“Faenem Paoa tru long Fasin blong Fogiv,” Blong Ol Yut Oli Kam Strong (2021), 10–11
Kam Folem Mi
Faenem Paoa tru long Fasin blong Fogivim
Lod i givim komanmen long yumi blong yumi fogivim ol narafala man. Hem bae i helpem yumi blong kipim ol komanmen, wetem hemia blong fogiv.
Pikja droing i kam long Jim Madsen
?I gat sam komanmen we i had blong kipim bitim ol narafala wan?
“Mi, Lod, bambae mi fogivim huia we bambae mi fogivim; be yufala, mi talem se yufala i mas fogivim evri man” (Doktrin mo Ol Kavenan 64:10
Wet. ?Yumi mas fogivim evri man we oli mekem nogud long yumi? !?Hemia i posibol?!
Hem i moa gud blong fogivim wan man we i talem wan nogud samting long yu o hem we i tekem las kaekae long tebol. ?Be olsem wanem long olgeta we oli mekem ol bigfala soa insaed long yu? ?Ol rabis fasin we oli series, we i save holemtaet o jenisim rod ia we yumi stap tekem long laef blong yumi?
Samtaem paoa ia blong save fogivim wan man we i mekem nogud tumas long yumi, bae i had tumas blong yumi save fogivim.
Be i gat wan gudfala nius: Wetem help blong Jisas Kraes, yumi neva sot long wanem yumi save mekem yumiwan.
Help We Hem I Nidim.
Wan tru Kristin blong Nedalan nem blong hem Corrie ten Boom i faenem aot long hemwan paoa blong askem God blong helpem hem blong i fogivim wan man.
Hem mo sista blong hem Besty oli bin ol prisena long ol bigfala kamp blong wo, long Wol Wo II. Corrie wetem ol narafala wan we oli holemtaet olgeta, oli bin go tru long ol nogud abius we ol Nazi prisen gad oli bin mekem long olgeta. Sista blong hem Besty, i ded from abius ia. Corrie i laef.
?Olsem wanem yumi save gat eksperiens ia blong filim hiling paoa blong Kraes? Oltaem hem i serem mesej blong hem long ol pablik ples. Be wan dei ol toktok blong hem, i kam blong testem hem.
Afta long taem blong wan toktok blong hem long pablik, wan long ol rabis gad blong prisen blong kamp ia i kam luk Corrie.
Hem i talem long Corrie se, hem i kam wan Kristin afta long wo mo hem i sakem sin long ol rabis samting we hem i bin mekem olsem wan prisen gad.
Hem i pusum aot han blong hem mo talem, “?Bae yu save fogivim mi?”
Iven long ol samting we hem i bin lanem mo serem abaot fasin blong fogivim ol narawan, Corrie i no save akseptem han blong man ia nomo mo fogivim hem—hem i no save mekem hemwan nomo.
Hem i raetem afta se, “Iven taem ol tingting blong kros, blong givim bak i gro bigwan insaed long mi, mi bin luk sin blong olgeta. … Lod Jisas, mi prea, fogivim mi mo helpem mi blong fogivim hem.
“Mi traem blong smael, [mo] mi traehad blong leftemap han blong mi. Mi no save nomo. Mi no filim wan samting nating, no iven wan smol wom filing o bigfala lav. Mo bakegen mi talem wan prea nomo long hat blong mi. Jisas, mi no save fogivim hem. Givim mi fogivnes blong Yu.
“Taem mi holem han blong hem, wan naesfala samting i hapen. Stat long solda blong mi go kasem han blong mi, i olsem wan filing we i pas long mi, i go long hem, mo long sem taem insaed, hat blong mi i fulap wetem lav from strenja ia mo i kavremap mi.
“Mo tu mi faenem aot se hiling blong wol i no dipen long fogivnes blong yumi o gud fasin blong yumi, be i dipen long fogivnes mo gud fasin blong Lod. Taem Hem i talem long yumi blong lavem ol enemi blong yumi, Hem i givim lav ia nao, wetem komanmen ia.”1
God i stap ia blong helpem yu kipim ol komanmen blong Hem, wetem hemia blong fogiv—iven taem we i had. Hem i save helpem yu olsem we Hem i helpem Corrie ten Boom.
Hiling We Yu Gat Raet long Hem.
Laef i fasfas. Hem i olbaot. Mo i fulap wetem ol pipol wetem fridom blong joes we God i givim.
Long ol taem ia, taem wan man i mekem wan joes we i mekem yu harem nogud tumas—o hem i no minim blong mekem—yu save kasem hiling paoa taem yu prea from help mo stap traehad blong fogiv.
Blong fogivim ol narawan, i karem hiling i kam long sol blong yu. Wetem help blong God, taem yu fogivim wan man we i mekem nogud long yu, yu karemaot wan hevi harem nogud long solda blong yu, we yu stap holemtaet. Iven taem rod ia blong kasem tru hiling i had, wetem God, bae yu neva wokbaot long hem yuwan.
© 2021 i kam long Intellectual Reserve, Inc. Oli holem evri raet Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly For the Strength of Youth Message, June 2021. Bislama. 17470 852