“Nrhiav Dag Zog Kom Thiaj Zam Tau Txim,” Ntxiv Dag Zog rau cov Tub Hluas Ntxhais Hluas, Rau Hli Ntuj 2021, 10–11.
Los, Nrog Kuv Mus
Nrhiav Dag Zog Kom Thiaj Zam Tau Txim
Tus Tswv tau txib kom peb zam txim rau lwm tus neeg. Nws yuav pab peb coj raws li Nws tej lus txib, suav txoj lus txib no thiab.
Daim duab los ntawm James Madsen
Puas yog ob peb txoj lus txib zoo li nyuaj ua dua lwm txoj lus txib?
Nov yog ib txoj lus txib uas kuj nyuaj heev rau neeg feem coob: “Kuv, tus Tswv, yuav zam txim rau tus uas kuv yuav zam txim rau, tiam sis nej yuav tsum zam txim rau txhua tus neeg” (Lus Qhuab Qhia thiab Kev Khi Lus 64:10).
Tos ib pliag. Peb yuav tsum zam txim pub rau txhua tus neeg uas ua txhaum rau peb? Peb puas yuav ua tau li ntawd?!
Thaum lwm tus neeg hais lus siab yus los yog muab pob khob cij kawg ua ntej koj muab tau, yeej yooj yim me ntsis zam txim pub rau lawv. Tiam sis tej qhov mob tob tob ne? Tej kev ua txhaum uas cuam tshuam los sis hloov peb lub neej yam hnyav hnyav li ne?
Qee zaum qhov uas peb muaj peev xwm zam txim rau lwm tus neeg uas tau ua txhaum peb yam mob heev yeej yog ib qho uas nyuaj ncav kom txog.
Txoj moo zoo yog: Thaum muaj Yexus Khetos pab peb, peb yeej yuav ua tau tej yam ntau dua peb ua tau peb tus kheej.
Qhov Pab uas Nws Xav Tau
Muaj ib tug Ntseeg Khetos kawg siab uas tuaj teb chaws Netherlands tuaj lub npe hu ua Corrie ten Boom es nws kawm hais tias saib nws tau lub hwj chim ntau npaum li cas thaum nws thov Vajtswv pab nws zam txim pub rau lwm tus neeg.
Nws thiab nws tus viv ncaus Betsy tau raug kaw rau hauv lub yeej kaw neeg thaum Kev Tsov Rog Thoob Ntiaj Teb thib Ob. Corrie thiab lwm tus neeg raug tsim txom ntau heev los ntawm Nazi cov neeg zov. Nws tus viv ncaus Betsy tau tas sim neej vim yog tej kev tsim txom ntawd. Corrie tseem tiv dhau.
Tom qab tsov rog tag, Corrie kawm tias muaj ib lub hwj chim kho lub siab lub ntsws los ntawm kev zam txim pub rau lwm tus neeg. Feem ntau nws yuav qhia nws zaj rau cov neeg. Muaj ib hnub nws cov lus raug sim yam nyuaj kawg nkaus li.
Tom qab nws hais nws zaj, muaj ib tug neeg zov cov neeg raug kaw hauv lub yeej kaw neeg yav thaud los txog ntawm Corrie, es nws yog ib tug neeg zov uas nyaum thiab phem heev tshaj.
Nws qhia Corrie hais tias nws tau rais los mus ua ib tug Ntseeg Khetos txij thaum kev tsov rog thiab tau hloov siab lees txim thiab tso tseg tej yam phem nws tau ua thaum nws yog ib tug neeg zov neeg kaw.
Nws cev tes thiab hais tias, “Koj puas kam zam txim pub rau kuv?”
Txawm tias Corrie tau kawm ntau yam thiab qhia ntau yam txog txoj kev zam txim pub rau lwm tus neeg, los nws txais tsis tau tus txiv neej no txhais tes thiab zam txim pub rau nws—nws tus kheej nkaus xwb.
Tom qab no nws sau ntawv hais tias, “Twb yog thaum kuv tab tom npau taws thiab xav pauj kua zaub ntsuab, kuv pom tias xav li ntawd yog kev txhaum thiab. … Tus Tswv Yexus, kuv thov, thov zam txim pub rau kuv thiab pab kuv zam txim pub rau nws.
“Kuv sim luag nyav, [thiab] kuv sim cev kuv txhais tes. Kuv cev tsis tau li. Kuv lub siab txias tiag, tsis muaj ib qho sov los sis kev siab hlub hlo li. Ib zaug ntxiv kuv thov Vajtswv hauv kuv lub nruab siab. Yexus, kuv zam txim pub rau nws tsis tau li. Thov muab Koj qhov kev zam txim pub rau kuv.
“Thaum kuv tuav tus neeg ntawd txhais tes ib qho txuj ci tseem ceeb txawm muaj los ua rau kuv xav tsis thoob li. Los ntawm kuv lub xub pwg mus raws kuv txhais caj npab thiab mus dhau kuv txhais tes zoo nkaus li muaj hluav taws xob los ntawm kuv mus rau nws, es tib txhij ntawd txawm muaj kev siab hlub txhawv hauv kuv lub siab lub ntsws rau tus neeg txawv no uas yuav luag ua rau kuv qaug zog.
“Ces kuv txawm kawm hais tias tsis yog peb txoj kev zam txim rau lwm tus neeg thiab tsis yog peb txoj kev coj zoo uas yuav kho lub ntiaj teb, tsis yog li ntawd, twb yog Yexus li yuav kho lub ntiaj teb. Thaum Yexus qhia peb kom hlub peb cov yeeb ncuab, Nws muab, ua ke nrog txoj lus txib ntawd, cov kev siab hlub nrog rau.”1
Vajtswv nyob tos kom pab koj ua raws li Nws cov lus txib, suav txoj lus txib kom zam txim pub—twb yog thaum ua li ntawd nyuaj kawg. Nws yuav pab tau koj ib yam li Nws tau pab Corrie ten Boom.
Txoj Kev Kho uas Tsim Nyog rau Koj
Lub neej no yeej muaj kev cov nyom. Yeej ntxhov tsis yooj yim. Thiab yeej muaj cov neeg uas muaj kev ywj siab xaiv los ntawm Vajtswv.
Thaum tej lub sij hawm uas ib tug neeg xaiv ua ib yam uas ua rau koj raug mob—los sis twb yog tsis txhob txwm ua rau koj—koj txais tau lub hwj chim kho thaum koj thov Vajtswv pab koj zam txim pub.
Kev zam txim rau lwm tus neeg kho yus sab ntsuj plig kom zoo tag nrho. Tau Vajtswv txoj kev pab, thaum koj zam txim pub rau ib tug neeg uas tau ua txhaum rau koj, koj txo ib lub nra hnyav heev ntawm koj ob lub xub pwg uas tej zaum tab kaum koj txoj kev ua neeg zoo dua zuj zus mus. Twb yog thaum txoj kev taug kom tau kev kho tseeb tseeb nyuaj heev los, nrog rau Vajtswv, koj yuav tsis tas taug txoj kev no koj ib leeg xwb.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, June 2021. Hmong. 17470 295