“Ib tug Tub Hluas Cawm Ib lub Zos Dim,” Ntxiv Dag Zog rau cov Tub Hluas Ntxhais Hluas, Plaub Hlis Ntuj 2021, 10–11.
Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Plaub Hlis Ntuj 2021
Ib tug Tub Hluas Cawm Ib lub Zos Dim
Tom Fanene tsuas muaj 12 xyoos xwb, tiam sis thaum ib phaum mob raug nws lub zos Samoan, nws raug hu los ua ntau yam zoo heev kom pab.
Daim duab los ntawm James Madsen; daim duab los ntawm Getty Images
Xyoo no cov tub hluas ntxhais hluas lub hom phiaj yog, nej “teeb lub hauv paus ntawm ib txoj hauj lwm tseem ceeb” (Lus Qhuab Qhia thiab Kev Khi Lus 64:33). Thoob plaws lub Koom Txoos zaj keeb puam, feem ntau cov tub hluas ntxhais hluas tau ua ib yam dab tsi tseem ceeb uas pab txhim tsa Vajtswv lub nceeg vaj. Nov yog ib zaj lus ua piv txwv.
Ib Phaum Mob rau Pov Txwv Dej
100 xyoo dhau los, hauv tej koog pov txwv Samoan ntawm tus Dej Hiav Txwv Pasxisfiv, muaj ib tug tub hluas npe hu ua Tom Fanene uas tau pab ntau heev thaum muaj xwm txheej ceev rau ib co mej zeej ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Tom nyob hauv ib lub zos hu ua Sauniatu, uas yog ib co Neeg Ntseeg hauv Hnub Nyoog Kawg txhim tsa hauv cheeb tsam ntawd ua ib qho rau cov ntseeg sib sau ua ke thiab ua ib koog zej zog. Ib yam li Vajtswv cov Ntseeg hauv lwm tiam thiab lwm qhov chaw, cov Ntseeg no raug tej kev sim siab thiab pom tej txuj ci tseem ceeb thaum lawv ua hauj lwm ua ke kom txhim tsa Vajtswv lub nceeg vaj. Muaj ib qho kev sim siab los thaum xyoo 1918, thaum ib phaum mob ua npaws raug lub zos.
Thaum phaum mob no raug lub zos, yeej hnyav heev, thiab txawj kis sai heev. Yuav luag txhua tus ntawm kwv yees li 400 tus neeg hauv lub zos ua npaws pw txaj vim yog phaum mob ntawd. Tsuas yog ob tug nkaus xwb uas nquag txaus ncig xyuas cov neeg: ib tug neeg laus zog thiab tus tub hluas 12 xyoos hu ua Tom.
Kev Ntseeg thiab Kev Rau Siab Ua Hauj Lwm
Tom tsev neeg twb tau muaj siab ntseeg kho mob nkeeg ua ntej lub sij hawm ntawd thiab tau pom tej txuj ci tseem ceeb los. Ob peb xyoos ua ntej ntawd Tom tus kwv Ailama muaj mob heev. Nkawd txiv, Elisala, tau ua npau suav es tau lus qhia uas txib kom nws ua tej yam kom saib xyuas thiab tu Ailama: nrhiav kom tau ib tsob ntoo wili-wili, tev ib co tawv ntoo, thiab muab tsoo kom tau cov kua. Elisala ua li no thiab nqa cov kua tawv ntoo rau Ailama haus, nws txawm haus thiab tsis ntev tom qab ntawd txawm zoo mob nkeeg. Yog li ntawd Tom pom tau hais tias thaum muaj siab ntseeg thiab ua raws li txoj kev ntseeg ntawd coj yus ua yuav pab tau kom kov yeej kev mob nkeeg.
Thaum phaum mob ua npaws 1918, Tom muaj siab ntseeg thaum nws rau rau siab ua hauj lwm kom pab saib xyuas thiab tu cov neeg hauv nws lub zos. Nws hais tias, “Txhua tag kis sawv ntxov kuv mus xyuas ib lub tsev dhau ib lub tsev kom muab mov rau cov neeg noj, muab lawv ntxuav, thiab nug saib puas muaj leej twg uas tas sim neej.”
Tom siv thoob mus nqa dej ntawm ib lub txhawv dej thiab nqa dej los rau txhua lub tsev. Nws nce ntoo txiv maj phaub, de cov txiv maj phaub, tev plhaub tawm, thiab muab tsoo tawg kom cug tau cov kua txiv ntoo thiab nqa los mus rau cov neeg mob. Nws kuj tua qaib hauv lub zos kom thiaj ua tau xuj rau txhua tsev neeg noj.
Pab Kom Tau qhov Zoo
Thaum phaum mob uas hais txog no, kwv yees li ib feem plaub ntawm tag nrho cov neeg hauv Samoa tuag vim yog phaum mob ua npaws no. Ib txhia neeg hauv Tom lub zos tuag thiab. Tom pab khawb qhov thiab muab ntau tshaj 20 tus neeg faus, suav nws leej txiv, Elisala, thiab.
Tiam sis ua tsaug rau Tom tej kev rau siab pab hlub thiab saib xyuas, neeg coob heev hauv nws lub zos tiv dhau. Nws tau pab cov neeg ntawd ntau heev thiab pab txhim tsa tus Tswv lub nceeg vaj hauv teb chaws Samoa. Tom tau “teeb lub hauv paus ntawm ib txoj hauj lwm tseem ceeb.”
Thiab nej los ua ib yam thiab raws li nej ua tau.
Tej zaum nej tsis raug hu los ua tej yam zoo li Tom, tiam sis mas, muaj tseeb tiag, nej tab tom rau siab ntseeg ua ntau yam uas yuav pab tau nej, lwm tus neeg, thiab kev txhim tsa Vajtswv lub nceeg vaj.
Nej ua yam ntxwv rau nej tsev neeg, phooj ywg, thiab lwm tus neeg thaum nej coj dawb huv, rub siab ntev, ua siab zoo, thiab hlub lwm tus neeg. Nej pab lwm tus neeg. Nej kawm cov vaj lug kub thiab thov Vajtswv. Nej qhia tej qhov tseeb ntawm Yexus Khetos txoj moo zoo txum tim rov qab los rau lwm tus neeg.
Thaum lub sij hawm xyoo tas los no, nej feem coob tau ua tej yam no thaum tseem raug tej yam uas muaj los vim yog ib phaum mob thiab. Tej zaum nej tsis tau nqa dej thiab txiv maj phaub thiab tu 400 tus neeg kom zoo mob nkeeg, tiam sis nej tau nplij tib neeg siab, thiab tau muab kev cia siab, kev xyiv fab, thiab kev nyob kaj siab lug rau lawv thaum ua lwm yam zoo.
Saib koj muaj hnub nyoog npaum li cas tsis tseem ceeb npaum li koj txoj kev ntseeg thiab qhov uas koj kam ua hauj lwm pab lwm tus neeg. Tej yam ntxwv los ntawm lub sij hawm yav nram ntej, xws li Tom Fanene, yuav pab tau nej pom tias yeej xav tau nej pab teeb lub hauv paus ntawm Vajtswv txoj hauj lwm tseem ceeb.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, April 2021. Hmong. 17467 295