“Piri’eg Genlngiy ningan N’agfan,” Fan ko Gelngin e Pi’in ni Fal’yangren, June 2021, 10–11.
Moy, Mu Lekag
Piri’eg Genlngiy ningan N’agfan
Somol e ke motochiyel nag ngodad ni ngad n’agedfan e kireb ko girdi’. Ra ayuweg dad ngad fol gad ko fapi motochiyel Rok’, nib mu’un e biney ngay.
James Madsen e ke dag ya’an e biney
Bay boch e motochiyel nib momaw’ rogon ni ngan fol riy nga boch?
Ba’aray reb nib momaw’ ngak e girdi’: “I gag, Somol, e bay gu turguy e en ni nggu n’agfan rok, machane gimed e bt’uf ni ngam n’agfaned e kireb ko gubin e girdi’” (Doctrine nge Covenants 64:10).
Mu son. Bt’uf ni ngad n’agedfan ko gubin e girdi’ ni ke rrin’ e kireb ngodad? Rayag e ran’ey?
Mom ni ngan n’agfan rok be’ nike yog e thin ni kireb ngom fa ke k’ay e bin ntomur e flowa u ta’ang. Machane bu uw rogon e tin ba’aray banan ni rib to’or e kireb riy? Tiney e togan nrayag ni nge kireb nag e yafos rodad fa thilyeg rogon e yafos rodad?
Boch i ngiyal’ mab momaw’ rogon ni ngan n’agfan rok be’ ni ke rrin’ e kireb ngodad ni rib gel.
Ba’aray e thin nib mangil: U dakean e ayuw rok Yesus Kristus, ma rayag ni ngad rrin’ed gubin banan ni fadad.
Fare Ayuw nike T’uf Rok
Ban nib bpin nib mangil ni be’ nu Netherlands ni fithingan Corrie ten Boom ni piri’eg ni bay gelngin nrayag ni nge fith ku Got ni nge ayuweg nge n’agfan rok be’.
I’ir nge walagen nib bpin ni kanog i Betsy ngak e ni kalbus nag row u napan fare mal ko World War II. Bo’or e girdi’ nib mu’un Corrie ngay ni’i gafgow nagrad fapi girdi’en e matanngiy e kablus ko Nazi. Walagen ni kanog i Betsy ngak e yim’ ni bachan e gafgow ni un tay ngak ni rib gel. Corrie e yag ni fos.
Tomuren fare mal, me piri’eg Corrie gelngin nrayag ni nge n’agfan ko girdi’. Baga’ nima thapeg e mulwol rok ko yu yang nib bo’or e girdi’ riy. Reb e rran ngay min sikeng nag ngan guy ko riyul’ e thin nibe yog.
Tomuren ni non ko girdi’ nib bo’or, me mada’ nag Corrie reb fapi girdi’ ni’i matanngiy e kablus ko fare camp.
Me yog ngak Corrie ni ke mang be’ nib mangil ma ke kalngan’ ko pi kireb ni’i rrin’ napan ni’i matanngiy e kablus.
Me k’eyag barba’ i pa’ ngak me ga’ar, “Rayag ni ngam n’agfan rog?”
Demuturug e tin ni manang ni’i mulwon nag mornga’agen e n’agfan ko girdi’, dani yag rok Corrie ni nge fek pa’ fare mo’on ni nge n’agfan rok—de yag ni nge rrin’ e biney, ni yigo ir rok.
Ta’ab boch riy me yoloy, “Demuturug gelngin e alan’, nge tafney ni kireb ni yib ngog, kug guy e pi denen rorad. … Somol ni Yesus, kug meybil, mu n’agfan rog mag ayuwegneg ni nggu n’agfan rok.
“Ku gay rogon ni nggu fal’ag owcheg, [ma] gay rogon ni nggu tining pa’ag ngalang. Ma dani yag rog. Dariy banan ni gu tharmiy, nimus ko t’ufeg fa murunguy ma dariy. Ere gube meybil biyay. Yesus, dabiyag rog ni nggu n’agfan rok. Mpi’ ngog e kalngan’uy.
“Napan ni gu kol pa’ me buch ban’en ni rib mangil. Tabab u pe’yog i yib ngalan barba i pa’ag ma wod ni yib rog ngak ma thamtham, me yib nga gum’ircha’eg ba t’ufeg ngak e ra mo’on ney ni rib gel.
“Ma aram mug piri’eg ni gathi mornga’agen rogon ni nggu n’agew fan romow fa rogon ni be dag e fayleng ni nge gol nigey, machane ke yan u rogon Rok. Nap’an ni yog ngodad ni ngad t’ufeged e pi to’ogor rodad, ke pi’ ngodad, fare motochiyel, ko t’ufeg.”1
Got e bay nra ayuweg nem ngam fol ko fapi motochiyel Rok, nib mu’un e re motochiyel ney ngay ko n’agfan—ndemuturug gelngin fani momaw’ rogon. Rayag ni nge ayuweg nem ni wod rogon nike ayuweg Corrie ten Boom.
Gol Nigem ko Rogon nike T’uf Rom
Momaw’ e yafos. Mab wagagay rogon. Mab sug ko girdi’ nike pi’ Got mot’won rad.
Nap’an e tiney e ngiyal’ nra rrin’ be’ banan ngom nike amith nigem nib gel—fa gathi tafney ku facha’ nike rrin’ e kireb ngom—rayag ni ngam thapeg gelngim nra yib u napan ni garam meybil ma gay rogon ni ngam n’agfan.
N’agfan ko girdi’ e ra fosag e ya’el rom. U dakean fare ayuw rok Got, napan ni gara n’agfan rok be’ nike rrin’ e kireb ngom, ma aram nrayag ni nge mul tomalngin fapi kirban’ ni be un ngom ni be talagnem ni ngam mon’og. Demuturug rogon gelngin fani momaw’, ya u dakean e ayuw rok Got, ma damu rrin’ e biney ni yigo gur rom.
© 2021 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Pilyeg ko Fan ko Gelngin e Pi’in ni Fal’yangren, June 2021. Yapese. 17470 905