ukpere Edem Usen.
Tom okodung ke obio kiet ekotde Sauniatu, emi mbon Latter-day Saint ekesiakde ke obio oro nte ebiet ono mmo ndiboho nyung nam idung. Ukem nte Ikɔt Abasi ke ini ye ebiet efen, mmo ema ekut idomo ye utibe-nkpo nko ke nte mmo enamde utom ndibop obio-ubong Abasi otokiet. Idomo kiet ekedi ke 1918, ini emi idiok-udongo efiomnsa ekesimde obio oro.
Ke ata idaha udongo odukde, ama odiok eti-eti, onyung osop nditara. Ata ediwak ibat owo kotu mbon obio Ikie Inang ema edongo oto ke udongo emi. Ata esisit ibat mmo ekenyene nsong-idem ndiboho: akani-eren kiet ye Tom, eyen iisua Duopeba.
Mbuotidem ye Okposong Utom
Ufokemana eke Tom ema enyene mbuotidem ke ufot ini udongo oro enyung ekut iboro utibe-nkpo. Ailama ekpri eyeneka-eren Tom ama odongo ke mme isua eke ebede. Elisala, ete mmo, ama adaba-ndap emi ekenode enye asanga-sanga item kabanga nte edikpemede Ailama: eyom eto wili-wili, eyarare ubak ikpok esie, etim enye enyim-me mmong esie. Elisala ama anam item emi ndien ada mmong osok Ailama, emi okowongde ndien osop okop nsongidem. Ntre Tom ama okut danga ndinam nkpo ke mbuotidem ekemede ndinwam nkan udongo.
Kini idiok udongo efiomnsa eke 1918, Tom enyene mbuotidem nte enye anamde utom man ese mme owo enyin ke obio. Enye ete, “Ofuri usenubok ami nyeka ke ufok-ke ufok ndino udia nyung nyet mme owo idem ndien mbup mbanga owo emi akpade.”
Enye eyeduri bucket mmong ke idim kiet ndien ada mmong aka kpukpru ufok owo. Enye eyedok isip-mbakara, atang isip-mbakara, ofot mmo, onyung esibe mmo man ada ininge-mmong oro osok mbon udongo. Nko enye owot ofuri unen ke obio man ada anam efere ono ufokemana kiet-kiet.
Ndinam Ukpuhore kiet
Kini idiok-udongo emi, kiet ke mbak-inang kotu ofuri mbon Samoa ekekpa oto efiomnsa emi. Ubak owo ke obio Tom ema ekpa nko. Tom anwam ndi-dok udi nyung mbuuk mme owo ekande Edip , ke esit edide ete esie, Elisala.
Edi ekom enyene Tom ke okposong utom ye edise-enyin esie, ediwak owo ke obio esie ema eboho. Enye ama anam akamba ukpuhore kiet ono mbonowo oro ye ke ndibop obio-ubong Abasi ke Samoa. Enye ekesin “itiat-idak-isong ono akwa utom.”
Ndien ke ndaha mbufo, mbufo enam ntre.
Owo idikotke mbufo ete edi-nam oruk utom emi Tom akanamde, edi mbufo, ke akpaniko, emenyene mbuotidem ke nsio-nsio usung emi edinamde akwa ukpuhore ino mbufo, mbon efen, ye utom edibop obio-ubong Abasi.
Mbufo emetongo uwutnkpo kiet eno ufokemana mbufo, mme ufan, ye mbon efen ke ndiwut eti-ido, ime, mfonido, ye ima. Mbufo emenam nkpo eno mbon efen. Mbufo emekot nwed Abasi enyung ebong-akam. Mbufo emebuana akpaniko eke mfiak-mmen-ndi iko Abasi Jesus Christ.
Ke isua ekebede mi, kpa ediwak mbufo emenam mme nkpo emi kini ekeyode unomo idiok-udongo. Ekeme ndidi mbufo ikedurike mmong ye isip-mbakara ndien inwamke owo Ikie-inang ndikop nsongidem, edi mbufo emeno mme owo ndongesit, idorenyin, idaresit, ye emem ke ediwak usung efen.
Isua mbufo enyene-ufon akan mbuotidem ye uduak mbufo ndinam utom nyung nnwam mbon efen. Mme uwutnkpo kini edem, oruk nte eke Tom Fanene, ekeme ndinwam mbufo ekut ete ke eyom mbufo ke ndisin itiat-idak-isong eke akwa utom Abasi.
© 2021 otode Intellectual Reserve, Inc. All rights reserved. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare eke Etop Ofuri Ofiong emi Abaŋade Nsɔŋɔnda eke Iwaad, Ofiong April 2021. Efik. 17467 553