“Dihdiar Kehl en Mahkohng,” Ong ni Kakehlepen me Pwulepwul kan, Suhn 2021, 10-11.
Kohdo, Idawehn Ie
Raparapahki Kehl en Mahkohng
Kauno ketin mahsaniongehr kitail en kin mahkohng mehteikan. E pahn ketin sewesei kitail en kapwaiada Sapwellime kosonned akan, iangahki kosonned wet.
Kasansal sang James Madsen
Da ekei kosonned akan kin mwomwen apwal sang ekei?
Iet ehu me kin apwal ong aramas tohto: Ngehi, Kauno, pahn kin mahkohng irail kan me I pahn mahkohng, ahpw kumwail anahne mahkohng aramas koaros. Dictrine and Covenants 64:10.
Awih. Kitail anahne mahkohngkoaros me wiahda sapwung ong kitail? Met kakete wiawi?!
Me mengei en mahkohng mehmen me nda mehkoat suwed ong uhk de ale lahs en pilahwa pohn tehpel en mwengeo. Ahpw iaduwen ma e kauweiukala? Soangen sapwung doar kan me kin kerempwahla de wekidala mwomwen amwail mour kan?
Ekei ansou atail kak en mahkohng mehmen me kemedekeikitailla kin sohrasang kitail.
Iet rohng mwahuo: Pwehki sawas sang Sises Krais, kitail kak diar kehl en pein wia mehkoaros.
Sawas me Liho Anahne
Souleng kehlail men sang Netherlands adaneki Corrie ten Boom diarehr manaman en peki Koht en sewese ih mahkohng mehmen.
Liho oh rie serepein Betsy iangehr selidi nan wasahn sensel nan irair en Mahwen Keriau en Sampa. Corrie oh mehteikan powehdi kalokolok en kamwamwahl doar sang sounkalupwuhs kan en Nazi. Rie serepein Betsy mehkihla kalokolok en kamwamwahl ko. Corrie sohte mehla.
Mwurin mahweno, Corrie diarada manaman en kakehlail sang mahkohng mehteikan. Liho kin kalap ehukihda ire wet ong aramas akan. Eri ehu rahno liho ahpw alehdi ah kasongosong keieu laud.
Mwurin ah kapahrek ong aramas kei, Corrie ahpw tuhong emen sounkalupwuhs ko me keieu lemei.
Ohlo ndahiong Corrie me a wialahr emen Souleng mwuring mahweno oh kolukilahr mwekid suwed kan me e wiahdahr ni eh wia emen sounkalupwuhs.
Ohlo kapahla pehkan oh nda, Komw kak mahkehng ie?
Itarete en liho esehier oh kin ehukihda mwomwen mahkohng mehteikan, Corrie sohte kak ale pehn ohlo oh mahkohng ohlo--pein liho sohte kak.
Liho ntingiedi mwuri, “Wen lingeringer, medemedewehn iki kan me kadireiehla, I kilang duwen suwed en mepwuko. … Kaun Sises, I kapakap, kupwure ie oh sewesei ie en mahkohng ohlo.
I song en pohkomwokomw, [oh] nantihong en pwekada pehi kan. I sohte kak. Sohte mehkoat I kehn, sohte ekiste mwahi en mahk de kadek. Oh ngehi eri pil pwurehng esingengki ehu kapakap. Sises, I sohte kak mahkohng ohlo. Ketikihong ie Sapwellimomwi mahk.
Ni ahi ale pehn ohlo mehkoat keieu kapwuriamwei wiawi. Sang nan pwopweie kohla nan pehi ka oh pwar nan pehie likamw sahl en pepehm ehu kohsang ie kohla rehn ohlo, ni ansou ohte limpoak ong ohl menet kadirehla nan mohngiongi me kerenieng kaleweiehdi pwon.
Oh ngehi eri diarada me kaidehn atail kin mahk de pil atail wiewia mwahu kan me kin kamwahuwiala sampa, ahpw pwehki Sapwellime limpoako. Ni Ah ketin mahsaniong kitail en poakohng atail imwintihti kan, E ketikihda, kosonnedo iangahki limpoako. 1
Koht ketdo pwehn sewesei kumwail kapwaiada Sapwellime kosonned akan, iangahki kosonned en mahkohng--mehlel ansou me e kin apwal. E kak ketin sewesei kumwail duwehte Ah ketin sewesedahr Corrie ten Boom.
Kakehlail me Kumwail Anahne
Mour wet me apwal. E me liseliping. Oh e direhkihla aramas me kolokol kisakis en pilipil sang Koht.
Ni ansou kan me en mehtaikan arail pilipil kin kahrehiong amwail medekla laud--de sapwungala kaiden sang ni nsenarail--kumwail kak ale manaman en kakehlail ni amwail kin kapakap peki sawas oh nantihong en mahkohng.
Mahkohng mehteikan kin kakehlailiada amwail mour. Pwehki sawas en Koht, ni amwail kin mahkohng mehmen me wiahiong kumwail sapwung, kumwail kin pwilikihdi katoutou sang pwopwamwail kan me kin katoutouwih kumwail. Detehn ansou me kamwahu mehlel kin apwal en dierek pohn ahlo, pwehki Koht, kumwail sohte pahn kelekelehpw pohn ahlo.
© 2021 by Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwepen Padahk en Sounpwong kan Ong Kakehlepen me Pwulopwul kan, Suhn 2021, Mahsen.17470 885.