“ගමක් සුරැකීමට පිරිමි ළමයෙකු අවශ්‍ය විය,” යෞවනයින්ගේ ශක්තිය සඳහා, අප්‍රි. 2021, 10–11.
යෞවනයින්ගේ ශක්තිය සඳහා මාසික පණිවිඩය, 2021 අප්‍රියෙල්
ගමක් සුරැකීමට පිරිමි ළමයෙකු අවශ්‍ය විය
ටොම් ෆැනේන්ට වයස අවුරුදු 12ක් වූ නමුත්, ඔහුගේ සමෝවාන් ගම්මානයේ දරුණු රෝගයක් වැළඳුණු විට, ඔහුට විශාල දෙයක් කිරීමට කැඳවනු ලැබීය.
ජේම්ස් මැඩ්සන්ගේ නිදර්ශනය; ගෙටි රූප වලින් ගත් ඡායාරූපයකි
මෙම වසරේ යෞවන තේමාව පවසන පරිදි, ඔබ “විශිෂ්ට කාර්යයක අඩිතාලම දමමින් සිටියි” (දහම සහ ගිවිසුම් 64:33). සභාවේ ඉතිහාසය පුරාම, යෞවනයන් බොහෝවිට දෙවියන්වහන්සේගේ රාජ්‍යය ගොඩනැඟීමේ තීරණාත්මක අවස්ථාවන්හිදී අත්‍යවශ්‍ය කාර්යභාරයක් ඉටුකර ඇත. මෙන්න එක් උදාහරණයක්.
දූපත් වසංගතය
මීට වසර 100 කට පමණ පෙර, පැසිපික් සාගරයේ සමෝවාන් දූපත්වල, ටොම් ෆැනේන් නම් තරුණයෙක් යේසුස් ක්‍රිස්තුස්වහන්සේගේ පසු-දවස්වල ශුද්ධවන්තයන්ගෙන් යුත් සභාවේ සාමාජිකයින්ට ජීවිත සහ මරණය අතර තත්ත්වයක් තුළ වැදගත් උපකාරයක් විය.
ටොම් ජීවත් වූයේ ප්‍රදේශයේ ශුද්ධවන්තයින් විසින් ආරම්භ කරන ලද, සෞනියාටු නම් ගම්මානයක වන අතර, එය ඔවුන්ට රැස්වීමට සහ ප්‍රජාවක් ඇති කිරීමට සුදුසු ස්ථානයක් විය. වෙනත් වේලාවක සහ ස්ථානවල දෙවියන්වහන්සේගේ ශුද්ධවන්තයින් සේම, ඔවුන් දෙවියන්වහන්සේගේ රාජ්‍යය එකට ගොඩනැගීමට කටයුතු කරන විට පීඩා මෙන්ම හාස්කම්ද අත්විඳින ලදි. ඉන්ෆ්ලුවෙන්සා වසංගතයක් ගමට පැමිණි විට, 1918 දී එක අභියෝගයක් පැමිණියේය.
අසනීපය පැමිණි විගස, එය විනාශකාරී වූ අතර, එය ඉක්මනින් පැතිර ගියේය. දළ වශයෙන් ගම්වැසියන් 400 දෙනාගෙන් සෑම කෙනෙක්ම පාහේ එය නිසා ඔත්පොළව සිටියහ. එහාට මෙහාට යාමට තරම් සනීප වූයේ ඔවුන්ගෙන් කිහිප දෙනෙකුට පමණි: වැඩිහිටි මිනිසෙකු සහ 12 හැවිරිදි ටොම් ඒ අතර විය.
ඇදහිල්ල සහ වෙහෙස මහන්සි වී වැඩ කිරීම
ටොම්ගේ පවුලේ අය මීට පෙර රෝගාබාධ හමුවේ විශ්වාසය තබා ඇති අතර එහි ප්‍රතිඵලයක් ලෙස ප්‍රාතිහාර්යයන් දැක තිබේ. ටොම්ගේ බාල සහෝදරයා වන අයිලාමා මීට වසර කිහිපයකට පෙර අසනීප විය. ඔවුන්ගේ පියා වන, එලිසාලාට සිහිනයක් තිබී ඇති අතර, අයිලාමා රැකබලා ගැනීම සඳහා කළ යුතු දේ පිළිබඳව නිශ්චිත උපදෙස් ලබා දී ඇත: විලි-විලි ගසක් සොයා ගැනීම, පොතු ටිකක් ඉවත් කිරීම, සහ යුෂ ඉවතට ගැනීම ඒ සිහිනයේ විය. එලිසාලා මෙය සිදුකර යුෂ අයිලාමා වෙත ගෙන ආ අතර, එය පානය කළ ඔහු ඉක්මනින්ම සුවය ලැබීය. ඉතින් ඇදහිල්ලෙන් ක්‍රියා කිරීම අසනීප වලින් මිදීමට උපකාර කරන්නේ කෙසේදැයි ටොම් දැක තිබේ.
1918 ඉන්ෆ්ලුවෙන්සා වසංගතය අතරතුර, ටොම් ගමේ ජනතාව රැකබලා ගැනීමට වෙහෙස මහන්සි වී වැඩ කළ නිසා ඇදහිල්ල ක්‍රියාවට නැංවූයේය. “සෑම උදෑසනකම මම ජනතාව පෝෂණය කිරීමට සහ පිරිසිඳු කිරීමට සහ මියගිය අය සොයාගැනීමට ගෙයින් ගෙට ගියෙමි,” යැයි ඔහු පැවසුවේය.
ඔහු දිය උල්පතකින් වතුර බාල්දි ගෙන සෑම නිවසකටම ජලය ගෙන ආවේය. ඔහු පොල් ගස්වලට නැග, පොල් අහුලා, ඒවා ලෙලි ගසා, රෝගීන්ට ගෙන ඒම සඳහා යුෂ එකතු කිරීමට ඒවා විවෘත කළේය. සෑම පවුලකටම සුප් සෑදීම සඳහා ඔහු ගමේ සියලුම කුකුළන්ද මරා දැමීය.
වෙනසක් කිරීම
මෙම වසංගතය අතරතුර, සමෝවාහි වෙසෙන ජනයාගෙන් හතරෙන් එකක් පමණ ඉන්ෆ්ලුවෙන්සා රෝගයෙන් මිය ගියහ. ටොම්ගේ ගමේ සමහර අයද මිය ගියහ. ටොම් සොහොන් හෑරීමට සහ ඔහුගේම පියා වන එලිසාලා ඇතුළු, 20කට වැඩි ප්‍රමාණයක් භූමදාන කිරීමට උදව් කළේය.
නමුත් ටොම්ගේ වෙහෙස මහන්සි වී වැඩ කිරීම සහ ආදරණීය රැකවරණය නිසා, ඔහුගේ ගමේ බොහෝ දෙනෙක් දිවි ගලවා ගත්හ. ඔහු එම ජනයාට සහ සමෝවාහි ස්වාමින්වහන්සේගේ රාජ්‍යය ගොඩනැගීමට විශාල වෙනසක් කළේය. ඔහු “ඉමහත් කාර්යයක අඩිතාලම දමමින් සිටියේය.”
ඔබේම ආකාරයෙන්, ඔබත් එසේමය.
ටොම් කළ ආකාරයේ දේවල් කිරීමට ඔබව කැඳවනු නොලැබෙන්නට පුලුවන්, නමුත් ඇත්තවශයෙන්ම, ඔබටත්, අන් අයටත්, දෙවියන් වහන්සේගේ රාජ්‍යය ගොඩනැඟීමේ කාර්යයටත් විශාල වෙනසක් ඇති කරන විවිධ ආකාර වලින් ඔබ ඇදහිල්ල ක්‍රියාකරවිය හැකිය.
ගුණවත්කම, ඉවසීම, කරුණාව සහ ආදරය පෙන්වීමෙන් ඔබ ඔබේ පවුලේ අයට, මිතුරන්ට සහ වෙනත් අයට ආදර්ශයක් සපයයි. ඔබ අන් අයට සේවය කරයි. ඔබ ශුද්ධලියවිලි අධ්‍යයනයෙහි සහ යාච්ඤාවෙහි නිරතව සිටී. ඔබ යේසුස් ක්‍රිස්තුස්වහන්සේගේ නැවත පිහිටුවන ලද ශුභාරංචියෙහි සත්‍යයන් බෙදාගනී.
මෙම පසුගිය වසර තුළ, ඔබගෙන් බොහෝ දෙනෙක් වසංගතයක ප්‍රතිඵල විඳදරාගනිමින් මේ දේවල් පවා කර ඇත. සමහරවිට ඔබ ජලය සහ පොල් ලබානොගෙන 400 දෙනෙකුට නැවත යහපත් සෞඛ්‍යයට පැමිණීමට සාත්තු සප්පායම් කර නොමැති නමුත්, ඔබ මිනිසුන්ට සැනසිල්ල, බලාපොරොත්තුව, ප්‍රීතිය, සහ සාමය වෙනත් බොහෝ ආකාර වලින් ගෙනැවිත් ඇත.
ඔබේ වයස වැදගත් වන්නේ ඔබේ ඇදහිල්ලට සහ අන් අයට වැඩ කිරීමට සහ සේවය කිරීමට ඇති ඔබේ කැමැත්තට වඩා අඩුවෙන්ය. ටොම් ෆැනේන් වැනි, අතීතයේ උදාහරණ වලට, දෙවියන්වහන්සේගේ උතුම් කාර්යයේ අඩිතාලම දැමීමේදී ඔබව අවශ්‍ය බව දැකීමට උපකාරී විය හැක.
© 2021 by Intellectual Reserve, Inc. All rights reserved. අමෙරිකා එක්සත් ජනපදයේ මුද්‍රණය කර ඇත. ඉංග්‍රීසි අනුමැතිය: 6/19. පරිවර්තන අනුමැතිය: 6/19. Monthly For the Strength of Youth Message, April 2021 හි පරිවර්තනයකි. Sinhala. 17467 408