« Te fa’aitoitora’a i te fa’a’ore i te hapa », Nō te Pūai ’o te Feiā ’Āpī, Tiunu 2021, 10–11.
Mai, pe’e mai
Te fa’aitoitora’a i te fa’a’ore i te hapa
’Ua fa’aue te Fatu ia tātou ’ia fa’a’ore i te hapa a vetahi ’ē. E tauturu ’oia ia tātou ’ia tāpe’a i tāna mau fa’auera’a, tae noa atu i teie fa’auera’a.
Fa’ahōho’ara’a nā Jim Madsen
E mea fifi ānei te tahi mau fa’auera’a ’ia ha’apa’o i te tahi atu mau fa’auera’a ?
« E fa’a’ore au, ’o te Fatu, i te hara a rātou tā’u i hina’aro i te fa’a’ore atu, ia ’outou rā ’ua tītauhia atu ra ’outou ’ia fa’a’ore i te hapa a te ta’ata ato’a » (Te Parau Ha’api’ira’a ’e te mau Parau Fafau 64:10).
E aha ? E mea ti’a ia tātou ’ia fa’a’ore i te hapa a te mau ta’ata ato’a tei fa’ahapa mai ia tātou ? E nehenehe ānei rā ? !
E nehenehe iā’u ’ia fa’a’ore i te hapa a te ta’ata i te paraura’a i te tahi mea ’ino iā’u ’e ’aore rā, i te ravera’a i te tuha’a hōpe’a i ni’a i te ’amura’a mā’a. E aha rā ïa te parau nō te mau puta hōhonu ? Taua mau fa’a’inora’a teimaha ra ’o tē nehenehe e ha’afifi ’e ’aore rā e taui i te terera’a o tō tātou orara’a ?
I te tahi taime, e au ē e’ita e noa’a ia tātou ’ia fa’a’ore i te hapa a te ta’ata tei ha’amāuiui pāpū ia tātou.
Teie te parau ’āpī maita’i : Nā roto i te tauturu a Iesu Mesia, ’aita roa atu tātou i tā’ōti’ahia i te mea tā tatou iho e nehenehe e rave.
Te tauturu e hina’arohia e ana
’Ua ’itehia ia Corrie ten Boom, e keresetiāno ha’apa’o maitai nō te fenua Holane, i te mana anira’a i te Atua ’ia tauturu iāna ’ia fa’a’ore i te hapa a te tahi ta’ata.
’Ua tāpe’ahia ’oia ’e tōna tuahine ’o Betsy i te mau pūhapara’a nā te ’āti Iuda i te piti o te Tama’i Rahi o te ao nei. ’Ua fa’a’oroma’i ’o Corrie ’e te tahi atu mau ta’ata i te mau ’ohipa ’ī’ino rahi mai roto mai i te mau tīa’i fare ’āuri Nazi. ’Ua pohe ho’i tōna tuahine ’o Betsy i muri a’e i taua hāmani-’ino-ra’a ra. ’Ua ora mai ’o Corrie.
I muri a’e i te tama’i, ’ua ’itehia ia Corrie te mana fa’aora o te fa’a’orera’a i te hapa a vetahi ’ē. Pinepine ’oia i te fa’a’ite i tāna parau poro’i i roto i te mau putuputura’a. I te hō’ē rā mahana, ’ua tāmatahia tāna mau parau.
I muri a’e i te hō’ē a’ora’a i mua i te ta’ata, tāpiri mai ra hō’ē o te mau tīa’i fare ’āuri ’ino roa a’e nō te mau pūhapara’a.
’Ua parau ’oia ia Corrie ē, ’ua riro mai ’oia ’ei ta’ata keresetiāno i muri mai i te tama’i, ’e ’ua tātarahapa i te mau ’ohipa ’ī’ino tāna i rave ’ei tia’i fare ’āuri.
’Ua fa’atoro mai ’oia i tōna rima ’e ’ua ani atu : « E fa’aore ānei ’oe i tā’u hapa ? »
Noa atu te mau mea ato’a tāna i ha’api’i mai ’e i fa’a’ite nō ni’a i te fa’a’orera’a i te hapa a vetahi ē, e’ita e nehenehe ia Corrie e fāri’i i te rima o teie ta’ata nō te fa’a’ore i tāna hapa—e’ita e nehenehe ’o ’ōna ana’e iho.
’Ua pāpa’i ’oia i muri iho : « Noa atu ē, ’ua piha’a roa te mau mana’o riri ’e te fa’a’ino i roto iā’u, ’ua ’ite au i te hara i roto i te reira […] Pure atu ra vau, e te Fatu e Iesu, fa’a’ore mai i tā’u hapa ’e tauturu mai iā’u ’ia fa’a’ore i tāna hapa.
« ’Ua tāmata vau i te ’ata’ata, [’e] ’ua fifi roa vau nō te ’āfa’i i tō’u rima i ni’a. ’Aita i ti’a iā’u. ’Aita hō’ē mea, ’aita roa atu hō’ē noa a’e hu’a ahi o te māhanahana ’e ’aore rā, o te aroha. ’E ’ua fa’ahiti fa’ahou vau i te hō’ē pure i roto i to’u ’ā’au. E Iesu, e’ita e ti’a iā’u ’ia fa’a’ore i tāna hapa. ’A hōro’a mai ’oe i tā ’oe fa’a’orera’a hapa.
« ’A tāpe’a ai au i tōna rima, ’ua tupu a’era te hō’ē mea māere rahi. Mai ni’a mai i tō’u tapono haere mai nā ni’a i te rima, mai te mea ra ē, tē he’e ra te uira mai roto atu iā’u haere ti’a atu i roto iāna, ’a tupu ai i roto i tō’u ’ā’au i te hō’ē aroha i teie ta’ata tei fātata roa i te ha’ape’ape’a iā’u.
« ’E nō reira ’ua ’ite a’era vau ē, e ’ere i ni’a i tā tatou fa’a’orera’a hapa, e ’ere ato’a i ni’a i tō tātou maita’i e ’ohu ai te fa’aorara’a o te ao nei, tei ni’a rā i tōna. ’Ia parau ana’e ’oia ia tātou ’ia aroha i tō tātou mau ’enemi, e hōro’a ato’a mai ’oia i te here i roto i te fa’auera’a ».1
Tei reira te Atua nō te tauturu ia ’oe ’ia ha’apa’o i tāna mau fa’auera’a, tae noa atu i te fa’auera’a ’ia fa’a’ore i te hapa—noa atu ē, e ’ere i te mea ’ōhie. E nehenehe tāna e tauturu ia ’outou mai tāna i tauturu ia Corrie ten Boom.
Te fa’aorara’a e ti’a ia ’outou ’ia fāna’o
E mea fifi te orara’a. E mea hue. ’E ua ’ī roa i te mau ta’ata e ti’amāra’a tō rātou tei hōro’ahia mai e te Atua.
I roto i taua mau taime ra, ’ia rave te ta’ata i te tahi mā’itira’a ’o tē fa’atupu i te māuiui rahi i roto ia ’outou—’e ’aore rā, i te mau taime ’ati—e nehenehe tā ’outou e fari’i i te mana fa’aora ’a pure ai ’outou nō te tauturu ’e nō te tūtava i te fa’aore i te hapa.
E hōpo’i mai te fa’aorera’a hapa a vetahi ē i te fa’aorara’a i tō ’outou vārua. Nā roto i te tauturu a te Atua, ’ia fa’aore ’outou i te hapa a te hō’ē ta’ata tei fa’a’ino ia ’outou, e fa’aru’e ïa ’outou i te tahi hōpoi’a ri’ari’a ’o tē tāpe’a nei ia ’outou. Noa atu ē, e mea fifi te ’ē’a e tae atu ai i te fa’aorara’a mau, nā roto i te Atua ra, e’ita roa atu ’outou e haere ’ōtahi noa.
© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Iritira’a nō Monthly For the Strength of Youth Message, June 2021. Tahitian. 17470 895