“Gusto Ko Gid sa Templo,” For the Strength of Youth, Mayo 2021.
Sabado sang Aga nga Sesyon
Gusto Ko Gid sa Templo
Mga Bahin (Excerpts)
Nakahibalo ako nga ang mga templo sang Ginuo balaan nga mga lugar. Ang akon tuyo karon nga adlaw sa paghambal parte sa mga templo amo nga dugangan ang inyo handum kag ang akon man nga mangin takos kag handa para sa nagadugang pa nga mga oportunidad sa pag-eksperiyensya sang templo nga magaabot sa aton. …
Kon kamo ukon ako magkadto sa templo nga di-nagakaigo ang pagkaputli, indi naton makita, paagi sa gahum sang Balaan nga Espiritu, ang espirituhanon nga panudlo parte sa Manluluwas nga mahimo naton mabaton sa templo.
Kon takos kita sa pagbaton sang amo nga panudlo, may magatubo paagi sa aton eksperiyensya sa templo nga paglaum, kalipay, kag positibo nga pagtamod sa bug-os naton nga mga kabuhi. Ang ina nga paglaum, kalipay, kag positibo nga pagtamod matigayon lamang paagi sa pagbaton sang mga ordinansa nga ginahikot sa balaan nga mga templo. Sa templo lamang nga mabaton naton ang kapat-uran sang mapinalanggaon nga pag-angot sang mga pamilya nga magapadayon pagkatapos sang kamatayon kag magalawig tubtob sa wala katapusan. …
… Kag nakahibalo kita nga ang aton wala katapusan nga kalipayan nagadepende sa paghimo naton sang aton pinakamaayo agud ihatag ang amo man nga nagadugay nga kalipay sa madamo sa aton mga kaliwat nga aton masarangan.
Nagabatyag ako sang amo man nga handum nga magmadinalag-on sa pag-agda sang buhi nga mga miyembro sang pamilya nga maghandum nga mangin bagay sa pagbaton kag sa pagtahod sang nagahugpong nga mga ordinansa sang templo. Kabahin ina sang ginpromisa nga pagtipon sang Israel sa katapusan nga mga adlaw sa magtimbang nga bahin sang belo.