“Ekar Bōk Juon Ļaddik n̄an Lo̧mo̧o̧ren Bukwōn eo,” N̄an Kōkajoorļo̧k Jodikdik ro, Epr. 2021, 10–11.
Kajjojo Allōn̄ N̄an Kōkajoorļo̧k Jodikdik ro Ennaan, Eprōļ 2021
Ekar Bōk Juon Ļaddik n̄an Lo̧mo̧o̧ren Bukwōn eo
Tom Fanene ekar 12 wōt iiō dettan, ak ke juon nan̄inmej ekar pādjake bukwōn eo an ilo Samoa, kar kūr n̄an kōm̧m̧an juon men eļap.
Kōmeļeļe jān James Madsen; pija jān Getty Images
Tiim eo an jodikdik ej ba, kom̧win “likūt pedped in juon jerbal eļap” (Katak im Bujen Ko 64:33). Ilo aolepān bwebwenatoin Kabun̄ in, ro rūm̧m̧an ded ekkā aer jerbale juon jerbal eaorōk ilo iien ko reppen n̄an kalōk aelōn̄ in kiin̄ eo an Anij. En̄in ej juon waanjon̄ak.
Island Epidemic
Ium̧win 100 iiō ko remootļo̧k, ilo Āne ko reddik in Pacific Ocean ilo Samoa en, juon ļaddik edik etan Tom Fanene ekar juon rijipan̄ eļap ikōtaan mour im mej n̄an membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Tom ekar jokwe ilo juon bukwōn ņaetan Sauniatu, kar loe jen Armej ro Rekwojarjar ilo Raan ko Āliktata ilo eria in āinwōt juon jikin aer kuk ippān doon im āinwōt juon jukjukin pād. Āinwōt ro Rekwojarjar an Anij ilo iien ak jikin ko jet, raar ioon apan̄ ko barāinwōt kabwilōn̄lōn̄ ko ilo aer kar jerbal ippān doon n̄an kalōk aelōn̄ in kiin̄ eo an Anij. Juon apan̄ eaar waļo̧k ilo 1918 eo, ke juon nan̄inmej ekar waļo̧k ilo jikin eo.
Ilo iien eo wōt ej waļo̧k nan̄inmej eo, ekar kauwōtata, im m̧ōkaj an ajedeed. Enan̄in 400 armej in jikin eo rekar lukkuun nan̄inmej jene. Ruo wōt iaer rekar maron̄ em̧akūtkūt: juon armej erūtto im Tom 12 an iiō.
Tōmak im Kijejeto in Jerbal
Baam̧le eo an Tom rekar kōjerbal tōmak n̄an jelm̧ae nan̄inmej eo m̧okta im rekar lo kabwilōn̄lōn̄ ko āinwōt juon uwaak. Ļaddik eo jatin Tom Ailama ekar nan̄inmej jet iiō m̧oktaļo̧k. Jemāer, Elisala, ekar ettōņake juon ettōņak eo kar leļo̧k tōl eo ekkar n̄an kōm̧m̧ane ta eo n̄an oņake Ailama, pukot juon wōjke-wili-wili, bōk jet kil jen wōjke eo, im nonoki bween walo̧k dān. Elisala ekar kōm̧m̧ane menin im kar bōktok dān eo n̄an Ailama, me ekar idake im tokālik ekar mour. Tom eaar lo wāween kōjerbal tōmak emaron̄ jipan̄ anjo̧ jen nan̄inmej eo.
Nan̄inmej eo ilo 1918 eo, Tom ekar kōjerbal tōmak ilo an kar jerbal n̄an oņake armej ro ilo bukwōn eo. “Aolep jibbon̄ ij etal jen em̧ n̄an em̧ n̄an naajdik armej ro im karreeo im lale wōn emej,” Eaar ba.
Ej tein̄tok bōkaj in dān ko n̄an aolep em̧. Ej taļļōn̄tok ni, būkki ni ko, im dibwōjji, im rubwi n̄an būkki dān ko im bōktok n̄an rinan̄inmej ro. Ej bar m̧anm̧an bao jen bukwōn eo n̄an kōm̧m̧an juub n̄an kajjojo baam̧le.
Kōm̧m̧ane Oktak
Ilo nan̄inmej in, epaak juon m̧ōttan emān in aolep armej ro ilo Samoa rekar mej jān nan̄inmej in. Jet iaan armej ro ilo bukwōn eo an Tom rekar bar mej. Tom ekar jipan̄ kōb ron̄ n̄an kalbwin elōn̄ļo̧k jān 20 iaer, ekoba jemān, Elisala.
Ak kam̧m̧oolol kōn jerbal im iakwe eo an Tom, elōn̄ armej ro ilo bukwōn eo an rekar mour. Ekar kōm̧m̧ane juon oktak eļap n̄an armej ro im n̄an kalōk aelōn̄ in kiin̄ eo an Irooj ilo Samoa. Ekar “likūt pedped in juon jerbal eļap.”
Im ilo jekjek ko am make, kwoj barāinwōt.
Kwomaron̄ jab kūr n̄an kōm̧m̧an men rot ko Tom ekar kōm̧m̧ani, ak kwomaron̄e, ilo m̧ool, kōjerbal tōmak ilo elōn̄ jekjek ko me kwonaaj kōm̧m̧ane juon oktak eļap ilo kwe, n̄an ro jet, im kōm̧m̧ane jerbal eo n̄an kalōk aelōn̄ in kiin̄ eo an Anij.
Kwoj kwaļo̧k juon waanjon̄ak n̄an baam̧le eo am̧, ro m̧ōttam̧, im ro jet n̄an kwaļo̧k erreeo, kijenmej, jouj, im iakwe. Kwoj jerbal n̄an ro jet. Kwoj bōk kuņaam̧ ilo ekkatak jeje ko rekwojarjar im jar. Kwoj kwaļo̧k m̧ool ko an gospel in em̧ōj an jepļaaktok an Jisōs Kraist.
Ilo iiō in, elōn̄ iami raar kōm̧m̧ani men kein n̄an dipļo̧ke ilo an waļo̧k nan̄inmej in. Bōlen kwojjan̄in tein̄tok dān im bōktok ni im oņake 400 armej n̄an ājmour, ak em̧ōj am kar kaenōm̧m̧an armej, kōjatdikdik, lan̄lōn̄, im aenōm̧m̧an ilo elōn̄ wāween.
Iiō eo am̧ ejjab aorōk jen tōmak eo am̧ im am̧ kōņaan jerbal n̄an ro jet. Waanjon̄ak ko jān m̧okta, āinwōt ko an Tom Fanene, emaron̄ jipan̄ eok lo bwe kwoj aikuj likūt pedped in juon jerbal an Anij eļap.
© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Monthly For the Strength of Youth Message, April 2021. Marshallese. 17467 874