“Karekean te Korakora ni Kabwarabure,” Ibukin Kakorakoraia Kairake, Tuun 2021, 10–11.
Nakomai, Iriirai
Karekean te Korakora ni Kabwarabure
E a tia te Atua n tuangiira bwa ti na kabwarai aia bure aomata. E na buokiira ni kakoroa nanon Ana tua nako, ao aio naba.
Korobanna iroun James Madsen
Iai tabeua tuua aika a taraa ni matoatoa aron kawakinana nakon ake tabeua?
Aio teuana are a maakua angiia aomata: “Ngai, te Uea, N na kabwara ana bure ane I taku bwa N na kabwara, ma ngkami kam riai ni kabwarai aia bure aomata ni kabane” (Reirei ao Berita aika Tabu 64:10).
Tataninga. Ti riai ni kabwarai aia bure aomata nako ake a kairua nakoira? E kona ni karaoki aei?!
E bebete kabwaran ana bure te aomata n aron ana taeka n aki rau nakoim ke anakin te kabanea n amwarake. Ma a uara maneka aika korakora? Kairua aika korakora aikai a kona ni kamangao ke ni bita waakin maiura?
N tabetai e na rangi ni matoatoa aron kabwaraan ana bure te aomata ae e a tia ni karaoa te iowaawa ae korakora nakoira.
Aio te rongorongo ae raoiroi: N ana ibuobuoki Iesu Kristo, e na akea tian bwai aika ti kona ni karaoi.
Te Ibuobuoki Ae E Kainnanoia Neienne
Te Kiritian ae kakaonimaki ae arana Coriie ten Boom e moan kunea i bon irouna te mwaaka ni butian te Atua bwa e na buokia ni kabwara ana bure te aomata temanna.
Ngaia ma tarina ae Betsy a tia ni kamatawarikaki n aia oo tautia n tain te Kauoua ni Buaka n te Aonaaba. Corrie ao tabeman riki a rinanon te bwainikirinaki ae korakora irouia taan tararuaia buure aika I-Tiaman. Tarina ae Betsy e mate man te mwakuri n iowaawa aei. E maiu Corrie.
Imwin te buaka, Corrie e kunea te korakora ni kabwaran aia bure aomata. Angiin te tai ao e tibwaua ana rongorongo nakoia aomata. Ma n te bong teuana ao e a kataaki n aron ana taeka aikai.
Imwiin ana maroro nakoia aomata, e kawaraki iroun temanna te tia tararua ae rianako iowaawana man aia oo tautia.
E tuanga Corrie bwa e riki bwa te Kiritian imwin te buaka ao e a tia ni raira nanona man bwaai ake e a tia ni karaoi ngke te tia tararua ngaia.
E arora baina man taku, “Ko kona ni kabwara au bure?”
E ngae ngke e korakora ana atatai ao man tia n tibwaua rongorongon kabwaraan aia bure aomata, E aki butimwaea bain te mwaane aei ao e aki kabwara ana bure, bwa e matoa irouna, n te tai aei.
Imwina ao e korea ae kangai, “E boni ngae ngke e koburake i nanou te un ao te iango ni kataekaiu, I noora aia bure. … Iesu te Uea, I tataro, kabwara au bure, ao buokai bwa N na kabwara ana bure.
“I kataia ni wingare, [ma] e matoa irou bwa N na anga baiu. E aki mwemwe. E bua au iango, akea naba teutana te tangira ke te aabue ae I namakinna. Ao ngaia are I manga tataro kaua. Iesu, I aki kona ni kabwara ana bure. Anganai Am kabwarabure.
“Ngke I taua baina e riki te bwai ae moan te tamaroa. Mai angau rinanon baiu ao rinanon tabonbaiu ao kanga e biri te iti mairou nakoina, ao e koburake te tangira inanou ibukin te aomata ae I aki kinaa aei n te aro are I kuri konaaki iai.
“Ao ngaia are I kunea bwa tiaki ara kabwara bure ma man nanora ae raoiraoi are e katan iaona te raoiakinaki, ma iaon Mwaakana. Ngkana E tua nakoira bwa ti na tangiriia ara kairiribati, E anga, bwa raon te tua, te tangira.”1
E raonira te Uea ni buokira ni kawakin Ana tua nako, e koaua naba aei n te kabwara bure—e boni ngae ngke e matoatoa. E kona ni buokiko n ai aron are e Buoka Corrie ten Boom.
Te Kamaiuaki ae Riai Ibukim
E mangaongao te maiu aei. E aki barongaki. Ao e kaainaki irouia aomata ake a anganaki te inaomata n rinerine.
N taai ake iai te aomata ae karaoa ana rinerine n anganiko te maraki ae korakora—ke tao n ae tiaki nanona—ko kona ni karekea te kamarurungaki man am tataro ibukin te ibuobuoki ao man kataan te kan kabwara bure.
Kabwaraan aia bure aomata e uota te marurung nakon tamneim. Man ana ibuobuoki te Atua, ngkai ko kabwara ana bure temanna ae e kairua nakoim, ko kanakoa te rawawata mai aom are tao ko tautaua. E boni ngae ngke e matoatoa aron karekean raun te nano, ngkai iai te Atua, ko na bon aki maroa i nanon mwanangam.
© 2021 iroun Intellectual Reserve, Inc. A bane n tauaki mwiin taian kariaia ibukin katootongana. Boreetiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan Monthly For the Strength of Youth Message, June 2021. Kiribati. 17470 859