“Sau Ntawv Ua Qhov Yog,” Ntxiv Dag Zog rau cov Tub Hluas Ntxhais Hluas, Xya Hli Ntuj 2021, 18–19.
Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Xya Hli Ntuj 2021
Sau Ntawv Ua Qhov Yog
Thaum koj kawm cov vaj lug kub sau tej yam koj xav txog rau hauv ntawv es ua li ntawd yuav pab koj kawm.
“Txhua lub sij hawm kuv pib nyeem cov vaj lug kub, kuv cia li tsaug zog!” ib tug tub txib hais rau nws tus thawj tswj hwm ntawm qhov chaw tshaj tawm txoj moo zoo. “Zoo li cov vaj lug kub yog tshuaj tsaug zog!”
Nws tus thawj tswj hwm teb tias, “Koj puas sau tej lus cim rau hauv ntawv thaum koj nyeem ntawv?”
Tus tub txib hais tias, “Tsis sau.”
“Yeej yooj yim tsaug zog los sis cia koj lub paj hlwb xav txog lwm yam thaum koj nyeem ntawv xwb,” tus thawj tswj hwm hais, “tiam sis ua tsis tau li ntawd thaum koj ke nyeem ke sau ntawv!”
Cov lus qhuab qhia uas tus thawj tswj hwm ntawm qhov chaw tshaj tawm txoj moo zoo qhia rau nws tus tub txib no pab tus tub txib ntawd ntau heev. Ces yog tias koj xav pab koj txoj kev kawm vaj lug kub zoo dua, sim sau tej lus cim rau hauv ntawv. Thaum koj sau ntawv txog tej yam koj nyeem, feem ntau koj yuav pom tias koj rau siab kawm zoo dua, thiab.
Nram qab no yog ob peb yam uas peb pom tias zoo ua.
Tij Laug Steven Lund:
Kuv npaj ntawv sau rau thaum kuv nyeem. Thaum tus Ntsuj Plig tshoov kuv lub siab thaum kuv nyeem vaj lug kub, kuv sau tej kev tshoov siab ntawd tseg rau hauv ntawd.
Kuv tau lub tswv yim no los ntawm Txwj Laug Richard G. Scott (1928–2015) ntawm Pawg Kaum Ob tug Thwj Tim, uas hais tias: “Sau rau hauv ntawv tej yam uas nej kawm los ntawm tus Ntsuj Plig thiab muab cia rau ib qho chaw khov kho. Nej yuav pom tias thaum nej sau tej yam uas tshoov nej lub siab yam tshwj xeeb li, feem ntau yuav muaj ntxiv thiab. Tsis tas li ntawd xwb, tej kev txawj ntse uas nej txais yuav muaj nqi rau nej tag nrho nej lub neej” (“To Acquire Knowledge and the Strength to Use It Wisely,” Ensign, Rau Hli Ntuj 2002, 32).
Kuv paub hais tias tej lus no muaj tseeb tiag. Thaum kuv npaj hais lus thiab qhia, tsis yog kuv kawm tej vaj lug kub xwb tiam sis kuv kuj xyuas tej yam uas kuv tau sau rau hauv ntawv thaum kuv nyeem vaj lug kub.
Tij Laug Ahmad Corbitt:
Kuv nyiam kawm vaj lug kub raws ncauj lus. Kuv yeej los nyeem cov vaj lug kub txij ntawm lub hauv paus mus rau qhov kawg, tiam sis kuv kuj nyiam kawm tej ncauj lus hais txog ib yam uas kuv ntxim kawm. Piv txwv hais tias, kuv yuav siv Topical Guide kom nrhiav tau cov vaj lug kub hais txog kev ntseeg los sis txoj kev sau tsev neeg Ixayees ua ke. Tsis yog kuv sau hauv ntawv ua lus cim xwb, tiam sis kuv sau tej yam kuv kawm kom paub tseeb tias kuv to taub tiag. Kuv xav tsis thoob thaum kuv to taub zoo dua thaum kuv ua li no. Kuv kuj xaiv ib co vaj lug kub kom cim thiab.
Tij Laug Bradley Wilcox:
Kuv ceev ib phau ntawv uas nyob haud kuv mam li sau cov ntawv vaj lug kub siv kuv cov lus. Piv txwv hais tias, “Tus neeg ntawm sab cev nqaij daim tawv yog ib tug yeeb ncuab rau Vajtswv” (Mauxiyas 3:19) hloov ua “Tus neeg muab hlob thiab tsis kam hloov siab lees txim xaiv los mus ua yeeb ncuab rau Vajtswv, tiam sis Vajtswv tsis yog nws tus yeeb ncuab. Vajtswv yog nws tus phooj ywg zoo tshaj plaws.”
Kuv kuj sau tej lo lus nug thiab. Tej zaum cov lus nug no yog cov uas kuv xav txog ua ntej kuv nyeem, los sis yog cov lus nug uas kuv xav txog thaum kuv tseem tab tom nyeem. Txawm li cas los, vim yog li ntawd kuv thiaj tsom ntsoov tau cov vaj lug kub.
Lub Hwj Chim Sau Ntawv txog tej Yam Koj Xav Txog
Txhua tus neeg hauv peb pawg thawj tswj hwm no nyias kawm nyias cov vaj lug kub sib txawv, tiam sis peb txhua tus ke kawm ke sau ntawv!
Txoj kev nyeem pab peb muab peb tej kev xav cog tob tob hauv peb tej siab ntsws. Qhov ntawd yeej tseem ceeb tiag. Thiab thaum peb hais lus los sis sau ntawv, peb nrhiav pom thiab qhia tawm tej kev xav hauv nruab siab los ntawm sab hauv nruab siab tuaj. Peb xav hais tias ua li ntawd pab peb muab tej qhov tseeb ntawm txoj moo zoo piv rau peb lub neej zoo dua.
Muaj ib tug tub hluas uas kawm qhov tseeb no rau nws tus kheej thaum nws tau lub cib fim hais lus hauv txoj kev sib ntsib txais lub cim nco txog. Nws tau mloog neeg coob heev hais lus tiam sis nws nco tsis tau saib lawv hais txog dab tsi tiag. Tam sim no ho txawv lawm. Thaum nws sau ib tug txheej txheem rau nws zaj lus hais, nws hais lus zoo rau cov mej zeej, thiab nws nco qab ntsoov txog tej yam nws hais txog ntev mus.
Koj txoj kev kawm vaj lug kub yeej zoo ib yam li ntawd los tau. Yog tias koj tsaug zog thaum koj qhib koj cov vaj lug kub, txog sij hawm tsim dheev. Sim xuas ib tug cwj mem qhuav, ib tug cwj mem kua, los sis ib lub koos pis tawj thiab sau ntawv. Koj yuav xav tsis thoob saib yuav pab tau koj ntau npaum li cas!
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, July 2021. Hmong. 17471 295