“Isa ka Pamatan-on ang Ginkinahanglan agud Maluwas ang isa ka Baryo,” Para sa Kusog sang mga Lamharon, Abr. 2021, 10–11.
Bulanan nga mensahe sang Para sa Kusog sang mga Lamharon, Abril 2021
Ginkinahanglan ang isa ka Pamatan-on agud Maluwas ang isa ka Baryo
Si Tom Fanene 12 anyos pa lang sadto, apang sang gin-igo sang isa ka makahalalit nga balatian ang iya baryo sa Samoa, ginpatawag sia sa paghimo sang dalagko nga mga butang.
Drowing ni James Madsen; litrato iya sang Getty Images
Ang tema sang mga lamharon sa sini nga tuig nagasiling, “nagapasad kamo sang pundasyon sing isa ka dako nga buluhaton” (Doktrina kag mga Kasugtanan 64:33). Sa bug-os nga kasaysayan sang Simbahan, ang mga lamharon masami may importante nga papel sa kritikal nga tinion sa pagpasad sang ginharian sang Dios. Ari ang isa ka halimbawa.
Epidemya sa Isla
Masobra 100 katuig na ang nagligad, sa mga Isla sang Samoa sa Dagat Pasipiko, isa ka pamatan-on nga ginhingadlan Tom Fanene nangin isa ka importante nga bulig sa kabuhi-kag-kamatayon nga sitwasyon para sa mga miyembro sang Ang Simbahan ni Jesucristo sang mga Santos sa Ulihing mga Adlaw.
Si Tom nagpuyo sa baryo nga gintawag Sauniatu, nga gintukod sang mga Santos sa Ulihing mga Adlaw sa sina nga duog bilang isa ka lugar nga ila matipunan kag himuon nga isa ka komunidad. Pareho sa mga Santos sang Dios sa iban nga mga panahon kag lugar, naagyan nila ang mga pagtilaw kag subong man mga milagro samtang ginahikot nila sing ululupod ang pagpasad sang ginharian sang Dios. Isa ka pagtilaw ang nag-abot sang tuig 1918, sang ang influenza nga pandemya naglab-ot sa ila baryo.
Pag-abot gid sang balatian, makahalalit ini, kag naglapta ini sing madasig. Halos tanan sa malapit 400 ka pumuluyo ang nagligid na lang sa hiligdaan tungod sini. Duha lang gid sa ila ang daw maayo-ayo gawa ang kondisyon para magbangon: isa ka gulangon nga lalaki kag ang 12-anyos nga si Tom.
Pagtuo kag Pagpangabudlay
Ang pamilya ni Tom nagpakita sadto sang pagtuo sa atubang sang pamalatian kag nakakita sang mga milagro bilang resulta. Ang manghod ni Tom nga si Ailama nagmasakit pila ka tuig antes. Ang ila amay, nga si Elisala, nagdamgo sa diin ginhatagan sia sang pat-od nga mga panulin kon ano ang himuon agud atipanon si Ailama: magpangita sang wili-wili nga kahoy, magkuha sang diutay nga panit sini, kag bukbukon agud maggwa ang duga. Ginhimo ini ni Elisala kag gindala kay Ailama ang duga, nga gin-inom ini kag wala madugayi nag-ayo. Gani nakita ni Tom kon paano ang pag-aksyon nga may pagtuo makabulig nga malampuwasan ang balatian.
Sang tuig 1918 nga pandemya sang influenza, si Tom naggamit sang iya pagtuo samtang sia nagapangabudlay sing todo sa pag-atipan sang mga tawo sa baryo. “Kada aga nagapamalay-balay ako agud pakaunon kag tinloan ang mga tawo kag hibal-on kon sin-o ang napatay,” siling niya.
Nagpanag-ob sia sang binalde nga tubig halin sa tuburan kag ginadalhan sang tubig ang kada balay. Nagsaka sia sa mga puno sang lubi, nanguha sang mga bunga, ginkuhaan sang bunot, kag ginbuka ang mga ini agud tipunon ang tubig sini kag dal-on sa mga masakiton. Gin-ihaw man niya ang mga manok sa baryo agud magluto sang sabaw para sa kada pamilya.
Paghimo sang Kinalain
Sa sining pandemya, mga ikaapat nga bahin sang tanan nga tawo sa Samoa ang napatay sa influenza. Pila sa mga tawo sa baryo ni Tom napatay man. Si Tom nagbulig kutkot kag lubong sang masobra 20 sa ila, lakip na ang iya kaugalingon nga amay nga si Elisala.
Pero tungod sa pagpangabudlay kag mapinalanggaon nga pag-atipan ni Tom, madamo nga tawo sa iya baryo ang nag-alayo. Naghimo sia sing kinalain sa sining mga tawo kag sa pagpasad sang ginharian sang Ginuo sa Samoa. “Nagapasad [sia] sang pundasyon sing isa ka dako nga buluhaton.”
Kag sa inyo kaugalingon nga pamaagi, amo man kamo sini.
Ayhan indi kamo pagtawgon sa paghimo sang mga butang nga ginhimo ni Tom, pero kamo, sa pagkamatuod, nagapakita sang pagtuo sa nagkalainlain nga mga pamaagi nga nagahimo sang dako nga kinalain sa inyo, sa iban, kag sa buluhaton sang pagpasad sang ginharian sang Dios.
Nagapahamtang kamo sang halimbawa sa inyo pamilya, mga abyan, kag sa iban paagi sa pagpakita sang kadungganan, pasensya. kaayo, kag gugma. Nagaalagad kamo sa iban. Nagatuon kamo sang balaan nga mga kasulatan kag nagapangamuyo. Nagapaambit kamo sang mga kamatuoran sang ginpanumbalik nga ebanghelyo ni Jesucristo.
Sining nagligad nga tuig, madamo sa inyo ang nagahimo sining mga butang samtang ginalampuwasan ang mga epekto sang pandemya. Ayhan wala pa kamo kaagi nga magpanag-ob sang tubig kag magpanaka sang lubi kag mag-atipan sang 400 ka tawo agud mag-ayo, pero kamo naghatag sang kaumpawan, paglaum, kalipay, kag katawhay sa madamo nga pamaagi.
Ang inyo edad indi importante ikomparar sa inyo pagtuo kag sa inyo kahanda sa pag-obra kag pag-alagad sa iban. Ang mga halimbawa sang nagliligad, pareho sang kay Tom Fanene, makabulig sa inyo nga makit-an nga ginakinahanglan kamo sa pagpasad sang pundasyon sing isa ka dako nga buluhaton sang Dios.
© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, April 2021. Hiligaynon 17467 861