ການ ຂຽນ ແມ່ນສິ່ງທີ່ດີເລີດ

ໂດຍຝ່າຍປະທານອົງການຊາຍໜຸ່ມສາມັນ

ການຂຽນຄວາມຄິດຂອງເຈົ້າລົງໄວ້ຂະນະທີ່ເຈົ້າສຶກສາພຣະຄຳພີສາມາດຊ່ວຍເຈົ້າໃນການຮຽນຮູ້ໄດ້ແທ້ໆ.

“ທຸກເທື່ອທີ່ຂ້ານ້ອຍເລີ່ມອ່ານພຣະຄຳພີ, ຂ້ານ້ອຍກໍເຫງົານອນ!” ຜູ້ສອນສາດສະໜາຜູ້ໜຶ່ງໄດ້ບອກກັບປະທານເຜີຍແຜ່ຂອງລາວ. “ມັນຄ້າຍກັບວ່າພຣະຄຳພີເປັນຢານອນຫລັບ!”

ປະທານຂອງລາວໄດ້ຖາມວ່າ, “ເຈົ້າເຄີຍຈົດບັນທຶກຕອນເຈົ້າອ່ານຫລືບໍ່?”

“ບໍ່,” ຜູ້ສອນສາດສະໜາໄດ້ເວົ້າ.

“ມັນງ່າຍທີ່ຈະເຫງົານອນ ຫລື ໃຈລອຍ ເມື່ອເຈົ້າມີແຕ່ອ່ານຢ່າງດຽວ,” ປະທານໄດ້ເວົ້າ, “ແຕ່ມັນຈະບໍ່ເກີດຂຶ້ນແນ່ນອນເມື່ອເຈົ້າເພີ່ມການຂຽນເຂົ້າໄປພ້ອມ!”

ຄຳແນະນຳທີ່ປະທານເຜີຍແຜ່ຜູ້ນີ້ໄດ້ໃຫ້ກັບຜູ້ສອນສາດສະໜາຂອງເພິ່ນທີ່ກຳລັງມີບັນຫາ ໄດ້ສ້າງຄວາມແຕກຕ່າງທີ່ຍິ່ງໃຫຍ່. ດັ່ງນັ້ນຖ້າເຈົ້າກຳລັງຊອກຫາວິທີແບບໃໝ່ເພື່ອຊ່ວຍເສີມສ້າງການສຶກສາພຣະຄຳພີຂອງເຈົ້າ, ໃຫ້ລອງໃຊ້ວິທີນີ້ເບິ່ງ. ຂະນະທີ່ເຈົ້າຂຽນກ່ຽວກັບສິ່ງທີ່ເຈົ້າກຳລັງອ່ານຢູ່, ເຈົ້າຈະພົບວ່າຕົວເອງມີສ່ວນຮ່ວມຫລາຍຂຶ້ນ ແລະ ຮຽນຮູ້ດີຂຶ້ນ, ເຊັ່ນກັນ.

ຕໍ່ໄປນີ້ແມ່ນວິທີທີ່ພວກເຮົາຄົ້ນພົບວ່າໃຊ້ໄດ້ຜົນຫລາຍ.

ບຣາເດີ ສະຕີບເວັນ ລັນ:

ຂ້າພະເຈົ້າມີເຈ້ຍໄວ້ໃກ້ໆມືເວລາທີ່ຂ້າພະເຈົ້າອ່ານ. ເມື່ອຂ້າພະເຈົ້າໄດ້ຮັບການກະຕຸ້ນຈາກພຣະວິນຍານໃນເວລາສຶກສາຂອງຂ້າພະເຈົ້າ, ຂ້າພະເຈົ້າຈະຂຽນການກະຕຸ້ນເຫລົ່ານັ້ນລົງໄວ້.

ຂ້າພະເຈົ້າໄດ້ຄວາມຄິດນີ້ຈາກແອວເດີ ຣິເຈີດ ຈີ ສະກາດ (1928–2015) ແຫ່ງກຸ່ມອັກຄະສາວົກສິບສອງ, ເພິ່ນໄດ້ເວົ້າວ່າ: “ໃຫ້ຂຽນສິ່ງຕ່າງໆທີ່ສຳຄັນທີ່ທ່ານຮຽນຮູ້ຈາກພຣະວິນຍານລົງໄວ້. ທ່ານຈະຄົ້ນພົບວ່າຂະນະທີ່ທ່ານຂຽນຄວາມປະທັບໃຈທີ່ມີຄ່າລົງໄວ້, ມັນມັກຈະມີຫລາຍຂຶ້ນ. ພ້ອມກັນນັ້ນ, ຄວາມຮູ້ທີ່ທ່ານໄດ້ຮັບ ຈະມີຢູ່ຕະຫລອດຊີວິດຂອງທ່ານ” (“To Acquire Knowledge and the Strength to Use It Wisely,” Ensign, June 2002, 32).

ຂ້າພະເຈົ້າຮູ້ວ່າ ຖ້ອຍຄຳເຫລົ່ານັ້ນເປັນຄວາມຈິງ. ຂະນະທີ່ຂ້າພະເຈົ້າໄດ້ກຽມບົດປາໄສ ແລະ ບົດຮຽນ, ຂ້າພະເຈົ້າບໍ່ພຽງແຕ່ເປີດໄປຫາຂໍ້ພຣະຄຳພີເທົ່ານັ້ນ ແຕ່ເບິ່ງສິ່ງທີ່ຂ້າພະເຈົ້າໄດ້ຂຽນລົງໄວ້ໃນຂະນະທີ່ອ່ານນຳອີກ.

ບຣາເດີ ອາມັດ ຄໍບິດ:

ຂ້າພະເຈົ້າມັກສຶກສາຕາມຫົວຂໍ້. ຂ້າພະເຈົ້າອ່ານພຣະຄຳພີແຕ່ຕົ້ນຈົນຈົບ, ແຕ່ວ່າຂ້າພະເຈົ້າກໍມັກຊອກຫາ ແລະ ສຶກສາຕາມຫົວຂໍ້ຕ່າງໆເຊັ່ນກັນ. ຍົກຕົວຢ່າງ, ຂ້າພະເຈົ້າຈະໃຊ້ຄູ່ມືພຣະຄຳພີເພື່ອຊອກຫາຂໍ້ພຣະຄຳພີກ່ຽວກັບສັດທາ ຫລື ການເຕົ້າໂຮມອິດສະຣາເອນ. ຈາກນັ້ນຂ້າພະເຈົ້າບໍ່ພຽງແຕ່ຈົດບັນທຶກເທົ່ານັ້ນ, ແຕ່ວ່າຂ້າພະເຈົ້າຈະຂຽນສິ່ງທີ່ຂ້າພະເຈົ້າກຳລັງຮຽນຮູ້ລົງໄວ້ເພື່ອໃຫ້ໝັ້ນໃຈວ່າຂ້າພະເຈົ້າເຂົ້າໃຈມັນແທ້ໆ. ຂ້າພະເຈົ້າປະຫລາດໃຈສະເໝີທີ່ຂ້າພະເຈົ້າເຂົ້າໃຈສິ່ງຕ່າງໆໄດ້ດີຂຶ້ນ ເມື່ອຂ້າພະເຈົ້າເຮັດແບບນີ້. ເຊັ່ນດຽວກັນ ຂ້າພະເຈົ້າກໍເລືອກຂໍ້ພຣະຄຳພີບາງຂໍ້ເພື່ອທ່ອງຈຳ.

ບຣາເດີ ແບຣດລີ ວິວຄ໊ອກສ໌:

ຂ້າພະເຈົ້າບັນທຶກການສຶກສາໄວ້ໃນປຶ້ມ ໂດຍການຂຽນຂໍ້ພຣະຄຳພີໃນຄຳເວົ້າຂອງຕົວເອງ. ຍົກຕົວຢ່າງ, “ເພາະມະນຸດທີ່ມີຈິດໃຈທຳມະດາເປັນສັດຕູກັບພຣະເຈົ້າ” (ໂມໄຊຢາ 3:19) ມາເປັນ “ເພາະມະນຸດທີ່ທະນົງຕົວ ແລະ ບໍ່ກັບໃຈເລືອກທີ່ຈະເປັນສັດຕູກັບພຣະເຈົ້າ, ແຕ່ວ່າພຣະເຈົ້າບໍ່ໄດ້ເປັນສັດຕູກັບມະນຸດ. ພຣະເຈົ້າເປັນເພື່ອນທີ່ດີທີ່ສຸດຂອງມະນຸດ.”

ຂ້າພະເຈົ້າກໍຂຽນຄຳຖາມເຊັ່ນກັນ. ອາດຈະເປັນຄຳຖາມທີ່ຂ້າພະເຈົ້າຄິດໄວ້ກ່ອນອ່ານ, ຫລື ອາດຈະເປັນຄຳຖາມທີ່ເກີດຈາກສິ່ງທີ່ຂ້າພະເຈົ້າອ່ານຢູ່. ທັງສອງຢ່າງ, ມັນຊ່ວຍຂ້າພະເຈົ້າໃຫ້ມີຄວາມຕັ້ງໃຈ.

ພະລັງຂອງການຂຽນຄວາມຄິດຂອງຕົນເອງ

ພວກເຮົາແຕ່ລະຄົນໃນຝ່າຍປະທານ ສຶກສາພຣະຄຳພີດ້ວຍວິທີທີ່ແຕກຕ່າງກັນໄປ, ແຕ່ວ່າພວກເຮົາທຸກຄົນໄດ້ຂຽນຂະນະທີ່ພວກເຮົາສຶກສາຢູ່!

ການອ່ານຊ່ວຍໃຫ້ເຮົາລວມເນື້ອຄວາມເຂົ້າໃນຄວາມຄິດ ແລະ ຄວາມຮູ້ສຶກ. ສິ່ງນັ້ນສຳຄັນຫລາຍ. ແລະ ເມື່ອເຮົາເວົ້າ ຫລື ຂຽນ, ເຮົາຄົ້ນພົບ ແລະ ສະແດງຄວາມຄິດ ແລະ ຄວາມຮູ້ສຶກນັ້ນຈາກພາຍໃນສູ່ພາຍນອກ. ເຮົາຮູ້ສຶກວ່າ ມັນຊ່ວຍເຮົາເຮັດໃຫ້ພຣະກິດຕິຄຸນເປັນຂອງຕົວເອງໄດ້ດີຂຶ້ນ.

ຊາຍໜຸ່ມຄົນໜຶ່ງໄດ້ຄົ້ນພົບຄວາມຈິງນີ້ດ້ວຍຕົວລາວເອງ ເມື່ອລາວໄດ້ຖືກມອບໝາຍໃຫ້ກ່າວປາໄສໃນກອງປະຊຸມສິນລະລຶກ. ລາວເຄີຍໄດ້ຍິນຫລາຍໆຄົນກ່າວປາໄສ ແຕ່ວ່າບໍ່ສາມາດຈື່ຈຳລາຍລະອຽດ. ເທື່ອນີ້ ແມ່ນແຕກຕ່າງ. ເມື່ອລາວໄດ້ຂຽນໂຄງຮ່າງສຳລັບບົດປາໄສຂອງລາວເອງ, ມັນບໍ່ພຽງແຕ່ຊ່ວຍໃຫ້ບົດປາໄສຂອງລາວເປັນລະບຽບເທົ່ານັ້ນ, ແຕ່ວ່າລາວຍັງຈື່ຈຳມັນໄປເປັນເວລາດົນນານນຳອີກ.

ການສຶກສາພຣະຄຳພີຂອງເຈົ້າກໍສາມາດເປັນເຊັ່ນນັ້ນໄດ້. ຖ້າວ່າເຈົ້າເຫງົານອນເວລາທີ່ເຈົ້າເປີດພຣະຄຳພີ, ເຖິງເວລາແລ້ວທີ່ເຈົ້າຕ້ອງຕື່ນ. ລອງຈົກເອົາສໍດຳ, ບິກ, ໂທລະສັບ, ຫລື ຄອມພິວເຕີອອກມາ ແລະ ເລີ່ມຕົ້ນຂຽນ. ມັນຈະສ້າງຄວາມແຕກຕ່າງທີ່ເຈົ້າຈະປະຫລາດໃຈ!

© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, July 2021. Laotian. 17471 331