“Pukōt Kajoor n̄an Jeorļo̧k Bōd,” N̄an Kōkajoorļo̧k Jodikdik ro, Juun 2021, 10–11.
Itok Ļoor Eō
Pukōt Kajoor n̄an Jeorļo̧k Bōd
Irooj ej kakiene kōj n̄an jeorļo̧k an ro jet bōd. E enaaj jipan̄ kōj kōjparok kien ko An, ekoba kien in.
Kōmeļeļe eo jān James Madsen
Āinwōt ke jet kien epen n̄an kōjparoki jān ko jet?
En̄in ej juon men ej kaleln̄o̧n̄ elon̄ armej: “N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd” (Katak im Bujen Ko 64:10).
Kōttar. Jej aikuj jeorļo̧k an aolep bōd ro rekar bōd ņae kōj? Epidodo ke?!
Ej juon men n̄an jolok an juon bōd kōn aer ba juon naan elej n̄an eok kake ak kōn aer bōk pilawe eo āliktata ioon tebōļ in kōjota eo. Akkō kinej ko rekōmetak remwilaļ? Naan kōmetak kein me remaron̄ kabōņōņōik eok ak em̧ool ukot iaļ in mour ko ad?
Jet iien maron̄ eo n̄an jeorļo̧k bōd an juon eo me ekar ļap an kametak kōj emaron̄ ļaplo̧k jān ad maron̄.
En̄in ej nuuj eo em̧m̧an: Kōn jipan̄ eo an Jisōs Kraist, ejjeļo̧k jon̄an n̄an ta eo jemaron̄ kōm̧m̧ane kōn kōj make.
Jipan̄ Eo Liin Ekar Aikuji
Juon Rikūrijin etiljek jān Netherlands kar etan Corrie ten Boom ekar loe ilo jinoin tata kajoor in kajjitōk ippān Anij n̄an jipan̄ e jeorļo̧k an juon bōd.
Liin im jijtōr eo an Betsy rekar kalibuuj ilo jikin kāām ko iien Pata eo an Lal in Kein Karuo. Corrie im ro jet rekar en̄taan jān kakkure ko jān riwaj ro an Nazi. Jijtōr eo an Betsy ekar mej itok wōt jān kakkure eo. Corrie eaar mour.
Ālikin pata eo, Corrie ekar loe kajoor in kōmour eo an jeorļo̧k bōd an ro jet. Ekkā an kwaļo̧k ennaan kein an ilo lo̧bwilej. Bōtaab juon raan ekar lukkuun kam̧ooli naan ko ekar ba n̄an jeorļo̧k an ro jet bōd.
Ālkin an kar kwaļo̧k kōnono eo an ilo lo̧bwilej, juon iaan rilale kalbuuj ro renana tata jān kāām eo, ekar jibadōkļo̧k Corrie.
Ekar ba n̄an Corrie ekar erom juon Kūrijin jān iien pata eo im ekar ukweļo̧k jān men ko renana ekar kōm̧m̧ani āinwōt juon rilale kalibuuj eo.
Ekar erļo̧ke pein im ba, “Kwomaron̄ ke jeorļo̧k aō bōd?”
Jekdo̧o̧n ta aolep men ko ekar ekkatak im kwaļo̧ki kōn jeorļo̧k an ro jet bōd, Corrie ekar jab maron̄ bōke pein em̧m̧aan in im jeroļo̧k an bōd—ejjab make iaan, ilo m̧ool.
Liin tokālik ekar je, “Men̄e kar illu, kejokļo̧kjeņ in koņaan ko rekar ļapļo̧k ilo n̄a, Iaar lo jerawiwi eo aer. … Irooj Jisōs, iaar jar, jeorļo̧k aō bōd, im jipan̄ eō n̄an jeorļo̧k an bōd.
“Iaar kajieon̄ ettōn̄, [im] ekar pen aō kotak peiū. Iaar jab maron̄. Ejjeļo̧k men ikar en̄jake, jab jidikin okmāņmāņ ak jouj. Im āinden bar juon alen ikar kōm̧m̧ane juon jar ejjeļo̧k ainikien. Jisōs, ijjab maron̄ jeorļo̧k an bōd. Letok n̄an eō jeorļo̧k bōd eo Am̧.
“Ke ikar jibwe pein juon men ekabwilōn̄lōn̄ eaar waļo̧k. Jān aira laļļo̧k ilo peiū im jān peiū juon en̄jake ekūraun ekar āinwōt etal jān n̄a n̄an e, ilo an kar būruō obrak kōn iakwe n̄an ruwaimejet in me enan̄in kalibubuik n̄a.
“Im kōn menin ikar lo bwe ejjab kōn jeorļo̧k bōd eo ad eļapļo̧k jān em̧m̧an eo ad me kemour eo an laļ in ej pedped ioon, ak eo An. Ke E ej jiron̄ kōm n̄an iakwe rikōjdāt ro ad, Eaar letok, ippāntok kapilōk eo, iakwe eo make.”1
Anij ej ped n̄an jipan̄ kwe kōjpārok kien ko An, ekoba kien eo n̄an jeorļo̧k bōd—em̧ool men̄e epen. E emaron̄ jipan̄ eok ejja āinwōt An kar jipan̄ Corrie ten Boom.
Kemour eo Kwoj Aikuji
Mour in ekaibokbok. Etooņoon. Im ilo m̧ool eobrak kōn armej ro kōn anemkwoj in kāālet eo Anij ekar letok.
Ilo iien ko n̄e juon armej ej kōm̧m̧ane juon kāālet me ekōm̧m̧an bwe en ļap am̧ metak—ak em̧ool ilo jidilo̧k—kwomaron̄ bōk kajoor in kemour eo ilo am̧ jar kōn jipan̄ im kajjieon̄ n̄an jeorļo̧k bōd.
Joļo̧k an ro jet bōd ej boktok kemour eo n̄an jetōb eo am̧. Kōn jipan̄ eo an Anij, ilo am̧ jeorļo̧k an juon armej bōd eo ekar bōd ņae eok, kwoj joļo̧k juon eddo jān airam̧ eo emaron̄ kar dāpij kwe likļo̧k. Jekdo̧o̧n men̄e iaļ eo n̄an kemour eo em̧ool āinwōt epen, kōn Anij, kwojjamin naaj etetal make ie.
© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Monthly For the Strength of Youth Message, June 2021. Marshallese. 17470 874